Máfìù 23 - Wè-dɔ-wè Dɛɛ

Zízɛ̀ e lìè‐wè gèe é gbɛ̃̀á Wálà kii‐dɔ‐mìà wà Fálásíì‐mìàa o mɔ̀

¹ Lɛ̀ e kɛ kília, Zízɛ̀ e wɔ̃́ dò gèe mia kù ɛ̃́ɛ̃́ là tòà‐píé‐mìà lɛ̀ɛ weeá kélɛ̀,

² “Wálà kii‐dɔ‐mìà wà Fálásíì‐mìàa waà yà gbaa Móózè yàlà mɔ̀.

³ À mɔ́ɔ̀ wɔ̃̀ mɔ̀ɔ, lɛ ka mɔ̀ ká o wéè kɛ, ɛ̃́ɛ̃́ lɛ ka mɔ̀ ká tó wɔ̃́ kɛ‐zì séĩ́ lɛ́ ò zɔ̃̀ɔ̃̀ ka lɛ̀ɛ píé. Kɛɛ yékɛ̀ ká o kɛ‐wɔ̃̀ kɛ, ɓii òó wɔ̃́ lɛ́ ò gèea kɛ.

⁴ Óò vũ gbííni lɛ́ à diè lɛ mi làa lùù, tó wáà yà mia wĩĩ́. Tó òó o kɔ̀‐wɛ́nɛ́ doó dà mia píé gbũ̀‐o‐mɔ̀ ká.

⁵ Óò pɛ séĩ́ kɛ̀ mia wà o gɛ̃̀ɛ̃ɛ̃̀ wɛ̃́ĩ̀. Pɛ lɛ́ Wálà kiia lɛ à yí, lɛ́ ò à yà o pelà, wáà dò dũ̀ o póó mɔ̀ɔ, óò à kɛ̀ gbùò gbùò. Ɛ́ɛ̃́ o zì sɔ́ɔ à vìà‐víá lɛ́ lɛ à mɔ̀ɔ, óò o kɛ̀ gbèĩ gbèĩ.

⁶ Óò nàà lɛ̀ kpànazɛ̀ ká ó yà yi yé waà ló kpílì làa ká. Ɛ́ɛ̃́ óò nàà yà‐pìè kpànazɛ̀ ká o zì Wálà‐kà wì.

⁷ Ɛ́ɛ̃́ zeĩ́, óò nàà mia ó wéé o píé ɓɛ̀lɛyà ká lɔ́ɔ́ kpánà píé. Ɛ́ɛ̃́ óò nàà mia ó o sí Tísɛ̀.

⁸ Kɛɛ yékɛ̀ ó ka sí Tísɛ̀. Ƃii ka séĩ́ ka lèe‐gé vɔ̀ ká. Ɛ́ɛ̃́ kà Pɛ‐zɔ̃̀ɔ̃̀‐mì lɛ nɔ́ doó.

⁹ Ɛ́ɛ̃́ yékɛ̀ ká mi nɔ́ɔ fé lɛ́ e kpóṹ là zèea sí ka dàa, ɓii ka Dàa lɛ nɔ́ doó lɛ́ e lɛ̀ía.

¹⁰ Ɛ́ɛ̃́ yékɛ̀ bɛ̃̀ɛ̃ ó ka sí mia dàa‐mì, ɓii mi doó lɛ́ nɔ́ e ka Dàa‐mì káa. Ye lɛ́ e Kɛ́lɛ̀ì káa.

¹¹ Mi yé lɛ kpànazɛ̀ ka bàa, lɛ à mɔ̀ é kɛ kà yɛɓo‐kɛ‐mì ká.

¹² Mi lɛ́ è e dìè si lɛ̀ía, óò lo nuù à ká tã́ã̀. Ɛ́ɛ̃́ mí è lo e dìè ká tã́ã̀a, óò lo à síì lɛ̀í.

Zízɛ̀ e mɛ̀ĩ́‐sà káá o wĩĩ́ o dìè wɛlɛ liì mɔ́ɔ̀ wɔ̃̀ mɔ̀

¹³ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà, ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà zi lɛ́ è lo lɛ̀ lɛ́ Wálà lɛ́ e lɛ̀ía, tóò lɛ mia là yia mɔ̀ɔ, tàà mia gɛ̀nɛ̀. Kɛɛ ka dìè‐tĩ́ kàá naa ká ló yi, ɛ̃́ɛ̃́ mia lɛ́ ò nàà ó ló yia, kàá wéé à mɔ̀ ó ló yi. [

¹⁴ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà lee lɛ́ lɛ gã̀ã káa, là pɛ ɓèlè à kɛ̀lɛ̀ gbã́ã̀ ká. Yé kaà à kɛ kília, káà ka dìè wɛlɛ li sɛ̀nɛ‐ɓò gbèĩ ká. À mɔ́ɔ̀ wɔ̃̀ mɔ̀ɔ, mɛ̀ĩ́‐sà lɛ́ è lo káà ka wĩĩ́a, lɛ́ɛ̀ lo kɛɛ̀ yɔɔ kpó‐kpó ɓo.]

¹⁵ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà mɛ̀ĩ́ kã, tó káà sɛ́lɛ́ pɛ̀ɛ̀ e zèí, kɛ ká mi kɛ é kɛ tò‐ka‐píé mì ká. Yé kaà gɛ̃̀ɛ, káà mí e kília kɛ̀, tó lò tíé‐pà áà mɛ́ kũ̀, é dieá bɛ̃̀ɛ̃ ka zìa là pɔ̃ũ le.

¹⁶ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká mia nyìɛ káàa zɛ̀ lɛ́ kà líé si mia káa ká ké. Káà gèe kélɛ̀, ‘Yé mi dò aà e náá kpɔ́ sálà‐ɓò‐Wálà‐lɛ̀ɛ‐kàa mɔ̀ɔ, ye wá wɔ̃́ dò ká. Kɛɛ yé mi aà e náá kpɔ́ góò lɛ́ e Wálà‐kà e kília mɔ̀ɔ, lɛ à mɔ̀ é wɔ̃́ lɛ́ a mɔ́ɔ̀ e náá kpɔ́ ɓoa kɛ.’

¹⁷ Bè‐mìà nyìɛ káàa zɛ̀ ka ké ɓɛ. Góòa, wà sálà‐ɓò‐Wálà‐lɛ̀ɛ‐kà lɛ́ è à kɛ̀, lɛ́ góòa è kɛ̀ Wálà là pɛ káa, dé e kpànazɛ̀?

¹⁸ Zéniía, káà gèe kélɛ̀, ‘Yé mi dò aà e náá kpɔ́ sálà‐ɓòà‐là‐pɛ̀ mɔ̀ɔ, ye wá wɔ̃́ dò ká. Kɛɛ yé mi aà e náá kpɔ́ pɛ ké yee ò sálà ɓoáa mɔ̀ɔ, lɛ à mɔ̀ é wɔ̃́ lɛ́ a mɔ́ɔ̀ e náá kpɔ́ ɓoa kɛ.’

¹⁹ Mia nyìɛ káàa zɛ̀ ka ké ɓɛ. Sálà‐ɓo‐pɛ̀ɛ wà sálà‐ɓòà‐là‐pɛ̀ lɛ́ è à kɛ̀, lɛ́ sálà‐ɓo‐pɛ̀ɛ è kɛ̀ Wálà là pɛ káa, dé e kpànazɛ̀?

²⁰ À mɔ́ɔ̀ wɔ̃̀ mɔ̀ɔ, yé mi aà e náá kpɔ́ sálà‐ɓòà‐là‐pɛ̀ɛ mɔ̀ɔ, kɛɛ aà e náá kpɔ́ à mɔ̀, ɛ̃́ɛ̃́ pɛ séĩ́ lɛ́ lɛ à làa mɔ̀ nɔ́ kíli.

²¹ Ɛ́ɛ̃́ yé mi aà e náá kpɔ́ sálà‐ɓò‐Wálà‐lɛ̀ɛ‐kà mɔ̀ɔ, kɛɛ aà e náá kpɔ́ à mɔ̀, ɛ̃́ɛ̃́ Wálà lɛ́ ká e kília lɛ à yà‐pìè káa mɔ̀ nɔ́ kíli.

²² Ɛ́ɛ̃́ yé mi aà e náá kpɔ́ lɛ̀í mɔ̀ɔ, kɛɛ aà e náá kpɔ́ Wálà là dɔ‐táŋáná mɔ̀, wà mi lɛ́ lɛ yàá à làa mɔ̀ nɔ́ kíli.

²³ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà kà ɓòo‐yíí‐ɓɔ pɔ̀ɔ̀, lɛ́ e kélɛ̀ ɓèlè‐wèĩ̀ ɛ̃́ɛ̃́ màà‐yè‐ŋèlè, e bɛ̀i, péní‐gùòa káà o vũ̀‐lé‐ɓɔ nɔ. Kɛɛ ka zò lɛ́ɛ̀ kpàà wɔ̃́ lɛ́ lɛ kpànazɛ̀ kpó‐kpó ɓo lɔ́ɔ̀ɔ yía mɔ́ɔ̀ wɔ̃̀ là. Ye lɛ́ e kélɛ̀, wɔ̃́ kpeĩ kɛɛ̀, wà mi yéĩ̀ kṹũ̀, ɛ̃́ɛ̃́ mi kɛ̀ zò‐dɔ̀à‐mɔ̀‐mì káa. Kɛɛ lɛ ka mɔ̀ ká wɔ̃́ nì e kéa kɛ, kɛɛ à kɛɛ̀ yía, yékɛ̀ ka zò é kpaa à yé e tóa kɛ‐wɔ̃̀ là.

²⁴ Mia líé‐sí‐mìà nyìɛ káàa zɛ̀ ka ké ɓɛ. Káà sèsè ɓo kà mi‐yìì bà, tó káà kĩ́ã́mò yee mánì.

²⁵ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà kɔ́pò wà páni o gbĩ mɛ́ pɛ̀lɛ̀. Kɛɛ o yí zàá paà lɛ pɔɔ̀ lɛ́ kaà à kṹ gana káá, wà ka dìè zò‐dà‐wɔ̃̀ kɛɛ̀ ká.

²⁶ Fálásíì mi nyìɛ káàa zɛ̀ i ké ɓɛ. Ì pɛ lɛ́ e kɔ́pòa yía pɛ́lɛ́ nɛ́. Yé aà kɛ kília, à gbĩ mɛ́ lɛ́ɛ̀ lo ɓɔɔ̀.

²⁷ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Ka kélɛ̀ ɓɔ́à lɛ́ o ɓɛlɛ púlú táá mɔ̀ɔ lɛ́ ɓe. O gbĩ mɔ̀ lɛ sɛ̀, kɛɛ o yí zàá paà lɛ mia gaàa wɛ́lɛ́ wà pɛ vúàa nì ká.

²⁸ Zi nɔ́ doóa káa, ka mia séĩ́ lɛ̀ɛ kpeĩ, yé waà ka gɛ̃̀ɛ ká. Kɛɛ ka yí zàá paà lɛ ka dìè wɛlɛ li wɔ̃̀, e bɛ̀i, wɔ̃́ yɔɔ kɛ‐wɔ̃̀ ká.

Zízɛ̀ a gèe kélɛ̀ wɔ̃́ yéĩ̀zɛ̀ lɛ́ɛ̀ lo kɛɛ̀ o ká

²⁹ “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà kii‐dɔ‐mìà ɛ̃́ɛ̃́ Fálásíì‐mìà ka ká ké. Ka ka dìè wɛlɛ‐li‐mìà ká. Káà dɔ̀‐Wálà‐lé‐là‐mìà ɓɔ́à pɛ̀ kɛ̀ e yiè ká, ɛ̃́ɛ̃́ káà pɛ lɛ́ è mia zò vùò mia lɛ́ o kɛ‐wɔ̃̀ e kɛ kpeĩa mɔ́ɔ̀ wɔ̃̀ káa, mɛ́ si e yiè ká.

³⁰ Ɛ́ɛ̃́ káà gèe kélɛ̀, ‘È kɛ̀á ko kɛ zèe bèĩzɛ̀ ko dàa ye dàà nì kɛ̀‐à‐yí lùò káa, kòó gɔ̃̀ wɔ̃́ lɛ́ wa kɛ dɔ̀‐Wálà‐lé‐là‐mìà zɛɛ̀ káa kɛɛ̀.’

³¹ Wánà kpó‐kpó káa, káà à zɔ̃̀ɔ̃̀ kélɛ̀ ka mia lɛ́ o dɔ̀‐Wálà‐lé‐là‐mìà zɛɛ, sùu‐là‐mìà ká.

³² À mɔ́ɔ̀ wɔ̃̀ mɔ̀ɔ, kà lo líé, ká yɛɓo lɛ́ ka dàa ye dàà nì o kɛ à kɛpìàa líé nyɛ.

³³ Mɛ̀nɛ vɔ̀, ɛ̃́ɛ̃́ mɛ̀nɛ là nɔ́ɔ̀ ka ké ɓɛ. Zi sùu kpɛɛ̀ lɛ́ kà bɛ̀i wàà à ká mɛ̀ĩ́‐sà kàà‐ka‐wĩĩ́, ká ló tíé‐pà mɔ̀ là?

³⁴ À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ kéèé, ḿm̀ lo dɔ̀‐Wálà‐lé‐là‐mìà, wà mia gíkã́ã̀a zɛ̀, ɛ̃́ɛ̃́ Wálà kii‐dɔ‐mìà o vɔɔ̀ ka píé. Káà lo vɔ‐mìà o kília dò zɛɛ̀, ɛ̃́ɛ̃́ káà lo o dò bɛ̃̀ɛ̃ páà nélè ká kɔ́lɔ́sì mɔ̀. E bɛ̀i, káà lo o dò mɛ̀ɛ̀ gbàtò ká ka zì Wálà‐kà wì píé, tó káà o yí lùò pɛ́lɛ nì yí píé.

³⁵ Wɔ̃́ e kília mɔ́ɔ̀ wɔ̃̀ mɔ̀ɔ, mia kpeĩ séĩ́ lɛ́ waà o zɛ kpóṹ là zèea, o léà wɔ̃̀ lɛ́ɛ̀ lo kɛɛ̀ ka wĩĩ́, é kã́ Ébɛ̀ sɔ̃̀ɔ̃ kpeĩ zɛ̀ɛ zɛ́ wa ɓoa mɔ̀, é ló é ɓɔá Bálàkáyà gbe Zɛkèláyà, lɛ́ ka zɛ sálà‐ɓò‐Wálà‐lɛ̀ɛ‐kà wà sálà‐ɓòà‐là pɛ̀ɛ o fĩ̀ã̀a mɔ̀ɔ ká.

³⁶ Wánà‐wɔ̃̀ lɛ́ m̀ gèe ka lɛ̀ɛ ɓɛ. Wɔ̃́ nì e kéa séĩ́ lɛ́ɛ̀ lo kɛɛ̀ míá o ɓe yà kɔa ɓoa yía o wĩĩ́.

Zùlúsàlɛ̀ lɔ̀ lɛ́ à kpɔ́ɔ̀ lɛ Zízɛ̀ mɔ̀ɔ

³⁷ “Zùlúsàlɛ̀, Zùlúsàlɛ̀, káà dɔ̀‐Wálà‐lé‐là‐mìà zɛ. Káà mia lɛ́ Wálà e o vɔ ka píéa, pa gɛ̀lɛ̀ ká. Lúó wɛ̀ɛɛ̀ píé lɛ́ ma naa ḿ m kɔ̀ sɔ̃́ kà mia nì bĩ̀ĩ̀, lɛ̀ zí tɔ̀ɔ̀ è là nɔ́ɔ̀ gbũ dɔá e gbã wìa ká ké. Kɛɛ kàá gbaa à tó kɛ ḿ kɛ kíli.

³⁸ Lɛ̀ gɛ̃̀, ka píé kɛ́ì lɛ́ɛ̀ lo tóò ɓɔ̀ɔ.

³⁹ Ƃii ḿm̀ gèe ka lɛ̀ɛ, kàá ló m gɛ̃̀ɛ̃̀ gbaa gbɛɛ ɓo, é tóá kíli lúó lɛ́ kà lo wɔ̃́ e kéa gèeèa é ɓɔ. Ye lɛ́ e kélɛ̀, ‘Lúà é kpɔ́ mi lɛ́ è nu ko Dàa‐mì tɔ́ yía mɔ̀.’ ”