Máfìù 20 - Wè-dɔ-wè Dɛɛ

Mia lɛ́ o yɛɓo kɛ nyɛ́nɛ̀ĩ̀a

¹ “Wálà lɛ́ e lɛ̀ía zì tò‐mia‐là lɛ kélɛ̀ ɓɛ̀lɛ̀‐wɛ́lɛ́ lɛ́ ò ɓɛɛ yíí mia nyɛ́nɛ̀ĩ̀ dàa‐mì lɛ́ ɓe. E sòló e ló mia naà kɛ ó yɛɓo kɛ à lɛ̀ɛ e píé nyɛ́nɛ̀ĩ̀.

² E wéé à mɔ̀ kɛ é o fɔ́nɔ́ nɔ lɛ̀ zí o nɔ kpáá à ká lúó doó wɛ̃́ĩ̀a lɛ́ ɓe. O kɛ pɛlèe púlú gbá doó nɔpìà o lɛ̀ɛ lúó doó mɔ̀. E o vɔ ó ló yɛɓo kɛɛ̀ là nyɛ́nɛ̀ĩ̀a mɔ̀.

³ E ló zeĩ́ nyɛ́nɛ́‐nɛ̀ɛ̀ mɛ́‐kpálàa zɛ̀ ká lɔ́ɔ́ kpánàa mɔ̀. E ló, e gɔ̃à lɛ́ òó gbaa kɛ wɔ̃́ dò fé kɛpìàa gɛ̃̀ɛ̃̀ dɔ̀á yi.

⁴ Lɛ̀ e kɛ kília, a gèe o lɛ̀ɛ, ‘Ka bɛ̃̀ɛ̃, kà lo ká yɛɓo kɛ m píé nyɛ́nɛ̀ĩ̀. Yé kaà kɛ kília, ḿm̀ lo ka fɔ́nɔ́ nɔɔ̀ ka fɔ́nɔ́‐nɔ zì ká.’ Lɛ̀ e kɛ kília, o ló.

⁵ Lɛ̀ zeĩ́ nyɛ́nɛ́ e dɔ mia tùluùa, ɛ̃́ɛ̃́ nyɛ́nɛ́‐tɛ̃́‐nyɛ̀nɛ̀ káa, e ló zeĩ́, e wɔ̃́ nɔ́ doóa kɛ.

⁶ Lɛ̀ zeĩ́ e ɓɔ nyɛ́nɛ́ dɔ̀‐lɛ́ɛ́‐là lùò mɔ̀ɔ, e ló zeĩ́ lɔ́ɔ́ kpánà, e gɔ̃à dò gɛ̃̀ zeĩ́ tĩã́ dɔ̀á yi. A gèe o lɛ̀ɛ, ‘Mɛ́ e kɛ lɛ́ kaà túó pɛ́nɛɛ dɔ̀á lɛ̀ɛ mɔ̀, lɛ́ ka wá yɛɓo lé ɓɛ?’

⁷ Wa gèe à lɛ̀ɛ kélɛ̀, ‘Ko dɔɔ̀ lɛ lɛ̀ɛ mɔ̀, ɓii mi gbɛɛ lɛ̀ɛ́ ko yɛ nɛ́ɛ mɔ́ɔ̀ wɔ̃̀ mɔ̀.’ Gɔ̃́ɛɛ a gèe o lɛ̀ɛ, ‘Ka bɛ̃̀ɛ̃, kà lo ká yɛɓo kɛ m píé nyɛ́nɛ̀ĩ̀.’

⁸ “Lɛ̀ nyɛ́ŋɛ̀ĩpíé e kɛɛ, nyɛ́nɛ̀ĩ̀a dàa‐mì e à gèe mi lɛ́ e nyɛ́nɛ̀ĩ̀a kpɔ́ à kɔ̀ làa lɛ̀ɛ, ‘Ì yɛɓo‐kɛ‐mìàa súo kɛ, í o fɔ́nɔ́ nɔ. Ì gbɛ̃̀ mia lɛ́ o nu zízàáa là, ɓá léĩ́ tó mia lɛ́ o nu líéa là.’

⁹ Mia lɛ́ o gbɛ̃̀ yɛɓo kɛɛ̀ ká nyɛ́nɛ́ dɔ̀‐lɛ́ɛ́‐là lùò káa, o pɛlèe púlú gbá nɔ o lɛ̀ɛ doó doó.

¹⁰ Lɛ̀ e ɓɔ mia lɛ́ o ló bèĩzɛ̀ɛ o fɔ́nɔ́ nɔ‐lùò mɔ̀ɔ, wa gɛ̃̀ ɓɔ̀ɔ kélɛ̀ o fɔ́nɔ́ lɛ́ɛ̀ lo diè mia zízàá zɛ̀ɛ là. Kɛɛ o o bɛ̃̀ɛ̃ o gba nɔ́ pɛlèe púlú gbá doó doó ká nɔ́ kíli.

¹¹ O pɛlèea kṹ, wáà wéé dɔ̀ o dàa‐mì ká.

¹² Wa gèe kélɛ̀, ‘Gɔ̃à lɛ́ o nu zízàá zɛ̀ɛ, o yɛɓo kɛ nɔ́ áwà doó mɔ̀. Ƃaa à kɛ kò ye nì kɔaà bɛ̀i. Kɛɛ ko yee, kɔaà tó nɔ́ pɛ́nɛɛ dɔ̀á nyɛ́nɛ́ gáàa wì sóló tótó, kɔ́áà yɛɓoa kɛ̀.’

¹³ Gɔ̃́ɔ a gèe o doó‐mì lɛ̀ɛ, ‘M ɓɛ́ɛ, ma wá i fùlupìà. Ḿ gɔ̃̀, i wéé à mɔ̀ í yɛɓo kɛ pɛlèe púlú gbú doó wɛ̃́ĩ̀?

¹⁴ Ì pɛ lɛ́ lɛ ɓà pɛ káa sí, í ɓà ló ɓo. Ḿm̀ nàà ḿ gɔ̃ lɛ́ eató zízàáa fɔ́nɔ́ nɔ zi nɔ́ doó m i fɔ́nɔ́ nɔ à káa ká.

¹⁵ Ḿ gɔ̃̀, lɛ m mɔ̀ ḿ wɔ̃́ kɛ m̀ pɛ ká lɛ̀ zí m̀ nàà ḿ kɛáa lɛ́ ɓe? Ɛ́ɛ̃́ wɔ̃́ lɛ́ɛ̀ i wàa m zò kɛ̀ sɛ̀ wɛ̃́ĩ̀?’

¹⁶ “À mɔ́ɔ̀ wɔ̃̀ mɔ̀ɔ, mia lɛ́ o zízàáa, óò lo kɛɛ̀ líé, tó líé‐mìà bɛ̃̀ɛ̃ wáà kɛ̀ zízàá‐mìà ká.”

Zízɛ̀ e e ga‐wɔ̃̀ gèe zeĩ́

¹⁷ Lɛ̀ Zízɛ̀ e kɛ lópìà Zùlúsàlɛ̀ɛ, e là tòà‐píé‐mìà vũ̀ doó wɛ́lɛ́ pèèlɛɛ súo kɛ o doó lɛ̀ píá, áà lò mɛ́ĩ́ ɓòá sí o lɛ̀ɛ lɛ̀ lɛ́ o kɛ lópìàa ká. A gèe kélɛ̀,

¹⁸ “Ɛ̀ɛ̀, kɔa lópìà gbaa Zùlúsàlɛ̀. Óò lo Mi Gbe nɔɔ̀ sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà lɛ̀ɛ. Óò lo mɛ̀ĩ́‐sà káà à wĩĩ́, tó wáà gèè ó à zɛ.

¹⁹ Tó o à nɔ gbaa sɛ́lɛ́ gbɛɛ yí‐mìà lɛ̀ɛ. O lɛ́ ò lo yéí síì à mɔ̀, e bɛ̀i, óò lo à mɛ̀ɛ̀ gbàtò ká, tó o à pá nélè ká kɔ́lɔ́sì mɔ̀ɔ. Yé aà kɛ kília, lɛ́ɛ̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”

Pɛ lɛ́ lééa a pɛ̃́ɛ

²⁰ Lɛ̀ e kɛ kília, lee lɛ́ e kɛ Zɛ́bɛ́dìì gbe nì lèe káa, e nu Zízɛ̀ píé là nɔ́ɔ̀ ká. E e wũ gbɛ̃̀, áà pɛ dò pɛ̃̀ à mɔ̀.

²¹ Zízɛ̀ a gèe à lɛ̀ɛ, “Mɛ́ ɓà nàà à ká?” A gèe Zízɛ̀ lɛ̀ɛ kélɛ̀, “Ì à gèe kélɛ̀ m̀ nɔ́ɔ̀ pèèlɛ o kéa, óò lo yàà i kɔ̀ yiè wà i kɔ̀ gbiè yí, yé ɓaà tó mia làa ká.”

²² Kɛɛ Zízɛ̀ a là nìɛ̀ kélɛ̀, “Pɛ kpó‐kpó lɛ́ kà pɛ̃ɛ, kàá dɔ bɛ̃̀ɛ̃. Káà bɛ̀i à mɔ̀ ká yíí mi kɔ̀ɛ̀ lɛ́ m nupìà yíí miì à yía yí?” Wa gèe à lɛ̀ɛ, “Kóò bɛ̀i à mɔ̀ kó à kɛ kíli.”

²³ Zízɛ̀ a gèe o lɛ̀ɛ, “Káà lo yíí miì m̀ kɔ̀ɛ̀a yí wánà kpó‐kpó ká. Kɛɛ yíkɛ̀ gáàa gbɛɛ wá m kɛ̀lɛ̀, kɛɛ ḿ mi lɛ́ è lo yàà m kɔ̀ yiè, ɛ̃́ɛ̃́ m kɔ̀ gbiè yía zɔ̃̀ɔ̃̀, ɓii m Dàa lɛ́ è lo lɛ̀ e kília nɔɔ̀ mia lɛ́ aà à pɛ̀ kɛ o wɛ̃́ĩ̀a, o lɛ̀ɛ.”

²⁴ Lɛ̀ tòà‐píé‐mìà vũ̀ doó o tóa wa maa, wɔ̃́ e o wàa lèe‐gé vɔ̀ pèèlɛɛ o píé.

²⁵ Kɛɛ Zízɛ̀ e o séĩ́ o súo kɛ e píé, ɛ̃́ɛ̃́ áà gèè o lɛ̀ɛ, “Káà yí dɔ mia lɛ́ o sɛ́lɛ́ líé‐sí‐mìà káa, wà yíkɛ̀ gáàa lɛ mia là gágà. Ɛ́ɛ̃́ mia kpànazɛ̀ bɛ̃̀ɛ̃, óò wɔ̃́ lɛ́ míáa ò lo à kɛɛ̀ɛ, zɔ̃̀ɔ̃̀ o lɛ̀ɛ teele.

²⁶ Kɛɛ zí e kéa ye wá à ká ka ká. Yé ka doó‐mì aà naa é kɛ mi kpànazɛ̀ ká ka làa, lɛ à mɔ̀ é kɛ míá ka tóa kà yɛɓo‐kɛ‐mì ká.

²⁷ Ɛ́ɛ̃́ yé ka doó‐mì aà naa é kɛ mia yé o tóa o líé‐sí‐mì káa, lɛ à mɔ̀ é kɛ kà lùò ká.

²⁸ Lɛ à mɔ̀ é kɛ lɛ̀ Mi Gbe lɛ́ ɓe. Lɛ̀ɛ́ gbaa nu zèe kɛɛ mi é yɛɓo kɛ à mɔ̀. Kɛɛ e nu é yɛɓo kɛ mi mɔ̀, ɛ̃́ɛ̃́ é e zì kɛ̀ɓe nɔ, kɛ é mia búnùzɛ̀ ɓo wɔ̃́ yɔɔ yí.”

Zízɛ̀ e gɔ̃à nyìɛ káàa zɛ̀ pèèlɛ la

²⁹ Lɛ̀ o kɛ gópìà Zɛ́lékòa, mia kù gbùò zɛ̀ o tó Zízɛ̀ píé.

³⁰ Gɔ̃à nyìɛ káàa zɛ̀ pèèlɛ lɛ́ o kɛ yàá zi sɛ̃́ĩ́a, wa ma kélɛ̀ Zízɛ̀ lɛ diepìà. O gbɛ̃̀ gbaa, wáà mɔ́ɔ̀ gbɛ́ɛ́ ɓò kélɛ̀, “Dèɓé Gbe, ì ko yéĩ̀ kṹ.”

³¹ Mia kùa o yà o wúú mɔ̀, wáà gèè o lɛ̀ɛ ó o lɛ̀à ga. Kɛɛ o kɛ gbɛ́ɛ́pìà nɔ́ tĩã́ gágà weeá kélɛ̀, “Ko Dàa‐mì, Dèɓé Gbe, ì ko yéĩ̀ kṹ.”

³² Zízɛ̀ e tèá, áà o súo kɛ̀, áà gèè, “Mɛ́ kà nàà ḿ kɛ ka lɛ̀ɛ?”

³³ Wa gèe à lɛ̀ɛ, “Ko Dàa‐mì, kóò nàà í ko nyìɛ fóló.”

³⁴ O yéĩ́ e Zízɛ̀ kɛ, e bĩ́ o nyìɛ mɔ̀. Yé e kɛ nɔ́ kília, o nyìɛ e fóló gbaa, wáà tò Zízɛ̀ píé.