Máfìù 13 - Wè-dɔ-wè Dɛɛ

Pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ

¹ Lúó nɔ́ doó e kília káa, Zízɛ̀ e gó ká e kília wì, e ló yíí‐pṹã́a sɔ́nɔ́. E yà tã́ã̀ yi, kɛ é pɛ zɔ̃̀ɔ̃̀ mia lɛ̀ɛ.

² Mia gbũ páà e kɛ à ká à mɔ̀ yí gbùò zɛ̀. Lɛ̀ e kɛ kília, a mɔ́ɔ̀ wàà ɓo gɔɔ yí, e yà à yí yíía là. Mia kù e kília o dɔ gbaa o gã̀ mɔ̀ yíí kpóṹa là.

³ Zízɛ̀ e mɛ́ĩ́ búnùzɛ̀ ɓo o lɛ̀ɛ pĩ̀ã̀ vɔɔ̀ ká. A gèe o lɛ̀ɛ kélɛ̀, “E kɛ gɔ̃ doó ká, lɛ́ e wɛ̀lɛ̀, e ló pɛ taàa.

⁴ Lɛ̀ e kɛ pɛ́ e kília pɛ̃̀ɛ̃̀pìàa, à dò e dà zi gbùò píé. À yé e dà zi gbùò píéa, mɔ̀ɔ̀ vɔ̀ o nu, wa mání.

⁵ À dò bɛ̃̀ɛ̃ e dà gɛ̀lɛ̀ là, lɛ́ sɛ́lɛ́ lɛ̀ɛ́ gbaa kɛ yí kpã́‐kpã̀a mɔ̀. À yé e kília, e ɓɔ tíè‐tíèe, ɓii sɛ́lɛ́ lɛ̀ɛ́ gbaa kɛ yí kpã́‐kpã̀.

⁶ Yé nyɛ́nɛ́ e gbɛ̃̀ɛ, e pɛ píní dɛɛ e kília gélé. E kpáa kṹ, ɓii à gáná lóò lɛ̀ɛ́ gbaa kɛ à ká gìè.

⁷ Pɛ wɛ́lɛ́ e kília dò e dà lɛ̀ lɛ́ gɛ́nɛ́ e kɛ yía mɔ̀. Gɛ́nɛ́ e kília, e fàa, e pɛ pínía kṹ e kpɛí.

⁸ Ɛ́ɛ̃́ zeĩ́a, à dò e dà sɛ́lɛ́ yiè yí. E ɓa. À gbã̀ã̀ dò wɛ́lɛ́ e kɛ à mɔ̀ wũ doó, à dò bɛ̃̀ɛ̃ vũ̀ sáláádo, ɛ̃́ɛ̃́ à dò bɛ̃̀ɛ̃ vũ̀ yààka.

⁹ “Mi lɛ́ à tóó è wɔ̃́ maa, è e tóó dɔ.”

Pɛ́ è kɛ̀ lɛ́ Zízɛ̀ è pĩ̀ã̀ vɔɔ

¹⁰ Lɛ̀ e kɛ kília, là tòà‐píé‐mìàa o nu, wáà gèè à lɛ̀ɛ, “Mɛ́ e kɛ lɛ́ ì pĩ̀ã̀ vɔ o lɛ̀ɛ yé ɓaà kɛ mɛ́ĩ́ ɓopìà o lɛ̀ɛ ká ɓɛ?”

¹¹ Zízɛ̀ a là nìɛ̀ weeá kélɛ̀, “Wɔ̃́ nì lɛ́ à bĩ̀ĩĩ̀ e kɛ à ká, lɛ́ à gbɛ̃̀ɛ̃̀ lɛ Wálà lɛ́ e lɛ̀ía là tò‐mia‐làa mɔ̀ɔ, à nɔɔ̀ lɛ gbaa ka lɛ̀ɛ, kɛ ká à dɔ. Kɛɛ à nɔɔ̀ wá nɛ́ o yee o lɛ̀ɛ.

¹² Ƃii mi lɛ́ pɛ laa kɛ̀lɛ̀ɛ, óò lo nɔ́ tĩã́ à dò nɔɔ̀ à lɛ̀ɛ, ɛ̃́ɛ̃́ lɛ́ɛ̀ lo kɛɛ̀ à kɛ̀lɛ̀ gbùò. Kɛɛ mi lɛ́ pɛ gbɛɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ e à kɛ̀lɛ̀ɛ káa, óò lo à kṹũ̀ à kɛ̀lɛ̀.

¹³ Pɛ́ m̀ mɔ́ɔ̀ wɔ̃́ gèe ɓo o lɛ̀ɛ pĩ̀ã̀ vɔɔ̀ káa, gɛ̃̀ e ké. Óò o nyìɛ gbɛ̃̀ pɛ mɔ̀, kɛɛ òó pɛ́ e kília gɛ̃̀. Óò o tóó dɔ. Kɛɛ òó wɔ̃́ ma, kɛ bɛ̃̀ɛ̃ ó à yí ma.

¹⁴ À mɔ́ɔ̀ wɔ̃̀ mɔ̀ɔ, wɔ̃́ lɛ́ Wálà a káá Ààzáyà lé, lɛ́ a gèea, o mɔ́ɔ̀ wɔ̃̀ lɛ́ɛ̀ à kɛ̀, áà kɛ̀ wánà zɛ̀. Wɔ̃́ Ààzáyà a gèea, gɛ̃̀ e ké. ‘Káà lo ka tóó dɔɔ̀ zi nɔ́ɔ fé ká. Kɛɛ kàá ló wɔ̃́ yí maà. Ɛ́ɛ̃́ káà lo ka nyìɛ gbɛ̃̀ɛ̃̀ pɛ mɔ̀ zi nɔ́ɔ fé ká. Kɛɛ kàá ló lɛ̀ gɛ̃̀ɛ̃̀.

¹⁵ Ƃii míá o kéa o wũ‐kèlè yí lɛ gágà. O tóó lɛ̀ɛ́ wɔ̃́ ma. Waà o nyìɛ tútaa. È gɔ̃̀á kɛɛ̀ kília, o nyìɛ áá lɛ̀ gɛ̃̀ɛ̃̀, o tóó áá wɔ̃́ maà, ɛ̃́ɛ̃́ o wũ‐kèlè yí áá kɛɛ̀ sɛ̀. Tó o nìɛ̀ m píé, ɛ̃́ɛ̃́ máá o kɛɛ̀ o kɛ kéléŋ‐kèlèŋ.’

¹⁶ “Zi sùu kpɛɛ̀ lɛ́ lúà kpɔ́ɔ̀ lɛ à ká ka mɔ̀ ké. Ka nyìɛ lɛ́ɛ̀ lɛ̀ gɛ̃̀, tó ka tóó áà wɔ̃́ mà.

¹⁷ Wánà‐wɔ̃̀ lɛ́ m̀ gèe ka lɛ̀ɛ ɓɛ. Dɔ̀‐Wálà‐lé‐là‐mìà búnùzɛ̀ ɛ̃́ɛ̃́ wɔ̃́ kpeĩ kɛ‐mìà búnùzɛ̀ o kɛ wɔ̃́ lɛ́ kà à gɛ̃̀ɛ, naapìà ó gɛ̃̀ nyɔ́ɔ̀ɔ. Kɛɛ òó gbaa à gɛ̃̀. Ɛ́ɛ̃́ wɔ̃́ lɛ́ kà à maa, o kɛ à naapìà ó ma. Kɛɛ òó gbaa à kɛ kíli.

Zízɛ̀ e pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ yí ɓo

¹⁸ “Kà ka tóó dɔ ká pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ yí ma.

¹⁹ Yé mia waà wɔ̃́ lɛ́ à gbɛ̃̀ɛ̃̀ lɛ Wálà tò‐mia‐là wɔ̃̀ mɔ̀ɔ ma, lɛ́ òó à yí maa, o kélɛ̀ pɛ wɛ́lɛ́ yé e dà zi gbùòa píéa lɛ́ ɓe. Kɛ‐pɛ̀ Yɔɔ Kɛ‐mìa lɛ́ɛ̀ nu, tó e pɛ lɛ́ à taà e kɛá o yía, sɔ̀nɔ́ e gó yi.

²⁰ Pɛ wɛ́lɛ́ yé e dà sɛ́lɛ́ lɛ́ gɛ̀lɛ̀ e kɛ à wìa làa, ye lɛ́ e kélɛ̀, mia lɛ́ ò Wálà lé‐wè kũ géli ká yé nɔ́ waà à maa káa káa.

²¹ Kɛɛ à gáná gbɛ̃̀ɛ̃̀ wá o yí. Ɛ́ɛ̃́ òó túó o dɔ̀lɔ̀ mɔ̀ fɛ̃̀ɛ̃̀. Yé aà kɛ nɔ́ kíli, lɛ́ wɔ̃́ nyɔ́ɔ̀ɔ wà sã̀‐dɔ aà ɓɔ o là Wálà lé‐wè mɔ́ɔ̀ wɔ̃̀ mɔ̀ɔ, láà kɛ̀, wáà kɔ̃̀ Wálà lé‐wè mɔ̀ nɔ́ kpá le.

²² Pɛ wɛ́lɛ́ yé e dà lɛ̀ lɛ́ gɛ́nɛ́ e kɛ yía mɔ̀ɔ, lɛ́ e kélɛ̀, mia lɛ́ ò Wálà lé‐wè maa. Kɛɛ óò o zò tàà kpóṹ là pɔ̀ɔ̀ wɛ̃́ĩ̀, ɛ̃́ɛ̃́ pɛ sɔ̀lɔ̀ ɓoò lɛ́ è o zò dàa. Wɔ̃́ sùu e kéa, lɛ́ɛ̀ dà o zò píé, tó Wálà lé‐wè lɛ̀ɛ́ fàa, ɛ̃́ɛ̃́ áà kɔ̃̀ ɓaà mɔ̀.

²³ À yé à bɛ̃̀ɛ̃ à taà e kɛá sɛ́lɛ́ yiè yía, lɛ́ e kélɛ̀, mia lɛ́ ò Wálà lé‐wè ma, tó wáà yí màa. Óò ɓa o ɓɛɛ ká. O dò ɓɛɛ lɛ nì ɓo wũ doó, vũ̀ sáláádo, ɛ̃́ɛ̃́ vũ̀ yààka.”

Pĩ̀ã̀ lɛ́ à gbɛ̃̀ɛ̃̀ lɛ sùu mɔ̀ɔ

²⁴ Zízɛ̀ e pĩ̀ã̀ dò vɔ zeĩ́ o lɛ̀ɛ weeá kélɛ̀, “Wálà lɛ́ e lɛ̀ía zì tò‐mia‐là lɛ kélɛ̀ gɔ̃ lɛ́ e ɓu sùu yiè zɛ̀ taa e píé nyɛ́nɛ̀ĩ̀a lɛ́ ɓe.

²⁵ Lɛ̀ lɛ́ mia séĩ́ o kɛ yi bà bĩ́míà doó káa, gɔ̃́ e kília dàa‐gbe dò e nu, e sùu wɛ́lɛ́ taa là ɓu lɛ́ a taa kília yí. Lɛ̀ e nyɛ à kɛ̀ kíli mɔ̀ɔ, e là ló ɓo.

²⁶ Lɛ̀ lɛ́ ɓú e kília e ɓɔ, lɛ́ e gbɛ̃̀ gbaa, áà e wìa, sùu lɛ́ à taà e kɛá à yía, e gbɛ̃̀ gbaa, áà ɓɔ̀.

²⁷ Gɔ̃́ e kília là yɛɓo‐kɛ‐mìà o nu à píé, wáà gèè, ‘Ko dàa‐mì, ḿ gɔ̃̀, ɓu lɛ́ ɓa taa ɓà lɛ̀ɛ mɔ̀ɔ, e kɛ ɓu sùu yiè ká? Sùu nì lɛ́ o à yía, o bɛ̃̀ɛ̃ o gó mɛ́?’

²⁸ A gèe o lɛ̀ɛ kélɛ̀, ‘M dàa‐gbe dò lɛ́ e wɔ̃́ kɛ ɓɛ.’ Wa gèe gbaa à lɛ̀ɛ, ‘Ƃáà nàà kó ló sùua wòlò?’

²⁹ Gɔ̃́ɛɛ a gèe o lɛ̀ɛ, ‘Gbàaò. Yékɛ̀ ká lòá sùua wòlòa, ká ɓúa dò kpɔ́ à mɔ̀.

³⁰ Kà tó sùua wà ɓúa nì ó tó o kíe là, é tóá kíli ɓu kã́‐pɛ̃́ é ɓɔ. Yé aà kɛ kília, ḿm̀ lo à gèeè míá ò lo à kã́ã̀a lɛ̀ɛ, Kà sùua wòlò nɛ́, ká bè yèlè kɛ ó dùò tíè. Ká kɛ̀á kília, kà ɓúa kã́, ká dùò kpàà yí.’ ”

Pĩ̀ã̀ lɛ́ à gbɛ̃̀ɛ̃̀ lɛ pɛ wɛ́lɛ́ mɔ̀ɔ

³¹ Zízɛ̀ e pĩ̀ã̀ dò vɔ zeĩ́ o lɛ̀ɛ weeá kélɛ̀, “Wálà lɛ́ e lɛ̀ía zì tò‐mia‐là lɛ kélɛ̀ pɛ wɛ́lɛ́ lɛ́ è kɛ̀ lɛ̀ màà‐yè‐ŋèlè wɛ́lɛ́ɛ lɛ́ ɓe. Gɔ̃ doó e à sí, a taa e píé nyɛ́nɛ̀ĩ̀.

³² Pɛ wɛ́lɛ́ e kília, lɛ kélé kélé pɛ wɛ́lɛ́ vɔ̀ séĩ́ píé. Kɛɛ yé aà fàa, lɛ́ɛ̀ kɛ̀ gbùò, tó e die taa‐pɔ̀ɔ̀ séĩ́ là. Tó e yílí kã́ gbaa, tó mɔ̀ɔ̀ vɔ̀ o nu, wáà o kéĩ́ dɔ̀ à kɔ̀ yí.”

Pĩ̀ã̀ lɛ́ à gbɛ̃̀ɛ̃̀ lɛ belè‐fɔ̀ɔ‐pɛ̀ mɔ̀ɔ

³³ Zízɛ̀ e pĩ̀ã̀ dò vɔ zeĩ́ o lɛ̀ɛ weeá kélɛ̀, “Wálà lɛ́ e lɛ̀ía zì tò‐mia‐là lɛ kélɛ̀ belè‐fɔ̀ɔ‐pɛ̀ lɛ́ lee à si, tó áà kàà fáláɓà lɛ́ ò belè kɛ̀áa, bɔ́kì paàa yààka bà, é tóá kíli belè‐kpùlù e kília séĩ́ é fɔ̀ɔ lɛ́ ɓe.”

Zízɛ̀ e wɔ̃́ gèe pĩ̀ã̀ vɔɔ̀ ká

³⁴ Zízɛ̀ e wɔ̃́ e kéa séĩ́ gèe mia kùa lɛ̀ɛ pĩ̀ã̀ vɔɔ̀ ká. Lɛ̀ɛ́ gbaa wɔ̃́ nɔ́ɔ fé gèe o lɛ̀ɛ fèle fã́ pe nɔ́ é pĩ̀ã̀ vɔ.

³⁵ E à kɛ kíli, kɛɛ wɔ̃́ lɛ́ dɔ̀‐Wálà‐lé‐là‐mì a gèea, é kɛ wánà zɛ̀. Wɔ̃́ a gèea, lɛ́ e kélɛ̀, “Ḿm̀ lo pĩ̀ã̀ vɔɔ̀ yé maà kɛ wéépìàa ká. Ḿm̀ lo wɔ̃́ lɛ́ mi nɔ́ɔ fé lɛ̀ɛ́ à yí dɔ nɛ́, é kã́ lúó lɛ́ kpóṹ là zèe kɛɛ̀ e kɛá é ɓɔá pɛ́nɛɛ mɔ̀ɔ, wɔ̃̀ gèeè mia lɛ̀ɛ.”

Zízɛ̀ e pĩ̀ã̀ lɛ́ à gbɛ̃̀ɛ̃̀ lɛ sùu mɔ̀ɔ yí ɓo

³⁶ Lɛ̀ e kɛ kília, Zízɛ̀ e gó gbaa míáa fĩ̀ã̀, e ló gbaa kɛ́ì. Là tòà‐píé‐mìàa o nu à píé, wáà gèè, “Pĩ̀ã̀ lɛ́ ɓa vɔ, lɛ́ à gbɛ̃̀ɛ̃̀ e kɛá sùu lɛ́ e kɛ nyɛ́nɛ̀ĩ̀a mɔ̀ɔ, yí ɓo ko lɛ̀ɛ.”

³⁷ Zízɛ̀ e à yí ɓo weeá kélɛ̀, “Gɔ̃ lɛ́ e pɛ wɛ́lɛ́ yièa taa, lɛ́ e kélɛ̀ Mi Gbe.

³⁸ Nyɛ́nɛ̀ĩ̀a lɛ́ e kpóṹ là zèe káa. Pɛ wɛ́lɛ́ yièa lɛ́ e mia lɛ́ Wálà tóò lɛ o làa káa. Sùua bɛ̃̀ɛ̃ lɛ́ e Kɛ‐pɛ̀ Yɔɔ Kɛ‐mìa mìà nì káa.

³⁹ Mi dàa‐gbe lɛ́ e o taa, lɛ́ e Dɛ́ɓò káa. Ƃú e kília kã́‐pɛ̃́ lɛ́ e kélɛ̀ lúó lɛ́ ko yàáa líé‐nyɛ‐lùòa. Ƃúa kã́‐mìà lɛ́ o Wálà là vɔ‐mìà káa.

⁴⁰ Zi nɔ́ o sùua wòlòá, lɛ́ wa gélé tíé káa, zi nɔ́ doóa lɛ́ è lo kɛɛ̀á lúó ko yàáa líé‐nyɛ‐lùò káa.

⁴¹ Mi Gbe lɛ́ɛ̀ lo là vɔ‐mìà vɔɔ̀. Ɛ́ɛ̃́ óò lo mia séĩ́ lɛ́ ò kɛ̀, tó mia wáà kɛ‐wɔ̃̀ yɔɔ kɛ̀, e bɛ̀i, wɔ̃́ yɔɔ kɛ‐mìà séĩ́ lɛ́ o lɛ̀ lɛ́ m tóò lɛ mia là yia mɔ̀ɔ, óò lo o páà o kíe mɔ̀,

⁴² tó o o dùò tíé kṹã̀a gbùòa yí. Óò lo gbóó ɓoò yi, tó wáà o sɔ̃́ɔ̃́ là ɓèlè.

⁴³ Yé aà kɛ kília, Wálà là mia nì óò lo ɓíì lɛ̀ nyɛ́nɛ́ lɛ́ ɓe, lɛ̀ lɛ́ o Dàa tóò lɛ mia là yia mɔ̀. Mi lɛ́ à tóó è wɔ̃́ maa, è e tóó dɔ.

Pĩ̀ã̀ lɛ́ à gbɛ̃̀ɛ̃̀ lɛ dɔ‐pɔ̀ɔ̀ lɛ́ à bĩ̀ĩĩ̀ lɛɛ mɔ̀ɔ

⁴⁴ “Wálà lɛ́ e lɛ̀ía zì tò‐mia‐là lɛ kélɛ̀ dɔ‐pɔ̀ɔ̀ lɛ́ à bĩ̀ĩĩ̀ lɛ nyɛ́nɛ̀ĩ̀a lɛ́ ɓe. Mi dò e ɓɔ à là e tií. Mí e kília e à là bĩ̀ĩ̀. À gé e kɛ lipìà. E à mɔ́ɔ̀ pɛ séĩ́ lɛ́ e kɛ à kɛ̀lɛ̀ɛ lɔ̀ɔ̀ dɔ. E nyɛ́nɛ̀ĩ̀ e kília lɔ́ à pɛ̀lèe ká.

Pĩ̀ã̀ lɛ́ à gbɛ̃̀ɛ̃̀ lɛ gɛ̀lɛ̀ sɔ̃̀ɔ̃́ gbùò zɛ̀ mɔ̀ɔ

⁴⁵ “Zéniía, Wálà lɛ́ e lɛ̀ía zì tò‐mia‐là lɛ kélɛ̀ lɔ́ɔ́‐dɔ‐mì lɛ́ è lo gɛ̀lɛ̀ sɔ̃̀ɔ̃́ gbùò zɛ̀ kpó‐kpó nàá sía, lɛ́ ɓe.

⁴⁶ Lɛ̀ a yiè kpó‐kpó lɛ́ òó à gɛ̃̀ tíè‐tíèea doó gɛ̃̀ɛ, e ló e pɛ séĩ́ lɛ́ e kɛ à kɛ̀lɛ̀ɛ lɔ̀ɔ̀ dɔ. E pɛ́ a gɛ̃̀ kília lɔ́ à pɛ̀lèe ká.

Pĩ̀ã̀ lɛ́ à gbɛ̃̀ɛ̃̀ lɛ fɛ̃́ĩ̀ mɔ̀ɔ

⁴⁷ “Wálà lɛ́ e lɛ̀ía zì tò‐mia‐là lɛ zeĩ́ kélɛ̀ fɛ̃́ĩ̀ lɛ́ wa káá yíí bà, lɛ́ e kpã̀ã́ sùu doò do zɛ̀ kṹa lɛ́ ɓe.

⁴⁸ Yé kpã̀ã́ aà paa, kpã̀ã́‐zɛ‐mìà óò à gã̀ã̀ kpóṹ bíní, tó o yà kpã̀ã́a mɔ̀, tó wáà bà wɔ̀ɔ̀. Óò à yiè yiè kàà téà yí. À yé lɛ́ òó naa à káa, tó wa káá luú.

⁴⁹ Zí e kéa lɛ́ è lo kɛɛ̀ à ká lúó lɛ́ kɔa yàáa líé‐nyɛ‐lùò káa. Wálà là vɔ‐mìà vɔ̀ óò lo lóò, tó o mia kɛ‐pɛ̀ yɔɔ zɛ̀ ɓo mia kɛ‐pɛ̀ yiè zɛ̀ bà,

⁵⁰ tó o mia kɛ‐pɛ̀ yɔɔ zɛ̀ɛ dùò tíé kṹã̀a gbùò yí. Óò lo gbóó ɓoò yi, tó wáà o sɔ̃́ɔ̃́ là ɓèlè.”

Wánà‐wɔ̃̀ dɛɛ wà à zii‐mì

⁵¹ Zízɛ̀ e o wɛ̃́ĩ́‐lɔ̀ɔ kɛ weeá kélɛ̀, “Káà wɔ̃́ nì e kéa séĩ́ yí ma?” Wa gèe, “M̀m̀.”

⁵² Zízɛ̀ a gèe o lɛ̀ɛ, “À mɔ́ɔ̀ wɔ̃̀ mɔ̀ɔ, Wálà kii‐dɔ‐mì nɔ́ɔ fé lɛ́ aà kɛ gbaa tòà‐píé‐mì ká, lɛ́ Wálà lɛ́ e lɛ̀ía tóò lɛ gbaa à làa, lɛ kélɛ̀ ká dàa‐mì lɛ́ è pɛ dɛɛ wà pɛ zii o ɓo là pɔɔ̀ káápìàa lɛ́ ɓe.”

Òó naa Zízɛ̀ ká Názàlɛ̀

⁵³ Lɛ̀ Zízɛ̀ e nyɛ pĩ̀ã̀ nì e kéa vɔɔ̀ mɔ̀ɔ, e gó gbaa yí,

⁵⁴ e ló e dìè pà gbaa. E pɛ zɔ̃̀ɔ̃̀ mia lɛ̀ɛ Zúù‐mìà zì Wálà‐kàa wì. Mia lɛ́ o à wéè maa, o lé e pa, wáà gèè kélɛ̀, “Gɔ̃́ e kéa mɛ́ɛ lɛ́ e gó gíkã́ e kéa ká yi? Ɛ́ɛ̃́ wɔ̃́ kpàlé‐kpàlézɛ̀ nì lɛ́ è à kɛ̀ɛ, e gó à kɛɛ̀ ká mɛ́?

⁵⁵ Ḿ gɔ̃̀, yílí‐nyá‐gɔ̃̀ɔ gbe lɛ́ɛ? Ḿ gɔ̃̀, Melé lɛ́ e à lòóò káa? Ɛ́ɛ̃́ ḿ gɔ̃̀, Zĩ́ĩ̀, Zósɛ̀, Sáímɔ̀, e bɛ̀i Zúdà lɛ́ o à lèe‐gé vɔ̀ káa?

⁵⁶ Ḿ gɔ̃̀, à lúlɔ̀ vɔ̀ séĩ́ o ko píé zèe? Mɛ́ɛ lɛ́ e gó wɔ̃́ nì e kéa séĩ́ ká yi?”

⁵⁷ Lɛ̀ e kɛ kília, òó gbaa naa à ká. Kɛɛ Zízɛ̀ a gèe o lɛ̀ɛ, “Óò ɓɛ̀lɛyà nɔ dɔ̀‐Wálà‐lé‐là‐mì lɛ̀ɛ lɛ̀ nɔ́ɔ fé‐fé mɔ̀, kɛɛ lɛ̀ nɔ́ òó nɔ à lɛ̀ɛ yía, lɛ́ e à pà ká, ɛ̃́ɛ̃́ zeĩ́, à píé‐kɛ́ì‐mìà fĩ̀ã̀.”

⁵⁸ Zízɛ̀ lɛ̀ɛ́ gbaa wɔ̃́ kpàlézɛ̀ búnùzɛ̀ kɛ yí, ɓii míáa òó gbaa o zò dɔ à mɔ̀ɔ mɔ́ɔ̀ wɔ̃̀ mɔ̀.