Máfìù 1 - Wè-dɔ-wè Dɛɛ

O Zízɛ̀ ye‐gã̀ pɛ́ɛ́

¹ Zízɛ̀ Kɛ́lɛ̀ì, lɛ́ e kɛ Dèɓé sùu‐là‐mì ká, ɛ̃́ɛ̃́ lɛ́ Dèɓé bɛ̃̀ɛ̃ e kɛ Éɓɔ́lɔ́hã́ã̀ sùu‐là‐mì káa, ye‐gã̀ mɔ́ɔ̀ kii lɛ́ e kéa.

² Éɓɔ́lɔ́hã́ã̀ e kɛ Áázè dàa ká. Áázè bɛ̃̀ɛ̃ e kɛ Zékɔ̀ dàa ká. Zékɔ̀ bɛ̃̀ɛ̃ e kɛ Zúdà wà e lèe‐gé vɔ̀ o dàa ká.

³ Zúdà bɛ̃̀ɛ̃ e kɛ Pílì wà Zílà o dàa ká. O lòóò lɛ́ e kɛ Tímà káa. Pílì e kília bɛ̃̀ɛ̃ e kɛ Hɛ́zɔ̃̀ dàa ká. Hɛ́zɔ̃̀ bɛ̃̀ɛ̃ e kɛ Wáláũ̀ dàa ká.

⁴ Wáláũ̀ bɛ̃̀ɛ̃ e kɛ Àmínídà dàa ká. Àmínídà bɛ̃̀ɛ̃ e kɛ Násɔ̃̀ dàa ká. Násɔ̃̀ bɛ̃̀ɛ̃ e kɛ Sámà dàa ká.

⁵ Sámà e kɛ Bóà dàa ká. À lòóò lɛ́ e kɛ Wéléháà káa. Bóà bɛ̃̀ɛ̃ e kɛ Óbɛ̀ dàa ká. À lòóò lɛ́ e kɛ Wúlúfè káa. Óbɛ̀ e kília e kɛ Zɛ́sè dàa ká.

⁶ Zɛ́sè e kɛ Dèɓé lɛ́ e kɛ sɛ́lɛ́ líé‐sí‐mì gbùò káa dàa ká. Dèɓé e kɛ Sɔ́lómɔ̀ dàa ká. À lòóò aà kɛ do Yùláyà na ká.

⁷ Sɔ́lómɔ̀ e kɛ Liòbóà dàa ká. Liòbóà bɛ̃̀ɛ̃ e kɛ Àbáyà dàa ká. Àbáyà e kília bɛ̃̀ɛ̃ e kɛ Ésà dàa ká.

⁸ Ésà bɛ̃̀ɛ̃ e kɛ Zìɔ́séfà dàa ká. Zìɔ́séfà bɛ̃̀ɛ̃ e kɛ Zɔ́lɔ̀ũ̀ dàa ká. Zɔ́lɔ̀ũ̀ e kília bɛ̃̀ɛ̃ e kɛ Yùzáyà dàa ká.

⁹ Yùzáyà bɛ̃̀ɛ̃ e kɛ Zótɔ̃̀ dàa ká. Zótɔ̃̀ bɛ̃̀ɛ̃ e kɛ Éháà dàa ká. Éháà bɛ̃̀ɛ̃ e kɛ Hɛzèkáyà dàa ká.

¹⁰ Hɛzèkáyà e kɛ Mànásè dàa ká. Mànásè bɛ̃̀ɛ̃ e kɛ Émɔ̀ dàa ká. Émɔ̀ bɛ̃̀ɛ̃ e kɛ Zòsáyà dàa ká.

¹¹ Zòsáyà bɛ̃̀ɛ̃ e kɛ Zɛkònáyà wà e lèe‐gé nì o dàa ká, lɛ̀ lɛ́ o Éézɛ̀lɛ̀‐mìà sí, wáà lò o ká Bábɛ́lɔ́ũ̀a ká.

¹² Lɛ̀ lɛ́ o ló míáa ká Bábɛ́lɔ́ũ̀a, Zɛkònáyà e Sìátíà ye gbaa. Sìátíà bɛ̃̀ɛ̃ e kɛ Zàlábábò dàa ká.

¹³ Zàlábábò bɛ̃̀ɛ̃ e kɛ Ábíyà dàa ká. Ábíyà bɛ̃̀ɛ̃ e kɛ Ìláyákɛ̀ dàa ká. Ìláyákɛ̀ bɛ̃̀ɛ̃ e kɛ Ézɔ̀ dàa ká.

¹⁴ Ézɔ̀ bɛ̃̀ɛ̃ e kɛ Zédɔ̀ dàa ká. Zédɔ̀ e kília bɛ̃̀ɛ̃ e kɛ Ékɛ̀ dàa ká. Ékɛ̀ bɛ̃̀ɛ̃ e kɛ Ìláyɔ̀ dàa ká.

¹⁵ Ìláyɔ̀ bɛ̃̀ɛ̃ e kɛ Ɛlìézà dàa ká. Ɛlìézà bɛ̃̀ɛ̃ e kɛ Mátì dàa ká. Mátì e kília bɛ̃̀ɛ̃ e kɛ Zékɔ̀ dàa ká.

¹⁶ Zékɔ̀ bɛ̃̀ɛ̃ e kɛ Zósɛ̀, lɛ́ e kɛ Melé dɛ̃ káa dàa ká. Melé e kília e kɛ Zízɛ̀, lɛ́ ò si Kɛ́lɛ̀ìa, lòóò ká.

¹⁷ À mɔ́ɔ̀ wɔ̃̀ mɔ̀ɔ, é kã́ Éɓɔ́lɔ́hã́ã̀ mɔ̀, é ɓɔá Dèɓé zì kɛ̀à‐yí‐lùò mɔ̀ɔ, gɔ̃à wà o gbe nì kpolà e kɛ vũ̀ doó wɛ́lɛ́ yììsɛ. Ɛ́ɛ̃́ é kã́ Dèɓé kɛ̀à‐yí‐lùò mɔ̀, é ló, é ɓɔá lúó lɛ́ o ló míáa ká Bábɛ́lɔ́ũ̀a mɔ̀ɔ, gɔ̃à wà o gbe nì kpolà e kɛ vũ̀ doó wɛ́lɛ́ yììsɛ. É kã́ lúó e kília bɛ̃̀ɛ̃ mɔ̀, é ló é ɓɔá Kɛ́lɛ̀ì ye‐lùò mɔ̀ɔ, gɔ̃à wà o gbe nì kpolà e kɛ vũ̀ doó wɛ́lɛ́ yììsɛ nɔ́ kíli.

Zízɛ̀ Kɛ́lɛ̀ì ye‐gã̀

¹⁸ Zi lɛ́ Zízɛ̀ Kɛ́lɛ̀ì yeè e kɛáa, gɛ̃̀ e ké. À lòóò Melé wà Zósɛ̀ o wè dɔɔ̀ e kɛá kɛ ó o kíe sí. Kɛɛ ó tĩã́ o kíe nì síìa, a yí dɔ kélɛ̀ Gɛ̀ɛ̀ Púlú aà kɛ aà e gí sí.

¹⁹ Zósɛ̀ lɛ́ wà ye o wè dɔɔ̀ e kɛáa, e kɛ gɔ̃ lɛ́ è wɔ̃́ kpeĩ kɛ̀ɛ ká. Kɛɛ lɛ̀ɛ́ gbaa naa é Melé léà ɓo mia nyìɛ mɔ̀. À mɔ́ɔ̀ wɔ̃̀ mɔ̀ɔ, e ló, a yà e gé kɛɛ wà Melé ó o wè lɛ́ wa dɔɔ ɓo o kíe nì là o doó lɛ̀ píà.

²⁰ Lɛ̀ Zósɛ̀ e kɛ e yɛ́lɛ́ táápìà wɔ̃́ sùua kɛ‐wɔ̃̀ káa, ko Dàa‐mì là vɔ‐mì doó e ɓíé à là mɛ̀ĩ̀ zɛɛ̀ yí, áà gèè à lɛ̀ɛ, “Zósɛ̀, lɛ́ i Dèɓé sùu‐là‐mì ká ɓɛ. Yékɛ̀ í túó Melé sì é kɛ i na ká pìà. Ƃii Gɛ̀ɛ̀ Púlú lɛ́ a kɛ, lɛ́ e e gí sía.

²¹ Lɛ́ɛ̀ lo nɛ́ gɔ̃ zɛ̀ doó yeè. Ì à tɔ́ kpɔ́ Zízɛ̀, ɓii lɛ́ɛ̀ lo là mia nì laà o zì kɛ‐wɔ̃̀ yɔɔ kɛ̀lɛ̀ɛ mɔ́ɔ̀ wɔ̃̀ mɔ̀.”

²² Wɔ̃́ nì e kéa séĩ́ kɛɛ̀ e kɛá, kɛɛ é wɔ̃́ lɛ́ ko Dàa‐mì e dɔ là dɔ̀‐lé‐là‐mì yí, lɛ́ a gèea, kɛ é kɛ wánà zɛ̀. Wɔ̃́ a gèea, gɛ̃̀ e ké.

²³ “Kà lɛ̀ gɛ̃̀, lee lɛ́ lɛ̀ɛ́ gɔ̃‐wɔ̃̀ yí dɔ nɛ́ɛ, lɛ́ɛ̀ lo e gí síì, tó e gɔ̃‐nɛ̀ doó ye. Óò lo nɛ́ e kília síì Imáyùɛ̀.” (À yí lɛ́ e kélɛ̀, Wálà lɛ ko píé.)

²⁴ Lɛ̀ Zósɛ̀ e vùòa, e wɔ̃́ lɛ́ ko Dàa‐mì là vɔ‐mì a gèe à lɛ̀ɛ kɛ. E Melé sí e píé‐lee ká.

²⁵ Kɛɛ Zósɛ̀ lɛ̀ɛ́ gbaa wɔɔ à sɔ́nɔ́ é tóá kíli Melé é gɔ̃‐nɛ̀ɛ ye. Zósɛ̀ e à tɔ́ kpɔ́ gbaa Zízɛ̀.