WƆ̃́ LÀṸ YIÈ ZÍ LÚÙ E À BƐ̃̀Ɛ̃ À KÁA 9 - Wè-dɔ-wè Dɛɛ

Zízɛ̀ e là tòà‐píé‐mìà vũ̀ doó wɛ́lɛ́ pèèlɛɛ vɔ

¹ Zízɛ̀ e là tòà‐píé‐mìà vũ̀ doó wɛ́lɛ́ pèèlɛɛ súo kɛ o kíe là. E yíkɛ̀ gáàa nɔ o lɛ̀ɛ, kɛ o kɔ̀ é die pɛ yɔɔ séĩ́ là, ɛ̃́ɛ̃́ kɛ ó yáá ɓo mia mɔ̀.

² Lɛ̀ e kɛ kília, e o vɔ, kɛ ó Wálà zì tò‐mia‐làa wɔ̃̀ gèe lòũ̀ ká, ɛ̃́ɛ̃́ kɛ ó mia kɔ̃́ṹ‐kɔ̃̀ũ̀ la.

³ A gèe o lɛ̀ɛ, “Yékɛ̀ pɛ gbɛɛ é kɛ ka kɛ̀lɛ̀ káà lòá táá e kília mɔ̀. Yékɛ̀ ká ló kpeĩ̀, ɛ̃́ɛ̃́ gbòṹ, e bɛ̀i, belè wà pɛlèe ká, ɛ̃́ɛ̃́ yékɛ̀ ká ló sɔ pèèlɛ ká.

⁴ Ká nɔ́ɔ fé lɛ́ ò lo ka wɔ̀lɔ̀ kpɔ́ɔ̀ à wìa, kà tó à wì, é tóá kíli ká góá sɛ́lɛ́ e kília yí.

⁵ Lɛ̀ lɛ́ mia òó ló o kɔ̀ yàà ka wì yia, ká kɛ̀á gópìà pɛ́lɛ e kília yía, kà ka gã̀ yí zɛ, kɛɛ mùnú lɛ́ e tó à mɔ̀ yia, é gó à mɔ̀, kɛ é kɛ wɔ̃́ lɛ́ wa kɛ ka káa, kélá ká.”

⁶ Lɛ̀ e kɛ kília, tòà‐píé‐mìàa o gó gbaa yí, o ló pɛ́lɛ kélé kélé yí píé wɔ̃́ làṹ yièa gèeè ká, tó wáà mia là o mɔ̀‐yàà bà lɛ̀ séĩ́ mɔ̀.

Hɛ́lɔ̀ lé e pa

⁷ Hɛ́lɔ̀, lɛ́ e kɛ sɛ́lɛ́ líé‐sí‐mì káa, e wɔ̃́ séĩ́ lɛ́ e kɛ kɛpìàa làṹ ma. À lé paà e kɛá wɔ̃́ nì e kéa mɔ́ɔ̀ wɔ̃̀ mɔ̀. Ƃii mia gbṹũ̀ o kɛ à gèepìà kélɛ̀ Zɔ̃̀ɔ̃́ aà wɛ̀lɛ̀ ga kɛ̀lɛ̀.

⁸ Mia dò bɛ̃̀ɛ̃ wáà gèè Ìláyà aà nu e mɛ̀ĩ́, lɛ̀ lɛ́ mia gbɛɛ bɛ̃̀ɛ̃ o kɛ à gèepìà dɔ̀‐Wálà‐lé‐là‐mìà, lɛ́ o kɛ mɔ́ ɓea, o doó‐mì aà wɛ̀lɛ̀ ga kɛ̀lɛ̀ɛ ká.

⁹ Hɛ́lɔ̀ a gèe, “M Zɔ̃̀ɔ̃́ wũ‐kèlè kã́ à là. Dé mɔṹ e gɔ̃́ lɛ́ m̀ wɔ̃́ ma, áà gbɛ̃̀ à mɔ̀ e kéa lɛ à ká?” E kɛ zi naapìà kɛ é Zízɛ̀ gɛ̃̀.

Zízɛ̀ e ɓèlè‐pɛ̀ nɔ mia wáá sɔ́ɔ́li lɛ̀ɛ

¹⁰ Àpɔ́sɔ̀lɔ̀ vɔ̀ɔ o nu o mɛ̀ĩ́, o wɔ̃́ séĩ́ lɛ́ waà à kɛɛ, gã̀ pɛ́ɛ́ Zízɛ̀ lɛ̀ɛ. Zízɛ̀ e o sí, wà ye nì o ló o doó lɛ̀ píà sɛ́lɛ́ lɛ́ ò si Bɛ̀sádàa yí.

¹¹ Lɛ̀ mia gbũa o o ló‐wɔ̃̀ maa, o tó gbaa o píé. Zízɛ̀ e o sɛ́nɛ́ ɓo, e mɛ́ĩ́ ɓo o lɛ̀ɛ, áà gbɛ̃̀á Wálà zì tò‐mia‐là wɔ̃̀ mɔ̀, tó áà mia yé e kɛ o mɔ̀ ó la‐ɓo sɔ̀lɔ̀ ɓoa, áà o kɛ̀ wáà kɛ̀ kéléŋ‐kèlèŋ.

¹² Lɛ̀ nyɛ́nɛ́ e kɛ dàpìàa, Zízɛ̀ là tòà‐píé‐mìà vũ̀ doó wɛ́lɛ́ pèèlɛɛ o nu à píé, wáà gèè, “Ì à gèe míáa ó gó lɛ̀ɛ mɔ̀, kɛɛ ó ló pɛ́lɛ kélé kélé, ɛ̃́ɛ̃́ nyɛ́nɛ̀ĩ̀ kɔ́ɛ́í lɛ́ e lɛ̀ɛ mɔ̀ kɔ̀ɛ́ɛ, yí píé, kɛ bɛ̀i é kɛ o mɔ̀ kɛ ó léɓèlè wà yììpìà sɔ̀lɔ̀ ɓo. Ƃii lɛ̀ e kéa lɛ lɛ̀ púlú gbùò ɓɔ̀ɔ ká.”

¹³ Kɛɛ Zízɛ̀ a gèe o lɛ̀ɛ, “Ka dìè‐tĩ́ kà pɛ nɔ o lɛ̀ɛ ó ɓèlè.” O à là nìɛ̀ weeá kélɛ̀, “Pɛ́ nɔ́ e ko kɛ̀lɛ̀ɛ, lɛ́ e belè‐kpo sɔ́ɔ́li wà kpã̀ã́ pèèlɛ káa. Ƃáà nàà kó ló léɓèlè lɔ́ɔ̀ mia gbààlà gbùò zɛ̀ e kéa lɛ̀ɛ?”

¹⁴ Gɔ̃à o kɛ yía, o kɛ lèĩ vɔ̀ wáá sɔ́ɔ́li. Zízɛ̀ a gèe là tòà‐píé‐mìàa lɛ̀ɛ, “Kà à kɛ míáa ó yà o kù ká doò do. O kù e kília míá o kélɛ̀ vɔ̀ mia vũ̀ sɔ́ɔ́lia ò kɛ à doó yí.”

¹⁵ Tòà‐píé‐mìàa o à kɛ kíli. O o séĩ́ o kɛ o yà tã́ã̀.

¹⁶ Yé e kɛ kíli gbaa, Zízɛ̀ e belè‐kpo sɔ́ɔ́li wà kpã̀ã́ pèèlɛɛ sí, e lɛ̀ gɛ̃̀ lɛ̀í, áà Wálà zúo ɓò. E belè‐kpoa kpú yɛ́ kélé kélé, a sí, a nɔ là tòà‐píé‐mìàa lɛ̀ɛ ó à nɔ mia kùa lɛ̀ɛ.

¹⁷ O séĩ́‐séĩ́ wa ɓèlè, o zò e dà. Lɛ̀ e kɛ kília, tòà‐píé‐mìàa o léɓèlèa kɔ̃̀‐à‐mɔ̀ zɛ̀ wɔ́ɔ́, e ɓɛ̀lɛ̀‐kolo‐kɔ̃̀ɛ̃̀ vũ̀ doó wɛ́lɛ́ pèèlɛ pa.

Wɔ̃́ Pílɛ̀ a gèe é gbɛ̃̀á Zízɛ̀ mɔ̀ɔ

¹⁸ Lúó doó káa, lɛ̀ Zízɛ̀ e kɛ sɛ̀nɛ ɓopìà e doó ká lɛ́ là tòà‐píé‐mìàa o kɛ à píéa, e o wɛ̃́ĩ́‐lɔ̀ɔ kɛ kélɛ̀, “Míáa óò gèe dé e m ká?”

¹⁹ Wa yí ɓo weeá kélɛ̀, “Mia gbṹũ̀ óò gèe i Zɔ̃̀ɔ̃́ mia bàtáì‐kɛ‐mì ká. Tó mia gbṹũ̀ bɛ̃̀ɛ̃, wáà gèè Ìláyà lɛ́ e i káa. O dò wáà gèè zeĩ́ dɔ̀‐Wálà‐lé‐là‐mìà lɛ́ o kɛ mɔ́ ɓea, doó‐mì aà wɛ̀lɛ̀ ga kɛ̀lɛ̀.”

²⁰ A gèe o lɛ̀ɛ, “Ka bɛ̃̀ɛ̃, káà gèe deĩ̀ lɛ́ e m ká?” Pílɛ̀ a yí zṹ weeá kélɛ̀, “I Wálà là Kɛ́lɛ̀ì ká.”

Zízɛ̀ e wɔ̃́ gèe é gbɛ̃̀á e ga‐wɔ̃̀ mɔ̀

²¹ Kɛɛ Zízɛ̀ e mɛ́ĩ́ ɓo o lɛ̀ɛ gágà, áà gèè o lɛ̀ɛ yékɛ̀ ó à gèe mi nɔ́ɔ fé lɛ̀ɛ.

²² A gèe zeĩ́ o lɛ̀ɛ, “Lɛ Mi Gbe mɔ̀ é wɔ̃́ nyɔ́ɔ̀ɔ búnùzɛ̀ gɛ̃̀. Mia dìè‐dìè vɔ̀, wà sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìàa, óò lo à wɔ̃̀ dàà o kɔ̀ mɛ̀ĩ́. Óò lo à zɛɛ̀. Ɛ́ɛ̃́ zeĩ́, lɛ́ɛ̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”

²³ Lɛ̀ e kɛ kília, a gèe mia séĩ́ lɛ̀ɛ kélɛ̀, “Yé mi nɔ́ɔ fé à nàà kò ye kó tàà‐kíe‐píé kɛɛ, lɛ à mɔ̀ é kã́ e nàà‐ká‐pɛ̀ séĩ́ lɛ̀ɛ, é là kɔ́lɔ́sì lɛ́ è lo gaà mɔ̀ɔ sí lúó séĩ́ ká, é tó à ká m píé.

²⁴ Ƃii mi lɛ́ à nàà é e dìè zì kɛ̀ɓe laa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Kɛɛ mí è e dìè wɔ̃̀ dà tã́ã̀ m mɔ́ɔ̀ wɔ̃̀ mɔ̀ɔ, lɛ́ɛ̀ lo e dìè laà.

²⁵ Yé kpóṹ là zèe séĩ́ aà kɛ mi doó là pɛ ká, lɛ́ aà e dìè gíni, tó à yí áà sìèa, mɛ́ è lo à sɔ̀lɔ̀ ɓoò à kolo là?

²⁶ Mi lɛ́ yɛ́lɛ̀ è lo à kɛɛ̀ m lɛ̀ɛ, ɛ̃́ɛ̃́ m lé‐wè lɛ̀ɛ, kɛɛ yɛ́lɛ̀ lɛ́ɛ̀ lo Mi Gbe kɛɛ̀ à lɛ̀ɛ, yé aà nu à zì lɛ̀‐fɔ̀nɔɔ̀ɔ, wà à Dàa wà là vɔ‐mìà zì lɛ̀‐fɔ̀nɔɔ̀ɔ yía ká.

²⁷ Tó ḿ wánà‐wɔ̃̀ gèe ka lɛ̀ɛ. Mia gbú o dɔ̀á lɛ̀ɛ mɔ̀ɔ, òó ló gaà é tóá kíli ó Wálà zì tò‐mia‐là gɛ̃̀.”

Zízɛ̀ mɛ́ e vɔ̀ɔ

²⁸ Lɛ̀ Zízɛ̀ e wɔ̃́ e kéa gèe, lɛ́ à lúó e die vɔ̀ lèĩ sálàkaa, e Pílɛ̀ wà Zɔ̃̀ɔ̃́, ɛ̃́ɛ̃́ Zĩ́ĩ̀ o sí, e ló o ká tɔ̃̀ũ̀ wĩĩ́ kɛ é sɛ̀nɛ ɓo.

²⁹ Lɛ̀ e kɛ sɛ̀nɛ ɓopìàa, à wɛlɛ kɛ‐kɔ̀ mɛ́ e vɔ̀ɔ. À mɔ̀‐sɔ̀ e kɛ gbaa púlú sélé tété.

³⁰ Nɔ́ zá lea, gɔ̃à pèèlɛ o kɛ yí, wà ye nì wáà wèè. Míá o kília, o kɛ Móózè wà Ìláyà o ká.

³¹ O ɓíé yi lɛ̀‐fɔ̀nɔ‐kɔ̀ yí. Wà ye nì o kɛ zi lɛ́ Zízɛ̀ è lo wɔ̃́ lɛ́ Wálà aà yà e gé á kɛɛ, kɛɛ̀á wánà zɛ̀ gá è lo à ɓoò Zùlúsàlɛ̀ɛ káa wɔ̃̀ gèepìà.

³² Pílɛ̀ wà mia nì yé o kɛ yía, yi e die o ká. Kɛɛ o vùò, o Zízɛ̀ zì lɛ̀‐fɔ̀nɔ‐kɔ̀ wà gɔ̃à pèèlɛ lɛ́ wà ye nì o kɛ dɔ̀á yia, o gɛ̃̀.

³³ Lɛ̀ gɔ̃àa o kɛ gópìà Zízɛ̀ píéa, Pílɛ̀ a gèe à lɛ̀ɛ, “M dàa‐mì, e kɛ sɛ̀ lɛ́ ko lɛ̀ɛ mɔ̀ɔ. Tó kó gbàa yààka dɔ, kɛɛ i zì é kɛ ɓe, ɛ̃́ɛ̃́ Móózè zì é kɛ ɓe, e bɛ̀i, Ìláyà zì é kɛ ɓe.” Wɔ̃́ lɛ́ Pílɛ̀ e kɛ à gèepìàa, lɛ̀ɛ́ gbaa kɛ e dìè wéè yí mapìà.

³⁴ Lɛ̀ e kɛ tĩã́ wéépìàa, lúé‐lúé e bɔ́nɔ́ o ká. Lɛ̀ e kɛ kília, à gbùlù e kɛ dɔ̀á o là. Lɛ̀ lɛ́ lúé‐lúéa e nu o làa, o kɛ túópìà.

³⁵ Wéé dò e gó lúé‐lúéa yí, áà gèè, “M Gbe lɛ́ maà à sía, lɛ́ e kéa. Kà ka tóó dɔ à mɔ̀.”

³⁶ Lɛ̀ mi wéè e kília e tèá dɔɔ̀ káa, Zízɛ̀ e kɛ gbaa dɔ̀á yi e doó ká. Tòà‐píé‐mìàa o o lɛ̀à ga. Òó gbaa wɔ̃́ nì lɛ́ wa gɛ̃̀ kília dò dɔ̀ɔ̀ dɔ mi nɔ́ɔ fé lɛ̀ɛ lúó e kília ká.

Zízɛ̀ e nɛ́fú lɛ́ pɛ yɔɔ e kɛ à píéa la

³⁷ À lɛ̀‐kpɛ̀iì gbɛɛ káa, o gó gbaa tɔ̃̀ũ̀a wĩĩ́. Mia kù gbùò zɛ̀ o nu dɔɔ̀ Zízɛ̀ gɛ̀nɛ̀.

³⁸ Gɔ̃ doó e gbɛ́ɛ́ mia kù yí, áà gèè, “Tísɛ̀, ɓà kpé lɛ sɛ̀, ì lɛ̀ gɛ̃̀ m̀ nɛ́ɛ là. Lɛ m gbe doó e m kɛ̀lɛ̀ɛ ká.

³⁹ Pɛ yɔɔ lɛ́ɛ̀ nu à là, tó aà kɛ nɔ́ kília, áà gbɛ̀ɛ̀, tó áà à ɓò, ɛ̃́ɛ̃́ à lélií fílí áà dɔ̀. E kɛ nɔ́ tĩã́ à yéĩ̀‐kɛ̀ ɓopìà, tó làá zṹ é gó nɛ́fúa mɔ̀ pɛ́lɛ̀.

⁴⁰ M kpé kã́ ɓà tòà‐píé‐mìàa lɛ̀ɛ kɛ ó à ɓo à píé m lɛ̀ɛ. Kɛɛ bɛ̀i lɛ̀ɛ́ gbaa kɛ o mɔ̀ kɛ ó kɛ.”

⁴¹ Zízɛ̀ a là nìɛ̀ weeá kélɛ̀, “Míá ka ɓe yà kɔa ɓoa yí e ké ɓɛ, zò‐dɔ̀à‐mɔ̀ gbɛɛ wá ka yí, ɛ̃́ɛ̃́ káà wɔ̃́ ni. Káà nàà ḿ kɛ ka píé lúó wɛ̀ɛɛ̀ píé, tó máà ka kɛ‐wɔ̃̀ kàà m píé? Ì nu i gbéa ká zèe.”

⁴² Lɛ̀ nɛ́fúa e kɛ nupìàa, pɛ yɔɔ e à ɓo, a dà tã́ã̀. Zízɛ̀ e mɛ́ĩ́ ɓo pɛ yɔɔ lɛ̀ɛ. E nɛ́fúa la, a sí, e à nɔ e mɛ̀ĩ́ e dàa lɛ̀ɛ.

⁴³ Mia séĩ́‐séĩ́ lé paà e kɛá Wálà zì yíkɛ̀ gáàa kpànazɛ̀ɛ mɔ́ɔ̀ wɔ̃̀ mɔ̀. Lɛ̀ míáa lé paà e kɛ tĩã́ à ká wɔ̃́ lɛ́ Zízɛ̀ e kɛ à kɛpìàa mɔ́ɔ̀ wɔ̃̀ yía, a gèe là tòà‐píé‐mìà lɛ̀ɛ,

Zízɛ̀ e wɔ̃́ gèe é gbɛ̃̀á e ga‐wɔ̃̀ mɔ̀ zeĩ́

⁴⁴ “Wɔ̃́ lɛ́ m̀ nu à gèeè e kéa, è tó ka yɛ́lɛ́ píé. Óò lo Mi Gbe nɔɔ̀ mia lɛ̀ɛ.”

⁴⁵ Kɛɛ wɔ̃́ lɛ́ Zízɛ̀ a gèe kília, òó gbaa à yí ma. À bĩ̀ĩĩ̀ e kɛá o mɔ̀, yékɛ̀ ó à yí ma. Ɛ́ɛ̃́ o kɛ túópìà ó à wɛ̃́ĩ́‐lɔ̀ɔ kɛ wɔ̃́ e kília mɔ́ɔ̀ wɔ̃̀ mɔ̀.

Deĩ̀ lɛ́ e mi kpànazɛ̀ ká?

⁴⁶ Tòà‐píé‐mìàa o gbɛ̃̀ gbaa, wáà tèé dà o kíe nì ká, mi lɛ́ lɛ kpànazɛ̀ é dieá o séĩ́ o làa mɔ́ɔ̀ wɔ̃̀ mɔ̀.

⁴⁷ Zízɛ̀ e wɔ̃́ lɛ́ o kɛ o yɛ́lɛ́ táápìà à káa, e à dɔ. Lɛ̀ e kɛ kília, e nɛ́fú dò kṹ, e à dɔ e sɔ́nɔ́,

⁴⁸ áà gèè o lɛ̀ɛ, “Mi lɛ́ è lo e kɔ̀ yàà nɛ́fú e kéa wì m tɔ́ yía, kɛɛ aà e kɔ̀ yà m wì. Ɛ́ɛ̃́ mi lɛ́ è lo e kɔ̀ yàà m wìa, kɛɛ aà e kɔ̀ yà mi lɛ́ e m vɔɔ wì. Ƃii mi lɛ́ lɛ fĩ́ĩ́‐nyɛ zɛ̀ ka séĩ́ ka bàa, à ye lɛ́ lɛ kpànazɛ̀ɛ.”

Mi lɛ́ lɛ̀ɛ́ gèlè gɔ̃ ka káa, lɛ ka dò ká

⁴⁹ Zɔ̃̀ɔ̃́ a gèe kélɛ̀, “M dàa‐mì, ko gɔ̃ doó gɛ̃̀, áà pɛ yɔɔ ɓò mia píé i tɔ́ yí. Kɔa gèe à lɛ̀ɛ é tèá à kɛɛ̀ ká, ɓii ye wá ko dò káa mɔ́ɔ̀ wɔ̃̀ mɔ̀.”

⁵⁰ Kɛɛ Zízɛ̀ a gèe à lɛ̀ɛ, “Yékɛ̀ ká tèá. Ƃii mí lɛ̀ɛ́ gèlè gɔ̃ ka káa, lɛ ka doó‐mì ká.”

Sɛ̀mɛ́lìà‐mìà dò òó gbaa o kɔ̀ yà Zízɛ̀ wì

⁵¹ Lɛ̀ lúó lɛ́ ò lo Zízɛ̀ síì à ká wáà lòá lɛ̀ía, e kɛ tópìà kɔ̀ɛ́ɛ, e e zò dɔ gágà, áà lò gbaa Zùlúsàlɛ̀.

⁵² E vɔ‐mìà vɔ e wɛlɛ mɔ̀. O wɛ̀lɛ̀, o ló Sɛ̀mɛ́lìà‐mìà zì pɛ́lɛ doó yí, kɛ ó pɛ séĩ́ pɛ̀ kɛ à nuà wɛ̃́ĩ̀.

⁵³ Kɛɛ míá o yía, òó ló o kɔ̀ yàà à wì, ɓii e kɛ wánà ká kélɛ̀ lɛ́ɛ̀ lo Zùlúsàlɛ̀.

⁵⁴ Lɛ̀ tòà‐píé‐mìà Zĩ́ĩ̀ wà Zɔ̃̀ɔ̃́ o wɔ̃́ e kéa yí dɔɔ, wa gèe à lɛ̀ɛ, “Ko Dàa‐mì, íì à nàà kɛ kó tíé súo kɛ é gó lɛ̀í, kɛ kó o yí siè à ká?”

⁵⁵ Zízɛ̀ e nìɛ̀, áà o tèà à gèè kíli mɔ̀.

⁵⁶ O ló sɛ́lɛ́ gbɛɛ bɛ̃̀ɛ̃ yí.

Mia lɛ́ wa gèe óò nàà ó tó Zízɛ̀ píéa

⁵⁷ Lɛ̀ o kɛ lópìàa, gɔ̃ doó a gèe Zízɛ̀ lɛ̀ɛ, “Ḿm̀ lo tóò i píé lɛ̀ nɔ́ɔ fé ì lo lóò yia mɔ̀.”

⁵⁸ Zízɛ̀ a gèe à lɛ̀ɛ, “Wɛ̃̀ɛ̃́ bũ lɛ ɓe. Ɛ́ɛ̃́ mɔ̀ɔ̀ bɛ̃̀ɛ̃ kéĩ́ lɛ ɓe. Kɛɛ Mi Gbe yee, lɛ̀ gbɛɛ wá ɓe à lɛ̀ɛ, kɛ é wɔɔ yí.”

⁵⁹ A gèe gɔ̃ dò bɛ̃̀ɛ̃ lɛ̀ɛ zeĩ́, “Tó m píé.” Kɛɛ gɔ̃́ e kília a gèe à lɛ̀ɛ, “M dàa‐mì, ì à tó ḿ ló ḿ m dàa bĩ̀ĩ̀ nɛ́.”

⁶⁰ Zízɛ̀ a là nìɛ̀ weeá kélɛ̀, “Ì à tó mia lɛ́ o gaà lɛɛ, ó o zì mi gaàa bĩ̀ĩ̀. Kɛɛ ɓi yee, ì lo í Wálà zì tò‐mia‐là wɔ̃̀ gèe mia lɛ̀ɛ.”

⁶¹ Gɔ̃ dò a gèe zeĩ́, “Ḿm̀ lo tóò i píé, m dàa‐mì. Kɛɛ ì à tó ḿ ló m wè dàà m mìà nì lɛ̀ɛ nɛ́.”

⁶² Zízɛ̀ a gèe à lɛ̀ɛ, “Mi nɔ́ɔ fé lɛ́ è gbɛ̃̀ áà lɛ̀ wìĩ́ĩ̀ ɓò, tó áà lɛ̀ gɛ̃̀ e mɛ̀ĩ́ pòò‐pòò lea, ye wá pɛ‐kɛ̀á‐pɛ̀ ká Wálà zì tò‐mia‐là mɔ́ɔ̀ wɔ̃̀ mɔ̀.”