WƆ̃́ LÀṸ YIÈ ZÍ LÚÙ E À BƐ̃̀Ɛ̃ À KÁA 8 - Wè-dɔ-wè Dɛɛ

Loà lɛ́ wà Zízɛ̀ nì o kɛ lópìàa

¹ Lɛ̀ à lɛ̀ e ɓo pèèlɛɛ, Zízɛ̀ e ló dìèá sí pɛlɛí wà kpã̀ãã̀ kɔ́ɛ́í píé, áà lò wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì tò‐mia‐là mɔ̀ɔ gèèá sí. Wà là tòà‐píé‐mìà vũ̀ doó wɛ́lɛ́ pèèlɛɛ o ló.

² Ɛ́ɛ̃́ zeĩ́, wà loà dò lɛ́ o laà e kɛá pɛ yɔɔ vɔ̀, ɛ̃́ɛ̃́ yáá kɛ̀lɛ̀ɛ, lɛ́ wà ye nì o kɛ lópìàa. Loà o kília o tɔ́ lɛ́ Melé, lɛ́ o kɛ à sípìà Mádɛ̀lɛ̀ mi, lɛ́ pɛ yɔɔ sálápèèlɛ ɓoò e kɛá à píéaò,

³ ɛ̃́ɛ̃́ Zòánà lɛ́ e kɛ Súzà, lɛ́ e kɛ Hɛ́lɔ̀ kɔ̀‐lé káa na káa, e bɛ̀i, Sùzánà. Ɛ́ɛ̃́ zeĩ́, loà búnù‐búnùzɛ̀ gbɛɛ̀ gbɛɛ, lɛ́ o kɛ gbũpìà Zízɛ̀ wà là tòà‐píé‐mìà mɔ̀ o zì pɛ́ e kɛ o kɛ̀lɛ̀ɛ káa, o kɛ o bà.

Pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ

⁴ Míá o kɛ nupìà Zízɛ̀ píéa, o kɛ gópìà sɛ́lɛ́ gbɛɛ̀ gbɛɛ yí, wáà nù à píé. Lɛ̀ mia gbũ e kília o pá o kíe mɔ̀ɔ, Zízɛ̀ e là pĩ̀ã̀ doó vɔ. Ye lɛ́ e kélɛ̀,

⁵ “E kɛ gɔ̃ doó ká, lɛ́ e wɛ̀lɛ̀ e ló là taa‐pɛ̀ wɛ́lɛ́ taàa. Lɛ̀ e kɛ pɛ́ e kília pɛ̃̀ɛ̃̀pìàa, à dò e dà zi gbùò píé. O ɓálá à là. Lɛ̀ e kɛ kília, mɔ̀ɔ̀ vɔ̀ o à mání.

⁶ À dò bɛ̃̀ɛ̃ e dà gɛ̀lɛ̀ là. Lɛ̀ pɛ́ e kília e ɓɔɔ, e kpáa kṹ, ɓii yíí gbɛɛ lɛ̀ɛ́ gbaa kɛ sɛ́lɛ́ e kília mɔ̀.

⁷ Pɛ wɛ́lɛ́ e kília dò e dà lɛ̀ lɛ́ gɛ́nɛ́ e kɛ yía mɔ̀. Gɛ́nɛ́ɛ wà pɛ wɛ́lɛ́ɛ o fàa o kíe ká. Lɛ̀ e kɛ kília, gɛ́nɛ́ɛ e pɛ pínía kṹ e kpɛí.

⁸ Pɛ wɛ́lɛ́ɛ dò e dà sɛ́lɛ́ yiè yí. Pɛ wɛ́lɛ́ e kília e ɓɔ, ɛ̃́ɛ̃́ e ɓa e gbã̀ã̀ ká. À wɛ́lɛ́ e kɛ à gbã̀ã̀ doó mɔ̀ wũ doó.” Zízɛ̀ e à líé nyɛ weeá kélɛ̀, “Mi lɛ́ à tóó è wɔ̃́ maa, è e tóó dɔ.”

Pɛ́ è kɛ̀ lɛ́ Zízɛ̀ è pĩ̀ã̀ vɔɔ

⁹ Zízɛ̀ là tòà‐píé‐mìà wa wɛ̃́ĩ́‐lɔ̀ɔ kɛ kɛ é pĩ̀ã̀a yí ɓo.

¹⁰ Zízɛ̀ a gèe, “Wɔ̃́ nì lɛ́ à bĩ̀ĩĩ̀ e kɛ à ká, lɛ́ à gbɛ̃̀ɛ̃̀ lɛ Wálà là tò‐mia‐là mɔ́ɔ̀ wɔ̃̀ mɔ̀ɔ, à nɔɔ̀ lɛ gbaa ka lɛ̀ɛ, kɛ ká à dɔ. Kɛɛ mia yé o tóa yee, o zì lɛ́ nɔ́ pĩ̀ã̀ vɔ̀ o lɛ̀ɛ káa. Wɔ̃́ e kília kɛɛ̀ lɛ kíli, kɛɛ ó o nyìɛ gbɛ̃̀ pɛ mɔ̀, kɛɛ yékɛ̀ ó gɛ̃̀, ɛ̃́ɛ̃́ kɛ ó o tóó dɔ wɔ̃́ mɔ̀, kɛɛ yékɛ̀ ó yí ma.

Zízɛ̀ e pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ yí ɓo

¹¹ “Pĩ̀ã̀ e kéa yí gɛ̃̀ e ké. Pɛ wɛ́lɛ́ɛ lɛ́ e Wálà lé‐wè káa.

¹² Pɛ wɛ́lɛ́ yé e dà zi gbùò píéa, o lɛ́ o míá ò Wálà lé‐wè maa káa. Yé aà kɛ kília, tó Dɛ́ɓò e nu, e wéé lɛ́ lɛ o zò píéa sí. Lɛ́ɛ̀ à kɛ̀ kíli, yékɛ̀ ó o zò dɔ wééa mɔ̀, yékɛ̀ ó la‐ɓo sɔ̀lɔ̀ ɓo.

¹³ Pɛ wɛ́lɛ́ yé e dà gɛ̀lɛ̀ làa, o lɛ́ o mia lɛ́ ò Wálà lé‐wè ma, tó wáà à kũ̀ géli káa káa. Kɛɛ à gáná gbɛ̃̀ɛ̃̀ wá o yí. Óò o zò dɔ Wálà lé‐wè mɔ̀ lúó zààle píé. Tó o kɔ̃́ à mɔ̀ yé yí‐dã́‐wɔ̃̀ aà ɓɔ o làa ká.

¹⁴ Pɛ wɛ́lɛ́ yé e dà lɛ̀ lɛ́ gɛ́nɛ́ e kɛ yía mɔ̀ɔ, o lɛ́ o míá ò Wálà lé‐wè maa káa. Kɛɛ yé waà kɛ lópìà o líéa, zò‐tàà‐yí‐wɔ̃̀, ɛ̃́ɛ̃́ kɛ̀‐kpànazɛ̀‐pɔ̀ɔ̀ wà mia zò‐dà‐wɔ̃̀ lɛ́ à gbɛ̃̀ɛ̃̀ lɛ ko zì kɛ̀ kpóṹ là zèe wɔ̃̀ mɔ̀ɔ aà o kṹ kɔ̃̀ɛ̃̀ɛ̃̀ le. Tó áà kɛ̀ o zì ɓɛɛ lɛ́ ò ɓa à káa, áà vómóló kũ̀.

¹⁵ Pɛ wɛ́lɛ́ yé e dà sɛ́lɛ́ yiè yía, o lɛ́ o míá ò Wálà lé‐wè ma, tó wáà à yàlà ɓò o zò píé, wáà kùnù à mɔ̀ wɔ̃́ kɛ‐zì kpeĩ ɛ̃́ɛ̃́ yiè ká, tó wáà o zò kũ̀ tã́ã̀, é tóá kíli ó ɓa o gbã̀ã̀ yiè káa káa.

Nábò yé páni gbinì lɛ à làa

¹⁶ “Mi gbɛɛ lɛ̀ɛ́ nábò dɔ, kɛ é páni sí á gbini à là, ɛ̃́ɛ̃́ kɛ á sí, á wàà kpĩ̀ĩ̀ wì. Kɛɛ lɛ́ɛ̀ à yà nábò yàà‐là‐pɛ̀ là. Láà kɛ̀ kíli, kɛ mia ó wàá kɛ́ìa, kɛ ó wàà lɛ̀‐fɔ̀nɔɔ̀ɔ bà.

¹⁷ Pɛ séĩ́ lɛ́ à bĩ̀ĩĩ̀ lɛɛ, óò lo nuù o ká wáà‐là, ɛ̃́ɛ̃́ pɛ séĩ́ lɛ́ lɛ gbòo wìa, óò lo o gɛ̃̀ɛ̃̀, tó o nu o ká lɛ̀‐púlú mɔ̀.

¹⁸ “À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ ka dìè píé ka tóó dɔ̀ wɔ̃́ mɔ̀ mɔ́ɔ̀ wɔ̃̀ mɔ̀. Ƃii mi nɔ́ɔ fé lɛ́ pɛ laa kɛ̀lɛ̀ɛ, óò lo nɔ́ tĩã́ à dò nɔɔ̀ à lɛ̀ɛ. Kɛɛ mi lɛ́ pɛ gbɛɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ à gèe lɛ à kɛ̀lɛ̀ɛ káa, óò lo à kṹũ̀ à kɛ̀lɛ̀.”

Zízɛ̀ lòóò wà à lekè gɔ̃à zɛ̀

¹⁹ Lɛ̀ e kɛ kília, Zízɛ̀ lòóò wà à lèe‐gé gɔ̃à zɛ̀ o nu à píé. Kɛɛ bɛ̀i lɛ̀ɛ́ gbaa kɛ o mɔ̀ kɛ ó ɓɔ à mɔ̀, ɓii mia gbũ lɛ́ e kɛ zuúa e kɛ gbùò.

²⁰ Mi dò a gèe Zízɛ̀ lɛ̀ɛ, “I lòóò wà i lèe‐gé nì o dɔ̀á pɛ́lɛ̀ zèí, wáà nàà ó i gɛ̃̀.”

²¹ Zízɛ̀ a gèe míáa lɛ̀ɛ, “Mia lɛ́ ò Wálà lé‐wè ma, tó wáà à kɛ̀ɛ, o lɛ́ o m lòóò wà m lèe‐gé nì káa.”

Zízɛ̀ e fã̀ã̀ wà yíí o tèá

²² Lúó doó káa, Zízɛ̀ wà là tòà‐píé‐mìà o yà gɔɔ doó yí. A gèe o lɛ̀ɛ, “Kɔ̀à lo yíía mɛ̀ĩ́.” O gbɛ̃̀ gbaa, wáà lò.

²³ Lɛ̀ o kɛ lópìàa, yi e die Zízɛ̀ ká. Fã̀ã̀ yí gágà zɛ̀ dò e gbɛ̃̀ gbaa, áà dìè yíía là. Yíí e gbɛ̃̀ gbaa, áà gɔ́ɔ́ɔ pà. E kɛ wɔ̃́ mìni zɛ̀ ká o lɛ̀ɛ.

²⁴ Tòà‐píé‐mìàa o ló Zízɛ̀ píé, wáà à vùò weeá kélɛ̀, “Ko dàa‐mì, ko dàa‐mì, ko gapìà.” Zízɛ̀ e vùò, e mɛ́ĩ́ ɓo fã̀ã̀a wà yíí súlúú lɛ́ e kɛ dɔpìàa lɛ̀ɛ. Lɛ̀ e kɛ kília, yíía wà fã̀ã̀a o dɔ tã́ã̀ gbaa dĩĩ le.

²⁵ Lɛ̀ e kɛ kília, a gèe là tòà‐píé‐mìàa lɛ̀ɛ, “Ka zì zò‐dɔ̀à‐mɔ̀ɔ lɛ mɛ́?” O lé paà e kɛá, tó wáà tùò. Wa gèe o kíe nì lɛ̀ɛ, “Dé e gɔ̃́ e kéa ká, lɛ́ è mɛ́ĩ́ ɓo fã̀ã̀ wà yíí o lɛ̀ɛ, tó wáà wéè kɛ̀ ɓɛ?”

Zízɛ̀ e gɔ̃ lɛ́ pɛ yɔɔ e kɛ à píéa la

²⁶ Lɛ̀ e kɛ kília, o tó yíía là, o ɓɔ sɛ́lɛ́ lɛ́ e Gèlásɔ́nì‐mìà pà ká, lɛ́ wà Gálàlíì o wɛlɛ vɔɔ̀ lɛ o kíe píéa yí.

²⁷ Lɛ̀ Zízɛ̀ e gbɛ̃̀ kpóṹ làa, wà gɔ̃ lɛ́ pɛ yɔɔ e kɛ à píé, lɛ́ è go sɛ́lɛ́ e kília yía, o o kíe gɛ̃̀. Sɔ aà gó à mɔ̀ ɓɛ̀lɛ̀‐píé gbèĩ zɛ̀. Lɛ̀ɛ́ gbaa kɛ yììpìà e píé kɛ́ì, kɛɛ e kɛ lópìà yììá sí ɓɔ́à sɔ́nɔ́ píé píé.

²⁸ Lɛ̀ e Zízɛ̀ gɛ̃̀ɛ, e gbɛ́ɛ́ gágà. E pèlè gbaa tã́ã̀ Zízɛ̀ wɛlɛ mɔ̀. E gbɛ́ɛ́ yí gágà zɛ̀, áà gèè, “Zízɛ̀, lɛ́ i Wálà yé e pɛ séĩ́ làa Gbe káa, mɛ́ ɓà nàà m píé? Ḿm̀ kpé kã i lɛ̀ɛ, yékɛ̀ í m sã̀ dɔ.”

²⁹ Gɔ̃́ɛɛ e kɛ à gèepìà kíli, ɓii Zízɛ̀ aà à gèe pɛ yɔɔ lɛ̀ɛ é gó à píé. Lúó búnùzɛ̀ káa, pɛ yɔɔ e kɛ gɔ̃́ɛ̃ɛ̃ ɓopià. Yé bɛ̃̀ɛ̃ mia o kɛ o nyìɛ kɛpìà gɔ̃́ɛɛ mɔ̀, tó à kɔ̀ wà à gã̀ yèlè lɛ pɛ‐kúlú ɓɛ̀lɛ̀ káa, e kɛ ɓɛ̀lɛ̀ɛ mɛ̀pìà, áà kã̀, tó pɛ yɔɔ e kília áà à yí lùò, áà lò yɛ̀í là.

³⁰ Zízɛ̀ e à wɛ̃́ĩ́‐lɔ̀ɔ kɛ weeá kélɛ̀, “I tɔ́ lɛ́ deĩ̀?” A gèe, “M tɔ́ lɛ́ Mia Gbũ.” Ƃii pɛ yɔɔ búnùzɛ̀ e kɛ à píé.

³¹ Pɛ yɔɔ vɔ̀ɔ o kpé kã́ Zízɛ̀ lɛ̀ɛ yékɛ̀ é o vɔ gùlù lɛ́ à tèá‐pìà wá ɓea yí.

³² Ƃɔ̀ kù gbùò zɛ̀ dò o kɛ o lé ɓèlèpìà tɔ̃̀ũ̀a mɔ̀ kɔ̀ɛ́. Pɛ yɔɔ vɔ̀ɔ o kpé kã́ Zízɛ̀ lɛ̀ɛ, kɛ Zízɛ̀ á tó kɛ ó dà ɓɔ̀ vɔ̀ɔ bà. Yé e kɛ kília, Zízɛ̀ e wéé à mɔ̀ ó ló yi.

³³ Lɛ̀ e kɛ kília, pɛ yɔɔ vɔ̀ɔ o gó gɔ̃́ɛɛ píé, o ló, o dà ɓɔ̀ vɔ̀ɔ bà. O séĩ́‐séĩ́ o gbĩ̀ĩ bàlà ká goo gbèkènia là, wáà dùò yíía bà. Yé e kɛ kília, o tó yíí bà e nyɛ.

³⁴ Mia lɛ́ o kɛ o nyìɛ kɛpìà ɓɔ̀ vɔ̀ɔ mɔ̀ɔ, o wɔ̃́ lɛ́ e kɛɛ gɛ̃̀. Lɛ̀ e kɛ kília, o wàà gbaa. Ɛ́ɛ̃́ o ló, wáà wɔ̃́ sùu e kília dɔ̀ɔ̀ dɔ̀ pɛlɛí, ɛ̃́ɛ̃́ nyɛ́nɛ̀ĩ̀ kɔ́ɛ́í píé déĩ́ le.

³⁵ Mia o ló kɛ ó wɔ̃́ lɛ́ aà kɛɛ gɛ̃̀. O nu Zízɛ̀ píé. O gɔ̃ lɛ́ pɛ yɔɔ aà gó à píéa gɛ̃̀ yàá Zízɛ̀ gã̀ dṹɔ̃̀. Sɔ e kɛ à mɔ̀, ɛ̃́ɛ̃́ à wũ‐kèlè yí e kɛ gbaa sɛ̀. Míáa o kɛ gbaa túópìà.

³⁶ Mia lɛ́ o kɛ yí, wɔ̃́ e kília áà kɛ̀ o nyìɛ́ɛ, o zi lɛ́ gɔ̃́ɛɛ e la à káa gã̀ pɛ́ɛ́ míá o tóa lɛ̀ɛ.

³⁷ Mia séĩ́ lɛ́ o kɛ gópìà Gèlásɔ́nì‐mìà pàa, wa gèe Zízɛ̀ lɛ̀ɛ é gó wà sɛ́lɛ́ɛ yí. Ƃii o séĩ́ o kɛ túópìà kpó‐kpó ɓo. Lɛ̀ e kɛ kília, Zízɛ̀ e yà gbaa gɔ́ɔ́ɔ yí, e là ló ɓo.

³⁸ Gɔ̃ lɛ́ pɛ yɔɔ góò e kɛá à píéa, e kpé kã́ Zízɛ̀ lɛ̀ɛ, áà gèè, “Ì à tó kò ɓi kó ló.” Kɛɛ Zízɛ̀ e à vɔ weeá kélɛ̀,

³⁹ “Ì lo i mɛ̀ĩ́ i pà, í wɔ̃́ lɛ́ Wálà aà kɛ i lɛ̀ɛ wɔ̃̀ gèe.” Gɔ̃́ɛɛ e ló pɛ́lɛ e kília yí píé wɔ̃́ lɛ́ Zízɛ̀ aà kɛ à lɛ̀ɛ wɔ̃̀ gèeè ká.

Zálɛ̀ lú, wà lee lɛ́ e pá Zízɛ̀ mɔ̀‐sɔ̀ mɔ̀ɔ

⁴⁰ Lɛ̀ Zízɛ̀ e yɛ́ e zí, e ló yíía mɛ̀ĩ́a, mia kù lɛ́ o kɛ yía, wa kpɛ̀ɛ̀ kɛ, ɓii o séĩ́ o nyìɛ e kɛ à gɛ̀nɛ̀.

⁴¹ Lɛ̀ e kɛ kília, gɔ̃ lɛ́ ò si Zálɛ̀ɛ e nu yí. E kɛ Zúù‐mìà zì Wálà‐kà wũ‐là‐mì ká. E gbini Zízɛ̀ gã̀ dṹɔ̃̀, áà kpé kã̀ à lɛ̀ɛ é ló à píé kɛ́ì.

⁴² Ƃii à lú doó nɔ́ e kɛ à kɛ̀lɛ̀, lɛ́ à kɛ̀ɛ̀ aà kɛ vũ̀ doó wɛ́lɛ́ pèèlɛɛ, e kɛ gapìà. Lɛ̀ Zízɛ̀ e kɛ lópìàa, mia séĩ́ o kɛ tópìà à píé wìà‐wìà le.

⁴³ Lee doó e kɛ yí. Léà‐yàà a kɛ kɛ̀ɛ̀ vũ̀ doó wɛ́lɛ́ pèèlɛ mɔ̀. Bɛ̀i lɛ̀ɛ́ kɛ do mi gbɛɛ mɔ̀ kɛ é à la.

⁴⁴ E nu Zízɛ̀ mɛ̀ĩ́, e pá Zízɛ̀ mɔ̀‐sɔ̀ léĩ́ mɔ̀. Lɛ̀ e kɛ nɔ́ kília, léàa e tèá gbaa diè ká à mɔ̀.

⁴⁵ Zízɛ̀ e wɛ̃́ĩ́‐lɔ̀ɔ kɛ, áà gèè, “Dé e pá m mɔ̀ ɓɛ?” Mia séĩ́ wa tèé ɓo. Pílɛ̀ a gèe, “M dàa‐mì, mia nìɛɛ̀ lɛ i mɔ̀, tó wáà tò i píé wìà‐wìà le.”

⁴⁶ Kɛɛ Zízɛ̀ a gèe, “Mi dò e pá m mɔ̀. Ma yí dɔ lɛ̀ lɛ́ yíkɛ̀ gáàa e gó m yía ká.”

⁴⁷ Lééa a yí dɔ gbaa kélɛ̀ à bĩ̀ĩĩ̀ wá. E nu gbaa mɛ́‐tàle ká, e gbini Zízɛ̀ gã̀ dṹɔ̃̀. Mia séĩ́ nyìɛ mɔ̀ à lɛ̀ mɔ̀ɔ, e wɔ̃́ lɛ́ a mɔ́ɔ̀ pá ɓo Zízɛ̀ mɔ̀, ɛ̃́ɛ̃́ zi lɛ́ e la‐ɓo sɔ̀lɔ̀ ɓoa ká nɔ́ zá lea, a wɔ̃̀ gèe à lɛ̀ɛ.

⁴⁸ Zízɛ̀ a gèe à lɛ̀ɛ, “M lú, i zì zò‐dɔ̀à‐mɔ̀ aà i la. Ì ɓà ló ɓo í yi yiè zɛèé.”

⁴⁹ Lɛ̀ Zízɛ̀ e kɛ tĩã́ wɔ̃́ e kília gèepìàa, gɔ̃ dò e gó Zálɛ̀ píé kɛ́ì, áà gèè à lɛ̀ɛ, “I lú aà ga. Yékɛ̀ í Tísɛ̀ yí gíni ɓɔ̀ɔ.”

⁵⁰ Kɛɛ Zízɛ̀ e wɔ̃́ lɛ́ wa gèea ma, áà gèè Zálɛ̀ lɛ̀ɛ, “Yékɛ̀ i lè é dũ. I zò yee dɔ nɔ́ gágà. Ƃá kɛ̀á kília, lɛ́ɛ̀ lo kɛɛ̀ kéléŋ‐kèlèŋ.”

⁵¹ Lɛ̀ e ɓɔ Zálɛ̀ píé kɛ́ìa, lɛ̀ɛ́ gbaa naa wà mi nɔ́ɔ fé dò ó wàà káa wì, é kã́ Pílɛ̀, wà Zɔ̃̀ɔ̃́ ɛ̃́ɛ̃́ Zĩ́ĩ̀, e bɛ̀i, nɛ́fúa dàa wà à lèe o mɔ̀ɔ ká.

⁵² Mia séĩ́ o kɛ gbɛ́ɛ́pìà gbóó ká nɛ́fúa mɔ́ɔ̀ wɔ̃̀ mɔ̀. Zízɛ̀ a gèe kélɛ̀, “Yékɛ̀ ká gbóó ɓo. Nɛ́fúa gaà wá. Yi lɛ́ lɛ à bàa.”

⁵³ Míáa wáà yéí sì Zízɛ̀ mɔ̀, ɓii wa yí dɔ kélɛ̀ nɛ́fúa gaà lɛ.

⁵⁴ Kɛɛ Zízɛ̀ e nɛ́fúa kṹ e kɔ̀ mɔ̀, áà gèè à lɛ̀ɛ, “Nɛ́fú, wɛ̀lɛ̀.”

⁵⁵ Lɛ̀ e kɛ kília, à gɛ̀ɛ̀ e nu à yí e mɛ̀ĩ́. Nɔ́ zá lea, e wɛ̀lɛ̀. Zízɛ̀ a gèe à mìà nì lɛ̀ɛ ó pɛ nɔ nɛ́fúa lɛ̀ɛ á ɓèlè.

⁵⁶ Nɛ́fúa mìà nì lé kpó‐kpó paà e kɛá. Kɛɛ Zízɛ̀ e lìè‐wè dɔ o lɛ̀ɛ, áà gèè yékɛ̀ ó wɔ̃́ lɛ́ aà kɛɛ, wɔ̃̀ gèe mi nɔ́ɔ fé lɛ̀ɛ.