Hííbúlù 9 - Wè-dɔ-wè Dɛɛ

Gbìnì-Wálà-lɛ̀ɛ kɔ̀ yé e tã́ã̀ zèea, wà à yé e lɛ̀ía

¹ Gbìnì-Wálà-lɛ̀ɛ kɔ̀ zɔ̃̀ɔ̃ɔ̃̀ e kɛá wè-dɔ-wè bèĩzɛ̀ɛ yí. Ɛ́ɛ̃́ lɛ̀ lɛ́ mia ò gbìnì Wálà lɛ̀ɛ yí lɛ́ mia wa kɛɛ, à zɔ̃̀ɔ̃ɔ̃̀ e kɛá à yí nɔ́ kíli.

² O sɔ-káa dɔ. À wɛlɛ mɔ̀ lɛ́ e kɛ pɛ́lɛ̀ zèía, o kɛ à sípìà Wálà là Lɛ̀ Púlú. Nábò, e bɛ̀i téɓò, ɛ̃́ɛ̃́ belè lɛ́ à nɔɔ̀ e kɛá Wálà lɛ̀ɛ, e kɛ à lɛ̀ mɔ̀.

³ Sɔ lɛ́ e kɛ dũ̀á káa wìa à kpolà pèèlɛ zɛ̀ɛ mɛ̀ĩ́a, sɔ-ká lɛ́ o kɛ à sípìà Wálà là Lɛ̀ Púlúa Lɛ̀ Kpànazɛ̀-pìàa e kɛ yí.

⁴ Sálà-ɓòà-là-pɛ̀ lɛ́ à kɛɛ̀ e kɛá góò ká, lɛ́ o kɛ pɛ gĩĩ yiè zɛ̀ɛ gélépìà yia, e kɛ à lɛ̀ mɔ̀. Ɛ́ɛ̃́ wè-dɔ-wèa mɔ́ɔ̀ gbɔ̀lɔ̀, lɛ́ à mɛ́ lúù e kɛá góò káa, e kɛ yí nɔ́ kíli. Pɔɔ̀ nì e kéa o kɛ gbɔ̀lɔ̀ e kília yí. O lɛ́ o kélɛ̀, kpòò lɛ́ à kɛɛ̀ e kɛá góò ká, lɛ́ belè lɛ́ ò si mánàa e kɛ à yía, e bɛ̀i, Ɛ́ɛ́lɔ̀ũ̀ là yílí lɛ́ à píní e ɓɔ à mɔ̀ɔ, ɛ̃́ɛ̃́ gɛ̀lɛ̀-pɛ̃́ɛ̃́ pèèlɛ lɛ́ wè-dɔ-wèa bɛ̃̀ɛ̃ɛ̃̀ e kɛá o làa káa.

⁵ Pɔɔ̀ kpàlézɛ̀ lɛ́ a zɔ̃̀ɔ̃̀ kélɛ̀ Wálà e kɛ yía, o kɛ gbɔ̀lɔ̀ɔ là píé. O gbã gbùlù dɔɔ̀ e kɛá lɛ̀ lɛ́ kɛ-wɔ̃̀ yɔɔ è ɓo mia wũ mɔ̀ yia là. Kɛɛ kòó bɛ̀i wɔ̃́ séĩ́ yí wɔ́ɔ̀ gbèĩ dɛɛ káa mɔ̀.

⁶ Zi lɛ́ pɛ séĩ́ pɛ̀ kɛɛ̀ e kɛá à káa lɛ́ ɓɛ. Sálà-ɓo-mìàa óò lo sɔ-káa lɛ̀ yé e kɛ à wɛlɛ mɔ̀ɔ wì lúó séĩ́ ká, kɛ ó o kɛ-yɛ̀ɓo kɛ.

⁷ Kɛɛ sálà-ɓo-mìà wũ-là-mì lɛ́ nɔ́ è lo sɔ-káa yí kà wìa. Ɛ́ɛ̃́ lɛ́ɛ̀ à kɛ̀ nɔ́ kíli kɛ̀ɛ̀ yí doó. Lɛ́ɛ̀ lo léà ká yi. Lɛ́ɛ̀ à kóná ɓo Wálà mɔ̀ e dìè mɔ́ɔ̀ wɔ̃̀ mɔ̀, ɛ̃́ɛ̃́ láà kɛ̀ zeĩ́ kɛ-wɔ̃̀ yɔɔ lɛ́ míáa wa kɛ, lɛ́ òó gbaa à yí dɔ kélɛ̀ o kɛ-wɔ̃̀ yɔɔ kɛpìàa mɔ́ɔ̀ wɔ̃̀ mɔ̀.

⁸ Gɛ̀ɛ̀ Púlú lɛ́ɛ̀ à zɔ̃̀ɔ̃̀ wɔ̃́ nì e kéa yí kélɛ̀ lɛ̀ lɛ́ sɔ-káa yé lɛ líéa lɛ tĩã́ dɔ̀á e gã̀ mɔ̀ɔ, zi lɛ́ è lo Wálà là Lɛ̀ Púlúa Lɛ̀ Kpànazɛ̀-pìàa mɔ̀ɔ, à lé lɛ̀ɛ́ ɓo nɛ́.

⁹ Pĩ̀ã̀ lɛ́ à gbɛ̃̀ɛ̃̀ lɛ lúó ko pɛ́nɛɛ à ká ɓea mɔ̀ɔ lɛ́ ɓɛ. À yí lɛ́ e kélɛ̀, nɔ̀-lɛ̀ɛ-pɛ̀ ɛ̃́ɛ̃́ sálà ɓoò lɛ́ ò kɛ̀ Wálà lɛ̀ɛ, lɛ̀ɛ́ bɛ̀i à kɛɛ̀ kɛɛ mi lɛ́ è gbìnì Wálà lɛ̀ɛ kília, à zò píé é kɛ kpeĩ fɛ́fɛ́ le.

¹⁰ Wɔ̃́ nì e kéa gbɛ̃̀ɛ̃̀ lɛ léɓèlè, mi-pɛ̀, e bɛ̀i mi mɛ́-pɛ́lɛ́-kɔ̀ doò do mɔ̀. Wɔ̃́ nì e kéa séĩ́ lɛ lɔ́ɔ̀ nì lɛ́ lɛ mi gbĩ-kpàla mɔ́ɔ̀ wɔ̃̀ mɔ̀ɔ ká. Óò lo kɛɛ̀ ɓe é tóá kíli Wálà é pɛ séĩ́ kɛ dɛɛ ɓo e yiè ká.

¹¹ Kɛɛ Kɛ́lɛ̀ì aà nu zèe gbaa, ɛ̃́ɛ̃́ lɛ pɔɔ̀ yiè yiè lɛ́ lɛ zèe dɛɛ káa wà sálà-ɓò-Wálà-mɔ̀-mìà wũ-là-mì ká. Sɔ-ká lɛ́ è yɛɓo kɛ̀ à wìa lɛ kpànazɛ̀, ɛ̃́ɛ̃́ púlú, é diá à bèĩzɛ̀ɛ là. Mia wá kɛ ó kɛ. À yí lɛ́ e kélɛ̀, ye wá kpóṹ là lɛ́ à kɛɛ̀ lɛ e kéa lɛ̀ dò ká.

¹² Lɛ̀ lɛ́ Kɛ́lɛ̀ì e wàà sɔ-káa wì, lɛ́ e ló doóa ɓo Wálà là Lɛ̀ Púlúa Lɛ̀ Kpànazɛ̀-pìàa mɔ̀ɔ, lɛ̀ɛ́ gbaa ló ɓò léà ɛ̃́ɛ̃́ dìì nyɔ̀nɔ́ léà ká kɛ é à kóná ɓo. Kɛɛ e ló e dìè léà ká, ɛ̃́ɛ̃́ e tòá kíli la-ɓo sɔ̀lɔ̀ ɓo ko mɔ́ɔ̀ wɔ̃̀ mɔ̀.

¹³ Óò ɓò ɛ̃́ɛ̃́ dìì gɔ̃ léà, ɛ̃́ɛ̃́ dìì-nyɔ̀nɔ́ lɛ́ wa géléa mɔ́ɔ̀ yúwé si, wáà à wɛ̃̀ĩ̀ mia lɛ́ o wá dà-ɓɛ́ĩ̀-bà mìà káa là, ɛ̃́ɛ̃́ tó wáà o kɛ̀ dà-ɓɛ́ĩ̀-bà mìà ká yé waà pɛ lɛ́ è o mɛ́ lilì kũa ɓo o mɔ̀ɔ ká.

¹⁴ Lɛ̀ lɛ́ wɔ̃́ e kéa lɛ wánà zɛ̀ɛ, zi sùu kpɛɛ̀ lɛ́ Kɛ́lɛ̀ì léà è wɔ̃́ kɛ̀á kpànazɛ̀ mɔṹ ké. E e dìè nɔ sálà-ɓo-pɛ̀ lɛ́ kɛɛ wá à mɔ̀ɔ ká Wálà lɛ̀ɛ tòá kíli Gɛ̀ɛ̀ ɓɛ kolo là zàá. À léà lɛ́ɛ̀ lo ko zò píé pɛ́lɛ̀, yékɛ̀ kó kɛ yɛɓo fèle kɛ-mìà ká, kɛ kó Wálà ɓéèe ɓɛ là yɛɓo kɛ.

¹⁵ Wɔ̃́ e kéa mɔ́ɔ̀ wɔ̃̀ mɔ̀ɔ, Kɛ́lɛ̀ì lɛ́ è wè-dɔ-wè dɛɛ pɛ̀ kɛ̀, kɛɛ mia lɛ́ Wálà aà o súo kɛɛ, kɛ ó tòá kíli pɔ̀ɔ̀ lɛ́ Wálà aà e wè dɔ à káa sɔ̀lɔ̀ ɓo. Wɔ̃́ e kéa lɛ́ɛ̀ bɛ̀i à mɔ̀ é kɛ kíli, ɓii ga lɛ́ è mia la wɔ̃́ yɔɔ lɛ́ wa kɛ lɛ̀ lɛ́ o kɛ wè-dɔ-wè bèĩzɛ̀ɛ wìa káa, e kɛ ɓe.

¹⁶ Mi lɛ́ɛ̀ bɛ̀i à mɔ̀ é mi lɛ́ là pɔɔ̀ è lo tóò à kɛ̀lɛ̀ yé aà gaa káa zɔ̃̀ɔ̃̀. Kɛ wè-dɔ-wè e kília é tĩã́ kɛɛ̀ pɛ-kɛ̀á-pɛ̀ káa, lɛ à mɔ̀ mia ó à zɔ̃̀ɔ̃̀ mia lɛ̀ɛ kélɛ̀ mi lɛ́ e e wè dɔɔ aà ga.

¹⁷ Ƃii wè-dɔ-wè sùua ye wá kpànazɛ̀ yé mí a dɔɔ lɛ tĩã́ ɓéèea ká. Lɛ́ɛ̀ kɛ̀ pɛ-kɛ̀á-pɛ̀ ká yé mí e kília aà gaa ká.

¹⁸ Wè-dɔ-wè bèĩzɛ̀ɛ vɔ̀ɔ léà e káá kɛ é tĩã́ kɛɛ̀ pɛ-kɛ̀á-pɛ̀ ká.

¹⁹ Bèĩzɛ̀ɛ, Móózè e pɛ séĩ́ lɛ́ Wálà a gèe míáa lɛ̀ɛ ó kɛ, lɛ́ e kɛ Lɔ́ɔ̀ɔ yía, e à gèe o séĩ́ o lɛ̀ɛ. Lɛ̀ e kɛ kília, e dìì nyɔ̀nɔ́ ɛ̃́ɛ̃́ ɓò léà kpɔ́ yíí mɔ̀, e ló o ká, e o wɛ̃̀ĩ Lɔ́ɔ̀ kiia wà mia séĩ́ lɛ́ o kɛ yía o là. E o wɛ̃̀ĩ o là sùu lɛ́ ò si hísɔ̀ɔ, wà ɓáá-kɛ̀ì zóló ká.

²⁰ A gèe, “Léà lɛ́ e wè-dɔ-wè lɛ́ Wálà aà gèe ka lɛ̀ɛ ká à kɛɛ wɛ́lɛ́ káa, lɛ́ ɓɛ.”

²¹ Zi nɔ́ doóa káa, Móózè e léàa wɛ̃̀ĩ à ká sɔ-káa wà pɔɔ̀ séĩ́ lɛ́ ò o kɔ̀ gĩ́ ɓo à yí yé waà kɛ gbinipìà Wálà lɛ̀ɛ káa là.

²² Wánà kpó-kpó káa, é ló é gbɛ̃̀á Lɔ́ɔ̀ɔ mɔ̀ɔ, pɛ séĩ́ e ɓúó kɛɛ̀ púlú léà kolo là. Ɛ́ɛ̃́ yé léà lɛ̀ɛ́ kááa, mi kɛ-wɔ̃̀ yɔɔ lɛ̀ɛ́ ɓo mi wũ mɔ̀.

Kɛ́lɛ̀ì zì sálà a ɓoa, lɛ́ɛ̀ kɛ-wɔ̃̀ yɔɔ ɓo mi mɔ̀

²³ E kɛ pɔɔ̀ nì e ké, lɛ́ o pɔɔ̀ lɛ́ e lɛ̀ía bĩ́ káa mɔ̀ kɛ o kɛɛ̀ é kɛá púlú zi sùu e kéa ká. Kɛɛ pɔɔ̀ lɛ́ e lɛ̀ía nì yee, lɛ à mɔ̀ ó sálà lɛ́ à bɛ̃̀ɛ̃ lɛ fìa à yé e kéa mɔ̀ɔ ɓo o wɛ̃́ĩ̀.

²⁴ Ƃii Kɛ́lɛ̀ì lɛ̀ɛ́ gbaa wàà lɛ̀ púlú lɛ́ mia wa kɛ, lɛ́ lɛ lɛ̀ púlú kpó-kpóa bĩ́ ɓɔ̀ɔ káa wì. E ló Wálà-pà dìè mɔ̀. Dɛɛ káa, lɛ́ɛ̀ dɔ Wálà wɛlɛ mɔ̀ ko mɔ́ɔ̀ wɔ̃̀ mɔ̀ à lɛ̀ mɔ̀.

²⁵ Sálà-ɓò-Wálà-mɔ̀-mìà wũ-là-mìa lɛ́ɛ̀ lo Wálà là Lɛ̀ Púlúa mɔ̀ kɛ̀ɛ̀ séĩ́ ká wìì léà ká. Kɛɛ Kɛ́lɛ̀ì lɛ̀ɛ́ gbaa ló yi kɛ é e dìè kóná ɓo lúó búnùzɛ̀ píé.

²⁶ È kɛ̀á a kɛ kília, áá wàa kpolà búnùzɛ̀ ɓèlè mɔ́ pɛ́lɛ̀ kpóṹ là zèe kɛ́ wa ɓoa ká. Kɛɛ lɛ̀ zí lɛ à káa, aà ɓíé nɔ́ mia là doó lɛ̀ lúó lɛ́ kɔa yàáa lɛ nyɛpìàa ká, kɛɛ é kɛ-wɔ̃̀ yɔɔ ɓo mia mɔ̀ sálà lɛ́ a ɓo e dìè káa kolo là zàá.

²⁷ Lɛ mi nɔ́ɔ fé mɔ̀ é ga nɔ́ doó. Yé aà kɛ kília, tó Wálà bɛ̃̀ɛ̃ e mɛ̀ĩ́-sà dɔ i mɔ̀.

²⁸ Zi nɔ́ doóa káa, Kɛ́lɛ̀ì nɔɔ̀ e kɛá nɔ́ doó sálà-ɓo-pɛ̀ ká, kɛɛ é mia búnùzɛ̀ kɛ-wɔ̃̀ yɔɔ ɓo o mɔ̀. Lɛ́ɛ̀ lo ɓíè mia là zeĩ́. Kɛɛ lɛ̀ɛ́ ló nuù kɛ-wɔ̃̀ yɔɔ wɛ̃́ĩ̀, kɛɛ à nuù lɛ́ɛ̀ lo kɛɛ̀á kɛ é mia lɛ́ o yàá à gɛ̀nɛ̀ɛ la.