Hííbúlù 4 - Wè-dɔ-wè Dɛɛ

¹ Kɛɛ dɛɛ káa, Wálà aà e wè-dɔ-wè lɛ́ à gbɛ̃̀ɛ̃̀ lɛ ɓɔ̀ à fĩ́ĩ́-dɔpìà wɔ̃̀ mɔ̀ɔ, tó ko lɛ̀ɛ. À mɔ́ɔ̀ wɔ̃̀ mɔ̀ɔ, kɔ̀à túó, yékɛ̀ ka dò é kɛ mia lɛ́ ò lo kɔ̃́ɔ̃̀ ɓɔ̀ fĩ́ĩ́-dɔpìà e kília mɔ̀ɔ dò ká.

² Ƃii kɔaà wɔ̃́ làṹ yièa ma, zi nɔ́ doó o à ma à káa ká. O wɔ̃́ làṹa ma, kɛɛ lɛ̀ɛ́ gbaa gbũ o mɔ̀, ɓii lɛ̀ wa maa, òó gbaa o kɔ̀ yà à wì zò-dɔ̀à-mɔ̀ káa mɔ́ɔ̀ wɔ̃̀ mɔ̀.

³ Kɛɛ mia lɛ́ kò à gɛ̃̀ wánà káa, kóò ɓɔ fĩ́ĩ́-dɔpìà e kília mɔ̀. Lɛ nɔ́ lɛ̀ zí Wálà a gèeá kélɛ̀, “Wɔ̃́ e m wàa, a kɛ máà m náá kpɔ̀ weeá kélɛ̀, ‘Òó ló ɓɔ gbɛɛ ɓoò m zì fĩ́ĩ́-dɔpìà.’ ” A gèe kíli, yé bɛ̃̀ɛ̃ là yɛɓo nyɛɛ̀ e kɛá é kã́ lúó lɛ́ e kpóṹ là zèe kɛɛ mɔ̀ɔ ká ká.

⁴ Ƃii wɔ̃́ dò gèeè lɛ Wálà là kíía lɛ̀ dò mɔ̀ é gbɛ̃̀á lúó sálápèèlɛ zɛ̀ɛ mɔ̀ kélɛ̀, “Wálà e e fĩ́ĩ́ dɔ à lúó sálápèèlɛɛ ká là yɛɓo séĩ́ kɛɛ̀ mɔ̀.”

⁵ Wɔ̃́ nɔ́ doóa gèeè lɛ zeĩ́ kélɛ̀, “Òó ló ɓɔ gbɛɛ ɓoò m zì fĩ́ĩ́-dɔpìà.”

⁶ Mia lɛ́ o wɔ̃́ làṹ yièa ma bèĩzɛ̀ɛ òó gbaa ɓɔ Wálà zì fĩ́ĩ́-dɔpìàa mɔ̀, ɓii òó gbaa wɔ̃́ gɛ̃̀ wánà káa mɔ́ɔ̀ wɔ̃̀ mɔ̀. Yé lɛ kília, mia dò o ɓe zeĩ́ kɛ ó ɓɔ fĩ́ĩ́-dɔpìà e kília mɔ̀.

⁷ Kóò wɔ̃́ e kéa yí dɔ ɓii Wálà e lúó dò kpɔ́ zeĩ́, tó wáà sì “Pɛ́nɛɛ.” E mɛ́ĩ́ ɓo áà gbɛ̃̀ à mɔ̀ lɛ̀ kɛ̀ɛ̀ búnùzɛ̀ diè e kɛáa ká. E kpɔ́ Dèɓé yí áà gèè Wálà kii lɛ̀ yé kɔaà à wɔ̃̀ gèea yí kélɛ̀, “Yé kaà Wálà wéè ma pɛ́nɛɛ, yékɛ̀ ká wũ-yí-gágà-là kɛ.”

⁸ È kɛ̀á Zásùà e ló míáa ká Wálà là fĩ́ĩ́-dɔpìàa mɔ̀ɔ, Wálà lɛ̀ɛ́ gɔ̃̀ lúó gbɛɛ wɔ̃̀ gèeè zeĩ́.

⁹ Lɛ̀ zí lɛ à káa, fĩ́ĩ́-dɔ lɛ tĩã́ ɓe Wálà là mia nì lɛ̀ɛ. Lɛ kélɛ̀ Wálà fĩ́ĩ́ lɛ́ e à dɔ lúó sálápèèlɛ zɛ̀ɛ píéa lɛ́ ɓe.

¹⁰ Ƃii mi nɔ́ɔ fé lɛ́ è ɓɔ Wálà zì fĩ́ĩ́-dɔpìàa, lɛ́ɛ̀ lo e fĩ́ĩ́ dɔɔ̀ e zì kɛ-yɛ̀ɓo mɔ̀, lɛ̀ zí Wálà a kɛáa lɛ́ ɓe.

¹¹ À mɔ́ɔ̀ wɔ̃̀ mɔ̀ɔ, kɔ̀à à kɛ-zì kpó-kpó naa kɛ kɔ́á ɓɔ fĩ́ĩ́-dɔpìà e kília mɔ̀, yékɛ̀ kɔa dò nɔ́ɔ fé é Wálà wéè tó lɛ̀ zí wa kɛá, lɛ́ a kɛ lɛ́ o kɔ̃́ lò yi mɔ̀ɔ lɛ́ ɓe.

¹² Wálà lé-wè lɛ ɓéèe, ɛ̃́ɛ̃́ wésá-wèsà. Lɛ líé-líé zɛ̀ é diá gèlè-gɔ̃-làà lé pèèlɛ zɛ̀ nɔ́ɔ fé là. Lɛ́ɛ̀ mia kã, áà lò mi yí, tó áà mi zò wà mi gɛ̀ɛ̀ o ɓò e kíe mɔ̀, ɛ̃́ɛ̃́ zeĩ́, lɛ́ɛ̀ lɛ̀ lɛ́ mi wɛ́lɛ́ è gbɛ̃̀ e kíe mɔ̀ yi, ɛ̃́ɛ̃́ lɛ̀ lɛ́ mi wɛ́lɛ́ yí-nyɔ́nɔ́ lɛ yía, lɛ́ɛ̀ o ɓo o kíe mɔ̀. E bɛ̀i, lɛ́ɛ̀ i zò-píé-wɔ̃̀, ɛ̃́ɛ̃́ i zò nàà-ká-wɔ̃̀ yí gɛ̃̀.

¹³ Wɔ̃́ gbɛɛ wá ɓe kɛɛ à bĩ̀ĩĩ̀ é kɛá Wálà mɔ̀. Pɛ séĩ́-séĩ́ lɛ́ à kɛɛ̀ lɛɛ, à dàà lɛ à lɛ̀ɛ wáà-là, ɛ̃́ɛ̃́ à lé ɓoò lɛ à nyìɛ mɔ̀. Ɛ́ɛ̃́ à ye lɛ́ à mɔ̀ kó ko dìè wɔ̃̀ gèe à lɛ̀ɛ.

Zízɛ̀ lɛ́ e sálà-ɓò-Wálà-mɔ̀-mìà Wũ-là-mì kpànazɛ̀ káa

¹⁴ À mɔ́ɔ̀ wɔ̃̀ mɔ̀ɔ, kɔ̀à kùnù zò-dɔ̀à-mɔ̀ wɔ̃̀ lɛ́ kɔaà wéé à mɔ̀ɔ wɔ̃̀ mɔ̀ kpɛ̃ĩ le. Ƃii sálà-ɓò-Wálà-mɔ̀-mìà wũ-là-mì kpànazɛ̀ dò lɛ ɓe ko lɛ̀ɛ. Aà ló Wálà wɛlɛ kpó-kpó mɔ̀. Mí e kília lɛ́ e Zízɛ̀ lɛ́ e Wálà Gbe káa káa.

¹⁵ Kò sálà-ɓò-Wálà-mɔ̀-mìà wũ-là-mì e kília, ye wá mi lɛ́ ko zì kɛ̀ yɔ̃́ṹ-yɔ̃̀ũ̀ kɔ̀ nì lɛ̀ɛ́ tíé kã́ à mɔ̀ɔ ká. Kɛɛ ko wũ-là-mì e kília yí-dã́-wɔ̃̀ nɔ́ɔ fé lɛ́ è ɓɔ ko làa, e ɓɔ à mɔ̀ nɔ́ kíli. Kɛɛ lɛ̀ɛ́ gbaa kɛ-wɔ̃̀ yɔɔ kɛ.

¹⁶ À mɔ́ɔ̀ wɔ̃̀ mɔ̀ɔ, kɔa zò è kɛ gágà kɔ́á nu Wálà là dɔ-táŋáná lɛ́ zò-kɛ̀-sɛ̀ lɛ yí mia ɓéèe wɛ̃́ĩ̀a ká kɔ̀ɛ́. À lɛ̀ mɔ̀ lɛ́ è lo ko yéĩ̀ kṹũ̀ yi, ɛ̃́ɛ̃́ lɛ́ à zì zò-kɛ̀-sɛ̀ è lo kɛɛ̀ yi ko wɛ̃́ĩ̀, kɛ é gbũ ko mɔ̀ yé lɛ ko mɔ̀ kó à sɔ̀lɔ̀ ɓoa káa káa.