Gɛ̀lésìà 6 - Wè-dɔ-wè Dɛɛ

Kà gbũ ka kíe nì mɔ̀ pɔɔ̀ gbííni sípìà

¹ M lèe-gé vɔ̀, yé waà ka dò kṹ wɔ̃́ yɔɔ kɛɛ̀ mɔ̀ɔ, mia lɛ́ Gɛ̀ɛ̀ Púlú lɛ ka píéa, lɛ ka mɔ̀ ká à gbɛ̃̀ zi kpeĩ píé. Kɛɛ kà à kɛ ka kpóló kpɔ̀ ka mɔ̀ zì píé. Ɛ́ɛ̃́ káà lɛ̀ gɛ̃̀ ka dìè là, yékɛ̀ yí-dã́-wɔ̃̀ é ɓɔ ka bɛ̃̀ɛ̃ ka mɔ̀.

² Kà gbũ ka kíe nì mɔ̀ pɔɔ̀ gbííni sípìà. Zí e kéa káa, káà lo Kɛ́lɛ̀ì zì lɔ́ɔ̀ɔ kɛɛ̀ à ká.

³ Ƃii yé mi dò aà e dìè sí pɛ-kɛ̀á-pɛ̀ ká, lɛ́ ye wá mɔṹ à káa, è à yí dɔ kélɛ̀ à dìè bèkɛ̀ lɛ́ à ɓoa.

⁴ Lɛ à mɔ̀ mi í mɛ̀ĩ́-sà dɔ i dìè zì wɔ̃́ kɛ-kɔ̀ mɔ̀. É kɛ̀á lɛ sɛ̀ɛ, kɛɛ bɛ̀i aà kɛ i mɔ̀ í kɛ gɔ́ɔ́-gɔ̀ɔ̀ wɔ̃́ lɛ́ i dìè ɓaà kɛɛ wɛ̃́ĩ̀. Ye wá à mɔ̀ kɛ í à dã́ wɔ̃́ lɛ́ mi gbɛɛ aà kɛɛ ká.

⁵ Ƃii lɛ mi séĩ́ mɔ̀ é ló e dìè-tĩ́ zì vũ gbííni káa mɔ́ɔ̀ wɔ̃̀ mɔ̀.

⁶ Mi lɛ́ ò Wálà lé-wè zɔ̃̀ɔ̃̀ à lɛ̀ɛ, lɛ à mɔ̀ wà mi lɛ́ e là pɛ-zɔ̃̀ɔ̃̀-mì káa ó dɔ pɛ yiè séĩ́ lɛ́ lɛ mi lɛ́ ò pɛ zɔ̃̀ɔ̃̀ à lɛ̀ɛ kɛ̀lɛ̀ɛ yí.

⁷ Yékɛ̀ ká ka dìè bèkɛ̀ ɓo. Mi gbɛɛ lɛ̀ɛ́ bɛ̀i Wálà bèkɛ̀ ɓoò. Mi lɛ́ɛ̀ pɛ kpó-kpó nɔ́ à tààa ɓɛɛ ɓo.

⁸ Mí è pɛ tàà e dìè-tĩ́ zì nàà-ká-wɔ̃̀ làa, pɛ ɓɛɛ lɛ́ è lo à ɓoò yia lɛ́ e ga káa. Kɛɛ é pɛ tàá Gɛ̀ɛ̀ Púlú làa, pɛ ɓɛɛ lɛ́ è lo à ɓoò yia, lɛ́ e kɛ̀ɓe wɔ́lɔ́-wɔ́lɔ́ káa.

⁹ À mɔ́ɔ̀ wɔ̃̀ mɔ̀ɔ, yékɛ̀ kɔa yí é ga wɔ̃́ yiè kɛɛ̀ mɔ̀. Ƃii yé kòó kɔ̃́ à kɛɛ̀ mɔ̀ɔ, lúó lɛ́ kò lo pɛ ɓɛɛ ɓoò à káa, lɛ́ɛ̀ lo ɓɔɔ̀.

¹⁰ À mɔ́ɔ̀ wɔ̃̀ mɔ̀ɔ, yé lúó nɔɔ̀ aà kɛá ko lɛ̀ɛ lúó nɔ́ɔ fé káa, kɔ̀à wɔ̃́ yiè kɛ à píé mia séĩ́ lɛ̀ɛ. Kɛɛ mia kpó-kpó lɛ́ kɔ̀à kɛ̀ o lɛ̀ɛ, lɛ́ o mia lɛ́ o ko kɔ̀-píé-mìà ká zò-dɔ̀à-mɔ̀ yía káa.

Lìè-wè léĩ́-to-mɔ̀ zɛ̀ ɛ̃́ɛ̃́ wèè-mia-bà tèá-là zɛ̀

¹¹ Pɛ bɛ̃̀ɛ̃ nyìɛ̀ búá-búá lɛ́ m pɛ bɛ̃̀ɛ̃ à ká ka píé m dìè-tĩ́ kɔ̀ káa, kà gɛ̃̀.

¹² Mia lɛ́ ò à kɛ-zì nàà kɛ ó ka kṹ gágà ká bɔ̃́ɔ̃́ sía, o lɛ́ o mia lɛ́ ò nàà ó wɔ̃́ kɛ kɛɛ mia ó gɛ̃̀áa, o dìè ó lé-gbùò-là kɛ pɛ lɛ́ e mi mɔ̀ pɛ́lɛ̀ zèía làa káa. Kɛɛ pɛ́ nɔ́ ò mɔ́ɔ̀ à kɛ ɓoa lɛ́ e kélɛ̀, yékɛ̀ mia ó o sã̀ dɔ Kɛ́lɛ̀ì là kɔ́lɔ́sìa mɔ́ɔ̀ wɔ̃̀ mɔ̀.

¹³ É kɛ bɛ̃̀ɛ̃ mia yé o kɔ̀ lɛ bɔ̃́ɔ̃́ zɛ-wɔ̃̀ yía káa, òó Lɔ́ɔ̀ɔ kɛ. Óò nàà ká bɔ̃́ɔ̃́ sí kɛɛ ó lé-gbùò-là kɛ zi lɛ́ ka ka dìè nɔá pɛ lɛ́ lɛ mi mɔ̀ pɛ́lɛ̀ zèía wɔ̃̀ lɛ̀ɛ là.

¹⁴ Kɛɛ ma yee, wɔ̃́ nɔ́ lɛ́ m̀ lo lé-gbùò-là kɛɛ̀ à mɔ́ɔ̀ wɔ̃̀ mɔ̀ɔ, lɛ́ e ko Dàa-mì Zízɛ̀ Kɛ́lɛ̀ì là kɔ́lɔ́sìa káa. Ƃii à zì kɔ́lɔ́sìa kolo là zàáa, kpóṹ là zèe gaà lɛ ma yee m nyìɛ. Ɛ́ɛ̃́ ma bɛ̃̀ɛ̃, m gaà lɛ kpóṹ là zèe mɔ̀.

¹⁵ Kɛɛ ko bɔ̃́ɔ̃́ síì é gɔ̃̀á bɛ̃̀ɛ̃ kɛɛ̀ à ká, ɛ̃́ɛ̃́ à síì é kɛá bɛ̃̀ɛ̃ à káa, ye wá wɔ̃́ dò ká. Pɛ ké yee e wɔ̃́ɔ káa lɛ́ e mi kɛ̀ mi dɛɛ lɛ́ lɛ ɓea ká káa.

¹⁶ Zò-yà-gé wà mia yéĩ̀ kṹũ̀ è kɛ mia séĩ́ lɛ́ ò tàà wɔ̃́ kɛ-zì e kéa kpáá yía fĩ̀ã̀. Ɛ́ɛ̃́ wɔ̃́ nì e kéa è kɛ Wálà là mia nì lɛ́ o Éézɛ̀lɛ̀-mìà wánà zɛ̀ káa fĩ̀ã̀.

¹⁷ É kã́ pɛ́nɛɛ mɔ̀ é ló líéa, yékɛ̀ mi gbɛɛ é m lé kpèi-kpéí, ɓii kpɔnɔ lɛ́ e m gbĩ-kpàla mɔ̀ɔ, lɛ́ɛ̀ à zɔ̃̀ɔ̃̀ kélɛ̀ m Zízɛ̀ là lùò ká.

¹⁸ M lèe-gé vɔ̀, ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ é kɛ ka gɛ̀ɛ̀ píé. É kɛ kíli.