Gɛ̀lésìà 3 - Wè-dɔ-wè Dɛɛ

Lɔ́ɔ̀ ɛ̃́ɛ̃́ zò-dɔ̀à-mɔ̀

¹ Gɛ̀lésìà-mìà, ka yí gínià lɛ. Dé e sɛ̀ɛɛ̀ kpɔ́ ka mɔ̀? Ka mia lɛ́ o Zízɛ̀ Kɛ́lɛ̀ì zì gá a ɓo kɔ́lɔ́sì mɔ̀ɔ wɔ̃̀ yí ɓo ka lɛ̀ɛ e yí púlú zɛ̀ ká ka nyìɛ mɔ̀ɔ káa ká.

² Kà wɔ̃́ doó e kéa gèe m lɛ̀ɛ. Wɔ̃́ lɛ́ Lɔ́ɔ̀ɔ à gèea kɛɛ̀ kolo là lɛ́ ka Wálà zì Gɛ̀ɛ̀ gɛ̃̀ɛ? Ɛ́ɛ̃́ kɛ̀ wɔ̃́ làṹ yièa maà tó káà ka zò dɔ̀ à mɔ̀ɔ lɛ?

³ Mɛ́ e kɛ lɛ́ ka bè zɛ̀ ké? Ka gbɛ̃̀ wɔ̃́ kɛɛ̀ ká Wálà zì Gɛ̀ɛ̀ kpáá yí. Káà nàà ká wɔ̃́ kɛɛ̀ léĩ́ tó gbaa ka dìè zì yíkɛ̀ gáàa ká?

⁴ Káà nàà ká gèe kélɛ̀ wɔ̃́ séĩ́ lɛ́ ka die à yía, lɛ wɔ̃́ dà tã́ã̀ zɛ̀ ká? E kɛ wɔ̃́ dà tã́ã̀ zɛ̀ ká nɔ́ ɓɔ̀ɔ?

⁵ Wɔ̃́ lɛ́ Lɔ́ɔ̀ɔ à gèea kɛɛ̀ lɛ́ Wálà à mɔ́ɔ̀ Gɛ̀ɛ̀ Púlú nɔ ɓo ka lɛ̀ɛ, ɛ̃́ɛ̃́ lɛ́ à mɔ́ɔ̀ wɔ̃́ kpàlézɛ̀ kɛ ɓo ka fĩ̀ã̀a? Ɛ́ɛ̃́ wɔ̃́ làṹ yièa má ka ɓo lɛ́ ka ka zò dɔ à mɔ̀ɔ lɛ?

⁶ Zí e kɛá Éɓɔ́lɔ́hã́ã̀ káa lɛ́ ɓɛ. “E e zò dɔ Wálà mɔ̀. À zì zò-dɔ̀à-mɔ̀ e kília kolo là zàáa, Wálà a sí gbaa é kɛ mi kpeĩ ká.”

⁷ Kà à yí dɔ kélɛ̀ mia lɛ́ zò-dɔ̀à-mɔ̀ lɛ o yía, lɛ́ o Éɓɔ́lɔ́hã́ã̀ sùu-là-mìà kpó-kpó káa.

⁸ Wálà kiia a zɔ̃̀ɔ̃̀ bèĩzɛ̀ mɔ́ kélɛ̀ Wálà lɛ́ɛ̀ lo sɛ́lɛ́ gbɛɛ yí-mìà kɛɛ̀ kpeĩ e dìè lɛ̀ɛ o zì zò-dɔ̀à-mɔ̀ kolo là zàá. Lɛ̀ e kɛ kília, Wálà kiia e wɔ̃́ làṹ yièa gèe mɔ́ bèĩzɛ̀ Éɓɔ́lɔ́hã́ã̀ lɛ̀ɛ weeá kélɛ̀, “Mia séĩ́ lɛ́ o kpóṹ làa, Wálà lɛ́ɛ̀ lo lúà kpɔ́ɔ̀ o mɔ̀ i tɔ́ yí zàá.”

⁹ Zò-dɔ̀à-mɔ̀ e kɛ Éɓɔ́lɔ́hã́ã̀ yí. Lúà kpɔ́ɔ̀ e kɛá à mɔ̀. À mɔ́ɔ̀ wɔ̃̀ mɔ̀ɔ, mia séĩ́ lɛ́ zò-dɔ̀à-mɔ̀ lɛ o yía, lúà kpɔ́ɔ̀ lɛ o mɔ̀ lɛ̀ zí e kɛ à ká à mɔ̀ɔ lɛ́ ɓe.

¹⁰ Mia lɛ́ o zò dɔɔ̀ lɛ Lɔ́ɔ̀ɔ kũ̀ tã́ã̀ wɔ̃̀ mɔ̀ɔ, náá lɛ o mɔ̀. Ƃii à bɛ̃̀ɛ̃ɛ̃̀ lɛ Wálà kiia yí weeá kélɛ̀, “Mi nɔ́ɔ fé lɛ́ lɛ̀ɛ́ wɔ̃́ séĩ́ lɛ́ à bɛ̃̀ɛ̃ɛ̃̀ lɛ Lɔ́ɔ̀-kiia yía kṹ tã́ã̀ teelea, náá lɛ à mɔ̀.”

¹¹ Dɛɛ ká gbaa, lɛ dóo séŋé-sèŋè kélɛ̀ mi gbɛɛ kɛɛ̀ wá kpeĩ Wálà lɛ̀ɛ Lɔ́ɔ̀ɔ kolo là zàá, ɓii “Mi lɛ́ à zì zò-dɔ̀à-mɔ̀ kolo là zàáa lɛ Wálà lɛ̀ɛ kpeĩa, lɛ́ɛ̀ lo kɛ̀ɓe sɔ̀lɔ̀ ɓoò.”

¹² Kɛɛ Lɔ́ɔ̀ɔ zò dɔɔ̀ wá zò-dɔ̀à-mɔ̀ mɔ̀. Kɛɛ “Mi nɔ́ɔ fé lɛ́ è wɔ̃́ lɛ́ Lɔ́ɔ̀ɔ à gèea kɛ̀ɛ, lɛ́ɛ̀ lo kɛɛ̀ ɓe Lɔ́ɔ̀ɔ yí zàá.”

¹³ Kɛɛ Kɛ́lɛ̀ì aà ko la náá lɛ́ Lɔ́ɔ̀ɔ è nu à káa kɛ̀lɛ̀. Aà náá e kília sí e mɔ̀ gbaa ko lɛ̀ɛ. Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Mi nɔ́ɔ fé lɛ́ ò dũ yílí mɔ̀ɔ, náá lɛ à mɔ̀.”

¹⁴ Kɛ́lɛ̀ì a kɛ kíli kɛɛ lúà lɛ́ Wálà e e wè dɔ à ká Éɓɔ́lɔ́hã́ã̀ lɛ̀ɛ, kɛɛ à nɔɔ̀ é kɛá sɛ́lɛ́ gbɛɛ yí-mìà lɛ̀ɛ Kɛ́lɛ̀ì Zízɛ̀ yí zàá, kɛɛ zò-dɔ̀à-mɔ̀ yí zàáa kó Gɛ̀ɛ̀ Púlú lɛ́ Wálà e e wè dɔ à káa sɔ̀lɔ̀ ɓo.

Lɔ́ɔ̀ɔ wà wè-dɔ-wèa

¹⁵ M lèe-gé vɔ̀, ḿm̀ lo wɔ̃́ gɔ̃̀á lɛ́ à gbɛ̃̀ɛ̃̀ lɛ mia kɛ-kɔ̀ mɔ̀ɔ zɔ̃̀ɔ̃̀ ka lɛ̀ɛ. Yé mia pèèlɛ waà wéé wɔ̃́ mɔ̀, lɛ́ waà kii kɛ wɔ̃́ e kília mɔ́ɔ̀ wɔ̃̀ mɔ̀ɔ, mi gbɛɛ lɛ̀ɛ́ bɛ̀i wɔ̃́ lɛ́ wa mɔ́ɔ̀ kii kɛ kília yí sìè, ɛ̃́ɛ̃́ kɛ bɛ̃̀ɛ̃ é à là kpɔ́ zi nɔ́ɔ fé ká.

¹⁶ Kɛɛ Wálà e e wè dɔ Éɓɔ́lɔ́hã́ã̀ wà e sùu-là-mì lɛ̀ɛ. Wálà kiia lɛ̀ɛ́ à gèe Wálà e e wè dɔ Éɓɔ́lɔ́hã́ã̀ wà e sùu-là-mìà lɛ́ e kélɛ̀ mia kù gbùò zɛ̀ɛ lɛ̀ɛ. Kɛɛ lɛ́ɛ̀ à gèe sùu-là-mì, lɛ́ e mi doó káa lɛ̀ɛ. Mi doó e kília lɛ́ e Kɛ́lɛ̀ì káa.

¹⁷ Wɔ̃́ m̀ gèea gɛ̃̀ e ké. Wálà e e wè dɔ, ɛ̃́ɛ̃́ e à gèe kélɛ̀ lɛ́ɛ̀ lo ɓɔɔ̀ e wè-dɔ-wèa mɔ̀. Lɔ́ɔ̀ lɛ́ e nu kɛɛ kɛ̀ɛ̀ aà die wè-dɔ-wè e kília là wũ yììsɛ là vũ̀ yààkaa, lɛ̀ɛ́ bɛ̀i wè-dɔ-wè e kília yí sìè, ɛ̃́ɛ̃́ kɛ é kɛ wɔ̃́ dà tã́ã̀ zɛ̀ ká bɛ̃̀ɛ̃.

¹⁸ Ƃii è kɛ̀á pɛ lɛ́ Wálà è à nɔɔ lɛ́ɛ̀ nu Lɔ́ɔ̀ɔ mɔ́ɔ̀ wɔ̃̀ mɔ̀ɔ, kɛɛ lɛ̀ɛ́ nu mɔṹ à wè a dɔɔ wɛ̃́ĩ̀. Kɛɛ Wálà a nɔ Éɓɔ́lɔ́hã́ã̀ lɛ̀ɛ, ɓii aà e wè dɔ à ká kília mɔ́ɔ̀ wɔ̃̀ mɔ̀.

¹⁹ Yé aà kɛ kília, mɛ́ e Lɔ́ɔ̀ɔ kɛ-yɛ̀ɓo ká? O nu Lɔ́ɔ̀ɔ ká kɛ é zi lɛ́ wɔ̃́ yɔɔ kɛɛ̀ lɛ à káa zɔ̃̀ɔ̃̀. E kɛ à mɔ̀ Lɔ́ɔ̀ɔ é tó ɓe é tóá kíli Éɓɔ́lɔ́hã́ã̀ sùu-là-mì lɛ́ o o wè e kília dɔ à lɛ̀ɛ é nu. Wálà là vɔ-mìà lɛ́ o Lɔ́ɔ̀ɔ nɔ tã́ã̀ zèea. Gɔ̃ doó e kɛ yí gbɛ̃̀-fĩ̀ã̀ kɛ-mì ká.

²⁰ Kɛɛ òó naa gbɛ̃̀-fĩ̀ã̀ kɛ-mì ká yé mí è wɔ̃́ kɛ̀ɛ lɛ doóa ká. Wálà lɛ nɔ́ doó.

Pɛ́ Lɔ́ɔ̀ɔ lɛ à wɛ̃́ĩ̀ ɓea

²¹ À yí lɛ́ e kélɛ̀, Lɔ́ɔ̀ɔ lɛ́ɛ̀ gèlè gɔ̃ Wálà zì wè-dɔ-wè nìa ká? Ye wá kíli gbɛɛ ɓo. Ƃii è kɛ̀á lɔ́ɔ̀ lɛ́ è nu kɛ̀ɓe ká mia lɛ̀ɛ waà nɔɔ, bɛ̀i áá kɛɛ̀ mia mɔ̀ tó wáà kɛ̀ kpeĩ Wálà lɛ̀ɛ lɔ́ɔ̀ɔ kolo là zàá.

²² Kɛɛ Wálà kiia aà gèe kélɛ̀ kpóṹ là zèe séĩ́ lɛ kɛ-wɔ̃̀ yɔɔ là yíkɛ̀ gáàa wì, kɛɛ nɔ̀-lɛ̀ɛ-pɛ̀ lɛ́ Wálà e e wè dɔ à ká lɛ́ à gã̀ gbɛ̃̀ɛ̃̀ lɛ zò-dɔ̀à-mɔ̀ là Zízɛ̀ Kɛ́lɛ̀ì yía, kɛɛ à nɔɔ̀ é kɛá mia lɛ́ zò-dɔ̀à-mɔ̀ lɛ o yía lɛ̀ɛ.

²³ Kɛɛ zò-dɔ̀à-mɔ̀ zì lúó é tĩã́ ɓɔɔ̀ɔ, ko kɛ lɛ̀ pɛ lɛ́ ko bĩ́-kɛ̀ì, tó Lɔ́ɔ̀ɔ áà e nyìɛ kɛ̀ ko mɔ̀ teele é tóá kíli zò-dɔ̀à-mɔ̀ e ké, lɛ́ e kɛ nupìàa, lɛ́ɛ́ é ɓo à là.

²⁴ À mɔ́ɔ̀ wɔ̃̀ mɔ̀ɔ, ko kpɔ́ɔ̀ e kɛá Lɔ́ɔ̀ɔ kɔ̀ là teele é tóá kíli Kɛ́lɛ̀ì é nu kɛɛ ko kɛɛ̀ é kɛá kpeĩ Wálà lɛ̀ɛ zò-dɔ̀à-mɔ̀ kolo là zàá.

²⁵ Lɛ̀ mɔṹ lɛ́ zò-dɔ̀à-mɔ̀ zì lúó aà ɓɔɔ, ko kpɔ́ɔ̀ wá gbaa Lɔ́ɔ̀ɔ kɔ̀ là.

²⁶ Zò-dɔ̀à-mɔ̀ kolo là zàá lɛ́ ka séĩ́ ka Wálà gbe nì ká, kà Kɛ́lɛ̀ì Zízɛ̀ nì ka kɛ̀ doó kolo là zàáa.

²⁷ Míá ka bàtáì kɛɛ̀ lɛ, tó áà kɛ̀ kà Kɛ́lɛ̀ì nì káà kɛ̀ doóa, kaà Kɛ́lɛ̀ì dà ka mɔ̀ sɔ ká.

²⁸ À mɔ́ɔ̀ wɔ̃̀ mɔ̀ɔ, mia kɛ̀ doò do zì gbɛɛ wá ɓe Zúù-mìà wà sɛ́lɛ́ gbɛɛ yí-mìà, ɛ̃́ɛ̃́ lùò vɔ̀, e bɛ̀i mia yé o wá lùò káa o fĩ̀ã̀, e bɛ̀i gɔ̃ã̀ wà loà nì o fĩ̀ã̀ nɔ́ kíli. Ka séĩ́-séĩ́ ka doó kà Kɛ́lɛ̀ì Zízɛ̀ nì ka zì kɛ̀ doó yí zàá.

²⁹ É kɛ̀á Kɛ́lɛ̀ì là pɛ lɛ́ e ka káa, kɛɛ ka mɔṹ Éɓɔ́lɔ́hã́ã̀ sùu-là-mìà ká. Ɛ́ɛ̃́ káà lo pɛ lɛ́ Wálà e e wè dɔ à káa gɛ̃̀ɛ̃̀.