Gɛ̀lésìà 2 - Wè-dɔ-wè Dɛɛ

Pɔ́ɔ̀ wà àpɔ́sɔ̀lɔ̀ vɔ̀ yé o tóa

¹ Lɛ̀ kɛ̀ɛ̀ vũ̀ doó wɛ́lɛ́ yììsɛ e diea, kò Bánábà ko ló ko mɛ̀ĩ́ Zùlúsàlɛ̀. Kò Tátɔ̀ nì lɛ́ ko ló e kília ɓoa.

² M ló ɓii Wálà aà à zɔ̃̀ɔ̃̀ m lɛ̀ɛ kélɛ̀ ḿ lóa mɔ́ɔ̀ wɔ̃̀ mɔ̀. Lɛ̀ kò Wálà-mìà líé-sí-mìàa ko pá ko kíe mɔ̀ ko doó là píéàa, m wɔ̃́ làṹ yiè lɛ́ ma gèe sɛ́lɛ́ gbɛɛ yí-mìà lɛ̀ɛ gã̀ pɛ́ɛ́ o lɛ̀ɛ. Mḿ gbaa naa kɛ m zì yɛɓo lɛ́ maà kɛ, ɛ̃́ɛ̃́ lɛ́ m à kɛpìàa, é kɛ wɔ̃́ dà tã́ã̀ zɛ̀ ká.

³ M ɓɛ́ɛ Tátɔ̀, yé bɛ̃̀ɛ̃ lɛ Gílíì mi káa, òó gbaa à kṹ gana ká kɛ é bɔ̃́ɔ̃́ sí.

⁴ Yé bɛ̃̀ɛ̃ gɔ̃ã̀ dò lɛ́ o o dìè kɛ ko ɓɛ́ĩ̀ ye-mìà ká, lɛ́ o dàaà e kɛá nɔ́ ɓɔ̀ɔ ko bàa, wa naa ó à bɔ̃́ɔ̃́ zɛɛ ká. Míá o kília o dà ko bà nɔ́ kpɔ̀lɔ̀ũ̀ le kɛ ó ko mɛ́ nyɛ, ɛ̃́ɛ̃́ kɛ ó zi lɛ́ mia lɛ́ ko ké, lɛ́ kò Kɛ́lɛ̀ì Zízɛ̀ nì ko doóa, ó zi lɛ́ ko tóò lɛ à ká ko dìè kɔ̀ mɔ̀ɔ gɛ̃̀. Wa naa ó ko lùò là kɛ̀ ɓo.

⁵ Kòó gbaa bɛ̃̀ɛ̃ wéé gbɛɛ ɓo à mɔ̀ kɛ ó kɛ kíli. Kɔa kɛ kíli kɛɛ kó wánà-wɔ̃̀ lɛ́ lɛ wɔ̃́ làṹ yièa yía yàlà bɛ̀i ka lɛ̀ɛ.

⁶ Kɛɛ mia yé ò o gɛ̃̀ mia líé-sí-mìà ká yia — ma gèe kíli ɓii wɔ̃́ e kília wá m lɛ̀ɛ kpànazɛ̀. Wálà lɛ̀ɛ́ dɔ mi nɔ́ɔ fé dò píé à zì kɛ̀ kpànazɛ̀ wɛ̃́ĩ̀ — mia líé-sí-mìà o kília, òó gbaa wɔ̃́ kɛ-zì dɛɛ gbɛɛ zɔ̃̀ɔ̃̀ m lɛ̀ɛ.

⁷ Kɛɛ o à yí dɔ gbaa kélɛ̀ yɛɓo lɛ́ Wálà a nɔ m lɛ̀ɛ, lɛ́ e wɔ̃́ làṹ yièa gèè sɛ́lɛ́ gbɛɛ yí-mìà lɛ̀ɛ káa, zi nɔ́ doóa lɛ́ e yɛɓo lɛ́ e wɔ̃́ làṹ yièa gèè Zúù-mìà lɛ̀ɛ nɔ à ká Pílɛ̀ lɛ̀ɛ.

⁸ Ƃii Wálà là yíkɛ̀ gáàa lɛ́ a kɛ lɛ́ m kɛ àpɔ́sɔ̀lɔ̀ ká sɛ́lɛ́ gbɛɛ yí-mìà lɛ̀ɛ, zi nɔ́ doóa lɛ́ Wálà zì yíkɛ̀ gáàa e Pílɛ̀ kɛá àpɔ́sɔ̀lɔ̀ ká Zúù-mìà lɛ̀ɛ.

⁹ Zĩ́ĩ̀, Pílɛ̀, e bɛ̀i Zɔ̃̀ɔ̃́ lɛ́ o o gɛ̃̀ mia kpànazɛ̀ káa, o à yí dɔ gbaa kélɛ̀ Wálà aà yɛɓo lé paàa zɛ̀ sùua nɔ m lɛ̀ɛ ḿ kɛ. Lɛ̀ e kɛ kília, o wéà kɛ kò Bánábà ko ká. Wa gèe kélɛ̀ kò ye nì ko yɛɓo doó kɛ-mìà ká kɛ kó yɛɓo kɛá sɛ́lɛ́ gbɛɛ yí-mìà bà, ɛ̃́ɛ̃́ kɛ o bɛ̃̀ɛ̃ ó yɛɓo kɛ Zúù-mìà bà.

¹⁰ Wɔ̃́ nɔ́ wa pɛ̃́ ko mɔ̀ɔ lɛ́ e kélɛ̀, ko zò é vùò mia lɛ́ pɛ wá o kɛ̀lɛ̀ lɛ́ o kɛ o bàa wɔ̃̀ káa. Wɔ̃́ nɔ́ doóa lɛ́ maà à kɛ-zì naa kɛ ḿ kɛɛ.

Pɔ́ɔ̀ e mɛ́ĩ́ ɓo Pílɛ̀ lɛ̀ɛ Ã́téɔ̀

¹¹ Lɛ̀ Pílɛ̀ e nu Ã́téɔ̀ɔ, m mɛ́ĩ́ ɓo à lɛ̀ɛ mia séĩ́ wɛlɛ mɔ̀, ɓii à wɔ̃́ yɔɔ kɛɛ̀ e kɛáa mɔ́ɔ̀ wɔ̃̀ mɔ̀.

¹² Kɛ gɔ̃ã̀ lɛ́ Zĩ́ĩ̀ e o vɔɔ ó tĩã́ ɓɔɔ̀ yia, Pílɛ̀ wà sɛ́lɛ́ gbɛɛ yí-mìà o kɛ pɛ ɓèlèpìà e kíe bà. Kɛɛ lɛ̀ lɛ́ gɔ̃ã̀ o kília o ɓɔ yía, Pílɛ̀ e e yí ɓo gbaa o mɔ̀, tó wà ye nì òó pɛ ɓèlè gbaa e kíe bà. A kɛ kíli ɓii e kɛ túópìà mia lɛ́ wa gèe ó sɛ́lɛ́ gbaa yí-mìà bɔ̃́ɔ̃́ zɛɛ lɛ̀ɛ.

¹³ Zúù-mìà yé o kɛ ko lèe-gé vɔ̀ ká yia, o kɛ o dìè wɛlɛ lipìà lɛ̀ zí Pílɛ̀ e kɛ à kɛpìà káa lɛ́ ɓe. O dìè wɛlɛ o kɛ à lipìàa, e à kɛ Bánábà vɔ̀ɔ e gó zi yièa píé.

¹⁴ Lɛ̀ ma yí dɔ gbaa kélɛ̀ zí o kɛ tópìà à píéa, ye wá kpeĩ lɛ̀ zí wánà-wɔ̃̀ lɛ́ e wɔ̃́ làṹ yièa yía lɛ à ká kpeĩa lɛ́ ɓea, ma gèe Pílɛ̀ lɛ̀ɛ o séĩ́-séĩ́ o wɛlɛ mɔ̀ kélɛ̀, “I Zúù mi ká. Kɛɛ i kɛ sɛ́lɛ́ gbɛɛ yí-mìà kɛ-wɔ̃̀ kɛpìà. Ìí gbaa kɛ wɔ̃́ kɛpìà lɛ̀ Zúù mi lɛ́ ɓe. Yé lɛ kília, zi sùu kpɛɛ̀ lɛ́ ì bɛ̀i à mɔ̀ í sɛ́lɛ́ gbɛɛ yí-mìà kɛá kɛ ó Zúù-mìà kɛ-wɔ̃̀ kɛ?”

Zúù-mìà wà sɛ́lɛ́ gbɛɛ yí-mìà o laà lɛ zò-dɔ̀à-mɔ̀ kolo là zàá

¹⁵ Ko vɔ̀ɔ Zúù-mìà lɛ́ o ko yea. Ko wá sɛ́lɛ́ gbɛɛ yí-mìà kɛ-wɔ̃̀ yɔɔ zɛ̀ɛ ká.

¹⁶ Kɛɛ kóò à yí dɔ kélɛ̀ pɛ́ è mi kɛ̀ kpeĩ Wálà lɛ̀ɛ lɛ́ e zò-dɔ̀ Zízɛ̀ Kɛ́lɛ̀ì mɔ̀ doó káa. Ye wá wɔ̃́ lɛ́ Lɔ́ɔ̀ɔ à gèea kɛɛ̀ ká. Ko vɔ̀ɔ kɔaà ko zò dɔ Kɛ́lɛ̀ì Zízɛ̀ mɔ̀, kɛ ko kɛɛ̀ é kɛá kpeĩ Wálà lɛ̀ɛ ko zì zò-dɔ̀ Kɛ́lɛ̀ì mɔ̀ kolo là zàá. Kɛɛ ye wá wɔ̃́ lɛ́ Lɔ́ɔ̀ɔ à gèea kɛɛ̀ ká. Ƃii mi gbɛɛ kɛɛ̀ wá kpeĩ Wálà lɛ̀ɛ wɔ̃́ lɛ́ Lɔ́ɔ̀ɔ à gèea kɛɛ̀ kolo là.

¹⁷ Zi lɛ́ kò à kɛ-zì nàá kɛ kó kɛ kpeĩ Wálà lɛ̀ɛ kò Kɛ́lɛ̀ì nì ko kɛ̀ doó yía, yé waà à gɛ̃̀ kélɛ̀ ko kɛ-wɔ̃̀ yɔɔ kɛ-mìà ká lɛ̀ zí sɛ́lɛ́ gbɛɛ yí-mìà o à káa lɛ́ ɓea, lɛ́ɛ̀ à zɔ̃̀ɔ̃̀ kélɛ̀ Kɛ́lɛ̀ì lɛ yɛɓo kɛ̀ kɛ-wɔ̃̀ yɔɔ mɔ̀ mì ká? Ye wá gbɛɛ ɓo kíli.

¹⁸ Yé maà gbɛ̃̀ máà pɛ lɛ́ maà wí tã́ã̀a dɔ̀ zeĩ́a, lɛ́ɛ̀ à zɔ̃̀ɔ̃̀ kélɛ̀ ḿm̀ Lɔ́ɔ̀ɔ sìè.

¹⁹ É ló é gbɛ̃̀á Lɔ́ɔ̀ɔ mɔ̀ɔ, ḿm̀ bɛ̀i à mɔ̀ ma gèe kélɛ̀ m gaà lɛ. Lɔ́ɔ̀ɔ dìè lɛ́ e m zɛɛ. M gaà lɛ kíli kɛɛ ḿ kɛ ɓe Wálà lɛ̀ɛ. Waà kò Kɛ́lɛ̀ì ko zɛ là kɔ́lɔ́sìa mɔ̀.

²⁰ À mɔ́ɔ̀ wɔ̃̀ mɔ̀ɔ, mi lɛ́ tɛ́lɛ́ lɛ à yía, ye wá m ká. Kɛɛ Kɛ́lɛ̀ì lɛ́ lɛ ɓe m yía. Kɛ̀ɓe lɛ́ m à ká ɓe pɛ́nɛɛ̀ɛ, m ɓe m zò dɔɔ̀ lɛ Wálà Gbe lɛ́ m lɔ̀ kpɔ́ɔ̀ lɛ à mɔ̀, ɛ̃́ɛ̃́ lɛ́ e e dìè nɔ m mɔ́ɔ̀ wɔ̃̀ mɔ̀ɔ yí.

²¹ M̀ḿ m wũ ɓo Wálà zì zò-kɛ̀-sɛ̀ wì. Yé mi aà kɛ kpeĩ Wálà lɛ̀ɛ Lɔ́ɔ̀ɔ kolo là zàáa, kɛɛ à yí lɛ́ e kélɛ̀, Kɛ́lɛ̀ì zì gá a ɓoa yí wá à mɔ̀.