Gɛ̀lésìà 1 - Wè-dɔ-wè Dɛɛ

¹ Óò m si Pɔ́ɔ̀. M àpɔ́sɔ̀lɔ̀ ká. M zì kɛ̀ àpɔ́sɔ̀lɔ̀ káa, à gã̀ lɛ̀ɛ́ gbaa gbɛ̃̀ mia kɛ̀lɛ̀. Ɛ́ɛ̃́ zeĩ́, mi gbɛɛ lɛ̀ɛ́ gbaa à kɛ kɛ ḿ kɛ àpɔ́sɔ̀lɔ̀ ká. Kɛɛ míá wa kɛɛ lɛ́ e Zízɛ̀ Kɛ́lɛ̀ì, ɛ̃́ɛ̃́ mia Dàa Wálà lɛ́ e Zízɛ̀ wɛ̀lɛ̀ ga kɛ̀lɛ̀ɛ káa.

² Kò ka lèe-gé vɔ̀ séĩ́ lɛ́ o m píé zèea, kóò wèè Wálà-mìà lɛ́ ka Gɛ̀lésìàa ka séĩ́ ka bà.

³ Kɔa Dàa Wálà wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

⁴ Kɛ́lɛ̀ì e e dìè nɔ ko zì kɛ-wɔ̃̀ yɔɔ wɛ̃́ĩ̀, kɛ é ko kɛ kó la lúó yɔɔ lɛ́ e pɛ́nɛɛ̀ e kéa kɛ̀lɛ̀, lɛ̀ zí kò Wálà lɛ́ e ko Dàa káa, a naa à ká é à kɛáa ká.

⁵ Wálà é tɔ́-ɓɔ sɔ̀lɔ̀ ɓo tòá kíli wɔ́lɔ́-wɔ́lɔ́ ká. É kɛ kíli.

Wɔ̃́ làṹ yièa lɛ nɔ́ doó

⁶ M lé kpó-kpó paà lɛ kɛɛ ḿ ka gɛ̃̀ káà ka wũ ɓò nɔ́ zá le mi lɛ́ e ka súo kɛ Kɛ́lɛ̀ì zì zò-kɛ̀-sɛ̀ kolo làa wì, ɛ̃́ɛ̃́ tó káà wɔ̃́ làṹ yiè gbɛɛ kũ̀ ka zɔ̃̀ɔ̃̀ ká.

⁷ Kɛɛ wánà kpó-kpó káa, wɔ̃́ làṹ yiè wá ɓe zeĩ́ é kã́ à yé kɔ̀à dɔɔ mɔ̀ɔ ká. Kɛɛ mia lɛ́ ò ka yí gíni, lɛ́ ò à kɛ-zì nàà ó wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ là nìàa, o ɓe.

⁸ É kɛ bɛ̃̀ɛ̃ ko ká, ɛ̃́ɛ̃́ Wálà là vɔ-mì lɛ́ è go lɛ̀ía ká, lɛ́ e wɔ̃́ làṹ yiè lɛ́ lɛ gbɛɛ à ye lɛ́ kɔa gèe ka lɛ̀ɛ mɔ̀ɔ, gèe ka lɛ̀ɛ, náá è tó à mɔ̀.

⁹ Kɔaà gèe do kíli. Ɛ́ɛ̃́ ḿm̀ lo à gèeè zeĩ́ dɛɛ ká. Yé mi nɔ́ɔ fé aà wɔ̃́ làṹ yiè yé lɛ́ lɛ gbɛɛ à ye lɛ́ ka ka kɔ̀ yà à wìa mɔ̀ɔ, gèe ka lɛ̀ɛ, náá è tó à mɔ̀.

¹⁰ À kɛ-zì lɛ́ m̀ nàà zeĩ́ kɛ mia zò é dà m píé ɓɛ? Ḿ gɔ̃̀, Wálà lɛ́ yee m̀ nàà à zò é dà m píéa? À kɛ-zì lɛ́ m̀ nàà kɛ ḿ mia zò-dà-wɔ̃̀ kɛ ɓɛ? È kɛ̀á m tó à kɛpìà kília, m̀ḿ gɔ̃̀ kɛɛ̀ Kɛ́lɛ̀ì là yɛɓo-kɛ-mì ká.

Zi lɛ́ Pɔ́ɔ̀ e kɛá àpɔ́sɔ̀lɔ̀ káa

¹¹ M lèe-gé vɔ̀, tó ḿ gèe ka lɛ̀ɛ, wɔ̃́ làṹ yiè lɛ́ m̀ gèea, mia wá kɛ ó kɛ.

¹² Lɛ̀ɛ́ gbaa gó mi nɔ́ɔ fé kɛ̀lɛ̀ kɛ ḿ sɔ̀lɔ̀ ɓo. Ɛ́ɛ̃́ kɛ bɛ̃̀ɛ̃ mi nɔ́ɔ fé é à zɔ̃̀ɔ̃̀ m lɛ̀ɛ. Kɛɛ e kɛ Zízɛ̀ Kɛ́lɛ̀ì dìè ká lɛ́ e lɛ́ɛ́ ɓo à là m lɛ̀ɛ.

¹³ Zi lɛ́ m zì yìì-kɔ̀ e kɛá lɛ̀ lɛ́ m kɛ gbinipìà Wálà lɛ̀ɛ Zúù-mìà zì gbìnì Wálà lɛ̀ɛ zì káa, waà à wɔ̃̀ gèe ka lɛ̀ɛ. M kɛ Wálà-mìà sã̀ dɔpìà kpó-kpó ɓo. Ɛ́ɛ̃́ ma kɛ-zì naa kɛ ḿ o kã́ o kíe mɔ̀.

¹⁴ Zi lɛ́ m kɔ̀ yàaà e kɛá Zúù-mìà zì gbìnì Wálà lɛ̀ɛ kɔ̀ wìa, m diè e kɛá m ɓɛ́ĩ̀ Zúù-mìà búnùzɛ̀ lɛ́ o kò ye nì ko ye nyɛ́nɛ́ doó káa là à kɛɛ̀ yí. M kɔ̀ kùnuù e kɛá kpó-kpó ɓo ko dàa ye dàà nì zì kɛ-wɔ̃̀ lɛ́ ò kɛ̀ mɔ́ɔ mɔ̀, tó máà o kɛ̀ máà dìèá m ɓɛ́ĩ̀ nì o kília là.

¹⁵ Kɛɛ Wálà e m sí kɛ bɛ̃̀ɛ̃ ó tĩã́ m yeè. Ɛ́ɛ̃́ e m súo kɛ e zì zò-kɛ̀-sɛ̀ kolo là zàá. Ɛ́ɛ̃́ lɛ̀ a yà e gé

¹⁶ kɛ é e Gbe zɔ̃̀ɔ̃̀ m lɛ̀ɛ, kɛ ḿ wɔ̃́ làṹ yiè lɛ́ à gbɛ̃̀ɛ̃̀ lɛ à mɔ̀ɔ gèe sɛ́lɛ́ gbɛɛ yí-mìà lɛ̀ɛ, m̀ḿ gbaa ló mi dò nɔ́ɔ fé píé kɛ kò ye kó ko wũ dũ à mɔ́ɔ̀ wɔ̃̀ ká.

¹⁷ Ɛ́ɛ̃́ kɛ bɛ̃̀ɛ̃ ḿ ló Zùlúsàlɛ̀ kɛ ḿ mia lɛ́ o kɛ àpɔ́sɔ̀lɔ̀ ká m mɔ̀ bèĩzɛ̀ɛ gɛ̃̀. Kɛɛ m ló Alébìà nɔ́ zá le. Lɛ̀ e kɛ kília, m yɛ́ m zí m ló Dùmásà.

¹⁸ Kɛɛ kɛ̀ɛ̀ yààka e die bɛ̃̀ɛ̃ kɛ ḿ tĩã́ lóò ɓɔɔ̀ Pílɛ̀ píé Zùlúsàlɛ̀. M kɛ à píé yi lɔ́ɔ́ pèèlɛ píé.

¹⁹ É kã́ Pílɛ̀ wà Zĩ́ĩ̀ lɛ́ e kɛ ko Dàa-mì lèe-gé káa mɔ̀ɔ, m̀ḿ gbaa àpɔ́sɔ̀lɔ̀ vɔ̀ gbɛɛ gɛ̃̀.

²⁰ Pɛ́ m̀ bɛ̃̀ɛ̃ lɛ wánà zɛ̀. É kɛ̀á nɛ̀ lɛ́ m̀ kɛ̀ɛ, Wálà lɛ́ɛ̀ à yí dɔ.

²¹ Lɛ̀ m gó gbaa yía, m ló sɛ́lɛ́ lɛ́ e kɛ Sílìà wà Sìlísìà o yía yí píé.

²² Lúó e kília káa, mia lɛ́ o kɛ Kɛ́lɛ̀ì là mia nì ká Zùdíà lɛ̀ doò do mɔ̀ɔ, òó gbaa kɛ m dɔpìà m wɛlɛ mɔ̀.

²³ Wɔ̃́ lɛ́ mia gbɛɛ o kɛ à gèepìàa lɛ́ nɔ́ o à dɔɔ. O kɛ à gèepìà kélɛ̀, “Gɔ̃ lɛ́ è ko sã̀ dɔ mɔ́ɔ lɛ gbaa zò-dɔ̀à-mɔ̀ wɔ̃̀ lɛ́ è à kɛ-zì nàà á yí sìè mɔ́ɔ, lɛ gbaa à wɔ̃̀ gèepìà.”

²⁴ À mɔ́ɔ̀ wɔ̃̀ mɔ̀ɔ, o Wálà tɔ́ ɓɔ m mɔ́ɔ̀ wɔ̃̀ mɔ̀.