Fèlépĩ̀ã̀ 3 - Wè-dɔ-wè Dɛɛ

Kɛ̀-kpeĩ-kɔ̀ wánà zɛ̀

¹ M lèe-gé vɔ̀, m tèáà-là lɛ́ e kélɛ̀, kà géli kɛ kɔa Dàa-mì tɔ́ yí zàá. Pɛ lɛ́ maà à bɛ̃̀ɛ̃ doa, à bɛ̃̀ɛ̃̀ zeĩ́ wá m lɛ̀ɛ wɔ̃́ yɔɔ ká. Ɛ́ɛ̃́ lɛ́ɛ̀ bɛ̀i ka bɛ̃̀ɛ̃ ka laà nɔ́ kíli.

² Kà ka yɛ́lɛ́ kɛ ka dìè píé gbã́ vɔ̀ lɛ́ o yí, lɛ́ o mia lɛ́ o kɛ-pɛ̀ yɔɔ̀ yɔɔ̀ kɛ-mìà káa mɔ́ɔ̀ wɔ̃̀ mɔ̀. Kà ka yɛ́lɛ́ kɛ ka dìè píé míá o kíli, lɛ́ ò nàà ó mia kii kã́ mia gbĩ-kpàla lɛ̀ dò mɔ̀ɔ mɔ́ɔ̀ wɔ̃̀ mɔ̀.

³ Ƃii mia lɛ́ o bɔ̃́ɔ̃́ kpó-kpó síì lɛɛ, lɛ́ e ko káa. Ye wá o ká. Ƃii kóò gbìnì Wálà lɛ̀ɛ à zì Gɛ̀ɛ̀ yí zàá, ɛ̃́ɛ̃́ kóò géli kɛ̀ kò Kɛ́lɛ̀ì Zízɛ̀ nì ko kɛ̀ doó yí zàá. Ko zò dɔɔ̀ wá wɔ̃́ ò kɛ̀ mia gbĩ-kpàla mɔ̀ɔ mɔ̀.

⁴ Áá kɛɛ̀ m mɔ̀ kɛ ḿ m zò dɔ wɔ̃́ nì e kília mɔ̀. Yé mi dò aà gɛ̃̀ ɓɔ̀ɔ kélɛ̀ lɛ́ɛ̀ bɛ̀i e zò dɔɔ̀ wɔ̃́ lɛ́ ò kɛ̀ mia gbĩ-kpàla mɔ̀ɔ mɔ̀ɔ, ma lɛ́ yee áá kɛɛ̀ m mɔ̀ dóo kpó-kpó ɓo kɛɛ ḿ m yɛ́lɛ́ táá zi sùua káa.

⁵ O m bɔ̃́ɔ̃́ zɛ lɛ̀ lɛ́ o m ye, lɛ́ à lɔ́ɔ́ e die doóa ká. Éézɛ̀lɛ̀-mìà dò lɛ́ e m káa. Ḿm̀ go Bɛ̃́zímà sùu là. Ɛ́ɛ̃́ Hííbúlù-mìà lɛ́ o m yea. É ló é gbɛ̃̀á Lɔ́ɔ̀ɔ kũ̀ tã́ã̀ wɔ̃̀ mɔ̀ɔ, m kɛ Fálásíì mi ká.

⁶ Fã̀ã́-wàà e kɛ m yí gbùò nì ɓo tó áà kɛ̀ máà Wálà-mìà sã̀ dɔ̀. Kɛ̀-kpeĩ-kɔ̀ lɛ́ mi ɓà sɔ̀lɔ̀ ɓo Lɔ́ɔ̀ɔ kũ̀ tã́ã̀ kolo làa, mɔ́ɔ̀ kɛɛ gbɛɛ lɛ̀ɛ́ gbaa kɛ m mɔ̀.

⁷ Wɔ̃́ nì e kília e kɛ wɔ̃́ lɛ́ m̀ bɛ̀i à mɔ̀ ḿ pɛ gɛ̃̀ à kolo làa ká. Kɛɛ ḿm̀ o séĩ́ o si gbaa pɛ tò dàá zɛ̀ Kɛ́lɛ̀ì mɔ́ɔ̀ wɔ̃̀ mɔ̀.

⁸ Ye wá nɔ́ ɓɔ̀ɔ pɔɔ̀ nì o kília doó ká. Kɛɛ ḿm̀ pɛ séĩ́ si pɛ tò dàá zɛ̀ pɛ lɛ́ à sɔ̃̀ɔ̃́ lɛ à mɔ̀ dóo kpànazɛ̀ɛ mɔ́ɔ̀ wɔ̃̀ mɔ̀. Ye lɛ́ e m Dàa-mi Kɛ́lɛ̀ì Zízɛ̀ zì dɔ́ m̀ ɓoa káa. Ƃii à mɔ́ɔ̀ wɔ̃̀ mɔ̀ɔ, maà mɔ́ɔ̀ pɔɔ̀ séĩ́ tó ɓo kàá m píé yí. Ḿm̀ o séĩ́ o gɛ̃̀ nɔ́ lɛ̀ gbòo lɛ́ ɓe. Ḿm̀ kɛ̀ kíli kɛɛ ḿ Kɛ́lɛ̀ì sɔ̀lɔ̀ ɓo,

⁹ kɛɛ kò ye kó kɛ dóo kpó-kpó ɓo doó. Kɛ̀-kpeĩ-kɔ̀ lɛ́ e m̀ pɛ ká, lɛ́ ò sɔ̀lɔ̀ ɓo Lɔ́ɔ̀ɔ kũ̀ tã́ã̀ kolo làa, ye wá gbaa m kɛ̀lɛ̀. Kɛ̀-kpeĩ-kɔ̀ lɛ́ e dɛɛ ká m kɛ̀lɛ̀ɛ, lɛ kɛ̀-kpeĩ-kɔ̀ lɛ́ à nɔɔ̀ lɛ m lɛ̀ɛ m zì zò-dɔ̀-Kɛ́lɛ̀ì-mɔ̀ kolo là zàáa ká. Kɛ̀-kpeĩ-kɔ̀ e kília, lɛ́ɛ̀ go Wálà píé, ɛ̃́ɛ̃́ à gã̀-gbɛ̃̀ɛ̃̀ lɛ zò-dɔ̀à-mɔ̀ là.

¹⁰ Wɔ̃́ nɔ́ m̀ nàà káa, lɛ́ e kélɛ̀, ḿ Kɛ́lɛ̀ì dɔ, ɛ̃́ɛ̃́ kɛ ḿ yíkɛ̀ gáàa lɛ́ e kɛ à kɛ̀lɛ̀, lɛ́ e wɛ̀lɛ̀á ga kɛ̀lɛ̀ɛ, ḿ à dɔ. Ḿm̀ nàà kò ye kó dɔ à zì wɔ̃́ nyɔ́ɔ̀ɔ gɛ̃̀ɛ̃ɛ̃̀ yí, ɛ̃́ɛ̃́ kɛ ḿ kɛ lɛ̀ à ye lɛ́ ɓe à zì gá a ɓoa yí,

¹¹ kɛɛ é kɛ̀á à kɛ-zì lɛ́ɛ̀ lo kɛɛ̀ ɓea, kɛɛ m wɛ̀lɛɛ̀ é kɛá ga kɛ̀lɛ̀ ḿ nu kɛ̀ɓe yí.

Ko bàlà sípìà kɛ kó pɛ sɔ̀lɔ̀ ɓo

¹² Ma wá à gèepìà kélɛ̀ wɔ̃́ nì o kília maà nyɛ gbaa kɛ̀ o yí mɔ̀ò. Ɛ́ɛ̃́ m̀ḿ bɛ̀i à mɔ̀ ḿ gèe kélɛ̀ maà kɛ gbaa mi púlú ká gbaa fɛ́fɛ́ le. M tĩã́ à kɛ-zì naapìà kɛ m kɔ̀ é die, kɛɛ ḿ wɔ̃́ lɛ́ Kɛ́lɛ̀ì Zízɛ̀ a mɔ́ɔ̀ m kɛ ɓo e dìè là pɛ káa, kɛɛ ḿ kɛ é kɛ m̀ pɛ ká.

¹³ M lèe-gé vɔ̀, m̀ḿ m yɛ́lɛ́ táá kélɛ̀ maà à kɛ gbaa m̀ pɛ ká. Kɛɛ wɔ̃́ doó lɛ́ m̀ à kɛ̀ɛ lɛ́ e kélɛ̀, m zò lɛ́ɛ̀ ni wɔ̃́ lɛ́ e m mɛ̀ĩ́a ká, tó máà dɔ̀ gágà kɛ ḿ ɓɔ pɛ lɛ́ lɛ líéa mɔ̀.

¹⁴ À mɔ́ɔ̀ wɔ̃̀ mɔ̀ɔ, m bàlà sípìà kpeĩ le máà lò m tèá-pìà, kɛ ḿ pɛ lɛ́ m̀ mɔ́ɔ̀ bàlà sia sɔ̀lɔ̀ ɓo à lɛ̀ mɔ̀. Ye lɛ́ e kélɛ̀, ko súo lɛ́ Wálà à kɛ̀ Kɛ́lɛ̀ì Zízɛ̀ kolo là, kɛ kó ló à píé lɛ̀ía.

¹⁵ Mia séĩ́ lɛ́ kɔa mɛ́ kpálà lɛɛ, lɛ à mɔ̀ yɛ́lɛ́-táá nɔ́ doóa é kɛ kɔa mɔ̀. É kɛ̀á ka dò bɛ̃̀ɛ̃ ka yí, tó yɛ́lɛ́-táá lɛ́ a mɔ̀ɔ lɛ gbɛɛ, Wálà lɛ́ɛ̀ lo lɛ́ɛ́ ɓoò wɔ̃́ e kéa là ka lɛ̀ɛ.

¹⁶ Wɔ̃́ kɛ-kɔ̀ é kɛá bɛ̃̀ɛ̃ zi nɔ́ɔ fé káa, kɔ̀à lo kɔa líé wɔ̃́ kɛ-zì lɛ́ kɔaà tó à píé é ɓɔá pɛ́nɛɛ mɔ̀ɔ kpáá yí.

¹⁷ M lèe-gé vɔ̀, kà lo líé m píé gɔ̃́ɔ̃̀ ká. Kɔaà wɔ̃́ gɔ̃̀á kpeĩ zɔ̃̀ɔ̃̀ ka lɛ̀ɛ. À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ mia lɛ́ ò wɔ̃́ kɛ̀ à káa mɔ̀.

¹⁸ Maà wɔ̃́ e kéa gèe do ka lɛ̀ɛ kpolà búnùzɛ̀, ɛ̃́ɛ̃́ dɛɛ káa m à gèepìà zeĩ́ m nyìɛ-yíí bà. Mia lɛ́ o zì yìì-kɔ̀ è o kɛ̀ wáà kɛ̀ gèlè-gɔ̃̀ Kɛ́lɛ̀ì là kɔ́lɔ́sìa mɔ̀ mìà káa, o búnùzɛ̀.

¹⁹ O líé nyɛpìà lɛ́ nɔ́ è lo kɛɛ̀ mia yí sìèpìà káa. Ƃii o zì Wálà lɛ́ e o gé káa. Óò kɛ̀ gɔ́ɔ́-gɔ̀ɔ̀ wɔ̃́ lɛ́ yɛ́lɛ̀ áá o kɛɛ̀ à mɔ́ɔ̀ wɔ̃̀ mɔ̀ɔ wɛ̃́ĩ̀. Óò o yɛ́lɛ́ tàà pɛ nɔ́ lɛ́ e kpóṹ là zèea mɔ́ɔ̀ wɔ̃̀ ká.

²⁰ Kɛɛ ko yee, ko Wálà pà-mìà ká. Ɛ́ɛ̃́ ko yàà lɛ soũ le ko La-mì lɛ́ e ko Dàa-mì Zízɛ̀ Kɛ́lɛ̀ì káa, gò Wálà-pà lùò gɛ̀nɛ̀.

²¹ Lɛ́ɛ̀ lo ko gbĩ-kpàla lɛ́ e pɛ yí sìeèe zɛ̀ ká e kéa mɛ́ vɔ̀ɔɔ̀. Ɛ́ɛ̃́ lɛ́ɛ̀ lo o kɛɛ̀ lɛ̀ e dìè-tĩ́ gbĩ-kpàla mɛ́ ɓɔɔ̀ɔ zɛ̀ɛ lɛ́ ɓe. Lɛ́ɛ̀ lo wɔ̃́ e kéa kɛɛ̀ yíkɛ̀ gáàa lɛ́ è bɛ̀i à mɔ̀ é pɛ séĩ́ kɛá e wìa ká.