Fàlímà 1 - Wè-dɔ-wè Dɛɛ

¹ Óò m si Pɔ́ɔ̀. M bĩ́-kɛ̀ì-mì ká pɛ́nɛɛ Kɛ́lɛ̀ì Zízɛ̀ tɔ́ mɔ́ɔ̀ wɔ̃̀ mɔ̀. Kò m ɓɛ́ɛ ye-mì Témɔ́tè kóò wèè ɓi Fàlímà lɛ́ kò ɓi nì kò yɛɓo kɛ̀ e kíe là, lɛ́ i lɔ̀ kpɔ́ɔ̀ lɛ ko mɔ̀ɔ bà.

² Ɛ́ɛ̃́ kóò wèè Wálà-mìà yé ò pa o kíe mɔ̀ i píé kɛ́ì, ɛ̃́ɛ̃́ ko ɓɛ́ɛ ye-mì lee zɛ̀ lɛ́ ò si Áfèàaò, ɛ̃́ɛ̃́ Àkípà lɛ́ kò ye nì ko sóyà káa bà.

³ Kɔa Dàa Wálà wà kɔa Dàa-mì Zízɛ̀ Kɛ́lɛ̀ì, o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

Fàlímà zì lɔ̀-kɛ̀à-mɔ̀ wà zò-dɔ̀à-mɔ̀

⁴ Ḿm̀ i tɔ́ dà sɛ̀nɛ ɓoò yí lúó séĩ́ ká. Ɛ́ɛ̃́ ḿm̀ m̀ Wálà zúo gèe.

⁵ Ƃii ḿm̀ Wálà-mìà séĩ́ lɔ̀ lɛ́ à kpɔ́ɔ̀ lɛ i mɔ̀ɔ, ɛ̃́ɛ̃́ lɛ̀ zí i zò dɔɔ̀ laa ká ko Dàa-mì Zízɛ̀ mɔ̀ɔ wɔ̃̀ ma.

⁶ M zì sɛ̀nɛ m̀ ɓoa lɛ́ e kélɛ̀, tàà-kíe-píé lɛ́ e kɔ̀à ɓi nì lɛ́ zò-dɔ̀à-mɔ̀ lɛ kɔa yía kɛ̀lɛ̀ɛ, kɛ á kɛ kɛɛ í wɔ̃́ yiè séĩ́ lɛ́ kò sɔ̀lɔ̀ ɓo Kɛ́lɛ̀ì tɔ́ yí zàáa dɔ.

⁷ M lèe-gé Fàlímà, m zì lɔ̀ lɛ́ à kpɔ́ɔ̀ lɛ i mɔ̀ɔ, aà nu géli ká m là kpó-kpó ɓo, tó áà kɛ̀ m fã̀ã́ áà wàà. Ƃaà Wálà-mìà séĩ́ kɛ wéĩ́-wèĩ̀.

Pɔ́ɔ̀ e kpé kã́ Ònɛ́sémà wɛ̃́ĩ̀

⁸ Wɔ̃́ e kília mɔ́ɔ̀ wɔ̃̀ mɔ̀ɔ, máá mɔ́ɔ̀ kɛ ɓoò nyìɛ gágà zɛ̀ kɛ ḿ ɓí i ké, lɛ́ kò ɓi ko doó Kɛ́lɛ̀ì yía, kɛ ḿ wɔ̃́ lɛ́ lɛ à mɔ̀ é kɛɛ gèe i lɛ̀ɛ ɓá kɛ.

⁹ Kɛɛ m lɔ̀ kpɔ̀-i-mɔ̀ a kɛ tó máá naà ḿ kpé kã́ i lɛ̀ɛ à kɛɛ̀ mɔ́ɔ̀ wɔ̃̀ mɔ̀, yé bɛ̃̀ɛ̃ m Pɔ́ɔ̀ lɛ́ lɛ Kɛ́lɛ̀ì Zízɛ̀ nyìɛ-wɛ̀lɛ̀ ká, ɛ̃́ɛ̃́ lɛ́ zeĩ́ dɛɛ káa, m bĩ́-kɛ̀ì-mì ká à mɔ́ɔ̀ wɔ̃̀ wɛ̃́ĩ̀a ká.

¹⁰ À mɔ́ɔ̀ wɔ̃̀ mɔ̀ɔ, ḿm̀ kpé kã i lɛ̀ɛ Ònɛ́sémà wɛ̃́ĩ̀. Lɛ m gbe kpó-kpó ká Kɛ́lɛ̀ì yí zàá. M kɛ à dàa ká lɛ̀ lɛ́ m tĩã́ bĩ́-kɛ̀ìa ká.

¹¹ Líé bèĩzɛ̀ɛ, e kɛ i kɔ̀-tò-yíí-bà mì ká. Kɛɛ dɛɛ káa, lɛ gbaa kò ɓi ko kɔ̀-ɓò-yíí-bà mì ká.

¹² M à vɔpìà e mɛ̀ĩ́ dɛɛ káa mɔ̀ i píé, ɛ̃́ɛ̃́ nú à ɓoa lɛ́ɛ̀ nu m zò ká.

¹³ Ḿm̀ lo à naà é kɛ m píé zèe lɛ̀ m tĩã́ bĩ́-kɛ̀ìa ká wɔ̃́ làṹ yièa mɔ́ɔ̀ wɔ̃̀ mɔ̀, kɛɛ é dɔ i dɔ̀lɔ̀ yí gbũ̀-m-mɔ̀ pìè.

¹⁴ É kɛ bɛ̃̀ɛ̃ kília, m̀ḿ naa kɛ ḿ i kṹ gágà kɛ í gbũ m mɔ̀. Kɛɛ ḿm̀ lo à naà ɓá kɛ i dìè zò ká. À mɔ́ɔ̀ wɔ̃̀ mɔ̀ɔ, m̀ḿ ló wɔ̃́ gbɛɛ kɛɛ̀ é tóá kíli í wéé à mɔ̀.

¹⁵ À kɛɛ̀ e kɛá kíli lèĩ kɛɛ Ònɛ́sémà é gó i píé ɓéĩ́ ɓo lúó gbèĩ píé, kɛ é kɛ i píé-mì ká tòá kíli ká zeĩ́.

¹⁶ Kɛɛ dɛɛ káa, ye wá gbaa lùò ká. Lɛ gbaa bɛ̃̀ɛ̃ kpeĩ é diá lùò là. Lɛ ko lèe-gé gɔ̃ zɛ̀ lɛ́ à lɔ̀ kpɔ́ɔ̀ lɛ ko mɔ̀ɔ ká Kɛ́lɛ̀ì yí. À kɛ-wɔ̃̀ lɛ à mɔ̀ kpànazɛ̀ m lɛ̀ɛ. Zi sùu kpɛɛ̀ lɛ́ à kɛ-wɔ̃̀ è lo kɛɛ̀á kpànazɛ̀ kpó-kpó ɓo ɓi bɛ̃̀ɛ̃ i lɛ̀ɛ ké. Lɛ kpànazɛ̀ i lɛ̀ɛ à kɛ̀ mi ká, wà à kɛ̀ i lèe-gé ká ko Dàa-mì yí zàáa kolo là.

¹⁷ À mɔ́ɔ̀ wɔ̃̀ mɔ̀ɔ, é kɛ̀á íì m si i dòa, ì i kɔ̀ yà à wì, lɛ̀ zí nɔ́ ɓáá i kɔ̀ yàá m wìa lɛ́ ɓe.

¹⁸ É kɛ̀á aà wɔ̃́ yɔɔ kɛ i ká, ɛ̃́ɛ̃́ é kɛ̀á ɓà kèle lɛ à mɔ̀ɔ, ì à kpɔ́ m wĩĩ́.

¹⁹ Ḿm̀ lo wɔ̃́ yé e kéa bɛ̃̀ɛ̃ɛ̃̀ m dìè kɔ̀ ká. Ye gɛ̃̀ e ké. Ma Pɔ́ɔ̀, ḿm̀ lo ɓà pɔɔ̀ɔ sɔ̃̀ɔ̃́ nɔɔ̀. (Ye wá m mɔ̀ kɛ ḿ i zò vùò m̀ pɛ lɛ́ à kèlè lɛ i mɔ̀ɔ mɔ́ɔ̀ wɔ̃̀ ká. M̀ kèle e kília lɛ́ e i zì kɛ̀ɓe káa.)

²⁰ À mɔ́ɔ̀ wɔ̃̀ mɔ̀ɔ, m ɓɛ́ɛ ye-mì, ì wɔ̃́ yé e kéa kɛ m lɛ̀ɛ ɓɔ̀ɔ ko Dàa-mì mɔ́ɔ̀ wɔ̃̀ mɔ̀. Lɛ̀ lɛ́ kò ɓi ko Kɛ́lɛ̀ì yía, ì m kɛ wésá-wèsà.

²¹ Yé m wɔ̃́ e kéa bɛ̃̀ɛ̃, ḿm̀ à yí dɔ wánà ká kélɛ̀ íì lo wɔ̃́ lɛ́ maà à pɛ̃́ i mɔ̀ ɓá kɛɛ kɛɛ̀. Ɛ́ɛ̃́ ḿm̀ à yí dɔ íì lo bɛ̃̀ɛ̃ à kɛɛ̀ gbùò é diá yi.

²² Í kɛ̀á kɛpìà kília, ì m wɔ̀lɔ̀ pɛ̀ kɛ, ɓii m zò lɛ à mɔ̀ kélɛ̀ Wálà lɛ́ɛ̀ lo kà sɛ̀nɛ-ɓo-wè yí zṹũ̀, tó e m nɔ m mɛ̀ĩ́ ka lɛ̀ɛ.

Wèè-mia-bà wè

²³ Ìpáfàlà lɛ́ kò ye nì ko bĩ́-kɛ̀ì zèe Kɛ́lɛ̀ì Zízɛ̀ mɔ́ɔ̀ wɔ̃̀ mɔ̀ɔ, e wéé i bà.

²⁴ Zi nɔ́ doóa káa, Máà wà Alèsákà, e bɛ̀i Dímà, ɛ̃́ɛ̃́ Lúù, lɛ́ kò ye nì kò yɛɓo kɛ̀ e kíe làa, o wééá i bà.

²⁵ Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ é kɛ ka gɛ̀ɛ̀ píé.