Kɔ̀lɔ́sĩã̀ 4 - Wè-dɔ-wè Dɛɛ

¹ Lùò dàa-mìà, ka bɛ̃̀ɛ̃ kà wɔ̃́ kɛ kà lùò vɔ̀ ká kpeĩ le, ɛ̃́ɛ̃́ e yí púlú zɛ̀ ká. Kà à yí dɔ kélɛ̀ ka bɛ̃̀ɛ̃, ka Dàa-mì lɛ lɛ̀í.

Wɔ̃́ kɛ-zì

² Kà lo ka líé sɛ̀nɛ ɓoò ká, ɛ̃́ɛ̃́ zeĩ́, kà yà ka nyìɛ́ yé kaà kɛ sɛ̀nɛ ɓopìàa ká, káà Wálà zúo ɓò.

³ Yé kaà kɛ à kɛpìà kília, kà sɛ̀nɛ ɓo ko bɛ̃̀ɛ̃ ko mɔ́ɔ̀ wɔ̃̀ mɔ̀, kɛɛ Wálà é zi kɛ ɓe kɛ kó là wééa gèe, kɛ kó wɔ̃́ lɛ́ à bĩ̀ĩĩ̀ e kɛá, lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, kó wɔ̃̀ gèe. Ƃii wɔ̃́ lɛ́ m à mɔ́ɔ̀ bĩ́-kɛ̀ìa, ye lɛ́ ɓɛ.

⁴ À mɔ́ɔ̀ wɔ̃̀ mɔ̀ɔ, kà sɛ̀nɛ ɓo kɛɛ wɔ̃́ m̀ gèea é kɛ e yí púlú zɛ̀ ká mia lɛ̀ɛ lɛ̀ zí lɛ m mɔ̀ ḿ kɛáa lɛ́ ɓe.

⁵ Kà táá gíkã́ ká mia lɛ́ o wá Wálà-mìà káa bà, tó káà yɛɓo yiè kɛ̀ lúó lɛ́ e ka kɛ̀lɛ̀ɛ píé.

⁶ Ka zì wɔ̃́-gèe-kɔ̀ è kɛ nɛ́ĩ́-nɛ̀ĩ̀ ɛ̃́ɛ̃́ ɓɔ́-kpɔ́ zɛ̀ teele, ɛ̃́ɛ̃́ zi lɛ́ lɛ ka mɔ̀ ká wɔ̃́ yí zṹ à ká mia séĩ́ lɛ̀ɛ, kà à dɔ.

Wèè-mia-bà wè

⁷ Tíkíkà, lɛ́ e m lèe-gé lɛ́ m̀ lɔ̀ kɛ̀áa ká, lɛ́ e yɛɓo-kɛ-mì zò-dɔ̀à-mɔ̀ zɛ̀ wà m ɓɛ́ɛ yɛɓo-kɛ̀-mi-mɔ̀ mì ká ko Dàa-mì yía, lɛ́ɛ̀ lo wɔ̃́ séĩ́ lɛ́ à gbɛ̃̀ɛ̃̀ lɛ m mɔ̀ɔ gèeè ka lɛ̀ɛ.

⁸ Wɔ̃́ e kéa mɔ́ɔ̀ wɔ̃̀ lɛ́ m̀ mɔ́ɔ̀ à vɔ ɓo ka píéa. Ḿm̀ nàà kɛɛ ká zi lɛ́ ko lópìà à ká líéa, kɛ á wɔ̃̀ gèe ka lɛ̀ɛ, kɛɛ é fã̀ã́-wàà nɔ ka zò lɛ̀ɛ.

⁹ Mi lɛ́ à bɛ̃̀ɛ̃ wà ye ò nua, lɛ́ e Ònɛ́sémà, lɛ́ e ko lèe-gé zò-dɔ̀à-mɔ̀ zɛ̀, lɛ́ à lɔ̀ kpɔ́ɔ̀ lɛ ko mɔ̀ɔ káa káa. Lɛ ka doó-mì ká nɔ́ kíli. Óò lo wɔ̃́ lɛ́ lɛ kɛpìà zèea, séĩ́ gèeè ka lɛ̀ɛ.

¹⁰ Alèsákà lɛ́ kò ye ko bĩ́-kɛ̀ì zèea, lɛ́ɛ̀ wèè ka bà. Zi nɔ́ doóa káa, Máà lɛ́ e Bánábà kɔ̀-píé-mìà dò káa, lɛ́ɛ̀ wèèá ka bà. Waà à gèe ka lɛ̀ɛ líé kélɛ̀ yé aà ɓɔ ka làa, kà ka kɔ̀ yà à wì.

¹¹ Zásùà lɛ́ ò si Zátàa, e wéé ka bà nɔ́ kíli. Mia yààka o kéa lɛ́ nɔ́ o Zúù-mìà lɛ́ kò ye nì kò yɛɓo kɛ̀ Wálà là tò-mia-là mɔ́ɔ̀ wɔ̃̀ mɔ̀ɔ káa. Waà gbũ̀-mɔ̀ kpó-kpó nɔ m lɛ̀ɛ.

¹² Ìpáfàlà lɛ́ e ka doó-mì ká, lɛ́ lɛ Kɛ́lɛ̀ì Zízɛ̀ là yɛɓo-kɛ-mì káa, e wéé ka bà. Lɛ́ɛ̀ sɛ̀nɛ ɓo teele fã̀ã́-wàà ká ka mɔ́ɔ̀ wɔ̃̀ mɔ̀, áà Wálà pɛ̃̀ kɛ é à kɛ ka mɛ́ é kpálà dɔ̀ ka dɔ̀lɔ̀ mɔ̀ yí, ɛ̃́ɛ̃́ kɛ ká kɛ wɔ̃́ séĩ́ lɛ́ Wálà à nàà ká kɛɛ yí kpó-kpó dɔ-mìà ká.

¹³ Ḿm̀ là kélá-wè ɓo kélɛ̀ aà yɛɓo kɛ dóo gágà ka mɔ́ɔ̀ wɔ̃̀ mɔ̀, ɛ̃́ɛ̃́ zeĩ́ mia lɛ́ o Leodòsíàa, e bɛ̀i, o yé o Hilápólèa mɔ́ɔ̀ wɔ̃̀ mɔ̀ nɔ́ kíli.

¹⁴ Lúù lɛ́ e kò nyìɛ̀-kɛ-mì lɛ́ à lɔ̀ kpɔ́ɔ̀ lɛ ko mɔ̀ɔ ká, é dàá Dímà bàa, óò wèè ka bà.

¹⁵ Kà à gèe ko lèe-gé vɔ̀ lɛ́ o Leodòsíàa lɛ̀ɛ kélɛ̀ kóò wèè o bà. Ɛ́ɛ̃́ kà wɔ̃́ nɔ́ doóa gèe Nífà wà Wálà-mìà lɛ́ ò pa o kíe mɔ̀ à píé kɛ́ìa lɛ̀ɛ.

¹⁶ Yé kaà kíí e kéa gèea, kà à kɛ ó à gèe zeĩ́ Wálà-mìà lɛ́ o Leodòsíàa fĩ̀ã̀. Zi nɔ́ doóa káa, kà kii lɛ́ mia lɛ́ o Leodòsíàa ò lo à vɔɔ̀ ka píéa gèe à ká.

¹⁷ Ɛ́ɛ̃́ kà gèe Àkípà lɛ̀ɛ kélɛ̀ é e yɛ́lɛ́ kɛ e líé, é yɛɓo lɛ́ aà à sɔ̀lɔ̀ ɓo ko Dàa-mì yía, á kɛɛ̀ líé nyɛ.

¹⁸ Wèè-ka-bà wè yé e kéa, ma Pɔ́ɔ̀, m dìè-tĩ́ lɛ́ ma bɛ̃̀ɛ̃ m dìè kɔ̀ káa. Yékɛ̀ ka zò é ni m kɛ̀ ɓɛ̀lɛ̀ yí mɔ́ɔ̀ wɔ̃̀ ká. Zò-kɛ̀-sɛ̀ é kɛ ka píé teele.