Kɔ̀lɔ́sĩã̀ 3 - Wè-dɔ-wè Dɛɛ

¹ Waà kà Kɛ́lɛ̀ì ka wɛ̀lɛ̀ lɛ̀í gbaa. À mɔ́ɔ̀ wɔ̃̀ mɔ̀ɔ, pɛ lɛ́ à wɔ̃̀ diè lɛ ka zò káa, è kɛ pɛ lɛ́ lɛ lɛ̀í, lɛ́ Kɛ́lɛ̀ì yàà lɛ yí Wálà kɔ̀ yiè yía ká.

² Kà ka yɛ́lɛ́ táá pɔɔ̀ lɛ́ lɛ lɛ̀í yia mɔ́ɔ̀ wɔ̃̀ ká teele. Yékɛ̀ ká ka yɛ́lɛ́ kɛ pɔɔ̀ lɛ́ lɛ tã́ã̀ zèea mɔ̀.

³ Ƃii kaà ga gbaa, ɛ̃́ɛ̃́ ka zì kɛ̀ɓe wà Kɛ́lɛ̀ì o bĩ̀ĩĩ̀ lɛ Wálà yí zàá gbaa.

⁴ Ko zì kɛ̀ɓe lɛ́ e Kɛ́lɛ̀ì káa. Yé aà ɓíé mia làa, ka bɛ̃̀ɛ̃ kà ye nì káà lo ɓíè mia là lɛ̀-fɔ̀nɔ-kɔ̀ yí zàá.

Zí i kɛá bèĩzɛ̀ɛ, wà zí i à ká gbaa

⁵ À mɔ́ɔ̀ wɔ̃̀ mɔ̀ɔ, lɛ ka mɔ̀ ká kpóṹ là zèe pɛ̀ lɛ́ e ka yía zɛ. O lɛ́ o kélɛ̀, sɔ̃̀ɔ̃ yɔɔ wà wɔ̃́ lilì kṹàa zɛ̀ kɛɛ̀, ɛ̃́ɛ̃́ wɔ̃́ kɛ-lɔ̀ lɛ́ è ka kɛ̀ɛ, e bɛ̀i, wɔ̃́ yɔɔ lɔ̀ lɛ́ à kpɔ́ɔ̀ lɛ ka mɔ̀ɔ, ɛ̃́ɛ̃́ zeĩ́, pɛ séĩ́ lɔ̀-kpɔ̀ ka mɔ̀. Ƃii pɛ séĩ́ lɔ̀-kpɔ̀ mi mɔ̀ lɛ nɔ́ kélɛ̀ gbìnì kɛ̀ɛ̀-wɛ́lɛ́ lɛ̀ɛ lɛ́ ɓe.

⁶ Wɔ̃́ nì e kília mɔ́ɔ̀ wɔ̃̀ mɔ̀ɔ, Wálà zì wɔ̃́à-wàa-kɔ̀ lɛ́ɛ̀ lo nuù míá òó à wéè kɛɛ là.

⁷ E kɛ lúó dò káa, ka vɔ̀ɔ ka kɛ táápìà wɔ̃́ kɛ-zì e píé kília kpáá yí, lɛ̀ lɛ́ o kɛ ka zì kɛ̀ɓe làa ká.

⁸ Kɛɛ dɛɛ ká gbaa, lɛ ka mɔ̀ ká wɔ̃́ nì e kéa séĩ́ ɓo ka mɔ̀. O lɛ́ o wɔ̃́à-mi-wàa-kɔ̀, ɛ̃́ɛ̃́ mi zò-dìè-kíe là, e bɛ̀i, mi zò-sìè-mi-gé káa. Yékɛ̀ lé-kã́ kɛɛ̀ wà wéé lilì kṹã̀a zɛ̀ nì ó gó ka lé.

⁹ Yékɛ̀ ká nɛ̀ kɛ ka kíe nì lɛ̀ɛ, ɓii kaà mi lɛ́ ka kɛ à ká bèĩzɛ̀, é dàá à zì wɔ̃́ lɛ́ à kɛ-wɔ̃̀ diè lɛ à káa bàa, kaà à ɓo ka mɔ̀,

¹⁰ ɛ̃́ɛ̃́ kaà mi dɛɛ lɛ́ kaà kɛ gbaa à káa dà ka mɔ̀. Mi dɛɛ lɛ́ e kília, Wálà lɛ́ e à kɛ-mì káa, lɛ à kɛpìà dɛɛ nɔ́ teele, kɛ é kɛ lɛ̀ e dìè lɛ́ ɓe, kɛɛ ká kɛ à dɔ-mìà kpó-kpó ká.

¹¹ Wɔ̃́ e kéa mɔ́ɔ̀ wɔ̃̀ mɔ̀ɔ, pɛ́ è lo Zúù-mìà wà sɛ́lɛ́ gbɛɛ yí-mìà, e bɛ̀i, mia lɛ́ o bɔ̃́ɔ̃́ síì wá, ɛ̃́ɛ̃́ o yé o bɔ̃́ɔ̃́ síì lɛɛò, ɛ̃́ɛ̃́ zeĩ́ kɔ́nɛ̀ĩ̀-mìà ɛ̃́ɛ̃́ síí gbɛɛ là-mìà, wà mia lɛ́ o lùò káaò, e bɛ̀i, o yé o wá lùò káaò, pɛ́ è lo o kɛɛ̀ doò doa, ye wá ɓe. Kɛ́lɛ̀ì lɛ́ e pɛ séĩ́ káa. Ɛ́ɛ̃́ Kɛ́lɛ̀ì lɛ́ e à séĩ́ yía.

¹² Ka Wálà là mia nì ká. Ka lɔ̀ kpɔ́ɔ̀ lɛ à mɔ̀, ɛ̃́ɛ̃́ aà ka sí kɛ ká kɛ à dìè là mia nì ká. À mɔ́ɔ̀ wɔ̃̀ mɔ̀ɔ, kà pɔɔ̀ nì e kéa dà ka mɔ̀. O lɛ́ o mia yéĩ́ kɛ̀ ka mɔ̀, ɛ̃́ɛ̃́ sɔ̃̀ɔ̃-kɛ̀-sɛ̀ wà ka dìè-sì-péĩ́, ɛ̃́ɛ̃́ ka kpóló kpɔ̀-ka-mɔ̀, e bɛ̀i, zò-kũ̀-tã́ã̀ káa.

¹³ Kà ka kíe nì kɛ-wɔ̃̀ káá ka píé. Ɛ́ɛ̃́ yé wɔ̃́ dò aà kɛ mi dò gé e ɓɛ́ɛ-mì dò gbĩ mɔ̀ɔ, kà kã́ à mɔ̀ ká káá tã́ã̀. Lɛ ka mɔ̀ ká kã́ ka kíe nì kɛ-wɔ̃̀ mɔ̀, káà kàà ka píé yí, lɛ̀ zí ko Dàa-mì è kãá ka zì mɔ̀ɔ lɛ́ ɓe.

¹⁴ Wɔ̃́ nì e kéa kɛɛ̀ yía, kà lɔ̀-kɛ̀à-mɔ̀ dà à bà. Lɔ̀-kɛ̀à-mɔ̀ lɛ́ɛ̀ pɛ yèlè e kíe mɔ̀, tó wáà kɛ̀ doó kɔ̀lɔ́-kɔ̀lɔ́ le.

¹⁵ Zò-yà-gé lɛ́ Kɛ́lɛ̀ì à nɔ ka zò píéa, lɛ à mɔ̀ é kɛ mɛ̀ĩ́-sà ɓo-pɛ̀ ká yi. Ƃii zò-yà-gé e kéa mɔ́ɔ̀ wɔ̃̀ mɔ̀ɔ, lɛ́ Wálà aà mɔ́ɔ̀ ka súo kɛ, kɛ ká kɛ ka kíe là gbĩ-kpàla doó yía. Ɛ́ɛ̃́ kà kɛ zúo-ɓo kɛ-mìà ká.

¹⁶ Lɛ à mɔ̀ Kɛ́lɛ̀ì lé-wè yàlà kṹũ̀ é kɛá ka yí, ɛ̃́ɛ̃́ é ka pa. Kà pɛ zɔ̃̀ɔ̃̀, ɛ̃́ɛ̃́ káà wɔ̃́ kɛ-zì zɔ̃̀ɔ̃̀ ka ɓɛ́ĩ̀ nì lɛ̀ɛ gíkã́ séĩ́ ká. Kà tã́ lɛ́ e Wálà là kíía yí, ɛ̃́ɛ̃́ à yé lɛ́ è nu tɔ́-ɓɔ káa ɓo. E bɛ̀i, kà Wálà-tã̀ ɓo. Kà tã́ ɓo Wálà píé, káà à zúo ɓò ka zò píé.

¹⁷ Ɛ́ɛ̃́ wɔ̃́ séĩ́ lɛ́ kà kɛ̀, ɛ̃́ɛ̃́ lɛ́ kà gèea, kà o kɛ ko Dàa-mì Zízɛ̀ tɔ́ yí, káà Wálà lɛ́ e kɔa Dàa káa zúo ɓò à tɔ́ yí.

Zi lɛ́ kɔ́áá ko kɔ̀ yàá mia wìa

¹⁸ Míá ka gɔ̃ã̀ na nì káa, kà kɛ ka dɛ̃ nì wì, ɓii lɛ̀ lɛ́ ka ko Dàa-mì yía, wɔ̃́ lɛ́ à kɛɛ̀ è ka mɛ́ kũa lɛ.

¹⁹ Lee-sí-gɔ̃̀ã̀ ka bɛ̃̀ɛ̃, ka na nì lɔ̀ è kpɔ́ ka mɔ̀, yékɛ̀ ká yíí kṹ o lé.

²⁰ Nɔ́ɔ̀ɓé, ka bɛ̃̀ɛ̃ kà wɔ̃́ ma ka mìà nì wè là ko Dàa-mì yí zàá wɔ̃́ séĩ́ kɛɛ̀ yí, ɓii wɔ̃́ sùua lɛ́ è Wálà zò dàa.

²¹ Míá ka nɛ́-ye-gɔ̃̀ã̀ ká ɓɛ, yékɛ̀ ká kà nɔ́ɔ̀ fɔ̃̀ã̀-fɔ̃́ã́ kɛ̀ ɓo, yékɛ̀ o zò é dà zízàá.

²² Mia lɛ́ ka lùò vɔ̀ káa, kà mia lɛ́ o ka dàa-mìà nì ká kpóṹ là zèea wéè kɛ kɔ̀ɔ tɛ̃̀ɛ̃́ɛ là. Yékɛ̀ ká wɔ̃́ e kéa kɛ yé nɔ́ o nyìɛ lɛ ka mɔ̀ kɛ ó ka tɛ̀nɛɛ ká. Kɛɛ kà à kɛ zò yiè ká, túó kà ɓo ko Dàa-mì lɛ̀ɛ mɔ́ɔ̀ wɔ̃̀ mɔ̀.

²³ Wɔ̃́ nɔ́ɔ fé lɛ́ kà lo à kɛɛ̀ɛ, kà à kɛ fã̀ã́-wàà ká, lɛ̀ pɛ lɛ́ ka wá yɛɓo kɛpìà mia lɛ̀ɛ, kɛɛ káà kɛ̀ ko Dàa-mì lɛ̀ɛ.

²⁴ Kà à yí dɔ kélɛ̀ ko Dàa-mì lɛ́ɛ̀ lo ka fɔ́nɔ́ nɔɔ̀ à wɛ̃́ĩ̀. Káà lo pɛ lɛ́ aà yàlà bɛ̀i là mia nì lɛ̀ɛ sɔ̀lɔ̀ ɓoò. Ƃii Kɛ́lɛ̀ì lɛ́ e mi Dàa-mì lɛ́ kà yɛɓo kɛ̀ à mɔ̀ɔ káa.

²⁵ Ɛ́ɛ̃́ zeĩ́, wɔ̃́ yɔɔ kɛ-mì bɛ̃̀ɛ̃, óò lo à fɔ́nɔ́ nɔɔ̀ wɔ̃́ yɔɔ lɛ́ à kɛ̀ɛ wɛ̃́ĩ̀. Ƃii Wálà lɛ̀ɛ́ mia ɓo mia bàa mɔ́ɔ̀ wɔ̃̀ mɔ̀.