Kɔ̀lɔ́sĩã̀ 2 - Wè-dɔ-wè Dɛɛ

¹ Ḿm̀ nàà ká zi lɛ́ maà yɛɓo kɛá gágà ka mɔ́ɔ̀ wɔ̃̀ mɔ̀, ɛ̃́ɛ̃́ mia lɛ́ o Leodòsíà, e bɛ̀i mia séĩ́ lɛ́ òó m dìè gɛ̃̀ nɛ́ɛ mɔ́ɔ̀ wɔ̃̀ mɔ̀ɔ dɔ.

² Ḿm̀ kɛ̀ kíli kɛɛ ḿ fã̀ã́-wàà nɔ o zò lɛ̀ɛ, ɛ̃́ɛ̃́ kɛ ó nɔ̀ɔ̀ o kíe nì mɔ̀ lɔ̀-kɛ̀à-mɔ̀ yí, ɛ̃́ɛ̃́ kɛ o zì wɔ̃́-yí-dɔ̀ wánà ká lɛ́ wɔ̃́ yí-ma-kɔ̀ wánà zɛ̀ è nu à káa, kɛ é kɛ o yí gbùò. Yé aà kɛ kília, óò lo Wálà là wɔ̃́ lɛ́ à bĩ̀ĩĩ̀ e kɛáa dɔɔ̀. Wɔ̃́ e kília lɛ́ e Kɛ́lɛ̀ì dìè-tĩ́ káa.

³ Wálà là gíkã́, e bɛ̀i, à zì wɔ̃́ yí-dɔ-kɔ̀ séĩ́ páà lɛ e kíe mɔ̀, ɛ̃́ɛ̃́ o yàlà kṹũ̀ lɛ Kɛ́lɛ̀ì yí.

⁴ À mɔ́ɔ̀ wɔ̃̀ mɔ̀ɔ, kà tó ḿ gèe ka lɛ̀ɛ. Yékɛ̀ ká tó mi nɔ́ɔ fé é ka bèkɛ̀ ɓo ka wũ-kèlè yí-sìè-wè gèeè ká ka lɛ̀ɛ.

⁵ Yé bɛ̃̀ɛ̃ m gbĩ-kpàla wá ka píé yia, m gɛ̀ɛ̀ lɛ ka píé yi. Ɛ́ɛ̃́ m gé lɛ́ɛ̀ li kɛ ḿ ka zì wɔ̃́ kɛ-kɔ̀ yiè lɛ́ kà dɔá ka dɔ̀lɔ̀ mɔ̀ ka zì zò-dɔ̀ Kɛ́lɛ̀ì mɔ̀ yía gɛ̃̀.

Ka nyáá páà lɛ e kíe mɔ̀ Kɛ́lɛ̀ì yí

⁶ Lɛ̀ lɛ́ ka Kɛ́lɛ̀ì Zízɛ̀ sɔ̀lɔ̀ ɓo ka Dàa-mì káa, kà táá à kpáá yí.

⁷ Ka gáná è gbɛ̃̀ à yí. Kà ka dìè dɔ à là. Ɛ́ɛ̃́ ka zì zò-dɔ̀à-mɔ̀ mɛ́ è kɛ gágà teele lɛ̀ zí o pɛ zɔ̃̀ɔ̃̀á ka lɛ̀ɛ lɛ́ ɓe. Kà Wálà zúo ɓo nyɔ́ɔ̀ɔ.

⁸ Yékɛ̀ ká tó mi dò é wɔ̃́ fèle lɛ́ e mia bèkɛ̀-ɓo-wɔ̃̀ ká, lɛ́ mia ɓéèe zì gíkã́ à zɔ̃̀ɔ̃̀ o lɛ̀ɛ káa sí é ka kɛá lùò vɔ̀ ká. Wɔ̃́ nì o kília, óò go mia kɛ-kɔ̀ lɛ́ waà à zɔ̃̀ɔ̃̀ mɔ́ o lɛ̀ɛ, e bɛ̀i pɛ vɔ̀ lɛ́ o kpóṹ là zèe líé sípìàa kɛ̀lɛ̀. Òó gó Kɛ́lɛ̀ì kɛ̀lɛ̀.

⁹ Ƃii pɛ séĩ́ lɛ́ e Wálà yía, lɛ ɓe Kɛ́lɛ̀ì zì kɛ̀ mi gbunu ká yí.

¹⁰ Ɛ́ɛ̃́ ka nyáá páà lɛ e kíe mɔ̀ à yí. Ɛ́ɛ̃́ Kɛ́lɛ̀ì lɛ pɛ yí gáàa zɛ̀, e bɛ̀i yíkɛ̀ gáàa nì séĩ́ là.

¹¹ Kà ye nì ka kɛ̀ doó yía, ka bɔ̃́ɔ̃́ síì e kɛá. Bɔ̃́ɔ̃́ síì e kília, ye wá à yé mia ò sia ká. Kɛɛ lɛ Kɛ́lɛ̀ì zì mia bɔ̃́ɔ̃́-zɛ-kɔ̀ ká. À zì bɔ̃́ɔ̃́-zɛ-kɔ̀ e kília lɛ́ e kélɛ̀, mia lɛ́ ò bɔ̃́ɔ̃́ e kília sia, kɛɛ o laà lɛ gbaa kɛ-wɔ̃̀ yɔɔ kɛ gbĩ-kpàla là yíkɛ̀ gáàa kɛ̀lɛ̀.

¹² Ƃii lɛ̀ lɛ́ o ka bàtáì kɛɛ, a zɔ̃̀ɔ̃̀ kélɛ̀ kà Kɛ́lɛ̀ì nì ka bĩ̀ĩ̀ lɛ lɛ̀ doó mɔ̀. Ɛ́ɛ̃́ kà Kɛ́lɛ̀ì nì ka wɛ̀lɛ̀ lɛ̀í lɛ̀ lɛ́ o ka bàtáì kɛɛ ká nɔ́ kíli. E kɛ kíli, ɓii ka zò dɔɔ̀ e kɛá Wálà lɛ́ e Kɛ́lɛ̀ì wɛ̀lɛ̀ ga kɛ̀lɛ̀ɛ zì yíkɛ̀ gáàa lɛ́ è yɛɓo kɛ̀áa mɔ̀.

¹³ Ka gaà e kɛá mɔ́ wɔ̃́ lɛ́ ye wá kpeĩa kɛ́ ka ɓoa, ɛ̃́ɛ̃́ zeĩ́, ka bɔ̃́ɔ̃́ síì lɛ̀ɛ́ gbaa kɛáa mɔ́ɔ̀ wɔ̃̀ mɔ̀. Kɛɛ dɛɛ káa, Wálà aà kà Kɛ́lɛ̀ì nì ka kɛ gbaa ɓéèe. Wálà aà ko kɛ-wɔ̃̀ séĩ́ lɛ́ ye wá kpeĩa ɓo ko wũ mɔ̀.

¹⁴ Kii lɛ́ à bɛ̃̀ɛ̃ɛ̃̀ e kɛá ko mɔ̀ kèlè mɔ́ɔ̀ wɔ̃̀ mɔ̀, lɛ́ à wɔ̃̀ e kɛ ko mɛ̀pìà lɛ́ tɔ̃́ũ e kɛ à mɛ̀ĩ́a, Wálà aà à sòló gbaa. E à wɔ̃̀ nyɛ tã́ã̀ féfé à pà kɔ́lɔ́sì mɔ̀ kolo là zàá.

¹⁵ Ɛ́ɛ̃́ kɔ́lɔ́sì e kília mɔ̀ɔ, Kɛ́lɛ̀ì e e dìè ɓo pɛ yí gáàa zɛ̀ wà yíkɛ̀ gáàa nì o zì yíkɛ̀ gáàa wì. E o kɛ gbaa mia nyìɛ là gɛ̃̀-pɛ̀ ká áà o líé sì, wáà tò à píé à zì kɔ̀-dìè-kɔ̀-là gbũ yí.

¹⁶ À mɔ́ɔ̀ wɔ̃̀ mɔ̀ɔ, yékɛ̀ ká tó mi nɔ́ɔ fé é bɔ̃́ɔ̃́ yà pɛ nɔ́ɔ fé lɛ́ kà ɓèlè, ɛ̃́ɛ̃́ lɛ́ kà mi, e bɛ̀i lúó kpànazɛ̀ wɔ̃̀, ɛ̃́ɛ̃́ zeĩ́ mɛnɛ dɛɛ kpɛ̀ɛ̀-yɛ́-wɔ̃̀, e bɛ̀i fĩ́ĩ́-dɔ-lùò mɔ́ɔ̀ wɔ̃̀ là.

¹⁷ Wɔ̃́ sùu nì e kília lɛ wɔ̃́ lɛ́ lɛ líéa bĩ́ ɓɔ̀ɔ ká. Kɛɛ pɛ́ e pɛ bĩ́ e kília yía lɛ́ e Kɛ́lɛ̀ì káa.

¹⁸ Yékɛ̀ ká tó mia lɛ́ ò o dìè si gbùò pɛ lɛ́ wa zɛ lɛ́ e kélɛ̀ mɛ̀ĩ̀ lɛ́ ɓea mɔ́ɔ̀ wɔ̃̀ mɔ̀ɔ, ó mɛ̀ĩ́-sà káá ka wĩĩ́. Wɔ̃́ lɛ́ ò nɛ̀ɛ à gèeè mɔ̀ɔ lɛ́ e kélɛ̀, mia ó o dìè sí péĩ́ dìè-sì-péĩ́ zì yé ye wá kpeĩa ká, ɛ̃́ɛ̃́ mia ó gbini Wálà là vɔ-mìà lɛ̀ɛ káa. Mi sùu e kília, à zì mia ɓéèe zì yɛ́lɛ́-táá-kɔ̀ lɛ́ɛ̀ à kɛ̀ tó áà kɛ̀ gɔ́ɔ́-gɔ̀ɔ̀, tó mɔṹ à yí kpeĩ wá ɓe.

¹⁹ Aà tèá gbaa kùnù Kɛ́lɛ̀ì lɛ́ e pɛ wũ káa mɔ̀ pìà. Kɛ́lɛ̀ì lɛ gbĩ-kpàla lɛ̀ séĩ́ là, tó áà gbĩ-kpàla lé gbà. Kɛ́lɛ̀ì láà kɛ̀ tó gbĩ-kpàla áà yà e kíe mɔ̀ e kpo là wà e yà-kíe-mɔ̀ ɓɛ̀lɛ̀ ká, ɛ̃́ɛ̃́ tó gbĩ-kpàlaa áà fàà zi lɛ́ Wálà à nàà é kɛáa ká.

Gà wáà kɛ̀ ɓe zeĩ́ Kɛ́lɛ̀ì yí

²⁰ Kà Kɛ́lɛ̀ì nì ka ga. Ɛ́ɛ̃́ ka ɓoò lɛ gbaa pɛ vɔ̀ lɛ́ o kpóṹ là zèe líé sípìàa o wì. Yé aà kɛ kília, mɛ́ mɔṹ e kɛ lɛ́ kà yìì lɛ̀ pɛ lɛ́ ka kpóṹ là zèe là pɛ ká ɓɛ? Mɛ́ e kɛ lɛ́ kà wèè bɔ̃́ɔ̃́ lɛ́ wa yà pɛ là píéa wɔ̃̀ mɔ̀ ɓɛ? Bɔ̃́ɔ̃́ lɛ́ wa yà kília, lɛ́ e kélɛ̀,

²¹ yékɛ̀ ká sɔ̀ɔ pɛ yé e kéa ká. Zéniía, yékɛ̀ ká pɛ́ e yía dã́, ɛ̃́ɛ̃́ yékɛ̀ ká pá pɛ yé e yía mɔ̀.

²² Pɛ nì e kília, yé waà yɛɓo kɛ o káa, kɛɛ o yí aà sìè. O nɔ́ ɓɔ̀ɔ mia ɓéèe zì bɔ̃́ɔ̃́-yà-pɛ-là wà pɛ-zɔ̃̀ɔ̃̀-kɔ̀ ɓɔ̀ɔ ká.

²³ Wɔ̃́ nì e kília, lɛ́ɛ̀ kɛ̀ lɛ̀ gíkã́-wɔ̃̀ lɛ́ ɓe. Óò mia kɛ̀ tó wáà gbìnì Wálà là vɔ-mìà lɛ̀ɛ, ɛ̃́ɛ̃́ wáà o dìè sì péĩ́ dìè-sì-péĩ́ zì yé ye wá kpeĩa píé, ɛ̃́ɛ̃́ tó wáà i kɛ̀ ɓáà wɔ̃́ nyɔ́ɔ̀ɔ nyɔ́ɔ̀ɔ kɛ̀ i gbĩ-kpàla ká. Kɛɛ òó bɛ̀i gbũũ̀ i mɔ̀ kɛ í i dìè kṹ tã́ã̀ wɔ̃́ yɔɔ̀ yɔɔ̀ lɛ́ à kɛ-lɔ̀ è i kɛ̀ɛ mɔ́ɔ̀ wɔ̃̀ mɔ̀.