Àpɔ́sɔ̀lɔ̀ 28 - Wè-dɔ-wè Dɛɛ

Pɔ́ɔ̀ lɛ Mɔ́tà

¹ Lɛ̀ ko ɓɔ kpóṹ làa, ko à yí dɔ gbaa kélɛ̀ ko lɛ̀ lɛ́ ò si Mɔ́tàa mɔ̀. Lɛ̀ e kília e kɛ lɛ̀ lɛ́ yíí nìɛ̀ lɛ à mɔ̀ɔ ká.

² Sɛ́lɛ́ e kília yí-mìà sɔ̃̀ɔ̃ e kɛ sɛ̀ ko ká nyɔ́ɔ̀ɔ. Lɛ̀ɛ e kɛ bãpìà, tó nɛ́nɛ́ áà nù. Lɛ̀ e kɛ kília, o tíé gbá kã́ ko lɛ̀ɛ, wáà ko ɓɛ̀lɛ kpɔ̀.

³ Pɔ́ɔ̀ e kɔ̀ɛ̀i kɛ̀nɛ́ pá e kíe mɔ̀. Lɛ̀ e kɛ à dɔpìà tíé mɔ̀ɔ, mɛ̀nɛ e gó kɔ̀ɛ̀ia yí, tíé e kɛ à kṹpìàa mɔ́ɔ̀ wɔ̃̀ mɔ̀. Mɛ̀nɛ e kília e e sɔ̃́ɔ̃́ pɛ́lɛ́ à kɔ̀ yí.

⁴ Sɛ́lɛ́ e kília yí-mìà o mɛ̀nɛɛ gɛ̃̀ dũ̀á Pɔ́ɔ̀ kɔ̀ mɔ̀. Wa gèe o kíe nì lɛ̀ɛ, “Gɔ̃́ e kéa lɛ́ɛ̀ bɛ̀i kɛɛ̀ lèĩ mi zɛ-mì ká. Kò wɔ̃́-kpeĩ-kɛ wálà lɛ̀ɛ́ ló à tóò kɛ é kɛ ɓe, yé bɛ̃̀ɛ̃ e la mɛ̀ĩ́ kɛ̀lɛ̀ɛ ká.”

⁵ Kɛɛ Pɔ́ɔ̀ e e kɔ̀ yí zɛ tíé là. Mɛ̀nɛɛ e káá gbaa tíè, Pɔ́ɔ̀ lɛ̀ɛ́ gbaa gĩ̀ĩ gbɛɛ ɓo.

⁶ O nyìɛ e kɛ Pɔ́ɔ̀ mɔ̀ kɛ é fɔ̀ɔ, ɛ̃́ɛ̃́ kɛ vɔ̀ é dà tã́ã̀ e bílí ká zá le. O yà gbaa ɓɛ̀lɛ̀ píé gbèĩ zɛ̀. Wɔ̃́ lé-pa zɛ̀ gbɛɛ lɛ̀ɛ́ gbaa kɛ à ká. Lɛ̀ e kɛ kília, o wà yɛ́lɛ́-táá mɛ́ vɔ̀ɔ wáà gèè, “Gɔ̃́ɔ lɛ wálàa dò ká.”

⁷ Lɛ̀ o kɛ yía, lɛ̀ dò e kɛ à ká kɔ̀ɛ́. Sɛ́lɛ́ e kília dàa-mì lɛ́ o kɛ à sípìà Pɔ́ɓèlèàa, lɛ́ e kɛ là pɛ káa. E ko ɓɛ̀lɛ kpɔ́. Ko kɛ à píé kɛ́ì lúó yààka píé, áà dɔ̀ ko là e yiè ká.

⁸ Pɔ́ɓèlèà e kília à dàa e kɛ wɔ̀ɔ̀á tã́ã̀. Yáá e kɛ à kɛpìà. Kii-kũ̀-mɔ̀ wà kɛ̀lɛ́-kɛ̀lɛ́ e kɛ à kɛpìà. Pɔ́ɔ̀ e ló à yììpìà. E sɛ̀nɛ ɓo. E e kɔ̀ kpɔ́ à là. E gɔ̃́ɔ kɛ gbaa e kɛ kéléŋ-kèlèŋ.

⁹ Lɛ̀ wɔ̃́ e kéa e kɛɛ, yáá-mìà yé o kɛ sɛ́lɛ́ e kília yía, o séĩ́ o nu. O o la nɔ́ kíli.

¹⁰ O nɔ̀-lɛ̀ɛ-pɛ̀ búnùzɛ̀ nɔ ko lɛ̀ɛ. Lɛ̀ ko yà zeĩ́ gɔɔ yía, o pɔɔ̀ lɛ́ kò lo à naà à ká tááa mɔ̀ɔ, wa wàà gɔ́ɔ́ɔ yí.

O gó Mɔ́tà, o ló Wólóũ̀

¹¹ Lɛ̀ mɛnɛ yààka e diea, ko yà gɔɔ lɛ́ e kɛ gópìà Ɛ́lèzánìàa yí. Gɔ́ɔ́ e kília à tɔ́ e kɛ à mɔ̀ɔ, lɛ́ Wálà Yòo Zɛ̀. E kɛ sɛ́lɛ́ e kília yí é tóá kíli lɛ̀ɛ-yíí-pɛ̃́ é nyɛ.

¹² Ko ɓɔ sɛ́lɛ́ lɛ́ ò si Sálékíyùa yí. Ko kɛ yí lúó yààka píé.

¹³ Lɛ̀ ko gó yia, ko ló zeĩ́, ko ɓɔ Lígìà. À lɛ̀ gbɛɛ kpɛ̀iì káa, fã̀ã̀ e gbɛ̃̀ áà gò ko mɛ̀ĩ́ die ká. Lɛ̀ lúó pèèlɛ e diea, ko ɓɔ Putíólè.

¹⁴ Ko ko ɓɛ́ĩ̀ Wálà-mìà dò gɛ̃̀ yi. Wa gèe kò ye nì kó kɛ yí lɔ́ɔ́ doó píé. Zí e kéa lɛ́ ko ɓɔá Wólóũ̀a.

¹⁵ Ko ɓɛ́ĩ̀ Wálà-mìà lɛ́ o kɛ Wólóũ̀a, o ko wɔ̃̀ ma. O nu dɔ̀á sí ko gɛ̀nɛ̀ Ápéà Lɔ́ɔ́ Kpánà, ɛ̃́ɛ̃́ lɛ̀ lɛ́ ò si Lɔ̀ɔ̀-mìà Wɔ̀lɔ̀-kpɔ́pìà Yààkaa mɔ̀ píé. Lɛ̀ Pɔ́ɔ̀ e o gɛ̃̀ɛ, à fã̀ã́ e wàà áà Wálà zúo ɓò.

Pɔ́ɔ̀ nì o Wólóũ̀

¹⁶ Lɛ̀ ko ɓɔ Wólóũ̀a, wa gèe Pɔ́ɔ̀ lɛ̀ɛ é kɛ e dìè kɔ̀ mɔ̀. Sóyà doó e kɛ yí é e nyìɛ kɛ Pɔ́ɔ̀ mɔ̀.

¹⁷ Lɛ̀ lúó yààka e diea, Pɔ́ɔ̀ e Zúù-mìà wũ-là-mìà lɛ́ o sɛ́lɛ́ e kília yía, súo kɛ o kíe là. Lɛ̀ o pá o kíe mɔ̀ɔ, a gèe o lɛ̀ɛ, “M lèe-gé vɔ̀. Yé bɛ̃̀ɛ̃ m̀ḿ gbaa wɔ̃́ gbɛɛ kɛ ko pà-mìà, ɛ̃́ɛ̃́ wɔ̃́ kɛ́-kɔ̀ lɛ́ kɔa sɔ̀lɔ̀ ɓo ko dàa ye dàà nì kɛ̀lɛ̀ɛ káa, o m kɛ m kɛ bĩ́-kɛ̀ì mì ká Zùlúsàlɛ̀, ɛ̃́ɛ̃́ o m nɔ Wólómà-mìà lɛ̀ɛ.

¹⁸ O m wɛ̃́ĩ́-lɔ̀ɔ kɛ, tó wáà nàà ó gó m mɔ̀, ɓii òó gbaa wɔ̃́ lɛ́ ò kɛ̀ lɛ́ ò mi zɛɛ gɛ̃̀ kɛ ḿ kɛ.

¹⁹ Kɛɛ lɛ̀ Zúù-mìà òó gbaa wéé wɔ̃́ e kéa mɔ̀ɔ, e kɛ m mɔ̀ kɛ ḿ gèe ó m vɔ Sízà píé, yé bɛ̃̀ɛ̃ wɔ̃́ gbɛɛ wá ɓe kɛ ḿ gèe m pà-mìà gbĩ mɔ̀ɔ káa ká.

²⁰ Wɔ̃́ e kéa lɛ́ ma mɔ́ɔ̀ à gèe ɓo kɛ ḿ ka gɛ̃̀, ɛ̃́ɛ̃́ kɛ kɔ́á mɛ́ĩ́ ɓo e kíe làa. Ƃii mi lɛ́ Éézɛ̀lɛ̀-mìà zò lɛ à mɔ̀ɔ mɔ́ɔ̀ wɔ̃̀ lɛ́ wa mɔ́ɔ̀ ɓɛ̀lɛ̀ e kéa dà ɓo m mɔ̀ɔ.”

²¹ Wa gèe à lɛ̀ɛ, “Kòó kii gbɛɛ gɛ̃̀ nɛ́ kɛ é gó Zùdíà, kɛɛ à gbɛ̃̀ɛ̃ɛ̃̀ é kɛá i mɔ́ɔ̀ wɔ̃̀ mɔ̀. Ɛ́ɛ̃́ ko lèe-gé vɔ̀ lɛ́ ò go yí wáà nù zèea, òó i làṹ ɛ̃́ɛ̃́ wɔ̃́ yɔɔ gbɛɛ gèe nɛ́ i gbĩ mɔ̀.

²² Kɛɛ kóò lo à naà kɛ kó i gé-wɔ̃̀ ma. Ƃii kóò à yí dɔ kélɛ̀ mia lɛ́ o lɛ̀ séĩ́ mɔ̀ɔ, óò wɔ̃́ yɔɔ gèe mia gbũ lɛ́ à mɔ́ɔ̀ mi dò lɛ i káa gbĩ mɔ̀.”

²³ Wà Pɔ́ɔ̀ nì o lúó kpɔ́. O kù gbùò zɛ̀ o nu lúó e kília ká lɛ̀ lɛ́ Pɔ́ɔ̀ e kɛ yía mɔ̀. Pɔ́ɔ̀ e kɛ wɔ̃́ gã̀ pɛ́ɛ́pìà, áà kélá-wè ɓò áà gbɛ̃̀á Wálà zì tò-mia-là mɔ̀. É gó làapíé mɔ̀ é lóá nyɛ́ŋɛ̀ĩpíé mɔ̀ɔ, e kɛ à gèepìà. E à kɛ-zì naa ó wéé wɔ̃́ lɛ́ e kɛ à gèepìà é gbɛ̃̀á Zízɛ̀ mɔ̀ɔ mɔ̀, wɔ̃́ lɛ́ e kɛ à sípìà Móózè là Lɔ́ɔ̀ɔ wà dɔ̀-Wálà-lé-là-mìà wà kíía yía ká.

²⁴ Mia gbṹũ̀ o wéé à wéè mɔ̀ wɔ̃́ e kɛ à gèepìàa kolo là zàá. Kɛɛ mia dò bɛ̃̀ɛ̃ òó gbaa à gɛ̃̀ wánà ká.

²⁵ Lɛ̀ e kɛ kília, o gó yi wáà lò wéé kũ̀á sí o kíe lé. O gó yi lɛ̀ lɛ́ Pɔ́ɔ̀ e wɔ̃́ doó e kéa gèea ká. Ye lɛ́ e kélɛ̀, “Lɛ̀ lɛ́ Gɛ̀ɛ̀ Púlú e kpɔ́ dɔ̀-Wálà-lé-là-mì Ààzáyà yí, lɛ́ e kɛ mɛ́ĩ́ ɓopìà ka dàa ye dàà nì lɛ̀ɛ, e kɛ à mɔ̀ á gèe o lɛ̀ɛ kíli.

²⁶ Ƃii a gèe kélɛ̀, ‘Lo ɓá gèe míá o kéa lɛ̀ɛ, Káà lo ka tóó dɔɔ̀ zi nɔ́ɔ fé ká. Kɛɛ kàá ló wɔ̃́ yí maà. Ɛ́ɛ̃́ káà lo ka nyìɛ gbɛ̃̀ɛ̃̀ pɛ mɔ̀ zi nɔ́ɔ fé ká. Kɛɛ kàá ló lɛ̀ gɛ̃̀ɛ̃̀.

²⁷ Ƃii míá o kéa o wũ-kèlè yí lɛ gágà. O tóó lɛ̀ɛ́ wɔ̃́ ma. Waà o nyìɛ tútaa. È gɔ̃̀á kɛɛ̀ kília, o nyìɛ áá lɛ̀ gɛ̃̀ɛ̃̀, o tóó áá wɔ̃́ maà, ɛ̃́ɛ̃́ o wũ-kèlè yí áá kɛɛ̀ sɛ̀. Tó o nìɛ̀ m píé, ɛ̃́ɛ̃́ máá o kɛɛ̀ o kɛ kéléŋ-kèlèŋ.

²⁸ “Kà à yí dɔ gbaa kélɛ̀ Wálà zì mia la-wɔ̃̀ vɔɔ̀ lɛ gbaa sɛ́lɛ́ gbɛɛ yí-mìà píé. O bɛ̃̀ɛ̃ óò lo o tóó dɔɔ̀.” [

²⁹ Lɛ̀ Pɔ́ɔ̀ e nyɛ wɔ̃́ e kéa gèeè mɔ̀ɔ, Zúù-mìàa o gó gbaa yí, wáà lò o kíe kũ̀á sí kpó-kpó ɓo.]

³⁰ Pɔ́ɔ̀ e kɛ lɛ̀ e kília mɔ̀ kɛ̀ɛ̀ pèèlɛ píé. E kɛ ká e kɛ à wìa fɔ̀nɔ̀-nɔ kɛpìà. E kɛ e kɔ̀ yàpìà mia séĩ́ lɛ́ o kɛ nupìà ɓɔɔ̀ à píéa wì.

³¹ E wɔ̃́ gèe áà gbɛ̃̀á Wálà zì tò-mia-là wɔ̃̀ mɔ̀, ɛ̃́ɛ̃́ e wɔ̃́ lɛ́ à gbɛ̃̀ɛ̃̀ lɛ ko Dàa-mì Zízɛ̀ Kɛ́lɛ́ì mɔ̀ɔ, zɔ̃̀ɔ̃̀ mia lɛ̀ɛ. Ɛ́ɛ̃́ e wɔ̃́ gèe zò gágà lɛ̀ ká. Mi gbɛɛ lɛ̀ɛ́ gbaa à tèá à gèeè mɔ̀.