Àpɔ́sɔ̀lɔ̀ 26 - Wè-dɔ-wè Dɛɛ

Pɔ́ɔ̀ e dɔ e dìè là Àgélépà wɛlɛ mɔ̀

¹ Àgélépà a gèe Pɔ́ɔ̀ lɛ̀ɛ, “Lúó nɔɔ̀ lɛ i lɛ̀ɛ kɛ í i dìè wɔ̃̀ gèe.” Pɔ́ɔ̀ e e kɔ̀ fóló áà gèè e dìè mɔ́ɔ̀ wɔ̃̀ yí kélɛ̀,

² “Mia wũ-là-mì Àgélépà, lɛ m géli wɔ̃̀ ká kɛ ḿ dɔ pɛ́nɛɛ i wɛlɛ mɔ̀, kɛ ḿ wɔ̃́ séĩ́ lɛ́ Zúù-mìà waà kpɔ́ m wĩĩ́a, kɛ ḿ à ɓò-m-wũ-mɔ̀ wɔ̃̀ gèe.

³ M gé kpó-kpó lɛ́ɛ̀ li, ɓii íì Zúù-mìà zì wɔ̃́ kɛ-kɔ̀ séĩ́, ɛ̃́ɛ̃́ wɔ̃́ yí-naa-zì dɔ sɛ̀. Ḿm̀ mɔ́ɔ̀ kpé kã i lɛ̀ɛ kɛ í i tóó dɔ m mɔ̀ zò-yà-gé ká.

⁴ “Zúù-mìà séĩ́ óò zi lɛ́ m wɛ̀lɛ̀á tã́ã̀ é kã́ lúó lɛ́ m kɛá nyɔ̀nɔ́ɔ mɔ̀ɔ, óò à dɔ. M kɛ ko pà-sɛ̀lɛ̀ yí bèĩzɛ̀. Yé e kɛ kília, m ló Zùlúsàlɛ̀ bɛ̃̀ɛ̃ mɔ̀.

⁵ Waà yí dɔ mɔ́ pɛ́lɛ̀, ɛ̃́ɛ̃́ óò bɛ̀i à mɔ̀ ó à kélá-wè ɓo yé ò nàà ó kɛɛ ká kélɛ̀, m kɛ mia lɛ́ ò ko zì gbìnì-Wálà-lɛ̀ɛ kɔ̀ wɔ̃̀ kũ gágàa doó-mì ká. O lɛ́ o Fálásíì-mìà káa.

⁶ Dɛɛ káa, m dɔɔ̀ lɛ lɛ̀ e kéa mɔ̀ kɛ ó mɛ̀ĩ́-sà dɔ m mɔ̀, m zì zò kɛ̀ wè-dɔ-wè lɛ́ Wálà aà dɔ mɔ́ ko dàa ye dàà nì lɛ̀ɛ mɔ̀ɔ mɔ́ɔ̀ wɔ̃̀ mɔ̀.

⁷ Wè-dɔ-wè e kília lɛ́ mia sùu doò do vũ̀ doó wɛ́lɛ́ pèèlɛ lɛ́ o ko sùu làa, o zò lɛ à mɔ̀ kɛ ó gɛ̃̀ lɛ̀ lɛ́ ò gbìnì Wálà lɛ̀ɛ bĩ́ã́ ɛ̃́ɛ̃́ nyɛ́nɛ́ĩ́a káa. Wɔ̃́ lɛ́ ko zò lɛ à mɔ̀ kília, lɛ́ Zúù-mìà ò mɔ́ɔ̀ m kɛ ɓoa ko dàa-mì.

⁸ Mɛ́ e kɛ lɛ́ lɛ gágà kɛ ká gɛ̃̀ wánà ká kélɛ̀ Wálà lɛ́ɛ̀ mia lɛ́ waà gaa, o wɛ̀lɛ̀ ga kɛ̀lɛ̀ ɓɛ?

⁹ “M dìè-tĩ́ ma yà m gé kɛ ḿ wɔ̃́ séĩ́ lɛ́ m̀ bɛ̀i à mɔ̀ ḿ kɛ Zízɛ̀ lɛ́ è go Názàlɛ̀ɛ tɔ́-sìè-wɔ̃̀ káa kɛ.

¹⁰ Pɛ́ e kília lɛ́ ma kɛ Zùlúsàlɛ̀ɛ. Sálà-ɓò-Wálà-mɔ̀-mìà kpànazɛ̀ɛ o yíkɛ̀ gáàa nɔ m lɛ̀ɛ, máà Wálà-mìà búnù-búnùzɛ̀ dùòá bĩ́-kɛ̀ì. Ɛ́ɛ̃́ lɛ̀ lɛ́ wa gèe ó o zɛɛ, m wéé o zɛ-wɔ̃̀ mɔ̀ nɔ́ kíli.

¹¹ M wɔ̃́ nyɔ́ɔ̀ɔ kɛ o ká Zúù-mìà zì Wálà-kà wì píé lúó búnùzɛ̀ ká. M o kɛ-zì naa kɛ ó wɔ̃́ yɔɔ gèe Zízɛ̀ gbĩ mɔ̀. Wɔ̃́ e m wàa o píé, a kɛ tó máà lò o sã̀ dɔ̀á sí sɛ́lɛ́ doò do yí píé.

Pɔ́ɔ̀ e zi lɛ́ e nuá Wálà píéa wɔ̃̀ gèe

¹² “Wɔ̃́ e kília kɛ-wɔ̃̀ lɛ́ ma mɔ́ɔ̀ ló ɓo Dùmásàa. Sálà-ɓò-Wálà-mɔ̀-mìà kpànazɛ̀ɛ o yíkɛ̀ gáàa ɛ̃́ɛ̃́ wɔ̃́ lɛ́ m̀ lo à kɛɛ̀ɛ, wa mɔ́ɔ̀ kii nɔ m lɛ̀ɛ.

¹³ Ko dàa-mì, lɛ̀ m kɛ zi là máà lò nyɛ́nɛ́-dɔ̀-mia-tùluù lùò káa, m lɛ̀-fɔ̀nɔ-kɔ̀ dò lɛ́ à diè lɛ nyɛ́nɛ́ làa gɛ̃̀. E kɛ gópìà lɛ̀í, áà lɛ̀ fɔ̀nɔ̀ kò mia nì lɛ́ ko kɛ lópìàa ko sɔ́nɔ́ píé.

¹⁴ Ko séĩ́-séĩ́ ko pèlè tã́ã̀, ɛ̃́ɛ̃́ m wéé dò ma áà gèè m lɛ̀ɛ Hííbúlù-wè yí kélɛ̀, ‘Sɔ́ɔ̀, Sɔ́ɔ̀, mɛ́ e kɛ lɛ́ ì m sã̀ dɔ ɓe? Íì i dìè gĩ̀ĩ yé ɓaà i gã̀ mɛ̀ yílí soũ zɛ̀ mɔ̀ɔ ká.’

¹⁵ Ma gèe à lɛ̀ɛ kélɛ̀, ‘Dé e i ká, m Dàa-mì?’ Ko Dàa-mì a gèe m lɛ̀ɛ, ‘Ma Zízɛ̀ lɛ́ ì à sã̀ dɔɔ lɛ.

¹⁶ Kɛɛ wɛ̀lɛ̀ í dɔ i gã̀ mɔ̀. Maà ɓíé i là kɛ ḿ i sí m̀ yɛɓo-kɛ-mì ká. Lɛ i mɔ̀ í wɔ̃́ lɛ́ maà kɛ lɛ́ ɓaà gɛ̃̀ pɛ́nɛɛ, ɛ̃́ɛ̃́ à yé m̀ lo à zɔ̃̀ɔ̃̀ i lɛ̀ɛ lúó lɛ́ lɛ̀ɛ́ ɓɔ nɛ́ɛ káa gèe mia lɛ̀ɛ.

¹⁷ Ḿm̀ lo i laà Éézɛ̀lɛ̀-mìà wà sɛ́lɛ́ gbɛɛ yí-mìà lɛ́ m̀ lo i vɔɔ̀ o píéa kɛ̀lɛ̀.

¹⁸ Lɛ i mɔ̀ í o nyìɛ lé ɓo, ɓáà o ɓò bĩ́ tii yí, ɓáà o gbɛ̃̀ lɛ̀ púlú mɔ̀. Lɛ i mɔ̀ í o ɓo Sétɔ̃̀ là yíkɛ̀ gáàa wì, ó nu Wálà píé. Lɛ sɛ̀ ɓá kɛ kíli kɛ o zì zò-dɔ̀-m-mɔ̀ kolo là zàáa, kɛ o kɛ-wɔ̃̀ yɔɔ é ɓo o wũ mɔ̀, ɛ̃́ɛ̃́ kɛ ó o dɔ̀lɔ̀ gɛ̃̀ mia lɛ́ Wálà aà o kɛ e dìè là mia nì káa bà.’

Pɔ́ɔ̀ e e zì yɛɓo-kɛ-wɔ̃̀ gèe

¹⁹ “Ko dàa-mì Àgélépà, lɛ̀ e kɛ kília, m̀ḿ gbaa wɔ̃́ lɛ́ ma gɛ̃̀ lɛ́ e gó lɛ̀í kília kɛ-wɔ̃̀ tèé ɓo.

²⁰ Kɛɛ m wɔ̃́ gèe mia lɛ̀ɛ Dùmásà bèĩzɛ̀. Lɛ̀ m gó yia, ma dò gèe Zùlúsàlɛ̀, ɛ̃́ɛ̃́ Zúù-mìà pà lɛ̀ séĩ́ mɔ̀, e bɛ̀i, sɛ́lɛ́ gbɛɛ yí-mìà fĩ̀ã̀. M kɛ à gèepìà o lɛ̀ɛ kélɛ̀, lɛ o mɔ̀ ó o sɔ̃̀ɔ̃ yɔɔ mɛ́ vɔ̀ɔ, ó nìɛ̀ Wálà píé, ɛ̃́ɛ̃́ ó wɔ̃́ lɛ́ è lo à zɔ̃̀ɔ̃̀ kélɛ̀ waà o sɔ̃̀ɔ̃ yɔɔ mɛ́ vɔ̀ɔ, ó à kɛ.

²¹ Wɔ̃́ e kéa mɔ́ɔ̀ wɔ̃̀ lɛ́ Zúù-mìà wa mɔ́ɔ̀ m kṹ ɓo lɛ̀ m kɛ sálà-ɓò-Wálà-lɛ̀ɛ-kà wìa ká, wáà à kɛ-zì nàà ó m zɛɛ.

²² Kɛɛ Wálà aà tó gbũpìà m mɔ̀ é ɓɔá pɛ́nɛɛ mɔ̀. À mɔ́ɔ̀ wɔ̃̀ mɔ̀ɔ, m dɔɔ̀ lɛ lɛ̀ e kéa mɔ̀, kɛ ḿ kélá-wè ɓo mia séĩ́ lɛ̀ɛ, ó kɛ bɛ̃̀ɛ̃ fĩ́ĩ́-nyɛ zɛ̀ ɛ̃́ɛ̃́ kpànazɛ̀ɛ káa ká. Wɔ̃́ lɛ́ m̀ lo à gèeèa, lɛ wɔ̃́ nɔ́ doó lɛ́ dɔ̀-Wálà-lé-là-mìà wà Móózè nì waà gèe kélɛ̀ lɛ́ɛ̀ lo kɛɛ̀ɛ, lɛ à ká.

²³ Wɔ̃́ e kília gɛ̃̀ e ké. Lɛ Kɛ́lɛ̀ì mɔ̀ é wàa ɓèlè, kɛɛ à ye lɛ́ è lo kɛɛ̀ mi bèĩzɛ̀ ká é wɛ̀lɛ̀ ga kɛ̀lɛ̀, kɛ é mia la-wɔ̃̀ lɛ́ e kélɛ̀ tíé lɛ́ è lo lɛ̀ fɔ̀nɔɔ̀ o bàa lɛ́ ɓea, wɔ̃̀ gèe Zúù-mìà ɛ̃́ɛ̃́ sɛ́lɛ́ gbɛɛ yí-mìà lɛ̀ɛ.”

²⁴ Lɛ̀ Pɔ́ɔ̀ e kɛ dɔpìà e dìè mɔ́ɔ̀ wɔ̃̀ yí gágà zi sùu e kéa káa, Fɛ́sɔ̀ e gbɛ́ɛ́ à là weeá kélɛ̀, “Pɔ́ɔ̀. I wũ-kèlè yí aà nìɛ̀. I kii dɔɔ̀ lɛ nyɔ́ɔ̀ɔ. Ye lɛ́ è i wũ-kèlè yí nìɛ̀ ɓɛ.”

²⁵ Kɛɛ Pɔ́ɔ̀ a yí zṹ weeá kélɛ̀, “M dàa-mì Fɛ́sɔ̀, m wũ-kèlè yí nìɛɛ̀ wá à ká. Wɔ̃́ m̀ gèea, lɛ wánà zɛ̀ ɛ̃́ɛ̃́ lɛ kpeĩ.

²⁶ Ko dàa-mì Àgélépà lɛ́ɛ̀ wɔ̃́ nì e kéa yí dɔ. Ḿm̀ bɛ̀i à mɔ̀ m mɛ́ĩ́ ɓo à lɛ̀ɛ nyìɛ gágà ká. Ḿm̀ à yí dɔ kélɛ̀ wɔ̃́ e kéa gbɛɛ lɛ̀ɛ́ die à là, ɓii à kɛɛ̀ lɛ̀ɛ́ gbaa kɛá bĩ̀ĩ̀ ká.

²⁷ M dàa-mì Àgélépà. Íì wɔ̃́ lɛ́ dɔ̀-Wálà-lé-là-mìàa ò gèea gɛ̃̀ wánà ká? Ḿm̀ yí dɔ ɓáà gɛ̃̀ wánà ká.”

²⁸ Àgélépà a gèe Pɔ́ɔ̀ lɛ̀ɛ, “Lúó kpuú e kéa káa, ɓáà yí dɔ íì lo m kɛɛ̀ Kɛ́lɛ̀ì là mi ká?”

²⁹ Pɔ́ɔ̀ a gèe à lɛ̀ɛ kélɛ̀, “Lúóa é kɛ bɛ̃̀ɛ̃ gbèĩ ɛ̃́ɛ̃́ ɓúlua, ḿm̀ sɛ̀nɛ ɓo Wálà lɛ̀ɛ kɛ ɓieò, e bɛ̀i mia séĩ́ lɛ́ ka ka tóó dɔpìà pɛ́nɛɛ m mɔ̀ɔ, kɛ ká kɛ lɛ̀ zí m à káa lɛ́ ɓe. Kɛɛ m̀ḿ gèe ká kɛ lɛ̀ zí m à ká ɓɛ̀lɛ̀ yía lɛ́ ɓe.”

³⁰ Lɛ̀ e kɛ kília, sɛ́lɛ́ líé-sí-mìa wà mia wũ-là-mìa, e bɛ̀i Bɛ̀níì, é dàá mia yé o tóa bàa, o dɔ o gã̀ mɔ̀.

³¹ Lɛ̀ o gó yia, wa gèe o kíe nì lɛ̀ɛ, “Gɔ̃́ e kéa lɛ̀ɛ́ wɔ̃́ lɛ́ mia ò kɛ̀ wáà o zɛ̀, ɛ̃́ɛ̃́ wáà o dùò bĩ́-kɛ̀ìa à gbɛɛ kɛ nɛ́.”

³² Àgélépà a gèe Fɛ́sɔ̀ lɛ̀ɛ, “Gɔ̃́ e kéa, è gɔ̃̀á lò Sízà píé-wɔ̃̀ gèeèa, kɔ́áá góò à mɔ̀ e ló fèle.”