2 Pílɛ̀ 2 - Wè-dɔ-wè Dɛɛ

Pɛ-zɔ̃̀ɔ̃̀-mìà nɛ̀ zɛ̀

¹ Mia lɛ́ ò o dìè si dɔ̀-Wálà-lé-là-mìà, lɛ́ o wá mɔṹ à káa, o kɛ mɔ́ mia bà zèe. Zi nɔ́ doóa káa, pɛ-zɔ̃̀ɔ̃̀-mìà nɛ̀ zɛ̀ óò lo kɛɛ̀ ka bà nɔ́ kíli. Óò lo nuù pɛ-zɔ̃̀ɔ̃̀-kɔ̀ lɛ́ è mia yí sìè, ɛ̃́ɛ̃́ lɛ́ ye wá wánà zɛ̀ɛ ká ka bà. Óò lo o Dàa-mì lɛ́ aà o lɔ́ɔ mɔ́ɔ̀ wɔ̃̀ tèé ɓoò. Zí e kéa káa, óò lo nuù o yí-sìè-pɛ̀ ká o dìè mɔ̀ nɔ́ zá le.

² Kɛɛ mia búnùzɛ̀ óò lo tóò o zì sɔ̃̀ɔ̃ yɔɔ kɛ-zìa píé. Ɛ́ɛ̃́ mia óò lo wɔ̃́ yɔɔ gèeè zi lɛ́ à gbɛ̃̀ɛ̃̀ lɛ wánà-wɔ̃̀ɔ mɔ̀ɔ gbĩ mɔ̀ wɔ̃́ lɛ́ pɛ-zɔ̃̀ɔ̃̀-mìàa ò kɛ̀ɛ kolo là.

³ Pɛ séĩ́ lɔ̀-kpɔ̀-o-mɔ̀ɔ lɛ́ɛ̀ lo à kɛɛ̀, tó wáà pɛ sɔ̀lɔ̀ ɓò wéé lɛ́ ye wá wánà zɛ̀ɛ, gèè ka lɛ̀ɛ kolo là. Waà mɛ̀ĩ́-sà lɛ́ ò lo à dɔɔ̀ o mɔ̀ɔ pɛ̀ kɛ mɔ́ pɛ́lɛ̀, ɛ̃́ɛ̃́ pɛ lɛ́ è lo o yí sìèa yàà lɛ e nyìɛ́.

⁴ Wálà lɛ̀ɛ́ gbaa là vɔ-mìà yé o wɔ̃́ yɔɔ kɛɛ yéĩ̀ kṹ. Kɛɛ e o dùò tíé-pà. Ƃɛ̀lɛ̀ dàà lɛ o dĩ́ bĩ́ bà yi. O yàá gbaa mɛ̀ĩ́-sà dɔ̀-mia-mɔ̀ lùò gɛ̀nɛ̀.

⁵ Ɛ́ɛ̃́ Wálà lɛ̀ɛ́ gbaa kpóṹ là yé e kɛ mɔ́ ɓea yéĩ̀ kṹ. Kɛɛ e à kɛ yíí e pa kpóṹ-là-mìà lɛ́ òó gbaa à sɔ̃̀ɔ̃ kɛɛ là. Mia nɔ́ e o laa lɛ́ e kɛ Nóà, lɛ́ è kɛ̀-kpeĩ-kɔ̀ wɔ̃̀ gèea, é dàá mia sálápèèlɛ bàa káa.

⁶ Ɛ́ɛ̃́ zeĩ́, Wálà e mɛ̀ĩ́-sà káá pɛ́lɛ lɛ́ ò si Sɔ́dɔ̃̀ wà Gòmálàa o wĩĩ́. E o yí sìè tíé ká. E o kɛ wɔ̃́ lɛ́ è lo kɛɛ̀ mia lɛ́ òó Wálà sɔ̃̀ɔ̃ kɛɛ káa gɔ̃̀á ká.

⁷ E Lɔ́ɔ̀ la. Lɔ́ɔ̀ e kɛ gɔ̃ kpeĩ lɛ́ sɔ̃̀ɔ̃ yɔɔ lɛ́ lɔ́ɔ̀-sìè-mìà o kɛ à kɛpìàa tíé e kɛ à kṹpìàa ká.

⁸ Gɔ̃ kpeĩ e kília, e kɛ o bà. Wɔ̃́ lɛ́ e kɛ à gɛ̃̀pìà tó áà mà lúó séĩ́-séĩ́ káa, e à kɛ tó à zò yiè lɛ́ e kɛ à géa, áà wàa ɓèlè o zì kɛ-wɔ̃̀ yɔɔ ɓɛ mɔ́ɔ̀ wɔ̃̀ mɔ̀.

⁹ À mɔ́ɔ̀ wɔ̃̀ mɔ̀ɔ, ko Dàa-mì lɛ́ɛ̀ mia lɛ́ ò à sɔ̃̀ɔ̃ kɛ̀ɛ là yí-dã́-wɔ̃̀ kɛ̀lɛ̀ zì dɔ. Ɛ́ɛ̃́ lɛ́ɛ̀ zi lɛ́ ò mia lɛ́ o wá kpeĩa gbɛ̃̀á lɛ̀ lɛ́ ò wàa ɓèlè yia mɔ̀ zì dɔ é tóá kíli Mɛ̀ĩ́-sà Dɔ̀-mia-mɔ̀ lùò é ɓɔ.

¹⁰ Kɛɛ mia kpó-kpó lɛ́ è o to wáà wàa ɓèlèa, o lɛ́ o mia lɛ́ wɔ̃́ lilì kṹã̀a zɛ̀ kɛ-lɔ̀ è o gbĩ-kpàla kɛ̀, tó wáà kɛ̀ɛ káa. Ɛ́ɛ̃́ o nyìɛ fɔ̃́ɔ̃̀ lɛ Wálà là yíkɛ̀ gáàa yí. Pɛ-zɔ̃̀ɔ̃̀-mìà nɛ̀ zɛ̀ o kéa òó túó, ɛ̃́ɛ̃́ óò o dìè si gbùò. Òó ɓɛ̀lɛyà nɔ mia lɛ́ o lɛ̀ fɔ̀nɔɔ̀ɔ yí lɛ̀ía lɛ̀ɛ. Kɛɛ óò lé-kã́ kɛ̀ o mɔ̀.

¹¹ É kɛ bɛ̃̀ɛ̃ Wálà là vɔ-mìà lɛ́ o yí lɛ gágà, ɛ̃́ɛ̃́ lɛ́ o kpànazɛ̀ é diá pɛ-zɔ̃̀ɔ̃̀-mìà nɛ̀ zɛ̀ o kéa làa, òó à gèe pɛ-zɔ̃̀ɔ̃̀-mìàa waà wɔ̃́ yɔɔ kɛ lé-kã́ ká ko Dàa-mì wɛlɛ mɔ̀.

¹² Míá o kília, óò wɔ̃́ kɛ̀ lɛ̀ wìì vɔ̀ lɛ́ òó o yɛ́lɛ́ tááa lɛ́ ɓe. Ɛ́ɛ̃́ o zeĩ́ kélɛ̀ wìì vɔ̀ lɛ́ o yeè lɛ kɛ ó o kṹ wáà o zɛ̀ɛ lɛ́ ɓe. Óò wɔ̃́ yɔɔ gèe wɔ̃́ lɛ́ òó à yí maa gbĩ mɔ̀. Óò lo o yí sìè lɛ̀ zí ò wìì yí sìèáa lɛ́ ɓe.

¹³ Óò lo o fɔ́nɔ́ nɔɔ̀ wàa ɓèlèe ká wàa lɛ́ wa kɛ lɛ́ mia ò ɓèlèa wɛ̃́ĩ̀. Wɔ̃́ lɛ́ lɛ géli-wɔ̃̀ ká o lɛ̀ɛ lɛ́ e kélɛ̀, ó wɔ̃́ nɔ́ɔ fé lɛ́ à kɛ-lɔ̀ è o gbĩ-kpàla kɛ̀ɛ ó kɛ lɛ̀-kpɛ̀iì yí. Yé kà ye nì kaà kɛ pɛ ɓèlèpìà e kíe bàa, o sɔ̃̀ɔ̃ lɛ yɔɔ ɛ̃́ɛ̃́ yɛ́lɛ̀ zɛ̀. O gé lɛ́ɛ̀ li zi lɛ́ ò mia bèkɛ̀ ɓo à káa wɛ̃́ĩ̀.

¹⁴ Kɛ-wɔ̃̀ yɔɔ kɛ-lòà lɛ́ nɔ́ ò nàà ó o gɛ̃̀ɛ. O zò lɛ̀ɛ́ dà do kɛ-wɔ̃̀ yɔɔ kɛɛ̀ mɔ̀. Óò líé si mia lɛ́ o mɛ́ wá gáàa ká pɛ́lɛ́ gbéĩ́. Waà o zò kpɔ́ à nàà pɛ séĩ́ ká ká. Wálà là náá lɛ o mɔ̀.

¹⁵ Waà gó zi kpeĩa píé, waà o dìè tó luú gbaa. Waà zi lɛ́ Bélàũ̀ lɛ́ e kɛ Béɔ̀ gbe káa, e tó à píéa sí. Bélàũ̀ e kília, pɛlèe lɛ́ e kɛ lópìà sɔ̀lɔ̀ ɓoò wɔ̃́ yɔɔ kɛɛ̀ wɛ̃́ĩ̀a, wɔ̃̀ diè e kɛá à zò ká.

¹⁶ O mɛ́ĩ́ ɓo à lɛ̀ɛ gágà à zì kɛ-wɔ̃̀ yɔɔ wɛ̃́ĩ̀. Sòofàné lɛ́ lɛ̀ɛ́ wééa, e mɛ́ĩ́ ɓo à lɛ̀ɛ mi-wè yí, ɛ̃́ɛ̃́ e dɔ̀-Wálà-lé-là-mì e kília la bè-wɔ̃̀ lɛ́ e kɛ lópìà à kɛɛ̀ɛ kɛ̀lɛ̀.

¹⁷ Gɔ̃à o kília, o kélɛ̀ yíí kɔ̃̀nɛ́ lɛ́ aà wààa lɛ́ ɓe. O zeĩ́ kélɛ̀ lɛ̀ɛ-yíí-kpo lɛ́ fã̀ã̀ à si áà dìèáa lɛ́ ɓe. Wálà aà lɛ̀ dò kɛ ɓe o lɛ̀ɛ bĩ́ tii bà.

¹⁸ Óò lé-gbùò-là kɛ̀, tó wáà wéé wũ-nyɛ̀à-mɔ̀ zɛ̀ gèè. Óò wɔ̃́ yɔɔ kɛ-lɔ̀ lɛ́ è mia gbĩ-kpàla kɛ̀ɛ si, tó wáà zi nàà à ká mia mɔ̀. Míá ò kɛ̀ o ká kília, o lɛ́ o mia lɛ́ o gópìà gbaa mia lɛ́ o ɓe wɔ̃́ nì lɛ́ ye wá kpeĩa bàa káa.

¹⁹ Óò gèe o lɛ̀ɛ kélɛ̀ óò lo tóò o dìè kɔ̀ mɔ̀. Kɛɛ o dìè o lùò ká mia yí-sìè-pɛ̀ lɛ̀ɛ. Ƃii pɛ nɔ́ɔ fé lɛ́ à kɔ̀ diè lɛ mi làa, i là lùò ká.

²⁰ Ƃii yé mia waà la pɛ yí-sìè-pɛ̀ lɛ́ e kpóṹ là zèea kɛ̀lɛ̀ o zì ko Dàa-mì lɛ́ e ko La-mì Zízɛ̀ Kɛ́lɛ̀ì káa dɔ́ o ɓoa kolo làa, lɛ́ zeĩ́ pɛ yí-sìè-pɛ̀ nì o kília waà o kṹ zeĩ́ o kɔ̀ aà die o làa, míá o kília kɛ-kɔ̀ lɛ gbaa yɔɔ é diá zí o kɛá bèĩzɛ̀ɛ là.

²¹ È kɛ̀á òó gbaa wɔ̃́ kpeĩ kɛ-zì dɔ bèĩzɛ̀ɛ, áá kɛɛ̀ o mɔ̀ sɛ̀, é diá à dɔɔ̀, tó wáà o ko gbɛ̃̀ Wálà là lɔ́ɔ̀ lɛ́ à nɔɔ̀ e kɛá o lɛ̀ɛ mɔ̀ là.

²² Wɔ̃́ e kɛ o káa, a zɔ̃̀ɔ̃̀ kélɛ̀ pĩ̀ã̀ lɛ́ à vɔɔ̀ lɛ e kéa, lɛ wánà zɛ̀. Ye lɛ́ e kélɛ̀, “Gbã́ lɛ́ɛ̀ sóli, tó e nìɛ̀ zeĩ́, áà pàà.” Ɛ́ɛ̃́, “Ƃɔ̀ lɛ́ wa zúlúa, e nìɛ̀ zeĩ́, e ló áà dà bálá bà.”