2 Pílɛ̀ 1 - Wè-dɔ-wè Dɛɛ

¹ Óò m si Sáímɔ̀ Pílɛ̀. M Zízɛ̀ Kɛ́lɛ̀ì là yɛɓo-kɛ-mì ɛ̃́ɛ̃́ là àpɔ́sɔ̀lɔ̀ ká. Ḿm̀ wèè mia lɛ́ kaà zò-dɔ̀à-mɔ̀ lɛ́ e kpànazɛ̀ lɛ̀ ko zìa lɛ́ ɓea, sɔ̀lɔ̀ ɓo kò Wálà lɛ́ e ko La-mì Zízɛ̀ Kɛ́lɛ̀ì káa, zì kɛ̀-kpeĩ-kɔ̀ kolo là zàáa bà.

² Zò-kɛ̀-sɛ̀ ɛ̃́ɛ̃́ zò-yà-gé là è kpɔ́ ka lɛ̀ɛ Wálà wà ko Dàa-mì Zízɛ̀ dɔ́ kà ɓoa kolo là zàá.

Wálà e ka súo kɛ áà ka sì

³ Là yíkɛ̀ gáàa lɛ́ è go Wálà kɛ̀lɛ̀ɛ aà pɛ séĩ́ lɛ́ lɛ ko mɔ̀ kó sɔ̀lɔ̀ ɓo kɛ kó kɛ ɓe Wálà lɛ̀ɛ nɔ ko lɛ̀ɛ. E à nɔ ko lɛ̀ɛ à dɔ́ kò ɓo mi lɛ́ e ko súo kɛ kɛɛ kò ye nì kó dɔ à zì lɛ̀-fɔ̀nɔ-kɔ̀, ɛ̃́ɛ̃́ à zì sɔ̃̀ɔ̃-kɛ̀-sɛ̀ yía kolo là zàá.

⁴ Zí e kília káa, aà nɔ̀-lɛ̀ɛ-pɛ̀ kpànazɛ̀ kpó-kpó lɛ́ e e wè dɔ à káa nɔá ko lɛ̀ɛ. A kɛ kíli kɛɛ nɔ̀-lɛ̀ɛ-pɛ̀ nì e kéa ó à kɛ ká la wɔ̃́ kɛ-lɔ̀ lɛ́ è mia yí sìè kpóṹ e kéa làa kɛ̀lɛ̀, kɛ ká kɛ lɛ̀ zí Wálà dìè lɛ à káa lɛ́ ɓe.

⁵ Wɔ̃́ kpó-kpó e kéa mɔ́ɔ̀ wɔ̃̀ mɔ̀ɔ, kà à kɛ-zì naa ká sɔ̃̀ɔ̃-kɛ̀-sɛ̀ dà ka zì zò-dɔ̀à-mɔ̀ɔ bà. Kà wɔ̃́ yí-dɔ-kɔ̀ dà ka zì sɔ̃̀ɔ̃-kɛ̀-sɛ̀ɛ bà.

⁶ Kà dìè-kũ̀-tã́ã̀ dà ka zì wɔ̃́ yí-dɔ-kɔ̀ bà. Kà zò-gágà-lɛ̀ dà ka zì dìè-kũ̀-tã́ã̀a bà. E bɛ̀i, kà Wálà sɔ̃̀ɔ̃ kɛɛ̀ dà ka zì zò-gágà-lɛ̀ɛ bà.

⁷ Kà ka lèe-gé zì lɔ̀-kpɔ̀-ka-mɔ̀ dà ka zì Wálà sɔ̃̀ɔ̃ kɛɛ̀ bà. Ɛ́ɛ̃́ kà lɔ̀-kɛ̀à-mɔ̀ dà ka zì lèe-gé lɔ̀-kpɔ̀-ka-mɔ̀ bà.

⁸ Yé pɛ nì e kéa aà kɛ ka yí, tó wáà ɓò o yía, óò lo ka kɛɛ̀ wésá-wèsà, kɛɛ ká ɓa ka ɓɛɛ ká ko Dàa-mì Zízɛ̀ Kɛ́lɛ̀ì dɔ́ kà ɓoa kolo là zàá.

⁹ Kɛɛ mi lɛ́ ye wá à kɛ̀lɛ̀ɛ, lɛ̀ɛ́ bɛ̀i pɛ lɛ́ laa ká gbèĩa gɛ̃̀ɛ̃̀. Ɛ́ɛ̃́ à nyìɛ káà lɛ. À zò aà ni kɛ-wɔ̃̀ yɔɔ lɛ́ aà kɛ lúó lɛ́ aà diea píéa, pɛ̀lɛ̀-à-mɔ̀ wɔ̃̀ ká.

¹⁰ À mɔ́ɔ̀ wɔ̃̀ mɔ̀ɔ, m lèe-gé vɔ̀, kà à kɛ-zì kpó-kpó naa kɛɛ ká à kɛ ka súo lɛ́ Wálà a kɛɛ, wà ka sí lɛ́ a ɓoa, é kɛ wánà zɛ̀ teele. Ká kɛ̀á kília, kàá ló pèlè gbɛɛ ɓoò gbaa.

¹¹ Zí e kéa káa, yíkɛ̀ gáàa kpó-kpó nɔɔ̀ lɛ́ɛ̀ lo kɛɛ̀á ka lɛ̀ɛ kɛɛ ká ɓɔ lɛ̀ lɛ́ ko Dàa-mì lɛ́ e ko La-mì Zízɛ̀ Kɛ́lɛ̀ì káa, tóò lɛ mia là yi tòá-kíli káa mɔ̀.

¹² Wɔ̃́ e kília mɔ́ɔ̀ wɔ̃̀ mɔ̀ɔ, ḿm̀ lo ka zò vùò wɔ̃́ nì e kéa ká teele, yé bɛ̃̀ɛ̃ káà à dɔ zii, ɛ̃́ɛ̃́ lɛ́ ka gã̀ gbɛ̃̀ɛ̃̀ lɛ wɔ̃́ wánà zɛ̀ lɛ́ kaà à sɔ̀lɔ̀ ɓoa yí kpɛ̃ĩ lea káa ká.

¹³ Ḿm̀ yí dɔ lɛ kpeĩ kɛ ḿ tíé kpaa ka là lɛ̀ m tĩã́ ɓea ká, kɛɛ ka zò é vùò wɔ̃́ nì e kéa mɔ́ɔ̀ wɔ̃̀ ká.

¹⁴ Ḿm̀ yí dɔ kélɛ̀ ḿm̀ lo gbĩ-kpàla e kéa ɓoò m mɔ̀ dɛɛ ká, lɛ̀ zí ko Dàa-mì Zízɛ̀ Kɛ́lɛ̀ì a zɔ̃̀ɔ̃̀á m lɛ̀ɛ lɛ́ ɓe.

¹⁵ À mɔ́ɔ̀ wɔ̃̀ mɔ̀ɔ, ḿm̀ lo à kɛ-zì naà kɛɛ ḿ zi kɛ ɓe kɛ ka zò é vùò lúó séĩ́ ká wɔ̃́ nì e kéa mɔ́ɔ̀ wɔ̃̀ yí yé maà gaa ká.

Ko nyìɛ e Kɛ́lɛ̀ì zì kɛ̀-kpànazɛ̀-kɔ̀ gɛ̃̀

¹⁶ Lɛ̀ lɛ́ ko ko Dàa-mì Zízɛ̀ Kɛ́lɛ̀ì nu-kɔ̀ yí gágà zɛ̀ ɓɛ wɔ̃̀ kɛ kɛ ká yí dɔɔ, kòó mɔ́ɔ̀ ko zò dɔ gbaa pĩ̀ã̀ lɛ́ mia ò kɛ̀ o dìè wà gíkã́ káa mɔ̀. Ko à zì kɛ̀-kpànazɛ̀-kɔ̀ gɛ̃̀ ko dìè nyìɛ ká.

¹⁷ Ko kɛ yí lɛ̀ lɛ́ Wálà lɛ́ e mia Dàa káa, e ɓɛ̀lɛyà wà tɔ́-ɓɔ nɔ à lɛ̀ɛ ká. Lúó e kília káa, lɛ́ wéè dò e gó lɛ̀-fɔ̀nɔɔ̀ɔ kpànazɛ̀ɛ yí weeá kélɛ̀, “M zì lɔ̀-kɛ̀á-nɛ̀ lɛ́ e yía. M zò dàà lɛ à píé.”

¹⁸ Ko dìè ko wéé lɛ́ e gó lɛ̀í kília ma, lɛ̀ lɛ́ kò ye nì ko kɛ tɔ̃̀ũ̀ kpànazɛ̀ kpó-kpóa wĩĩ́a ká.

¹⁹ Wɔ̃́ e kéa láà kɛ̀ tó ko zò dɔɔ̀ lɛ wɔ̃́ lɛ́ dɔ̀-Wálà-lé-là-mìà wa gèea mɔ̀ kpó-kpó ɓo. Ká ka tóó dɔ̀á à mɔ̀ɔ, kɛɛ ka kɛ sɛ̀, ɓii lɛ kélɛ̀ nábò lɛ́ è lɛ̀ fɔ̀nɔ bĩ́ tii bàa lɛ́ ɓe. Lɛ́ɛ̀ lɛ̀ fɔ̀nɔ é tóá kíli Lɛ̀-kpɛ̀iì gã̀-là é ɓɔ, ɛ̃́ɛ̃́ tó lɛ̀-fɔ̀nɔ-kɔ̀ lɛ́ è go lɛ̀-kpèiì gã̀-là sĩ̀ã́ã̀ŋèlè kɛ̀lɛ̀ɛ, áà lɛ̀ fɔ̀nɔ̀ ka zò píé.

²⁰ Wɔ̃́ yé lɛ kpànazɛ̀ kpó-kpó ɓoa, gɛ̃̀ e ké. Lɛ à mɔ̀ ká yí dɔ kélɛ̀ mi gbɛɛ lɛ̀ɛ́ bɛ̀i wɔ̃́ lɛ́ à káà e kɛá mia lé, lɛ́ à bɛ̃̀ɛ̃ɛ̃̀ lɛ Wálà là kíía yía, yí ɓoò e doó là píéa.

²¹ Ƃii wɔ̃́ lɛ́ Wálà a káá mia léa gbɛɛ lɛ̀ɛ́ gbaa gó nɔ́ ɓɔ̀ɔ mi dò zì wèè-wɔ̃́-mɔ̀ yí. Kɛɛ Gɛ̀ɛ̀ Púlúa e mia sí, áà lò o ká wáà lò wɔ̃́ lɛ́ Wálà a káá o léa gèeá sí.