2 Témɔ́tè 4 - Wè-dɔ-wè Dɛɛ

¹ Wɔ̃́ e kéa ma kpɔ́ i kɔ̀ là Wálà wà Kɛ́lɛ̀ì Zízɛ̀ lɛ́ è lo mia lɛ́ waà gaa, wà o yé o tĩã́ ɓea, è lo mɛ̀ĩ́-sà dɔɔ̀ o mɔ̀ɔ, o wɛlɛ mɔ̀. À zì nú è lo à ɓoò, ɛ̃́ɛ̃́ à zì tò-mia-là mɔ́ɔ̀ wɔ̃̀ mɔ̀ɔ, ḿm̀ gèe i lɛ̀ɛ,

² ì Wálà là wééa gèe lòũ̀ ká. Ì à gèe téé-tèè, yé bɛ̃̀ɛ̃ lúó e kília lɛ sɛ̀ ɛ̃́ɛ̃́ ye wá sɛ̀ɛ ká. Ì à kɛ mia ó wéé i wéè mɔ̀. Ì mia gbɛ̃̀ zuú. Ì à kɛ mia fã̀ã́ é wàà. Ì pɛ zɔ̃̀ɔ̃̀ ɓáà i zò kũ̀ i gé à kɛɛ̀ yí teele.

³ Lúó lɛ́ mia òó ló o tóó dɔɔ̀ à ká pɛ wánà zɛ̀ lɛ́ ò zɔ̃̀ɔ̃̀ɔ mɔ̀ɔ, lɛ́ɛ̀ lo ɓɔɔ̀. Míá o kília óò lo tóò o dìè zì nàà-ká-wɔ̃̀ píé. Óò lo pɛ-zɔ̃̀ɔ̃̀-mìà búnù-búnùzɛ̀ lɛ́ ò lo wɔ̃́ lɛ́ o tóó à nàà á maa gèeè o lɛ̀ɛ, páà e kíe mɔ̀ o dìè lɛ̀ɛ.

⁴ Óò lo o tóó lé taà yékɛ̀ ó wánà-wɔ̃̀ɔ ma. Óò lo o tóó dɔɔ̀ pĩ̀ã̀ doò do mɔ̀.

⁵ Kɛɛ ì i yɛ́lɛ́ kɛ i dìè píé wɔ̃́ séĩ́ lɛ́ è lo kɛɛ̀ɛ kɛɛ̀ yí. Ì i zò kṹ tã́ã̀ wɔ̃́ nyɔ́ɔ̀ɔ gɛ̃̀ɛ̃ɛ̃̀ yí. Ì yɛɓo lɛ́ wɔ̃́ làṹ yièa gèe-mì à kɛ̀ɛ kɛ. Ì yɛɓo lɛ́ lɛ i mɔ̀ ɓá kɛɛ séĩ́ kɛ.

⁶ Kɛɛ ma yee, lúó lɛ́ m̀ lo kɛɛ̀á sálà-ɓo-pɛ̀ ká Wálà lɛ̀ɛ aà ɓɔ kɔ̀ɛ́. Lúó lɛ́ m̀ lo góòá sɛ́lɛ́ e kéa yía aà ɓɔ.

⁷ Maà m yí dɔ gágà bàlà lɛ́ e kɛ m mɔ̀ ḿ sía yí. Maà nyɛ gbaa bàlà e kília síì mɔ̀. Maà kùnù zò-dɔ̀à-mɔ̀ wɔ̃̀ɔ mɔ̀.

⁸ Dɛɛ ká gbaa, pɛ́ m kɛ à mɔ́ɔ̀ bàlà sípìàa, lɛ yàá m gɛ̀nɛ̀. Ye lɛ́ e zòlò lɛ́ lɛ wɔ̃́ kpeĩ kɛɛ̀ mɔ́ɔ̀ zòlò ká, lɛ́ ko Dàa-mì lɛ́ e Mɛ̀ĩ́-sà ɓo-mì kpeĩ káa, è lo à nɔɔ̀ m lɛ̀ɛ Lúó e kília káa káa. Lɛ̀ɛ́ ló à nɔɔ̀ m doó m lɛ̀ɛ. Kɛɛ lɛ́ɛ̀ lo à nɔɔ̀ mia séĩ́ lɛ́ ko Dàa-mì zì ɓɔ̀-mia-là è o zò kũa lɛ̀ɛ.

Wɔ̃́ lɛ́ Pɔ́ɔ̀ à nàà Témɔ́tè á kɛɛ

⁹ Ì à kɛ-zì kpó-kpó naa í ɓɔ m mɔ̀ pɛ́lɛ̀.

¹⁰ Dímà a lɔ̀ kɛ pɔɔ̀ lɛ́ e kpóṹ là zèea ká, ɛ̃́ɛ̃́ aà m kɛ maà wí tã́ã̀. Aà là ló ɓo Tɛsàlònákà. Kɛ́lɛ́sɛ̃̀ e ló Gɛ̀lésìà. Tátɔ̀ bɛ̃̀ɛ̃ e ló Dàmésà.

¹¹ Lúù doó lɛ́ nɔ́ lɛ m píé zèea. Ì Máà naa í nu à ká. Ƃii lɛ gbũ̀-mɔ̀ zɛ̀ yɛɓoa kɛɛ̀ yí.

¹² M Tíkíkà vɔ Ɛ́fɔ́sɔ̀.

¹³ Í kɛ̀á nupìàa, ì nu m̀ dà-mɔ̀-sɔ̀ lɛ́ m̀ dà m̀ sɔ là, lɛ́ ma tó Kápà kɛ̀lɛ̀ Tólóyàa ká. Ì nu kiia bɛ̃̀ɛ̃ ká nɔ́ kíli. À ye kpó-kpó lɛ́ à kɛɛ̀ lɛ kii lɛ́ɛ́ gbóló-gbòlò káa ì nu à ká.

¹⁴ Ɛ́lèzánà lɛ́ è pɛ-kúlú pèĩ̀a, e wɔ̃́ yɔɔ kpó-kpó kɛ m ká. Ko Dàa-mì lɛ́ɛ̀ lo à fɔ́nɔ́-nɔɔ̀ síì wɔ̃́ lɛ́ aà kɛɛ mɔ̀.

¹⁵ Ì i yɛ́lɛ́ kɛ i dìè píé à mɔ́ɔ̀ wɔ̃̀ mɔ̀, ɓii e kɛ gèlè gɔ̃pìà wɔ̃́ làṹ lɛ́ ko kɛ à gèepìàa ká mɛ́ gágà zɛ̀.

¹⁶ Mi gbɛɛ lɛ̀ɛ́ gbaa dɔ m sɔ́nɔ́ lúó bèĩzɛ̀ lɛ́ m dɔá kɛ ḿ wɔ̃́ ɓò-m-wũ-mɔ̀ wɔ̃̀ gèea ká. O séĩ́ o m wí tã́ã̀. Wálà là sɛ̀nɛ ɓɔ̀ɔ yékɛ̀ é à kpɔ́ o wĩĩ́.

¹⁷ Kɛɛ ko Dàa-mì e dɔ m sɔ́nɔ́, e yíkɛ̀ gáàa nɔ m lɛ̀ɛ. A kɛ bɛ̀i e kɛá m mɔ̀ kɛ ḿ wɔ̃́ làṹ yièa gèe kpó-kpó ɓo, kɛɛ sɛ́lɛ́ gbɛɛ yí-mìà séĩ́ ó à ma. Ɛ́ɛ̃́ m ɓoò e kɛá wɔ̀ɔ́ù lé.

¹⁸ Ɛ́ɛ̃́ ko Dàa-mì lɛ́ɛ̀ lo m laà wɔ̃́ yɔɔ séĩ́ kɛ̀lɛ̀, tó e m sí m kpóló dɔ́lɔ́ yí, tó e ló m ká lɛ̀ lɛ́ à tóò lɛ mia là yi lɛ̀ía mɔ̀. Ò à tɔ́ ɓɔ tòá kíli wɔ́lɔ́-wɔ́lɔ́ ká. É kɛ kíli.

Pɔ́ɔ̀ e wéé mia bà

¹⁹ Ḿm̀ wèè Pòlòsílà wà Àkólà, e bɛ̀i Ònɛ́séfɔ̀lɔ̀ píé-kɛ́ì-mìà séĩ́ bà.

²⁰ Ìlásà e tó Kɔ́lèĩ̀. Zeĩ́a, m Tɔ́lɔ́fímà tó Màlétà, ɓii e kɛ kɔ̃́ṹ-kɔ̃̀ũ̀a mɔ́ɔ̀ wɔ̃̀ mɔ̀.

²¹ Ì à kɛ-zì kpó-kpó naa í nɛ́nɛ́ pɛ̃́ tó líé, í nu. Yúɓèlè, Púdɛ̃̀, Lánà e bɛ̀i Kɔ́lɔ́dìà, ɛ̃́ɛ̃́ zeĩ́ ko lèe-gé vɔ̀ séĩ́ lɛ́ o tóa, óò wèè i bà.

²² Ko Dàa-mì é kɛ i gɛ̀ɛ̀ píé. Zò-kɛ̀-sɛ̀ é kɛ ka píé teele.