2 Témɔ́tè 2 - Wè-dɔ-wè Dɛɛ

Kɛ́lɛ̀ì Zízɛ̀ là sóyà yiè

¹ M̀ nɛ́ kɛɛ ɓi yee, i mɛ́ è kɛ gágà zò-kɛ̀-sɛ̀ lɛ́ e mia lɛ́ kò Kɛ́lɛ̀ì Zízɛ̀ nì ko doóa kɛ̀lɛ̀ɛ yí zàá.

² Wɔ̃́ lɛ́ i m gɛ̃̀ máà gèè kélá vɔ̀ búnùzɛ̀ nyìɛ mɔ̀ɔ, ì o sí í o nɔ gɔ̃à lɛ́ ì bɛ̀i à mɔ̀ í i zò dɔ o mɔ̀, lɛ́ bɛ̀i è lo kɛɛ̀ o mɔ̀ kɛ ó pɛ zɔ̃̀ɔ̃̀ mia gbɛɛ bɛ̃̀ɛ̃ lɛ̀ɛ lɛ̀ɛ.

³ Wàa lɛ́ mi lɛ́ lɛ Kɛ́lɛ̀ì Zízɛ̀ là sóyà yiè káa è à ɓèlèa, ì i zì ɓèlè.

⁴ Sóyà lɛ́ lɛ sóyà kɛ-yɛ̀ɓo kɛpìàa, láà nàà é e wũ-là-mì zò-dà-wɔ̃̀ kɛ. À mɔ́ɔ̀ wɔ̃̀ mɔ̀ɔ, lɛ́ɛ̀ e kɔ̀ ɓo wɔ̃́ lɛ́ mi lɛ́ ye wá sóyà káa à kɛ̀ɛ kɛɛ̀ bà.

⁵ Mi lɛ́ lɛ bàlà sípìà pɛ dò wɛ̃́ĩ̀a, lɛ̀ɛ́ ló pɛ́ e kília sɔ̀lɔ̀ ɓoò yé lɛ̀ɛ́ bàlà e kília sí lɔ́ɔ̀ kṹ tã́ã̀a ká.

⁶ Nyɛ́nɛ̀ĩ̀-kpɔ́-mì lɛ́ aà yɛɓo lɛ́ e nyɛ́nɛ̀ĩ̀a gágà kɛɛ lɛ́ lɛ à mɔ̀ é pɔɔ̀ lɛ́ e nyɛ́nɛ̀ĩ̀ e kília mɔ̀ɔ dɛɛ sía.

⁷ Ì i yɛ́lɛ́ táá wɔ̃́ m̀ gèea yí, ɓii ko Dàa-mì lɛ́ɛ̀ lo à kɛɛ̀ tó i wɔ̃́ séĩ́ yí ma.

⁸ Zízɛ̀ Kɛ́lɛ̀ì lɛ́ e wɛ̀lɛ̀ ga kɛ̀lɛ̀, lɛ́ e kɛ Dèɓé sùu là mì ká, lɛ́ à wɔ̃̀ gèeè lɛ wɔ̃́ làṹ yiè lɛ́ m̀ à gèea yía, i zò è vùò à mɔ́ɔ̀ wɔ̃̀ ká.

⁹ Ḿm̀ wɔ̃́ nyɔ́ɔ̀ɔ gɛ̃̀ wɔ̃́ làṹ yiè e kília mɔ́ɔ̀ wɔ̃̀ mɔ̀. Ɛ́ɛ̃́ óò ɓɛ̀lɛ̀ dà m gã̀ mɔ̀ lɛ̀ pɛ lɛ́ m wɔ̃́ sìè. Kɛɛ Wálà là wééa wá ɓɛ̀lɛ̀ yí.

¹⁰ Wɔ̃́ e kéa mɔ́ɔ̀ wɔ̃̀ mɔ̀ɔ, ḿm̀ m zò kũ tã́ã̀ wɔ̃́ séĩ́ kɛ̀ m ká yí, Wálà là míá aà o sía mɔ́ɔ̀ wɔ̃̀ mɔ̀, kɛ o bɛ̃̀ɛ̃ ó la-ɓo lɛ́ lɛ Kɛ́lɛ̀ì Zízɛ̀ yí, ɛ̃́ɛ̃́ tòá kíli lɛ̀-fɔ̀nɔ-kɔ̀ɔ sɔ̀lɔ̀ ɓo.

¹¹ Wɔ̃́ mia ò gèe lɛ́ e kéa lɛ wánà zɛ̀. Óò gèe kélɛ̀, “É kɛ̀á kò ye nì ko gaa, kò ye nì kóò lo kɛɛ̀ ɓe nɔ́ kíli.

¹² Kóò ko zò kũ̀á tã́ã̀ kɔ́áà lò ko líé wɔ̃́ kɛɛ̀ káa, kò ye nì kóò lo mia líé síì nɔ́ kíli. Kóò à mɔ́ɔ̀ wɔ̃̀ tèé ɓòáa, lɛ́ɛ̀ lo ko bɛ̃̀ɛ̃ ko mɔ́ɔ̀ wɔ̃̀ tèé ɓoò nɔ́ kíli.

¹³ Yé ko wá zò-dɔ̀à-mɔ̀ zɛ̀ɛ, à yee lɛ nɔ́ zò-dɔ̀à-mɔ̀ zɛ̀ teele. Ƃii lɛ̀ɛ́ bɛ̀i nɛ̀ kɛɛ̀ e dìè mɔ́ɔ̀ wɔ̃̀ yí.”

Yɛɓo-kɛ-mì lɛ́ Wálà zò dàaà lɛ à píéa

¹⁴ Ì mia zò vùò wɔ̃́ e kéa ká. Ɛ́ɛ̃́ ì lìè-wè dɔ o lɛ̀ɛ Wálà wɛlɛ mɔ̀ kélɛ̀ yékɛ̀ ó wéé dɔ wéé doò do mɔ́ɔ̀ wɔ̃̀ mɔ̀. Wéé dɔɔ̀ lɛ̀ɛ́ wɔ̃́ yiè gbɛɛ kɛ. Kɛɛ lɛ́ɛ̀ mia lɛ́ ò o tóó dɔɔ wi tã́ã̀.

¹⁵ Ì i yí dɔ gágà kɛɛ Wálà zò é dà i píé. Ì kɛ yɛɓo-kɛ-mì lɛ́ yɛ́lɛ̀ làá kɛ yɛɓo lɛ́ à kɛ̀ɛ mɔ́ɔ̀ wɔ̃̀ mɔ̀, lɛ́ è wéé lɛ́ à gbɛ̃̀ɛ̃̀ lɛ Wálà là wánà-wɔ̃̀ɔ mɔ̀ɔ zɔ̃̀ɔ̃̀ kpeĩ lea ká.

¹⁶ Ì i dìè ɓo wéé lɛ́ Wálà tɔ́ lɛ̀ɛ́ ɓɔ à ɓoò yía bà. Wéé nì e kília, lɛ́ɛ̀ mia yí ɓo Wálà mɔ̀ bá le.

¹⁷ Wéé ò zɔ̃̀ɔ̃̀ mia lɛ̀ɛ kília, lɛ́ɛ̀ lo kɛɛ̀ lɛ̀ kã́-ɓà lɛ́ è mia ɓèlèa lɛ́ ɓe. Pɛ-zɔ̃̀ɔ̃̀-mìà o kília pèèlɛ tɔ́ lɛ́ Hàmìníà wà Fàlétà.

¹⁸ Waà gó wánà-wɔ̃̀ zì píé wáà à gèè kélɛ̀ ko zì wɛ̀lɛ̀-ga-kɛ̀lɛ̀ wɔ̃̀ aà die. Wɔ̃́ e kéa gèeè yía, aà mia dò zì zò-dɔ̀à-mɔ̀ kɛ wɔ̃́ gbɛ̃̀ mɛ̀ĩ́ zɛ̀ ká.

¹⁹ Kɛɛ ká-gã̀ mɛ́ gágà zɛ̀ lɛ́ Wálà aà dɔɔ wí-pɛ̀ wá. Ɛ́ɛ̃́ wéé nì e kéa bɛ̃̀ɛ̃ɛ̃̀ laa mɔ̀. O lɛ́ o kélɛ̀, “Ko Dàa-mì lɛ́ɛ̀ mia lɛ́ o là mia káa dɔ.” Ɛ́ɛ̃́ zeĩ́, “Mi nɔ́ɔ fé lɛ́ à gèe lɛ ko Dàa-mì là mi káa, lɛ à mɔ̀ é gó kɛ-pɛ̀ yɔɔ kɛɛ̀ lɛ̀ɛ.”

²⁰ Mia kɔ̀ gĩ́-ɓo-pɛ̀ doò do lɛ ká gbùò wì. À gbṹũ̀ lɛ sévà wà góò ká. À dò bɛ̃̀ɛ̃ lɛ yílí wà sɛ́lɛ́ ká. À gbṹũ̀ bɛ̃̀ɛ̃ lɛ yí lúó kpànazɛ̀ dò wɛ̃́ĩ̀. À dò bɛ̃̀ɛ̃ lɛ nɔ́ ɓɔ̀ɔ mia kɔ̀-lé ká.

²¹ Yé mi dò aà gó wɔ̃́ yɔɔ séĩ́ e kília kɛɛ̀ lɛ̀ɛ, tó áà e dìè mɛ́ pɛ̀lɛ̀ɛ, óò lo à síì wɔ̃́ kpànazɛ̀ kɛɛ̀ wɛ̃́ĩ̀. Ƃii mí e kília lɛ Wálà doó là mi ká, ɛ̃́ɛ̃́ bɛ̀i lɛ à Dàa-mì bɛ̃̀ɛ̃ mɔ̀ kɛ é yɛɓo kɛ à ká. À pɛ̀ kɛɛ̀ lɛ kɛ à Dàa-mì é yɛɓo kɛ à ká wɔ̃́ yiè nɔ́ɔ fé mɔ́ɔ̀ wɔ̃̀ mɔ̀.

²² Pɛ lɛ́ à lɔ̀ è mia dɛɛ kɛ̀ɛ, ì i yí ɓo à mɔ̀. Ɛ́ɛ̃́ ì i fã̀ã́ wàà kɛ̀-kpeĩ-kɔ̀, zò-dɔ̀à-mɔ̀, ɛ̃́ɛ̃́ lɔ̀-kɛ̀à-mɔ̀, e bɛ̀i, zò-yà-gé wɔ̃̀ kɛɛ̀ mɔ̀. Mia nì lɛ́ o zò píé lɛ púlú, lɛ́ o ko Dàa-mì súo kɛ kɛ é gbũ o mɔ̀ɔ, kà ye nì káà wɔ̃́ e kília kɛ̀.

²³ Ì i dìè ɓo tèé yí gíniìa zɛ̀ lɛ́ ò dà wɔ̃́ mi ɓàá yí dɔɔ mɔ́ɔ̀ wɔ̃̀ mɔ̀ɔ bà. Íì à yí dɔ tèé e kília dàaà líé-nyɛ-pìà lɛ́ e wéé dɔɔ̀ káa.

²⁴ Ye wá ko Dàa-mì là yɛɓo-kɛ-mì mɔ̀ kɛ é wéé dɔ. Lɛ à mɔ̀ à sɔ̃̀ɔ̃ é kɛ sɛ̀ mia séĩ́ ká. Lɛ à mɔ̀ é kɛ pɛ-zɔ̃̀ɔ̃̀-mì yiè lɛ́ zò-kũ̀-tã́ã̀ lɛ à kɛ̀lɛ̀ɛ ká.

²⁵ Yé à nàà é mia lɛ́ ò gèlè gɔ̃ à káa gbɛ̃̀ zuúa, lɛ à mɔ̀ é e kpóló kpɔ́ e mɔ̀ à kɛɛ̀ yí. À gbú lɛ yía, Wálà lɛ́ɛ̀ lo zi kɛɛ̀ ɓe o lɛ̀ɛ kɛ ó o sɔ̃̀ɔ̃ yɔɔ mɛ́ vɔ̀ɔ, kɛ ó kɛ gbaa wánà-wɔ̃̀ dɔ-mìà ká.

²⁶ Yé aà kɛ kília, óò lo nuù o dìè píé, tó o ɓàa gbaa Dɛ́ɓò lɛ́ aà o kṹ, ɛ̃́ɛ̃́ lɛ́ aà o kɛ wáà wɔ̃́ lɛ́ à nàà à káa kɛ̀ɛ là pɛ́lɛ́ kɛ̀lɛ̀.