2 Kɔ̀léĩ́tĩ̀ã̀ 8 - Wè-dɔ-wè Dɛɛ

Zi lɛ́ Wálà-mìà ò pɛ nɔ à káa

¹ M lèe-gé vɔ̀, kóò nàà wɔ̃́ lɛ́ Wálà zì zò-kɛ̀-sɛ̀ aà kɛ Wálà-mìà lɛ́ o Masèdónà lɛ̀ séĩ́ mɔ̀ɔ o yía, kɛ ká à yí dɔ.

² Wɔ̃́ nyɔ́ɔ̀ɔ doò do lɛ́ o kɛ à gɛ̃̀pìàa, e kɛ dóo yí-dã́-wɔ̃̀ gágà ká o là. Kɛɛ o zì géli e kɛ dóo kpànazɛ̀, òó gbaa kɛ kpàapìà pɛ nɔ̀ mia lɛ̀ɛ pìà. Lɛ̀ zí bɛ̃̀ɛ̃ lɛ́ pɛ lɛ̀ɛ́ gbaa kɛá o kɛ̀lɛ̀ɛ, o kɛ gba-ɓo kɛpìà kpànazɛ̀.

³ Ḿm̀ bɛ̀i à mɔ̀ m wà kélá-wè ɓo. Pɛ lɛ́ bɛ̀i e kɛ o mɔ̀ ó nɔɔ, o kɛ à nɔpìà. Ɛ́ɛ̃́ o kɛ bɛ̃̀ɛ̃ à nɔpìà áà dìè yi. O dìè o zì zò-wèèà-mɔ̀ yí zàáa,

⁴ o kpé kã́ ko lɛ̀ɛ lɛ́ ko wéé à mɔ̀ kɛ ó wɔ̃́ yiè dò kɛɛ. Wɔ̃́ yiè e kília, lɛ́ e kélɛ̀ o zì yɛɓo kɛɛ̀ ká, wáà gbũ̀ Wálà là mia nì mɔ̀ɔ.

⁵ Wɔ̃́ lɛ́ wa kɛɛ, e die wɔ̃́ lɛ́ ko zò e kɛ o mɔ̀ ó à kɛɛ là. Bèĩzɛ̀ɛ, o o dìè nɔ ko Dàa-mì lɛ̀ɛ. À tò-ko-mɔ̀ɔ, lɛ́ e kélɛ̀ o o dìè nɔ ko lɛ̀ɛ Wálà zì wèè-wɔ̃́-mɔ̀ kolo là zàá.

⁶ À mɔ́ɔ̀ wɔ̃̀ mɔ̀ɔ, ko kpé kã́ Tátɔ̀ lɛ́ e yɛɓo e kéa zi gbɛ̃̀ɛ lɛ̀ɛ kɛ é ló yɛɓo e kília kɛɛ̀ ká líé zàá, ɛ̃́ɛ̃́ kɛ é gbũ ka mɔ̀ kɛɛ ká pɛ yiè e kéa líé nyɛ.

⁷ Ka dóo kpànazɛ̀ pɛ séĩ́ kolo là zàá. Ka kpànazɛ̀ zò-dɔ̀à-mɔ̀ wà mɛ́ĩ́-ɓo-kɔ̀, ɛ̃́ɛ̃́ wɔ̃́ yí-dɔ-kɔ̀, e bɛ̀i wéé kà ɓo gbũ̀-mia-mɔ̀ wɔ̃̀ mɔ̀ zá le, ɛ̃́ɛ̃́ zeĩ́, ko zì lɔ̀ lɛ́ à kpɔ́ɔ̀ lɛ ka mɔ̀ɔ yí zàá. À mɔ́ɔ̀ wɔ̃̀ mɔ̀ɔ, kóò nàà kɛ wɔ̃́-kɛ-lɔ̀ é ka kɛ wɔ̃́ yiè e kéa kɛɛ̀ yí nɔ́ kíli.

⁸ Wɔ̃́ m̀ gèe e kéa, ye wá lɔ́ɔ̀ ká kɛ ḿ kpɔ́. Zi lɛ́ mia gbɛɛ zò è kã à ká gbũ̀-mia-mɔ̀ pìàa lɛ́ m̀ à zɔ̃̀ɔ̃̀ ka lɛ̀ɛ, kɛ ḿ zi kpó-kpó lɛ́ lɔ̀-kɛ̀à-mɔ̀ lɛ à ká ka yía dɔɔ.

⁹ Ƃii káà ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ dɔ. E e dìè kɛ mi lɛ́ pɛ wá à kɛ̀lɛ̀ɛ ká ka mɔ́ɔ̀ wɔ̃̀ mɔ̀, yé bɛ̃̀ɛ̃ e kɛ kpànazɛ̀ɛ ká. E à kɛ kíli kɛɛ ká kɛ kpànazɛ̀ à zì pɛ nyɛ̀ à kɛ̀lɛ̀ kolo là zàá.

¹⁰ Wɔ̃́ lɛ́ ma yee m̀ gɛ̃̀ wɔ̃́ e kéa yía gɛ̃̀ e ké. Lɛ dóo kpeĩ kɛ ká wɔ̃́ lɛ́ ka zi gbɛ̃̀ kɛ̀ɛ̀ e diea káa, kɛ ká líé nyɛ gbaa. Ka lɛ́ ka kɛ bèĩzɛ̀ kɛ ká wɔ̃́ dò kɛɛ. Kɛɛ ye wá wɔ̃́ dò kɛɛ̀ doó mɔ̀, kɛɛ ka lɛ́ ka kɛ bèĩzɛ̀ kɛɛ ka zò é wéé à mɔ̀ ká wɔ̃́ dò kɛɛ.

¹¹ Lɛ̀ lɛ́ lɛ kília, kà wɔ̃́ lɛ́ kà kɛ̀ɛ líé nyɛ. Zi lɛ́ ka zò e kã́ à ká kɛɛ ká wɔ̃́ e kéa yà ka géa, ka zò è kã́ zi nɔ́ doóa ká à líé nyɛpìà. Ɛ́ɛ̃́ kà à kɛ pɛ lɛ́ e ka kɛ̀lɛ̀ɛ ká.

¹² É kɛ̀á káà nàà gba-ɓo kɛɛ̀ ká nyɔ́ɔ̀ɔ, pɛ lɛ́ lɛ ka kɛ̀lɛ̀ kɛ ká gba-ɓo kɛ à káa, Wálà lɛ́ɛ̀ lo e kɔ̀ yàà à wì. Pɛ lɛ́ ye wá mi kɛ̀lɛ̀ɛ, Wálà lɛ̀ɛ́ à naa à kɛ̀lɛ̀.

^13-14 Ma wá à kɛ-zì naapìà kɛɛ ḿ mi gbɛɛ zì vũ sí kɛɛ ḿ ka zì kɛá gbííni. Kɛɛ lɛ̀ lɛ́ lɛ ka kɛ̀lɛ̀ gbùò gbaa lúó e kéa káa, lɛ kpeĩ kɛ ká gbũ mia lɛ́ lɛ o mɔ̀ ó gbũ̀-mɔ̀ sɔ̀lɔ̀ ɓoa mɔ̀. Kɛɛ yé ka bɛ̃̀ɛ̃ kaà kɛ gbũ̀-mɔ̀ naa-mìà ká, lɛ́ o bɛ̃̀ɛ̃ pɛ lɛ o kɛ̀lɛ̀ gbaa gbùòa, óò lo gbũũ̀ ka bɛ̃̀ɛ̃ ka mɔ̀. Zi yé e kéa káa, ka bɛ̀iì lɛ à ká ka kíe ká.

¹⁵ Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía gɛ̃̀ e ké. “Mi lɛ́ e pɛ pá e kíe mɔ̀ gbùòa, lɛ̀ɛ́ gbaa tó à kɛ̀lɛ̀ kpã́-kpã̀. Ɛ́ɛ̃́ mi yé a pá e kíe mɔ̀ ɓéĩ́a, lɛ̀ɛ́ gbaa kɛ à kɛ̀lɛ̀ péétĩ́ nyɔ́ɔ̀ɔ.”

Tátɔ̀ wà e ɓɛ́ĩ̀ nì

¹⁶ Kóò Wálà zúo gèe zi lɛ́ a kɛá lɛ́ Tátɔ̀ zò è kã gbũ̀-ka-mɔ̀ pìà, lɛ̀ zí ko zò è kãá gbũ̀-ka-mɔ̀ pìàa lɛ́ ɓea mɔ́ɔ̀ wɔ̃̀ mɔ̀.

¹⁷ Pɛ lɛ́ kɔa naa á kɛɛ, e e kɔ̀ yà à wì. Ye wá à doó ká. Kɛɛ à zò e kã́ gbũ̀-ka-mɔ̀ mɔ́ɔ̀ wɔ̃̀ mɔ̀, ɛ̃́ɛ̃́ a mɔ́ɔ̀ à yà ɓo e gé kɛ é nu ka píé à dìè-tĩ́ zì zò-wèèà-mɔ̀ wɔ̃̀ yí zàá.

¹⁸ Ko ko lèe-gé doó gbɛ̃̀pìà à píé, wà à ye nì ó nu ka píé. Ko lèe-gé e kília, Wálà-mìà lɛ́ o lɛ̀ séĩ́ mɔ̀ɔ, óò à ɓɛ̀lɛ yà wɔ̃́ làṹ yièa gèe à ɓoa mɔ́ɔ̀ wɔ̃̀ mɔ̀.

¹⁹ Ye wá à doó ká. Kɛɛ Wálà-mìà lɛ́ o lɛ̀ doò do mɔ̀ɔ, waà sí é kɛ ko píé yé kɔaà kɛ lópìà wɔ̃́ yiè e kéa kɛ̀á sía ká. Kóò à kɛ̀ kíli kɛɛ ko Dàa-mì é tɔ́-ɓɔ sɔ̀lɔ̀ ɓo, ɛ̃́ɛ̃́ kɛ á zɔ̃̀ɔ̃̀ kélɛ̀ kóò nàà kó gbũ mia mɔ̀.

²⁰ Kóò ko yɛ́lɛ́ kɛ̀ ko dìè píé, yékɛ̀ mi gbɛɛ é ko gã̀ naa zi lɛ́ kò ko yɛ́lɛ́ kɛ̀á nɔ̀-mia-lɛ̀ɛ-pɛ̀ kpànazɛ̀ e kéa mɔ̀ɔ bà.

²¹ Wɔ̃́ lɛ́ kò nàà kó kɛɛ, ye lɛ́ e kélɛ̀ wɔ̃́ lɛ́ lɛ kpeĩa kɛɛ̀ɛ. Ye wá wɔ̃́ lɛ́ lɛ kpeĩ ko Dàa-mì nyìɛ mɔ̀ɔ doó ká. Kɛɛ lɛ wɔ̃́ lɛ́ lɛ kpeĩ mia nyìɛ mɔ̀ɔ ká nɔ́ kíli.

²² À mɔ́ɔ̀ wɔ̃̀ mɔ̀ɔ, ko wà ko lèe-gé nì o vɔpìà. Kɔaà yí dã́ kpolà búnùzɛ̀. Ɛ́ɛ̃́ kɔaà gɛ̃̀ gbaa, ɛ̃́ɛ̃́ lɛ́ɛ̀ wèè gbũ̀-mia-mɔ̀ wɔ̃̀ mɔ̀ zá le teele. Ɛ́ɛ̃́ dɛɛ káa, lɛ́ɛ̀ wèè à mɔ̀ dóo, ɓii à zò dɔɔ̀ lɛ ka mɔ̀ nyɔ́ɔ̀ɔ.

²³ Tátɔ̀ ye ɓaa, lɛ m ɓɛ́ɛ lɛ́ kò ye kò yɛɓo kɛ̀ e kíe là kɛ kó gbũ à ká ka mɔ̀ɔ ká. Ko lèe-gé vɔ̀ yé wà ye nì ò loa yee, o mia lɛ́ Wálà-mìà lɛ́ o lɛ̀ doò do mɔ̀ɔ ò o vɔɔ ká. Óò à kɛ̀ Kɛ́lɛ̀ì tɔ́ áà ɓɔ̀.

²⁴ À mɔ́ɔ̀ wɔ̃̀ mɔ̀ɔ, kà ka zì lɔ̀-kɛ̀à-mɔ̀ zɔ̃̀ɔ̃̀ o lɛ̀ɛ, kɛɛ Wálà-mìà lɛ́ o lɛ̀ séĩ́ mɔ̀ɔ ó à yí dɔ, ɛ̃́ɛ̃́ kɛ ó à yí dɔ kélɛ̀ ko zì lé-gbùò-là lɛ́ ko kɛ à kɛpìà ka mɔ́ɔ̀ wɔ̃̀ mɔ̀ɔ lɛ wánà zɛ̀.