2 Kɔ̀léĩ́tĩ̀ã̀ 7 - Wè-dɔ-wè Dɛɛ

¹ M̀ lɔ̀-kɛ̀á-mìà, wè-dɔ-wè doò do e kéa, à dɔɔ̀ lɛ ko lɛ̀ɛ. À mɔ́ɔ̀ wɔ̃̀ mɔ̀ɔ, kɔ̀à kɔa dìè kɛ kpeĩ, yékɛ̀ pɛ nɔ́ɔ fé lɛ́ è mia gbĩ-kpàla wà mia gɛ̀ɛ̀ lilì kũa é kɛ à mɔ̀. Kɔ̀à kɔa dìè kɛ kpó-kpó ɓo là mia nì ká tùò Wálà lɛ̀ɛ ká.

Pɔ́ɔ̀ gé lɛ́ɛ̀ li

² Kà ka zò píé lɛ̀ dò nɔ ko lɛ̀ɛ. Kòó wɔ̃́ yɔɔ nɔ́ɔ fé dò kɛ nɛ́ mi gbɛɛ ká. Kòó mi gbɛɛ wí nɛ́ tã́ã̀. Kòó yɛ̀ì-yɛ́í kɛ do mi dò ká.

³ Wɔ̃́ m̀ gèe e kéa, m̀ḿ gèe kɛ é mɛ̀ĩ́-sà káá ka wĩĩ́. Ƃii maà gèe bèĩzɛ̀ kélɛ̀ ka mɔ́ɔ̀ wɔ̃̀ diè lɛ ko zò ká, kɔ̀à ɓi nì kɔ́áà kɛ̀ à ká kɔa kíe là teele, kó kɛ bɛ̃̀ɛ̃ ɓeaò, ɛ̃́ɛ̃́ kó gàáa ká.

⁴ M zò dɔɔ̀ lɛ ka mɔ̀ nyɔ́ɔ̀ɔ. Ḿm̀ ka si gbùò kpó-kpó ɓo. Ko zì wɔ̃́ nyɔ́ɔ̀ɔ séĩ́ gɛ̃̀ɛ̃ɛ̃̀ yía, m lé paà lɛ zò-yà-gé ká. Ɛ́ɛ̃́ m gé lɛ́ɛ̀ li nyɔ́ɔ̀ɔ kpó-kpó ɓo.

⁵ É kɛ bɛ̃̀ɛ̃ nu kɔa ɓo Masèdónàa káa, fĩ́ĩ́-dɔ lɛ̀ɛ́ gbaa kɛ ko mɔ̀: Wɔ̃́ nyɔ́ɔ̀ɔ e kɛ lɛ̀ séĩ́ mɔ̀. Ko kɛ wɔ̃́ zèí. Túó e kɛ ko gé.

⁶ Kɛɛ Wálà lɛ́ è mia yé o zò dàà lɛ zízàáa kɛ̀ o zò áà yàa, e ko zò kɛ e yà ko gé Tátɔ̀ zì nú a ɓoa yí.

⁷ Lɛ̀ɛ́ gbaa kɛ à zì nu doóa ɓoa ká. Kɛɛ e kɛ nì ɓo zi lɛ́ ka à kɛ à ká, lɛ́ à zò e yàa, wɔ̃̀ gèe pìà. Zi lɛ́ m gɛ̃̀-lɔ̀ lɛ à ká ka kɛpìà, ɛ̃́ɛ̃́ zi lɛ́ ka dà à ká yéĩ̀ yí, e bɛ̀i, zi lɛ́ dɔ̀-m̀-wɔ̃́ yí-lɔ̀ lɛ à ká ka mɔ̀ e nyɔ́ɔ̀ɔ káa, a gèe m lɛ̀ɛ. À mɔ́ɔ̀ wɔ̃̀ mɔ̀ɔ, m gé lɛ́ɛ̀ li kpó-kpó ɓo gbaa.

⁸ É kɛ̀á bɛ̃̀ɛ kii lɛ́ ma bɛ̃̀ɛ̃ ka píéa a kɛ ka zò e dà zízàáa, m zò kɛɛ̀ wá yéĩ̀zɛ̀ à bɛ̃̀ɛ̃ ma ɓoa wɛ̃́ĩ̀. Lɛ̀ ma gɛ̃̀ lɛ́ kii ma bɛ̃̀ɛ̃ ka píéa, e ka zò dà zízàá ɓéĩ́ ɓo ɓɛ̀lɛ̀ píé gbèĩ zɛ̀ɛ, áá kɛɛ̀ m mɔ̀ m zò é kɛ yéĩ̀zɛ̀ à mɔ́ɔ̀ wɔ̃̀ mɔ̀.

⁹ Kɛɛ dɛɛ káa, m gé lɛ́ɛ̀ li. Ye wá kélɛ̀ ka kɛ́ ma ɓo lɛ́ ka zò e dà zízàáa ká, kɛ m gé á mɔ́ɔ̀ li ɓo. Kɛɛ ka zì zò-dà-zízàáa à kɛ́ a ɓo lɛ́ ka ka sɔ̃̀ɔ̃ mɛ́ vɔ̀ɔ lɛ́ m gé à mɔ́ɔ̀ li ɓoa. Wálà lɛ́ e yɛɓo kɛ zò-dà-zízàá yé e yía yía. À mɔ́ɔ̀ wɔ̃̀ mɔ̀ɔ, wɔ̃́ kɔa kɛɛ, lɛ̀ɛ́ gbaa à kɛ kɛ ká vɔ wɔ̃́ nɔ́ɔ fé zì.

¹⁰ Ƃii zò-dà-zízàá yé Wálà è yɛɓo kɛ̀ à yía, lɛ́ɛ̀ nu sɔ̃̀ɔ̃-mɛ́-vɔ̀ɔ yé à líé-nyɛpìà lɛ la-ɓo káa ká i lɛ̀ɛ. Ɛ́ɛ̃́ mi gbɛɛ zò lɛ̀ɛ́ dà zízàá wɔ̃́ e kília mɔ́ɔ̀ wɔ̃̀ mɔ̀. Kɛɛ kpóṹ là zèe zì zò-dà-zízàá lɛ́ɛ̀ nu ga ká mia mɔ̀.

¹¹ Wɔ̃́ lɛ́ Wálà a kɛ ka zì zò-dà-zízàá káa, gɛ̃̀ nɔ́. E à kɛ káà ka yɛ́lɛ́ kɛ̀ ka táá-kɔ̀ píé. E ka kɛ tó ka zò áà kɛ̀ tíè-tíèe ka dìè ɓò-wɔ̃́-yípìà. Zi lɛ́ wɔ̃́ à ka wàaà lɛ à káa, kà gɛ̃̀. Zi lɛ́ tíé kã́ã̀ lɛ à ká ka mɔ̀ɔ, kà gɛ̃̀. Zi lɛ́ m gɛ̃̀-lɔ̀ lɛ à ká ka kɛpìàa, kà gɛ̃̀. Zi lɛ́ ka fã̀ã́-wàà lɛ à káa, kà gɛ̃̀. Zi lɛ́ ka pɛ̀ kɛɛ̀ e kɛá kɛɛ ká wɔ̃́ nyɔ́ɔ̀ɔ kɛ mi lɛ́ aà wɔ̃́ yɔɔ kɛɛ káa, kà gɛ̃̀. Kaà ka dìè zɔ̃̀ɔ̃̀ mia púlú ká wɔ̃́ e kéa séĩ́ kɛɛ̀ yí.

¹² Kɛɛ yé bɛ̃̀ɛ̃ m kíí e yía bɛ̃̀ɛ̃, ye wá mi lɛ́ e wɔ̃́ yɔɔ kɛɛ, ɛ̃́ɛ̃́ ye wá mi yé o wɔ̃́ yɔɔ kɛáa mɔ́ɔ̀ wɔ̃̀ ká kɛ ḿ mɔ́ɔ̀ à bɛ̃̀ɛ̃ ɓo. Kɛɛ ma bɛ̃̀ɛ̃ kɛɛ é zi lɛ́ kà fã̀ã́-wàà kɛ̀ à ká ko mɔ́ɔ̀ wɔ̃̀ mɔ̀ɔ, kɛ á zɔ̃̀ɔ̃̀ ka lɛ̀ɛ Wálà wɛlɛ mɔ̀.

¹³ Pɛ́ è kɛ̀ lɛ́ ko zò yàà lɛ ko géa, ye lɛ́ ɓɛ. Kɛɛ ye wá ko zò doó ká kɛ é yà ko gé. Kɛɛ ko gé kpó-kpó liì e kɛá géli lɛ́ e kɛ Tátɔ̀ làa kolo là zàá. Ƃii ka séĩ́ kaà kɛ aà kɛ wéĩ́-wèĩ̀.

¹⁴ Maà ka sí gbùò à lɛ̀ɛ. Kɛɛ ka bɛ̃̀ɛ̃, kàá yɛ́lɛ̀ kpɔ́ do m là. Ko nɔ́ wɔ̃́ lɛ́ lɛ wánà zɛ̀ɛ gèepìà ka lɛ̀ɛ teele. Zi nɔ́ doóa káa, lé-gbùò-là lɛ́ kɔaà kɛ Tátɔ̀ lɛ̀ɛ, aà kɛ gbaa wánà ká.

¹⁵ À mɔ́ɔ̀ wɔ̃̀ mɔ̀ɔ, ka lɔ̀ lɛ́ à kpɔ́ɔ̀ lɛ à mɔ̀ɔ, à là lɛ kpɔ́pìà, lɛ̀ lɛ́ à zò e vùò zi lɛ́ ka pɛ̀ kɛɛ̀ e kɛá kɛ ká à wè kɛɛ káa ká, ɛ̃́ɛ̃́ zi lɛ́ ka mɛ́ e tàle káà tùò, tó káà ka kɔ̀ yà à wìa ká.

¹⁶ M gé lɛ́ɛ̀ li nyɔ́ɔ̀ɔ lɛ̀ lɛ́ m̀ bɛ̀i à mɔ̀ ḿ m zò dɔ ka mɔ̀ kpó-kpó ɓoa ká.