2 Kɔ̀léĩ́tĩ̀ã̀ 5 - Wè-dɔ-wè Dɛɛ

¹ Ƃii kóò yí dɔ kélɛ̀ yé sɔ-ká lɛ́ kò yìì à wì, lɛ́ e ko gbĩ-kpàla ká kpóṹ là zèea, yé waà ká e kília wía, ká lɛ́ɛ̀ lo kɛɛ̀ Wálà kɛ̀lɛ̀ à pà kɛ kó kɛ à wì. Lɛ ká lɛ́ mi gbunu lɛ̀ɛ́ gbaa dɔ, lɛ́ è lo kɛɛ̀ ɓe tòá kíli káa ká.

² Yà kɔa ɓoa káa, kóò gɔ̃̀nɔ̀ ko yí, ɓii ko zì ká lɛ́ e lɛ̀ía, à wàà-ko-mɔ̀ lɛ̀ zí ò sɔ wàá o mɔ̀ɔ lɔ̀ lɛ ko kɛpìà nyɔ́ɔ̀ɔ.

³ Yé kɔaà wàà ko mɔ̀ɔ, òó ló ko gɛ̃̀ɛ̃̀ lɛ̀ pɛ lɛ́ ko gbĩ-kpàla wá ko mɔ̀.

⁴ Lɛ̀ ko tĩã́ sɔ-ká e kéa wìa, lɛ kélɛ̀ ko lópìà pɔɔ̀ gbííni dò ká, tó kɔ́áà gɔ̃̀nɔ̀ ko yí à wì. Ye wá kélɛ̀ kóò nàà kó ko kpóṹ là zèe gbĩ-kpàla e kéa ɓo ko mɔ̀. Kɛɛ kóò nàà kɛɛ à lɛ̀í-sɛ̀lɛ̀ yí zìa kó à dà à là ko mɔ̀, kɛɛ kɛ̀ɓe é pɛ yé è lo gaàa mání.

⁵ Wálà lɛ́ aà ko pɛ̀ kɛ wɔ̃́ nì sùua wɛ̃́ĩ̀a. Ɛ́ɛ̃́ e e Gɛ̀ɛ̀ nɔ ko lɛ̀ɛ e wè-wɛ́lɛ́ ká pɛ séĩ́ lɛ́ lɛ à kɛ̀lɛ̀ ko mɔ́ɔ̀ wɔ̃̀ mɔ̀ɔ wɛ̃́ĩ̀.

⁶ À mɔ́ɔ̀ wɔ̃̀ mɔ̀ɔ, ko paà lɛ zò-kɛ̀-gágà lɛ̀ ká teele. Kóò yí dɔ kélɛ̀ lɛ̀ lɛ́ gbĩ-kpàla e kéa lɛ tĩã́ ko pà káa, ko wá nɛ́ ko Dàa-mì pà.

⁷ Ko zì kɛ̀ kpóṹ là zèea, kóò tàà zò-dɔ̀à-mɔ̀ kpáá yí. Kɛɛ kòó táá pɛ́ kò bɛ̀i à mɔ̀ kó gɛ̃̀ɛ kpáá yí.

⁸ Ko paà lɛ zò-kɛ̀-gágà lɛ̀ ká. Ɛ́ɛ̃́ kɔ́áá naà dóo à ká kɛɛ kó ko pà tó gbĩ-kpàla e kéa yí, kó ló kɛɛ̀ ko Dàa-mì píé à pà.

⁹ Kɛɛ kó kɛ bɛ̃̀ɛ̃ ko pà zèea, ɛ̃́ɛ̃́ kó kɛ bɛ̃̀ɛ̃ à píé lɛ̀ía, à zì zò-dà-wɔ̃̀ lɛ́ nɔ́ à kɛɛ̀ è ko zò kũ kpó-kpó ɓoa.

¹⁰ Ƃii lɛ ko séĩ́ ko mɔ̀ kɛ kó dɔ Kɛ́lɛ̀ì wɛlɛ mɔ̀, kɛ é mɛ̀ĩ́-sà dɔ ko mɔ̀. Óò lo pɛ sɔ̀lɔ̀ ɓoò wɔ̃́ lɛ́ waà kɛ o zì gbĩ-kpàla kɛ̀ɓe yía kolo là zàá. Ó wɔ̃́ yiè kɛ bɛ̃̀ɛ̃ò, ɛ̃́ɛ̃́ ó à yɔɔ kɛ̀á bɛ̃̀ɛ̃ò, óò lo pɛ lɛ́ lɛ o mɔ̀ ó à sɔ̀lɔ̀ ɓoa sɔ̀lɔ̀ ɓoò o tɔ̀ là doò do.

Kɛ́lɛ̀ì a kɛ kò Wálà nì ko li ko kíe nì lɛ̀ɛ

¹¹ Kóò tùò ko Dàa-mì lɛ̀ɛ yí dɔ. À mɔ́ɔ̀ wɔ̃̀ mɔ̀ɔ, kóò à kɛ-zì nàà kɛɛ mia ɓéèe ó o zì yɛ́lɛ́-táá mɛ́ vɔ̀ɔ. Wálà lɛ́ɛ̀ zi lɛ́ ko à káa dɔ kpó-kpó ɓo. M zò lɛ à mɔ̀ kɛɛ ka bɛ̃̀ɛ̃ ká m dɔ ka zò píé nɔ́ kíli.

¹² Ko wá à naapìà kɛ kó ko dìè zɔ̃̀ɔ̃̀ ka lɛ̀ɛ zeĩ́. Kɛɛ kóò à kɛ-zì nàà kɛɛ lúó lɛ́ kà lo lé-gbùò-là kɛɛ̀ à ká ko mɔ́ɔ̀ wɔ̃̀ mɔ̀ɔ é kɛ ka kɛ̀lɛ̀, kɛɛ bɛ̀i é kɛ ka mɔ̀, kɛɛ ká mia lɛ́ ò lé-gbùò-là kɛ̀ zi lɛ́ mi gbĩ-kpàla lɛ à káa là, lɛ́ ye wá zí lɛ à ká e yí zàáa làa, kɛ ká o wúú là nìɛ̀.

¹³ Ko wúù é kɛ̀á káa, kɛɛ à kɛɛ̀ lɛ kíli Wálà mɔ́ɔ̀ wɔ̃̀ mɔ̀. Kɛɛ ko zò là kpɛ̀iì é kɛ̀á káa, kɛɛ à kɛɛ̀ lɛ kíli ka mɔ́ɔ̀ wɔ̃̀ mɔ̀.

¹⁴ Ko lɔ̀-kpɔ́ɔ̀ lɛ́ lɛ Kɛ́lɛ̀ì mɔ̀ɔ, lɛ́ à tóò lɛ à ká ko làa. Ƃii kóò yí dɔ gbaa kélɛ̀ gɔ̃ doó e ga mia séĩ́ wɛ̃́ĩ̀. À yí lɛ́ e kélɛ̀ mia séĩ́ waà ga.

¹⁵ E ga mia séĩ́ wɛ̃́ĩ̀ kɛɛ mia lɛ́ o ɓea, yékɛ̀ ó kɛ gbɛɛ ɓo ɓe o dìè lɛ̀ɛ, kɛɛ ó kɛ ɓe mi lɛ́ e ga, lɛ́ e wɛ̀lɛ̀ ga kɛ̀lɛ̀ o wɛ̃́ĩ̀a lɛ̀ɛ.

¹⁶ É kã́ pɛ́nɛɛ mɔ̀ é ló líéa, kòó ko yɛ́lɛ́ táá mi nɔ́ɔ fé dò ká lɛ̀ zí kpóṹ là zèe mìà ò o yɛ́lɛ́ tàá mia káa lɛ́ ɓe. Yé bɛ̃̀ɛ̃ ko ko yɛ́lɛ́ táá Kɛ́lɛ̀ì mɔ́ɔ̀ wɔ̃̀ ká bèĩzɛ̀ lɛ̀ zí kpóṹ là zèe mìà ò o yɛ́lɛ́ tàá à káa lɛ́ ɓea, kòó à kɛ gbɛɛ ɓo gbaa kíli.

¹⁷ Yé mi dò wà Kɛ́lɛ̀ì waà kɛ doóa, lɛ gbaa mi dɛɛ lɛ́ lɛ ɓea ká. Là kɛ̀ɓe zii aà die. À dɛɛ aà nu gbaa.

¹⁸ Wálà lɛ́ è wɔ̃́ nì e kéa séĩ́ kɛ̀ɛ. E à kɛ kò à ye nì ko li ko kíe nì lɛ̀ɛ Kɛ́lɛ̀ì tɔ́ yí zàá. Ɛ́ɛ̃́ e yɛɓo lɛ́ à kɛɛ̀ kolo là zàáa, lɛ́ è lo à kɛɛ̀ kɛɛ wà mia gbɛɛ nì bɛ̃̀ɛ̃ ó lia, aà kɛɛ̀ kpɔ́ ko kɔ̀ yí zàá.

¹⁹ Wɔ̃́ kò à gèea lɛ́ e kélɛ̀, Wálà e kɛ à kɛpìà, kɛɛ wà kpóṹ là mìà séĩ́ ó li Kɛ́lɛ̀ì tɔ́ yí zàá. Wálà lɛ̀ɛ́ gbaa kɛ-wɔ̃̀ yɔɔ wa kɛɛ kpɔ́ e gé o gbĩ mɔ̀. Ɛ́ɛ̃́ aà wɔ̃́ làṹ lɛ́ è bɛ̀i à mɔ̀ é à kɛ wà mia nì ó lia, kpɔ́ ko kɔ̀ là.

²⁰ À mɔ́ɔ̀ wɔ̃̀ mɔ̀ɔ, ko Kɛ́lɛ̀ì lé ká. Lɛ kélɛ̀ pɛ lɛ́ Wálà dìè-tĩ́ lɛ kpɔ́pìà ko yí áà kpé kã̀ ka lɛ̀ɛ. Ko dɔ̀á Kɛ́lɛ̀ì dɔ̀lɔ̀ yí, kɔ́áà kpé kã̀ ka lɛ̀ɛ kɛɛ ká wéé à mɔ̀ Wálà é kà ye nì ka kɛ ká li ka kíe nì lɛ̀ɛ.

²¹ Kɛ́lɛ̀ì lɛ̀ɛ́ gbaa kɛ-wɔ̃̀ yɔɔ nɔ́ɔ fé dò kɛ gbɛɛ ɓo. Kɛɛ Wálà a kɛ kɛ é dɔ ko zì kɛ-wɔ̃̀ yɔɔ yí ko mɔ́ɔ̀ wɔ̃̀ mɔ̀, kɛɛ kò ye nì ko kɛ̀ doó yía kó dɔ Wálà là kɛ̀-kpeĩ-kɔ̀ɔ yí.