2 Kɔ̀léĩ́tĩ̀ã̀ 4 - Wè-dɔ-wè Dɛɛ

Pɛ kpànazɛ̀ kpɔ́lɔ̀ bɛ̀iì lɛ sɛ́lɛ́ gbɔɔ yí

¹ Ko yéĩ́ kɛ̀ Wálà mɔ̀ɔ, ye lɛ́ a mɔ́ɔ̀ yɛɓo e kéa nɔ ɓo ko lɛ̀ɛ. À mɔ́ɔ̀ wɔ̃̀ mɔ̀ɔ, zò-dà-zízàá gbɛɛ wá ko mɔ̀.

² Ko kã́ã̀ lɛ wɔ̃́ yɛ́lɛ̀ yɛ́lɛ̀ zɛ̀ lɛ́ mia ò kɛ̀ bĩ̀ĩ̀ ká píéa mɔ̀. Ko wá yɛ̀ì-yɛ́í kɛ-mìà ká. Ɛ́ɛ̃́ zeĩ́, kòó Wálà lé-wè gèe nɛ̀ ká. Kóò wánà-wɔ̃̀ gèe e yí púlú zɛ̀, ɛ̃́ɛ̃́ ko ɓe Wálà nyìɛ mɔ̀. Zi nɔ́ e kéa káa, kóò à kɛ-zì nàà kɛɛ mia séĩ́ zì zò gíkã́ zò é dà ko píé.

³ É kɛ̀á wɔ̃́ làṹ yiè lɛ́ kò gèea bĩ̀ĩĩ̀ lɛɛ, kɛɛ à bĩ̀ĩĩ̀ lɛ mia lɛ́ nɔ́ o gínipìàa o mɔ̀.

⁴ Tã́ã̀ zèe mìà zì wálà aà mia lɛ́ o zò dɔɔ̀ wá Wálà mɔ̀ lɛ́ o kília, aà bĩ́ dà o wũ-kèlè yí. Lɛ́ɛ̀ o tèa lɛ̀-púlú lɛ́ è fɔ̀nɔ o bàa gɛ̃̀ɛ̃ɛ̃̀ mɔ̀. Lɛ̀ púlú e kéa lɛ́ɛ̀ go wɔ̃́ làṹ yiè lɛ́ è gbɛ̃̀ Kɛ́lɛ̀ì lɛ́ e Wálà bĩ́ káa, zì lɛ̀-fɔ̀nɔ-kɔ̀ kɛ̀lɛ̀.

⁵ Ƃii wɔ̃́ kò gèe lòũ̀ káa, ye wá ko dìè-wɔ̃̀ ká. Kɛɛ lɛ Zízɛ̀ Kɛ́lɛ̀ì wɔ̃̀ ká lɛ́ kò gèe lòũ̀ káa. Kóò gèe kélɛ̀ lɛ ko Dàa-mì ká, ɛ̃́ɛ̃́ ko dìè bɛ̃̀ɛ̃ ko kà yɛɓo-kɛ-mìà ká Zízɛ̀ mɔ́ɔ̀ wɔ̃̀ mɔ̀.

⁶ Wálà a gèe mɔ́ kélɛ̀, “Lɛ̀ è fɔ̀nɔ bĩ́ tii bà.” Wálà nɔ́ doó e wɔ̃́ e kéa gèea, ye lɛ́ e à kɛ lɛ́ lɛ̀ e fɔ̀nɔ ko zò píéa. E à kɛ kíli kɛɛ é nu lɛ̀-púlú, lɛ́ e wɔ̃́ yí-dɔ-kɔ̀ lɛ́ à gbɛ̃̀ɛ̃̀ lɛ Wálà zì lɛ̀-fɔ̀nɔ-kɔ̀ mɔ̀ɔ ká ko píé. Lɛ̀-fɔ̀nɔ-kɔ̀ e kília lɛ́ɛ̀ lɛ̀ fɔ̀nɔ Kɛ́lɛ̀ì wɛlɛ yí.

⁷ Mia lɛ́ pɛ kpànazɛ̀ kpɔ́lɔ̀ bɛ̀ipìà e kília lɛ ko kɛ̀lɛ̀ɛ, ko kélɛ̀ sɛ́lɛ́ gbɔɔ lɛ́ ɓe. Wɔ̃́ e kéa kɛɛ̀ lɛ kíli kɛ á zɔ̃̀ɔ̃̀ mia lɛ̀ɛ kélɛ̀ yíkɛ̀ gágà kpó-kpó lɛ Wálà là pɛ ká. Kɛɛ ye wá kò pɛ ká.

⁸ Ko wɔ̃́ nyɔ́ɔ̀ɔ doò do gɛ̃̀. Kɛɛ wɔ̃́ nyɔ́ɔ̀ɔ e kília lɛ̀ɛ́ ko tìli-tílí do. Wɔ̃́ kò lo à kɛɛ̀ɛ, kòó à dɔ, kɛɛ kòó ko kɔ̀ bɔ̃́ũ̀ dà do wɔ̃́ kɛɛ̀ mɔ̀.

⁹ Óò ko sã̀ dɔ, kɛɛ Wálà lɛ̀ɛ́ kã́ do ko mɔ̀. Óò ko mɛ̀ tã́ã̀, kɛɛ ko yí lɛ̀ɛ́ sìè.

¹⁰ Lɛ kélɛ̀ Zízɛ̀ zì gá a ɓoa lɛ ko gbĩ-kpàla yí, kɔ́áà lò à ká teele. À kɛɛ̀ lɛ kíli kɛɛ mia ó Zízɛ̀ zì kɛ̀ɓe gɛ̃̀ ko gbĩ-kpàla yí nɔ́ kíli.

¹¹ Lɛ̀ ko tĩã́ ɓea, ko nɔɔ̀ lɛ ga lɛ̀ɛ teele Zízɛ̀ mɔ́ɔ̀ wɔ̃̀ mɔ̀. Wɔ̃́ e kéa lɛ kíli kɛɛ ó Zízɛ̀ zì kɛ̀ɓea gɛ̃̀ ko gbĩ-kpàla lɛ́ e ké, lɛ́ à yí è lo sìèa yí.

¹² Wɔ̃́ e kéa yí lɛ́ e kélɛ̀, ga lɛ yɛɓo kɛpìà ko yí. Kɛɛ kɛ̀ɓe lɛ yɛɓo kɛpìà ka yí.

¹³ À bɛ̃̀ɛ̃ɛ̃̀ lɛ Wálà là kíía yí kélɛ̀, “Wɔ̃́ m̀ gèea, ḿm̀ gèe ɓii zò-dɔ̀à-mɔ̀ lɛ m yí.” Ko tópìà zi zò-dɔ̀à-mɔ̀ zɛ̀ nɔ́ doóa píé. À mɔ́ɔ̀ wɔ̃̀ mɔ̀ɔ, wɔ̃́ ko bɛ̃̀ɛ̃ kò gèea, kóò gèe ɓii zò-dɔ̀à-mɔ̀ lɛ ko yía mɔ́ɔ̀ wɔ̃̀ mɔ̀.

¹⁴ Kóò yí dɔ kélɛ̀ Wálà lɛ́ e ko Dàa-mì Zízɛ̀ wɛ̀lɛ̀ ga kɛ̀lɛ̀ɛ, lɛ́ɛ̀ lo ko wɛ̀lɛ̀ lɛ̀í Zízɛ̀ yí zàá nɔ́ kíli, tó áà nù kɔ̀à ɓi nì kɔa ká e dìè wɛlɛ mɔ̀.

¹⁵ Wɔ̃́ e kéa séĩ́ lɛ ka mɔ́ɔ̀ wɔ̃̀ mɔ̀. Ɛ́ɛ̃́ yé Wálà là zò-kɛ̀-sɛ̀ aà kɛ ɓɔpìà mia búnù-búnùzɛ̀ làa, o zì Wálà zúo-ɓo-kɔ̀ɔ là lɛ́ɛ̀ lo kɛɛ̀ kpɔ́pìà yí gbùò zɛ̀, kɛɛ Wálà é tɔ́-ɓɔ sɔ̀lɔ̀ ɓo.

Ko ɓe zò-dɔ̀à-mɔ̀ kolo là zàá

¹⁶ À mɔ́ɔ̀ wɔ̃̀ mɔ̀ɔ, zò-dà-zízàá gbɛɛ wá ko mɔ̀. Yé bɛ̃̀ɛ̃ ko gbĩ-kpàla mɛ́ lɛ kɛpìà yɔ̃́ṹ-yɔ̃̀ũ̀a, Wálà lɛ ko yí zàá kɛpìà pɛ dɛɛ ká lɛ̀ lɛ̀ lɛ kpɛ̀ipìà tó bĩ́ áà mìa ká.

¹⁷ Wɔ̃́ nyɔ́ɔ̀ɔ lɛ́ ko à gɛ̃̀pìàa, lɛ wɔ̃́ ɓéĩ́ lɛ́ lɛ̀ɛ́ ló túò nyɛpìàa ká. Kɛɛ lɛ́ɛ̀ lo nuù lɛ̀-fɔ̀nɔ-kɔ̀ kpànazɛ̀ lɛ́ è lo kɛɛ̀ ɓe tòá kíli káa ká. Ɛ́ɛ̃́ lɛ̀-fɔ̀nɔ-kɔ̀ e kília, lɛ dóo kpànazɛ̀ é diá wɔ̃́ nyɔ́ɔ̀ɔ kɔ̀à gɛ̃̀ɛ là kpó-kpó ɓo.

¹⁸ Ƃii kóò ko yɛ́lɛ́ kɛ̀ pɛ́ òó bɛ̀i à mɔ̀ ó gɛ̃̀ɛ mɔ̀. Kòó ko yɛ́lɛ́ kɛ pɛ́ ò bɛ̀i à mɔ̀ ó gɛ̃̀ɛ mɔ̀. Pɛ́ ò bɛ̀i à mɔ̀ ó à gɛ̃̀ɛ, lɛ nɔ́ ɓɔ̀ɔ ɓe lúó zààle píé. Kɛɛ pɛ́ òó bɛ̀i à mɔ̀ ó gɛ̃̀ɛ, lɛ ɓe tòá kíli ká.