2 Kɔ̀léĩ́tĩ̀ã̀ 13 - Wè-dɔ-wè Dɛɛ

Lìè-wè dɔɔ̀ léĩ́-tó-mɔ̀

¹ M zì ɓɔ̀-ka-píé kpolà yààka zɛ̀ lɛ́ e kéa. Wɔ̃́ nɔ́ɔ fé lɛ́ ò kpɔ mia wĩĩ́a lɛ à mɔ̀ à kélá é kɛ pèèlɛ, é gɔ̃̀á kɛɛ̀ pèèlɛɛ è kɛ yààka.

² Mia lɛ́ kaà kɛ-wɔ̃̀ yɔɔ kɛ lúó zààle lɛ́ aà diea píé, ɛ̃́ɛ̃́ zeĩ́ mia séĩ́ yé o tóa, ḿm̀ nàà ḿ wɔ̃́ dò gèe ka lɛ̀ɛ. M zì ɓɔ̀-ka-píé kpolà pèèlɛ zɛ̀ɛ, maà wɔ̃́ nɔ́ doóa gèe do ka lɛ̀ɛ à lúó ká. Yé ma wá ka píéa, ḿm̀ lo à gèeè zeĩ́. Nu yé aà tó ḿ ɓoa, mi dò lɛ̀ɛ́ ló laà m kɛ̀lɛ̀.

³ Pɛ lɛ́ kà nààa, káà lo à sɔ̀lɔ̀ ɓoò. Pɛ́ e kília lɛ́ e kélɛ̀, pɛ lɛ́ è lo à zɔ̃̀ɔ̃̀ kélɛ̀ Kɛ́lɛ̀ì lɛ́ɛ̀ mɛ́ĩ́ kàà m lé máà gèèa káa. Yé aà e kɔ̀ sí ka píéa, à mɛ́ wá yɔ̃́ṹ-yɔ̃̀ũ̀. Kɛɛ lɛ́ɛ̀ e zì yíkɛ̀ gáàa zɔ̃̀ɔ̃̀ ka bà.

⁴ Yé bɛ̃̀ɛ̃ à mɛ́ e kɛ yɔ̃́ṹ-yɔ̃̀ũ̀ wáà pà nélè ká kɔ́lɔ́sì mɔ̀ɔ, lɛ ɓe Wálà zì yíkɛ̀ gáàa kolo là zàá. Kò ye nì ko kɛ̀ doó yí zàáa, kò ye nì kóò dɔ à zì kɛ̀ yɔ̃́ṹ-yɔ̃̀ũ̀ kɔ̀ɔ yí. Kɛɛ ko zì kɔ̀ sì ka píéa, kò ye nì kóò lo kɛɛ̀ ɓe Wálà zì yíkɛ̀ gáàa kolo là zàá.

⁵ Kà lɛ̀ gɛ̃̀ ka dìè là, ká ka dìè yí dã́, kɛɛ é kɛ̀á ka ɓe zò-dɔ̀à-mɔ̀ yí zàáa, kɛ ká à yí dɔ. Kàá yí dɔ kélɛ̀ Zízɛ̀ Kɛ́lɛ̀ì lɛ ka yí? Yé nɔ́ kaà kɔ̃́ wɔ̃́ e kília mɔ̀ɔ, lɛ́ nɔ́ Kɛ́lɛ̀ì wá ka yía.

⁶ M zò lɛ à mɔ̀ kélɛ̀ káà lo à yí dɔɔ̀ kélɛ̀ ko wá kɔ̃̀-wɔ̃́-mɔ̀ mìà ká.

⁷ Kóò sɛ̀nɛ ɓo Wálà lɛ̀ɛ kélɛ̀ kàá ló wɔ̃́ niìa gbɛɛ kɛɛ̀. Kòó à kɛ kɛɛ á zɔ̃̀ɔ̃̀ kélɛ̀ ko wɔ̃́ kpeĩ kɛ-mìà ká. Kɛɛ kóò à kɛ̀ kɛɛ ká wɔ̃́ lɛ́ lɛ kpeĩa kɛ, yé bɛ̃̀ɛ̃ ko kélɛ̀ kɔ̃̀-wɔ̃́-mɔ̀ mìà lɛ́ ɓea ká.

⁸ Ƃii kòó bɛ̀i à mɔ̀ kɛ kó wɔ̃́ gbɛɛ kɛ kɛ é gèlè gbini wɔ̃́ wánà zɛ̀ɛ mɔ̀, kɛɛ wɔ̃́ lɛ́ nɔ́ kò bɛ̀i à mɔ̀ kó kɛ wɔ̃́ wánà zɛ̀ɛ lɛ̀ɛ.

⁹ Ko gé lɛ́ɛ̀ li yé kɔaà kɛ yɔ̃́ṹ-yɔ̃̀ũ̀, lɛ́ ka mɛ́ lɛ gágàa ká. Kóò sɛ̀nɛ ɓo nɔ́ zeĩ́, kɛɛ ka mɛ́ é kpálà.

¹⁰ Pɛ́ e kɛ lɛ́ ma mɔ́ɔ̀ pɛ́ e kéa bɛ̃̀ɛ̃ ɓo lɛ̀ lɛ́ ma wá ka píéa káa lɛ́ ɓɛ. À kɛɛ̀ lɛ kíli kɛɛ yékɛ̀ ḿ nùáa, ḿ ka kṹ gágà yíkɛ̀ gáàa lɛ́ ko Dàa-mì a nɔ m lɛ̀ɛ ká. Yíkɛ̀ gáàa e kília, lɛ ɓe é ka dɔ ka gã̀ mɔ̀, kɛɛ ye wá ɓe kɛ é ka wí tã́ã̀.

¹¹ Ɛ̀ɛ̀, m lèe-gé vɔ̀, kɔa làa píé-èé. Ka mɛ́ kpálà è kɛ à ká. Kà ka tóó dɔ wɔ̃́ lɛ́ m̀ gèe ka lɛ̀ɛ mɔ̀. Kà wéé ka kíe nì wéè mɔ̀, ká kɛ ɓe zò-yà-gé yí zàá. Ɛ́ɛ̃́ Wálà lɛ́ lɔ̀-kɛ̀à-mɔ̀ wà zò-yà-gé è go à kɛ̀lɛ̀ɛ, lɛ́ɛ̀ lo kɛɛ̀ ka píé.

¹² Kà wéé ka kíe nì píé ka bè gbɛ̃̀ ka kíe nì kpéĩ́ mɔ̀ ká lɛ̀ zí wáá kɛɛ̀áa ká.

¹³ Wálà-mìà séĩ́ óò wèè ka bà.

¹⁴ Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀, wà Wálà zì mia lɔ̀-kpɔ̀à-mɔ̀, e bɛ̀i tàà-kíe-píé lɛ́ kɔ̀à kɛ̀, lɛ́ è go Gɛ̀ɛ̀ Púlú kɛ̀lɛ̀ɛ, é kɛ ka séĩ́ ka píé.