2 Kɔ̀léĩ́tĩ̀ã̀ 12 - Wè-dɔ-wè Dɛɛ

Wɔ̃́ lɛ́ Pɔ́ɔ̀ a gɛ̃̀ɛ

¹ Lɛ m mɔ̀ ḿ lé-gbùò-là kɛ, yé bɛ̃̀ɛ̃ lɛ̀ɛ́ ló wɔ̃́ yiè kɛɛ̀ m lɛ̀ɛ ká. Ḿm̀ lo gbaa wɔ̃́ gèeè áà gbɛ̃̀ wɔ̃́ lɛ́ ko Dàa-mì a zɔ̃̀ɔ̃̀ m lɛ̀ɛ lɛ́ ma gɛ̃̀ɛ, wà pɛ lɛ́ lɛ́ɛ́ ɓoò lɛ̀ɛ́ gbaa kɛá là, lɛ́ lɛ́ɛ́ ɓoò lɛ gbaa làa mɔ̀.

² Ḿm̀ Kɛ́lɛ̀ì là mi doó lɛ́ Wálà a sí lɛ̀í zá le áà lò à ká lɛ̀í kpolà yààka zɛ̀ɛ mɔ̀ɔ dɔ. Wɔ̃́ e kéa kɛ́ a ɓoa, à kɛ̀ɛ̀ aà die vũ̀ doó wɛ́lɛ́ yììsɛ. Lɛ̀ wɔ̃́ e kéa e kɛɛ, é kɛ̀á à gbĩ-kpàlaa e lóo, ɛ̃́ɛ̃́ lɛ̀ɛ́ gbaa lóo, m̀ḿ yí dɔ. Wálà láà dɔɔ.

³ Kɛɛ ḿm̀ à yí dɔ kélɛ̀ Wálà e gɔ̃́ e kília sí lɛ̀í zá le, áà lò à ká Pálédáà. Lɛ̀ wɔ̃́ e kéa e kɛɛ, é kɛ̀á à gbĩ-kpàlaa e lóo, ɛ̃́ɛ̃́ lɛ̀ɛ́ gbaa lóo, m̀ḿ yí dɔ. Wálà láà dɔɔ.

⁴ Lɛ̀ e kɛ yía, e wɔ̃́ lɛ́ òó bɛ̀i à mɔ̀ ó à là nìɛ̀, ɛ̃́ɛ̃́ lɛ́ ye wá mia ɓéèe mɔ̀ ó à gèea ma.

⁵ À mɔ́ɔ̀ wɔ̃̀ mɔ̀ɔ, ḿm̀ lo lé-gbùò-là kɛɛ̀ gɔ̃́ e kéa mɔ́ɔ̀ wɔ̃̀ mɔ̀. M̀ḿ ló lé-gbùò-là kɛɛ̀ m dìè mɔ́ɔ̀ wɔ̃̀ mɔ̀. Pɛ lɛ́ è m zì kɛ̀-yɔ̃́ṹ-yɔ̃̀ũ̀ là dà wáà-làa, ye lɛ́ nɔ́ m̀ lo lé-gbùò-là kɛɛ̀ à làa.

⁶ Yé maà naa ḿ lé-gbùò-là kɛɛ, m̀ḿ ló kɛɛ̀ bè-mì ká. Ƃii wɔ̃́ m̀ lo kɛɛ̀ à gèepìàa, lɛ́ɛ̀ lo kɛɛ̀ wánà zɛ̀. Kɛɛ m̀ḿ ló lé-gbùò-là kɛɛ̀, ɓii ḿm̀ nàà kɛɛ mia ó o yɛ́lɛ́ táá m ká wɔ̃́ lɛ́ nɔ́ waà m gɛ̃̀ máà kɛ̀, e bɛ̀i, à ye lɛ́ waà ma m lé máà gèèa, kolo là zàá. M̀ḿ naa ó o yɛ́lɛ́ táá m ká nyɔ́ɔ̀ɔ wɔ̃́ gbɛɛ mɔ́ɔ̀ wɔ̃̀ mɔ̀.

⁷ Pɛ dò nɔɔ̀ e kɛá m lɛ̀ɛ, tó pɛ́ e kília áà m gbĩ-kpàla sã̀ dɔ̀, lɛ̀ zí gɛ́nɛ́ aà mi kṹa è mi kɛ̀áa lɛ́ ɓe. Wɔ̃́ e kéa kɛɛ̀ e kɛá m ká kíli, yékɛ̀ dìè-sì-gbùò é m yí pa wɔ̃́ kpàlézɛ̀ nì lɛ́ ma gɛ̃̀ɛ mɔ́ɔ̀ wɔ̃̀ mɔ̀. Ɛ́ɛ̃́ pɛ́ e kília lɛ lɛ̀ Sétɔ̃̀ là vɔ-mì lɛ́ ɓe. À vɔɔ̀ lɛ à ká áà m mɛ̀, tó áà m tèà m dìè sì gbùò mɔ̀.

⁸ M sɛ̀nɛ ɓo ko Dàa-mì lɛ̀ɛ kpolà yààka zɛ̀ wɔ̃́ e kéa mɔ́ɔ̀ wɔ̃̀ mɔ̀, kɛɛ é pɛ́ e kília ɓo m píé.

⁹ Kɛɛ a gèe m lɛ̀ɛ, “M zì zò-kɛ̀-sɛ̀ lɛ́ nɔ́ ì bɛ̀i à mɔ̀ é kɛ i kɛ̀lɛ̀ɛ. Ƃii yé ɓaà kɛ yɔ̃́ṹ-yɔ̃̀ũ̀a, m zì yíkɛ̀ gáàa mɛ́ lɛ́ɛ̀ kɛ̀ dóo gágà.” À mɔ́ɔ̀ wɔ̃̀ mɔ̀ɔ, m gé lɛ́ɛ̀ li nyɔ́ɔ̀ɔ kɛ ḿ lé-gbùò-là kɛ m zì kɛ̀-yɔ̃́ṹ-yɔ̃̀ũ̀ là, kɛɛ Kɛ́lɛ̀ì zì yíkɛ̀ gáàa é kɛ m là gbùlù ká.

¹⁰ Lɛ̀ lɛ kília, m zò yàà lɛ m gé m zì kɛ̀ yɔ̃́ṹ-yɔ̃̀ũ̀ kɔ̀, e bɛ̀i lé-kã́ lɛ́ ò kɛ̀ m mɔ̀, ɛ̃́ɛ̃́ m sã̀ lɛ́ è dɔ, e bɛ̀i, m sã̀ lɛ́ ò dɔ, ɛ̃́ɛ̃́ wɔ̃́ nyɔ́ɔ̀ɔ lɛ́ m̀ à gɛ̃̀ɛ séĩ́ yí Kɛ́lɛ̀ì mɔ́ɔ̀ wɔ̃̀ mɔ̀. Ƃii yé m mɛ́ aà kɛ yɔ̃́ṹ-yɔ̃̀ũ̀a, kɛɛ m mɛ́ aà kɛ gágà.

Pɔ́ɔ̀ zò lɛ́ɛ̀ wàa à gé Kɔ̀léĩ́tĩ̀ã̀-mìà wɛ̃́ĩ̀

¹¹ Ḿm̀ wɔ̃́ kɛ̀ lɛ̀ bè-mì lɛ́ ɓe. Kɛɛ ka lɛ́ kaà m kɛ à kɛ-mì káa. Ka lɛ́ káá m zɔ̃̀ɔ̃̀ mia lɛ̀ɛ. Yé bɛ̃̀ɛ̃ ma wá pɛ-kɛ̀á-pɛ̀ káa, ḿm̀ yí dɔ kélɛ̀ m kpànazɛ̀ lɛ̀ zí nɔ́ àpɔ́sɔ̀lɔ̀ vɔ̀ kpàna-kpànazɛ̀ o yía o à ká kpànazɛ̀ɛ lɛ́ ɓe.

¹² Pɛ lɛ́ è à zɔ̃̀ɔ̃̀ kélɛ̀ àpɔ́sɔ̀lɔ̀ wánà zɛ̀ lɛ́ m káa, ka o gɛ̃̀ ka bà píé. O kɛɛ̀ e kɛá zò-kũ̀-tã́ã̀ séĩ́ ká. Pɔɔ̀ e kília ye lɛ́ e kélɛ̀ wɔ̃́ gɔ̃̀á zɔ̃̀ɔ̃ɔ̃̀, e bɛ̀i wɔ̃́ lé-pa zɛ̀ wà à kpàlézɛ̀ nì kɛɛ̀ káa.

¹³ Zi sùu kpɛɛ̀ lɛ́ m wɔ̃́ kɛá Wálà-mìà lɛ́ o sɛ́lɛ́ gbɛɛ̀ gbɛɛ yía lɛ̀ɛ, lɛ́ m̀ḿ gbaa kɛá ka lɛ̀ɛ? Ye lɛ́ nɔ́ e kélɛ̀ yèĩ lɛ́ m̀ḿ gbaa yà ka kii yí gbũ̀-m-mɔ̀ mɔ́ɔ̀ wɔ̃̀ káa káa. Kà kpé lɛ sɛ̀, kà die kɛ-wɔ̃̀ yɔɔ lɛ́ ma kɛ kília là.

¹⁴ M zì ɓɔ̀-ka-píé kpolà yààka zɛ̀ lɛ́ m̀ nuá ɓɛ. Ɛ́ɛ̃́ m̀ḿ ló yèĩ yàà ka kii yí nú yé m̀ ɓoa ká. Ḿm̀ nàà ka dìè ka ká. Kɛɛ m̀ḿ naa pɛ́ e ka kɛ̀lɛ̀ɛ ká. Ye wá bɛ̃̀ɛ̃ nɔ́ɔ̀ɓé mɔ̀ kɛ ó pɛ yàlà bɛ̀i o ye-mìà lɛ̀ɛ. Kɛɛ o ye-mìà lɛ́ lɛ o mɔ̀ ó pɛ yàlà bɛ̀i wà nɔ́ɔ̀ nì lɛ̀ɛ.

¹⁵ M gé lɛ́ɛ̀ lo liì kɛɛ ḿ m dìè ɛ̃́ɛ̃́ pɛ séĩ́ lɛ́ lɛ m kɛ̀lɛ̀ɛ gó ka mɔ́ɔ̀ wɔ̃̀ mɔ̀. Yé ka lɔ̀ aà kpɔ́ m mɔ̀ nyɔ́ɔ̀ɔ, ye lɛ́ è lo à kɛɛ̀ m lɔ̀ é nyɛ ka mɔ̀ɔ?

¹⁶ Káà lo wéè à mɔ̀ kélɛ̀ m̀ḿ gbaa kɛ vũ gbííni ká ka wĩĩ́. Kɛɛ mia gbṹũ̀ óò lo à gèeè kélɛ̀ m kɛ yɛ̀ì-yɛ́í zɛ̀, ɛ̃́ɛ̃́ tó máà ka kũ̀ gbã́ã̀ ká.

¹⁷ Ɛ̀ɛ̀. Káà yí dɔ m pɛ ɓo ka yí gbã́ã̀ ká vɔ-mìà lɛ́ m o vɔ ka píéa dò yí zàá?

¹⁸ M kpé kã́ Tátɔ̀ lɛ̀ɛ kɛ é nu ka píé. Ɛ́ɛ̃́ m ko lèe-gé doó-mì gbɛ̃̀ à píé. Kɛ́ a ɓoa, Tátɔ̀ e pɛ dò ɓo ka yí gbã́ã̀ ká? Ḿ gɔ̃̀, zò nɔ́ doó e m géa, lɛ́ à dò lɛ à géa? Ḿ gɔ̃̀, kò ye kò wɔ̃́ kɛ-kɔ̀ lɛ doó?

¹⁹ Káà yí dɔ kaà yà ka yɛ́lɛ́-táà ká ɓɛ̀lɛ̀-píé gbèĩ zɛ̀ kélɛ̀ kɔaà à kɛ-zì naa kó dɔ ko dìè là ka wɛlɛ mɔ̀? Gbàaò. Kóò mɛ́ĩ́ ɓo zi lɛ́ Kɛ́lɛ̀ì à nàà kó mɛ́ĩ́ ɓo à ká Wálà wɛlɛ mɔ̀ɔ ká. M̀ lɔ̀-kɛ̀á-mìà, pɛ séĩ́ lɛ́ kò kɛ̀ɛ kóò kɛ̀ é ka mɛ́ kɛ gágà.

²⁰ Ḿm̀ tùò yékɛ̀ ḿ nuá yia, zi lɛ́ máá naà kɛ ḿ ka gɛ̃̀ à káa, kàá ló kɛɛ̀ à káa mɔ́ɔ̀ wɔ̃̀ mɔ̀. Ɛ́ɛ̃́ zi lɛ́ káá naà ká m gɛ̃̀ à káa, m̀ḿ ló kɛɛ̀ à ká. À gbú lɛ yía, wéé-dɔ̀-kíe ká, e bɛ̀i dàa-gbe-là kɛɛ̀, zò kɛ̀ tíè-tíèe là, nàà-dìè-ká, mɛ́ĩ́ yɔɔ ɓò-mia-gbĩ mɔ̀, lùe ɓoò, dìè-sì-gbùò, wéé kã́ã̀ nì séĩ́ óò lo kɛɛ̀ ka fĩ̀ã̀.

²¹ Ḿm̀ tùò, nú yé m̀ lo à ɓoòa yí, yékɛ̀ m̀ Wálà é nu m ká tã́ã̀ ka wɛlɛ mɔ̀. Ɛ́ɛ̃́ ḿm̀ lo gbóó ɓoò mia lɛ́ waà kɛ-wɔ̃̀ yɔɔ kɛ lúó zààle aà diea píé, lɛ́ òó o sɔ̃̀ɔ̃ mɛ́ vɔ̀ɔ nɛ́ɛ o mɔ́ɔ̀ wɔ̃̀ mɔ̀. Wɔ̃́ yɔɔ e kília lɛ́ e kélɛ̀, wɔ̃́ lilì kṹã̀a zɛ̀ wà sɔ̃̀ɔ̃ yɔɔ lɛ́ waà kɛ, ɛ̃́ɛ̃́ nɛ́ĩ̀ yɔɔ lɛ́ waà zɛɛ káa.