2 Kɔ̀léĩ́tĩ̀ã̀ 1 - Wè-dɔ-wè Dɛɛ

¹ Óò m si Pɔ́ɔ̀. M Kɛ́lɛ̀ì Zízɛ̀ là àpɔ́sɔ̀lɔ̀ ká, ɓii Wálà a naa ḿ kɛáa mɔ́ɔ̀ wɔ̃̀ mɔ̀. Kò m ɓɛ́ɛ ye-mì Témɔ́tè, kóò wèè Wálà-mìà lɛ́ ka Kɔ́lèĩ̀, ɛ̃́ɛ̃́ Wálà-mìà séĩ́ lɛ́ o Àkéyà-sɛ̀lɛ̀ kɔ̀ pɔ̃́ũ̀ tɛ̃̀ɛ̃́ɛ mɔ̀ɔ bà.

² Kɔa Dàa Wálà wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

Pɔ́ɔ̀ e Wálà zúo ɓo

³ Wálà lɛ́ e kɔa Dàa-mì Zízɛ̀ Kɛ́lɛ̀ì Dàa káa, kɔ̀à à tɔ́ ɓɔ. Lɛ mia Dàa lɛ́ mi yéĩ́ lɛ à mɔ̀ɔ ká. Lɛ zeĩ́ Wálà lɛ́ mia zò-yà-gé wɔ̃̀ séĩ́ è go à kɛ̀lɛ̀ɛ ká.

⁴ Láà kɛ̀ tó ko zò áà yà kò wɔ̃́ nyɔ́ɔ̀ɔ gɛ̃̀ɛ̃ɛ̃̀ séĩ́ yí. Láà kɛ̀ kíli, kɛɛ bɛ̀i é kɛ ko mɔ̀ kɛɛ kó zò-yà-gé nɔ mia lɛ́ o bɛ̃̀ɛ̃ o wɔ̃́ nyɔ́ɔ̀ɔ nɔ́ɔ fé gɛ̃̀pìàa lɛ̀ɛ. Kóò zò-yà-gé lɛ́ Wálà aà nɔ ko lɛ̀ɛ si, tó kɔ́áà o bɛ̃̀ɛ̃ o zò yà à ká o gé.

⁵ Zi nɔ́ kò Kɛ́lɛ̀ì nì kɔaa ká doó wàa kpolà búnùzɛ̀ à ɓèlèa yí zàáa, zi nɔ́ doóa káa Kɛ́lɛ̀ì lɛ́ɛ̀ à kɛ̀ tó kò à ye nì kɔ́áà dɔ̀ à zì zò-yà-gé wɔ̃̀ búnù-búnùzɛ̀ɛ yí nɔ́ kíli.

⁶ Yé kɔaà wàa ɓèlèa, kóò ɓèlè kɛɛ ká zò-yà-gé ɛ̃́ɛ̃́ la-ɓo sɔ̀lɔ̀ ɓo. Yé kɔaà zò-yà-gé sɔ̀lɔ̀ ɓoa, kóò à sɔ̀lɔ̀ ɓo kɛɛ ka bɛ̃̀ɛ̃ ka zò é yà ka gé. Láà kɛ̀ tó ka yí áà kɛ̀ gágà, kɛɛ zò-kũ̀-tã́ã̀ é kɛ ka kɛ̀lɛ̀, yé wàa nɔ́ doó kò ɓèlèa aà ɓɔ ka làa ká.

⁷ Ko zò lɛ ka mɔ̀. Ɛ́ɛ̃́ ko zì zò-kɛ̀-ka-mɔ̀ɔ, lɛ̀ɛ́ wɛ̀lɛ̀ e yàlà mɔ̀. Kóò yí dɔ yé kɔ̀à ɓi nì kɔa doó ko zì wàa kò ɓèlèa yía, kɔ̀à ɓi nì kɔa doó ko zì zò-yà-gé wɔ̃̀ lɛ́ kò à sɔ̀lɔ̀ ɓoa yí zàá nɔ́ kíli.

⁸ M lèe-gé vɔ̀, kóò nàà ká wɔ̃́ nyɔ́ɔ̀ɔ lɛ́ e kɛ ɓɔpìà ko là Ésìàa yí dɔ. Ko zì vũ gbííni lɛ́ e kɛ ko làa, e kɛ gbùò gbĩ́kĩ́ni. Bɛ̀i lɛ̀ɛ́ gbaa kɛ ko mɔ̀ kɛ kó à vũ. Ko zò lɛ̀ɛ́ gbaa kɛ ko la-wɔ̃̀ mɔ̀ gbaa.

⁹ Ko kɛ nɔ́ gbaa lɛ̀ mia lɛ́ mɛ̀ĩ́-sà aà káá o wĩĩ́ kɛ ó o zɛɛ lɛ́ ɓe. Wɔ̃́ nì e kéa, e kɛ kíli kɛɛ yékɛ̀ kó ko zò dɔ ko dìè mɔ̀, kɛɛ e kɛ kíli kɛɛ kó ko zò dɔ Wálà lɛ́ è mia wɛ̀lɛ̀ ga kɛ̀lɛ̀ɛ yee mɔ̀ zàá.

¹⁰ E ko la ga sùu yɔɔ zɛ̀ e kília kɛ̀lɛ̀, ɛ̃́ɛ̃́ lɛ́ɛ̀ lo ko laà. Ko zò dɔɔ̀ lɛ à mɔ̀ kélɛ̀ lɛ́ɛ̀ lo ko laà zeĩ́

¹¹ gbũ lɛ́ kà ɓo ko mɔ̀ sɛ̀nɛ ɓoò káa kolo là zàá. Zi nɔ́ doóa káa, ye lɛ́ Wálà è lo sɛ̀nɛ-ɓo-wè búnùzɛ̀ yí zṹũ̀ à ká, ɛ̃́ɛ̃́ tó áà lúà kpɔ̀ à ká ko mɔ̀ɔ. Ɛ́ɛ̃́ lɛ́ɛ̀ lo à kɛɛ̀ tó mia búnùzɛ̀ wáà Wálà zúo ɓò ko mɔ́ɔ̀ wɔ̃̀ mɔ̀.

Pɔ́ɔ̀ e wɔ̃́ lɛ́ a yà e gé é à kɛɛ mɛ́ vɔ̀ɔ

¹² Wɔ̃́ lɛ́ kɔ̀à lé-gbùò-là kɛ̀ à làa, gɛ̃̀ e ké. Ye lɛ́ e kélɛ̀, ko zì gíkã́ láà zɔ̃̀ɔ̃̀ ko lɛ̀ɛ kélɛ̀ ko zì wɔ̃́ kɛ-kɔ̀ lɛ́ kò wɔ̃́ kɛ̀ à ká kpóṹ là zèe, ɛ̃́ɛ̃́ à yé kò wɔ̃́ kɛ̀ à ká ka lɛ̀ɛ, Wálà láà kɛ̀ tó áà kɛ̀ kpeĩ le, ɛ̃́ɛ̃́ tó áà gò ko zò píé. Wálà zì zò-kɛ̀-sɛ̀ɛ lɛ́ a kɛ lɛ́ e kɛ kília. Kpóṹ là zèe mìà zì gíkã́ wá kɛ á kɛ kíli.

^13-14 Pɛ nɔ́ kà bɛ̀i à mɔ̀ ká gèe ká à yí maa, lɛ́ kò à bɛ̃̀ɛ̃ ka píéa. Wɔ̃́ lɛ́ kà lɛ̀ dò ɓɔ̀ɔ maa, m zò lɛ à mɔ̀ kélɛ̀ káà lo à yí maà séĩ́-sèĩ̀, kɛɛ yé ko Dàa-mì Zízɛ̀ zì lúó aà ɓɔ à mɔ̀ɔ, kɛɛ ká lé-gbùò-là kɛ ko mɔ́ɔ̀ wɔ̃̀ mɔ̀, lɛ̀ zí kò lo à kɛɛ̀ à ká ka mɔ́ɔ̀ wɔ̃̀ mɔ̀ɔ lɛ́ ɓe.

¹⁵ Lɛ̀ lɛ́ wɔ̃́ nì e kéa séĩ́ o kɛ m lɛ̀ɛ wánà zɛ̀ɛ, ma yà m gé kɛ ḿ nu ɓɔ ka píé bèĩzɛ̀, kɛɛ lúà é kpɔ́ ka mɔ̀ kpolà pèèlɛ zɛ̀.

¹⁶ Ma yà m gé kɛɛ ḿ ɓɔ ka píé yé maà kɛ lópìà Masèdónà, ɛ̃́ɛ̃́ zeĩ́ yé maà kɛ yɛ́pìà m zí máà gò Masèdónàa ká, kɛɛ ká ló m dɔɔ̀ zuú máà lò Zùdíà.

¹⁷ Lɛ̀ lɛ́ m wɔ̃́ nì e kéa yà m géa, ka kɛ m gɛ̃̀pìà lɛ̀ mí è nìɛ̀ e léa lɛ́ ɓe? Yé maà wɔ̃́ dò yà m gé ḿ kɛɛ, ḿm̀ à kɛ̀ lɛ̀ kpóṹ là zèe mìà lɛ́ ò bɛ̀i à mɔ̀ ó gèe “M̀m̀, m̀m̀” wáà gèè zeĩ́ “Gbàaò, gbàaò” e kíe káa lɛ́ ɓe?

¹⁸ Zi lɛ́ Wálà lɛ à ká zò-dɔ̀à-mɔ̀ zɛ̀ɛ, m zì wé lɛ́ m à gèe ka lɛ̀ɛ, lɛ̀ɛ́ gbaa kɛ “M̀m̀” wà “Gbàaò” o ká.

¹⁹ Ƃii Zízɛ̀ Kɛ́lɛ̀ì lɛ́ e Wálà Gbe ká, lɛ́ Sálɛ̀ e bɛ̀i Témɔ́tè, ɛ̃́ɛ̃́ ma, lɛ́ ko à wɔ̃̀ gèe ka fĩ̀ã̀ lòũ̀ káa, ye wá mí à wɔ̃̀ è bɛ̀i à mɔ̀ é kɛ “M̀m̀” wà “Gbàaò” o káa ká. Kɛɛ à ye lɛ́ nɔ́ e Wálà zì “M̀m̀” káa.

²⁰ Ƃii à ye lɛ́ e “M̀m̀” ká Wálà zì wè-dɔ-wè nɔ́ɔ tɛ̃̀ɛ̃́ɛ yía. Wɔ̃́ lɛ́ à kɛ̀ lɛ́ kò gèe “É kɛ kíli” Zízɛ̀ Kɛ́lɛ̀ì tɔ́ yí kɛɛ Wálà tɔ́ é ɓɔɔ lɛ́ ɓɛ.

²¹ Wálà lɛ́ à kɛ̀ lɛ́ kò ɓi nì kò dɔ e yiè ká Kɛ́lɛ̀ì yí zàáa. À ye lɛ́ aà ko ɓo mia bàa.

²² Aà e dɔ̀á kɛ ko mɔ̀. Ɛ́ɛ̃́ aà Gɛ̀ɛ̀ Púlú nɔ ko lɛ̀ɛ, kɛ é kɛ ko zò píé à zì wè-wɛ́lɛ́ ká pɛ séĩ́ lɛ́ lɛ à kɛ̀lɛ̀ ko mɔ́ɔ̀ wɔ̃̀ mɔ̀ɔ wɛ̃́ĩ̀.

²³ Wálà è kɛ m kélá ká. À ye lɛ́ m kɛ̀ɓe lɛ à kɛ̀lɛ̀ɛ. Wɔ̃́ lɛ́ a kɛ lɛ́ m̀ḿ gbaa mɔ́ɔ̀ nu ɓo Kɔ́lèĩ̀a, lɛ́ e kélɛ̀, m̀ḿ gbaa naa kɛ yèĩ é yà ka kii yí.

²⁴ Ko wá à naapìà kɛɛ kó ka kṹ gágà wɔ̃́ lɛ́ kà lo ka zò dɔɔ̀ à mɔ̀ɔ wɛ̃́ĩ̀. Ƃii ka dɔɔ̀ lɛ ka dɔ̀lɔ̀ mɔ̀ gágà zò-dɔ̀à-mɔ̀ yí zàá. Kɛɛ kɔ̀à ɓi nì kɔ́áà yɛɓo kɛ̀ e kíe là kɛɛ géli é kɛ ka là.