1 Pílɛ̀ 5 - Wè-dɔ-wè Dɛɛ

Wálà là ɓáá vɔ̀

¹ Má m mi dìè ká Wálà-mìà bàa, ḿm̀ kpé kã míá ka bɛ̃̀ɛ̃ ka yí mia dìè-dìè vɔ̀ ká Wálà-mìà bàa lɛ̀ɛ. M kélá ká Kɛ́lɛ̀ì zì wàa a ɓèlèa mɔ́ɔ̀ wɔ̃̀ mɔ̀. Ɛ́ɛ̃́ kò à ye kóò lo dɔɔ̀ lɛ̀-fɔ̀nɔ-kɔ̀ lɛ́ lɛ́ɛ́ ɓoò è lo kɛɛ̀ à ká à làa yí. Ḿm̀ kpé kã ka lɛ̀ɛ,

² ká ka nyìɛ kɛ ɓáá vɔ̀ lɛ́ Wálà aà kpɔ́ ka kɔ̀ làa mɔ̀. Kà kɛ zò-wèèà-mɔ̀ ká zi lɛ́ Wálà à nàà ká kɛáa ká. Yékɛ̀ ká kɛ zi lɛ́ yé ka zò lɛ̀ɛ́ wéé wɔ̃́ mɔ̀ɔ kà wɔ̃́ kɛ̀áa ká. Yékɛ̀ ká ka kɛ-yɛ̀ɓo kɛ pɛlèe doó wɛ̃́ĩ̀. Kɛɛ kà kɛ ɓii káà nàà ká yɛɓo kɛ mia mɔ̀ɔ mɔ́ɔ̀ wɔ̃̀ mɔ̀.

³ Yékɛ̀ ká mia lɛ́ waà o kpɔ́ ka kɔ̀ làa kṹ gágà. Kɛɛ kà kɛ wɔ̃́ gɔ̃̀á ká ɓáá vɔ̀ɔ lɛ̀ɛ.

⁴ Ká kɛ̀á kília, yé Nyìɛ-kɛ̀-ɓáá-mɔ̀-mì Kpó-kpóa aà nua, káà lo zòlò tɔ́ ɓɔɔ̀ɔ zɛ̀, lɛ́ à zì lɛ̀-fɔ̀nɔ-kɔ̀ lɛ̀ɛ́ ló kɛɛ̀ fúɛ́-fùɛ̀ɛ sɔ̀lɔ̀ ɓoò.

⁵ Zi nɔ́ doóa káa, mia lɛ́ ka dɛɛ, lɛ à mɔ̀ ká ka dìè kɛ mia dìè-dìè vɔ̀ɔ wì. Lɛ ka séĩ́ ka mɔ̀ ká dìè-sì-péĩ́ sɔ̀ dà ka mɔ̀ ka kíe nì mɔ́ɔ̀ wɔ̃̀ mɔ̀. Ƃii, “Wálà lɛ́ɛ̀ gèlè gɔ̃ mia lɛ́ ò o dìè si gbùòa ká, kɛɛ zò-kɛ̀-sɛ̀ lɛ ɓe à kɛ̀lɛ̀ mia lɛ́ ò o dìè si péĩ́a wɛ̃́ĩ̀.”

⁶ À mɔ́ɔ̀ wɔ̃̀ mɔ̀ɔ, kà ka dìè sí péĩ́, ká kɛ Wálà gágà ɓɛ kɔ̀ wì, kɛɛ é ka sí lɛ̀í yé à kɛ̀ kíli lùò aà ɓɔɔ ká.

⁷ Kà ka zì zò-gɔ̃́ séĩ́ yà à wĩĩ́, ɓii lɛ́ɛ̀ kpàa ka mɔ́ɔ̀ wɔ̃̀ yía wɛ̃́ĩ̀.

⁸ Kà yà ka nyìɛ́, káà ka yɛ́lɛ́ kɛ̀ zuú. Mi lɛ́ è gèlè gɔ̃ ka ká, lɛ́ e kélɛ̀ Dɛ́ɓòa, lɛ lópìà tàá sí lɛ̀ wɔ̀ɔ́ù lɛ́ è lo gũ̀mɛá sí, áà mi nàà á ɓèlèa lɛ́ ɓe.

⁹ Kà dɔ zò-dɔ̀à-mɔ̀ yí gágà, ká gèlè gɔ̃ à ká, ɓii káà yí dɔ kélɛ̀ ka lèe-gé vɔ̀ lɛ́ o kpóṹ là zèe lɛ̀ séĩ́ mɔ̀ɔ o wàa sùu nɔ́ doóa ɓèlèpìà.

¹⁰ Kɛɛ yé kaà wàa ɓèlè ké zì-làà lea, Wálà lɛ́ zò-kɛ̀-sɛ̀ séĩ́ lɛ à kɛ̀lɛ̀, lɛ́ è ka súo kɛ̀ kɛ kà ye nì ká dɔ à zì lɛ̀-fɔ̀nɔɔ̀ɔ tòá kíli zɛ̀ ɓɛ yí Kɛ́lɛ̀ì yí zàáa, à dìè lɛ́ɛ̀ lo à kɛɛ̀ tó ka mɛ́ e kpálà fɛ́fɛ́ le. Ɛ́ɛ̃́ lɛ́ɛ̀ lo ka wɛ́lɛ́ dàà ka yí áà yíkɛ̀ gágà nɔ̀ ka lɛ̀ɛ, tó áà kɛ̀ ka gã̀ áà tã́ã̀ kũ̀.

¹¹ Yíkɛ̀ gáàa è kɛ là pɛ ká tòá kíli ká. É kɛ kíli.

Wèè-mia-bà wè

¹² Sɔ̀vénà lɛ́ e m lèe-gé zò-dɔ̀à-mɔ̀ zɛ̀ ká m lɛ̀ɛ, e gbũ m mɔ̀ kɛɛ kò ye kó kii kpuú e kéa bɛ̃̀ɛ̃ ka píé. Ḿm̀ nàà ḿ à kɛ ka fã̀ã́ é wàà, ɛ̃́ɛ̃́ ḿm̀ nàà ḿ gèe ka lɛ̀ɛ kélɛ̀ Wálà zì zò-kɛ̀-sɛ̀ wánà zɛ̀ɛ lɛ́ e kília. Kà dɔ ka dɔ̀lɔ̀ mɔ̀ kpɛ̃ĩ le à yí.

¹³ Wálà-mìà yé o Bábɛ́lɔ́ũ̀ lɛ́ Wálà aà o bɛ̃̀ɛ̃ o sía, óò wèè ka bà. Zi nɔ́ doóa m gbe Máà e wééá ka bà.

¹⁴ Kà wéé ka kíe nì bà ka bè gbɛ̃̀ ka kíe nì kpéĩ́ mɔ̀ ká lɔ̀-kɛ̀à-mɔ̀ kolo là zàá. Mia séĩ́ lɛ́ ka Kɛ́lɛ̀ì là mia nì káa, zò-yà-gé é kɛ ka séĩ́ ka píé.