1 Témɔ́tè 6 - Wè-dɔ-wè Dɛɛ

¹ Mia séĩ́ lɛ́ o lùò káa, lɛ o mɔ̀ ó o dàa-mìà nì gɛ̃̀ mia lɛ́ ò bɛ̀i à mɔ̀ ó ɓɛ̀lɛyà séĩ́ sɔ̀lɔ̀ ɓoa ká, yékɛ̀ mi nɔ́ɔ fé é wɔ̃́ yɔɔ gèe Wálà tɔ́, ɛ̃́ɛ̃́ ko zì pɛ-zɔ̃̀ɔ̃̀-kɔ̀ gbĩ mɔ̀.

² Lùò lɛ́ à dàa-mì lɛ mí aà e zò dɔ Wálà mɔ̀ɔ káa, yékɛ̀ lùò e kília nyìɛ é fɔ̃́ à yí, ɓii à kɛ̀ à ɓɛ́ɛ Wálà mi ká mɔ́ɔ̀ wɔ̃̀ mɔ̀. Kɛɛ lɛ o mɔ̀ ó yɛɓo kɛ o dàa-mì lɛ̀ɛ kpó-kpó ɓo, ɓii mia lɛ́ ò gbũ̀-mɔ̀ sɔ̀lɔ̀ ɓo yɛɓo e kília kɛɛ̀ yía, o Wálà-mìà lɛ́ o lɔ̀ kpɔ́ɔ̀ lɛ wà lùò vɔ̀ mɔ̀ɔ ká. Ì wɔ̃́ nì e kéa zɔ̃̀ɔ̃̀ mia lɛ̀ɛ, ɓáà à gèè o lɛ̀ɛ wáà kɛ̀.

Pɛ-zɔ̃̀ɔ̃̀-kɔ̀ nɛ̀ zɛ̀ wà dɔ-pɔ̀ɔ̀ wánà zɛ̀

³ Mi lɛ́ è pɛ gbɛɛ zɔ̃̀ɔ̃̀ lɛ́ lɛ̀ɛ́ wéé ko Dàa-mì Zízɛ̀ Kɛ́lɛ̀ì zì wéé wánà zɛ̀ɛò, ɛ̃́ɛ̃́ lɛ́ lɛ̀ɛ́ wéé pɛ-zɔ̃̀ɔ̃̀-kɔ̀ lɛ́ à gbɛ̃̀ɛ̃̀ lɛ gbìnì-Wálà-lɛ̀ɛ kɔ̀ mɔ̀ɔ mɔ̀ɔ,

⁴ à fɔ̀ɔɔ̀ lɛ dìè-sì-gbùò ká. Ɛ́ɛ̃́ lɛ̀ɛ́ pɛ gbɛɛ dɔ. Wɔ̃́ kɛ-lɔ̀ yɔɔ yé à kɛ̀ tó ɓáà tèé dà, ɛ̃́ɛ̃́ ɓáà wéé-dɔ-wè gèè wéé doò do mɔ́ɔ̀ wɔ̃̀ mɔ̀ɔ, lɛ́ɛ̀ à kɛ̀. Tó wɔ̃́ e kéa kɛɛ̀ áà nù dàa-gbe-là, e bɛ̀i wéé dɔɔ̀, ɛ̃́ɛ̃́ lé-kã́ kɛɛ̀, e bɛ̀i, yɛ́lɛ́-táá yɔɔ̀ yɔɔ̀,

⁵ ɛ̃́ɛ̃́ zeĩ́, tèé lɛ́ gɔ̃à dò ò à dà teelea ká tã́ã̀. Gɔ̃à o kília o wũ-kèlè yí wá kpeĩ, ɛ̃́ɛ̃́ òó wɔ̃́ wánà zɛ̀ɛ dɔ gbaa. Óò à gɛ̃̀ ɓɔ̀ɔ kélɛ̀ gbìnì Wálà lɛ̀ɛ lɛ zi lɛ́ mi ì to à píé ɓáà kɛ̀ pɛ-mì káa ká.

⁶ Gbìnì Wálà lɛ̀ɛ lɛ́ɛ̀ mi kɛ̀ pɛ-mì kpó-kpó ká wánà ká, yé i zò aà dà pɛ yé e i kɛ̀lɛ̀ɛ mɔ́ɔ̀ wɔ̃̀ mɔ̀ɔ ká.

⁷ Kòó gbaa nu pɛ dò fé ká kpóṹ là zèe. Ɛ́ɛ̃́ kòó bɛ̀i góò pɛ nɔ́ɔ fé ká zèe.

⁸ À mɔ́ɔ̀ wɔ̃̀ mɔ̀ɔ, yé léɓèlè wà sɔ nì waà kɛ ko kɛ̀lɛ̀ɛ, laa mɔ̀ ko zò é dà.

⁹ Kɛɛ mia lɛ́ o kɛ̀ kpànazɛ̀ lɔ̀ lɛ o kɛpìàa, mia yí-dã́-wɔ̃̀ lɛ́ɛ̀ ɓɔ o là. Pɛ́lɛ́ lɛ́ɛ̀ o kũ. Pɛ́lɛ́ e kília lɛ́ e wɔ̃́ yí gíniìa zɛ̀ wà wɔ̃́ yé è mia gĩ̀ĩa lɔ̀ káa. Pɔɔ̀ nì o kília óò mia gã̀ã̀ tã́ã̀ o sìè-zì píé, tó e o yí sìè.

¹⁰ Wɔ̃́ yɔɔ̀ yɔɔ̀ kɛɛ̀ séĩ́ gã̀ gbɛ̃̀ɛ̃̀ lɛ pɛlèe zì lɔ̀-kɛ̀à-mɔ̀ lɛ́ e mia yía là. Nàà pɛlèe ká aà die mia gbṹũ̀ zò ká, ɛ̃́ɛ̃́ aà kɛ waà dà o gã̀ là, waà gó zò-dɔ̀à-mɔ̀ wɔ̃̀ɔ píé, ɛ̃́ɛ̃́ lɛ gbaa kélɛ̀ o zò píé aà wí zò-dà-zízàá búnùzɛ̀ ká.

Lìè-wè

¹¹ Kɛɛ ɓí i ké, lɛ́ i Wálà là mi káa, ì wɔ̃́ sùua kɛɛ̀ mɛ́ kpɔ́. Ì i fã̀ã́ wàà kɛ̀-kpeĩ-kɔ̀, kɛ̀ ɓe Wálà lɛ̀ɛ, wà zò-dɔ̀à-mɔ̀, e bɛ̀i, mi lɔ̀-kpɔ̀ mi mɔ̀, ɛ̃́ɛ̃́ zò-kũ̀-tã́ã̀, e bɛ̀i i kpóló kpɔ̀-i-mɔ̀ wɔ̃́ kɛɛ̀ yí mɔ̀.

¹² Gèlè yiè lɛ́ à gbɛ̃̀ɛ̃̀ lɛ zò-dɔ̀à-mɔ̀ wɔ̃̀ mɔ̀ɔ, ì kɛ à gɔ̃-mì ká. Ì kùnù kɛ̀ɓe wɔ́lɔ́-wɔ́lɔ́ɔ mɔ̀. Kɛ̀ɓe e kéa mɔ́ɔ̀ wɔ̃̀ lɛ́ Wálà a mɔ́ɔ̀ i súo kɛ ɓo, lɛ̀ lɛ́ i wéé i zì zò-dɔ̀à-mɔ̀ wɔ̃̀ mɔ̀ e yiè ká kélá búnùzɛ̀ wɛlɛ mɔ̀ɔ káa.

¹³ Wálà lɛ́ è kɛ̀ɓe nɔ pɛ séĩ́ lɛ̀ɛ, ɛ̃́ɛ̃́ Kɛ́lɛ̀ì Zízɛ̀ lɛ́ e wéé wɔ̃́ wánà zɛ̀ mɔ̀ e yiè ká Pɔ̃́sɔ̀ Pálɛ̀ wɛlɛ mɔ̀ɔ, maà wɔ̃́ e kéa kpɔ́ i kɔ̀ là o wɛlɛ mɔ̀.

¹⁴ Wɔ̃́ e kília gɛ̃̀ e ké. Ì wɔ̃́ lɛ́ Wálà à gèe i lɛ̀ɛ kɛ. Ì i dìè kṹ sɛ̀ à kɛɛ̀ yí, yékɛ̀ pɛ píé wà kɛɛ é kɛ i mɔ̀, é tóá kíli é ɓɔá ko Dàa-mì Zízɛ̀ Kɛ́lɛ̀ì ɓìè-mia-là lùò mɔ̀.

¹⁵ À zì ɓìè-mia-là lɛ́ɛ̀ lo kɛɛ̀á e lúó kpó-kpó ká. Wálà lɛ́ lúà kpɔ́ɔ̀ lɛ à mɔ̀, lɛ́ à doóa lɛ mia Wũ-là-mì ká, ɛ̃́ɛ̃́ lɛ́ lɛ sɛ́lɛ́ líé-sí-mìà séĩ́ Líé-sí-mì ká, ɛ̃́ɛ̃́ mia dàa-mìà séĩ́ Dàa-mì káa, à ye lɛ́ è lo à kɛɛ̀ɛ.

¹⁶ À doó lɛ́ ga là wɔ̃́ wá à mɔ̀ɔ. À yàlà kṹũ̀ lɛ lɛ̀-fɔ̀nɔ-kɔ̀ lɛ́ mi gbɛɛ lɛ̀ɛ́ bɛ̀i nyɔ̀ɔɔ̀ à káa yí. Mi gbɛɛ lɛ̀ɛ́ à gɛ̃̀ do. Ɛ́ɛ̃́ bɛ̀i wá mi gbɛɛ mɔ̀ kɛ á gɛ̃̀. Ò ɓɛ̀lɛyà wà yíkɛ̀ gáàa tòá kíli zɛ̀ nɔ à lɛ̀ɛ. É kɛ kíli.

¹⁷ Mia lɛ́ o kɛɛ̀ lɛ kpànazɛ̀ pɔɔ̀ lɛ́ e kpóṹ là zèea káa, à gèe o lɛ̀ɛ yékɛ̀ ó o dìè sí gbùò. À gèe o lɛ̀ɛ pɛ́ o zò è bɛ̀i kɛɛ̀ à mɔ̀ɔ ye wá dɔ-pɔ̀ɔ̀ lɛ́ ìí à gò-i-kɛ̀lɛ̀ lùò dɔɔ ká. Kɛɛ Wálà lɛ́ è pɛ séĩ́ nɔ ko lɛ̀ɛ e yí gbùò zɛ̀ ká, tó à nyɔ́nɔ́ áà lò ko zò káa, lɛ́ lɛ o mɔ̀ o zò é kɛ à mɔ̀ɔ.

¹⁸ À gèe o lɛ̀ɛ ó wɔ̃́ yiè kɛ kɛ o zì dɔ-pɔ̀ɔ̀ é kɛ wɔ̃́ yiè kɛɛ̀ ká, ó kɛ pɛ nɔ̀-mia-lɛ̀ɛ mìà ká, ɛ̃́ɛ̃́ o pɛ̀ kɛɛ̀ é kɛá kɛ wà mia gbɛɛ nì ó dɔ o zì dɔ-pɔ̀ɔ̀ e kília yí.

¹⁹ Zí e kéa káa, óò lo pɛ kpɔ́lɔ̀ bɛ̀ipìà lɛ́ è lo kɛɛ̀ ká-gã̀ gágà zɛ̀ ká líé zàá wɛ̃́ĩ̀a bɛ̀iì à ká. Yé aà kɛ kília, bɛ̀i lɛ́ɛ̀ lo kɛɛ̀ o mɔ̀ kɛ ó kùnù kɛ̀ɓe lɛ́ lɛ kɛ̀ɓe kpó-kpó káa mɔ̀.

²⁰ Témɔ́tè, pɛ lɛ́ waà kpɔ́ i kɔ̀ làa, ì i yɛ́lɛ́ yiè kɛ à píé. Wéé lɛ́ Wálà tɔ́ lɛ̀ɛ́ ɓɔ à ɓoò yíaò, e bɛ̀i, tèé yí gíniìa zɛ̀ dàaà, lɛ́ mia gbṹũ̀ ò à si gíkã́a, lɛ́ ye wá mɔṹ gíkã́ káa, ì o mɛ́ kpɔ́.

²¹ Ƃii mia dò waà à gèe kélɛ̀ gíkã́ e kéa lɛ o kɛ̀lɛ̀. Wɔ̃́ e kéa gèeè yía waà gó à ká zi gbùò lɛ́ à gbɛ̃̀ɛ̃̀ lɛ zò-dɔ̀à-mɔ̀ wɔ̃̀ mɔ̀ɔ píé. Zò-kɛ̀-sɛ̀ é kɛ ka píé teele.