1 Témɔ́tè 2 - Wè-dɔ-wè Dɛɛ

Zi lɛ́ mia wáá gbiniìá Wálà lɛ̀ɛ

¹ Wɔ̃́ bèĩzɛ̀ e ɓea gɛ̃̀ e ké. Ḿm̀ lìè-wè dɔ mia lɛ̀ɛ kɛ ó sɛ̀nɛ ɓo Wálà lɛ̀ɛ kpé kã̀ à lɛ̀ɛ ká, ɛ̃́ɛ̃́ wáà pɛ pɛ̃̀ à mɔ̀, e bɛ̀i, wáà à zúo ɓò mia séĩ́ wɛ̃́ĩ̀.

² Ò sɛ̀nɛ e kília ɓo sɛ́lɛ́ líé-sí-mìà, ɛ̃́ɛ̃́ mia séĩ́ lɛ́ yíkɛ̀ gáàa lɛ o kɛ̀lɛ̀ɛ mɔ́ɔ̀ wɔ̃̀ mɔ̀, kɛ kó kɛ ɓe lɛ̀à ga wà zò-yà-gé yí, kɛ ko zì kɛ-kɔ̀ é kɛ kpeĩ zi nɔ́ lɛ́ Wálà à nàà é kɛá kpó-kpó ɓoa ká.

³ Wɔ̃́ e kéa lɛ sɛ̀, ɛ̃́ɛ̃́ lɛ́ɛ̀ lo mia La-mì Wálà zò dàà.

⁴ Láà nàà mia séĩ́ ó la-ɓo sɔ̀lɔ̀ ɓo, ɛ̃́ɛ̃́ kɛ ó kɛ wánà-wɔ̃̀ dɔ-mìà ká.

⁵ Ƃii Wálà lɛ nɔ́ doó. Ɛ́ɛ̃́ mí è nu zò-yà-gé ká Wálà wà mia nì o fĩ̀ã̀a lɛ doó. Mí e kília lɛ́ e gɔ̃ lɛ́ e Kɛ́lɛ̀ì Zízɛ̀ káa káa.

⁶ E e dìè nɔ kɛ é mia séĩ́ wũ mɛ́ ɓo. À dìè nɔ́ a ɓo kília, ye lɛ́ e kɛ kélá-wè lɛ́ à zɔ̃̀ɔ̃̀ e kɛá mia lɛ̀ɛ e lúó kpó-kpó káa káa.

⁷ Wɔ̃́ e kéa lɛ́ Wálà a mɔ́ɔ̀ m vɔ ɓo àpɔ́sɔ̀lɔ̀ ɛ̃́ɛ̃́ pɛ-zɔ̃̀ɔ̃̀-mì ká sɛ́lɛ́ gbɛɛ yí-mìà píé, kɛ ḿ zò-dɔ̀à-mɔ̀ wɔ̃̀ wà wánà-wɔ̃̀ɔ gèe lòũ̀ káa. Ma wá nɛ̀ kɛpìà i lɛ̀ɛ. Lɛ wánà-wɔ̃̀ ká lɛ́ m̀ gèea.

⁸ Ḿm̀ nàà gɔ̃ã̀ lɛ́ o lɛ̀ séĩ́ mɔ̀ɔ ó sɛ̀nɛ ɓo. Gɔ̃ã̀ o kília, o mia lɛ́ waà o dìè nɔ Wálà lɛ̀ɛ, ɛ̃́ɛ̃́ lɛ́ bɛ̀i lɛ o mɔ̀ ó o kɔ̀ sí lɛ̀í sɛ̀nɛ ɓoò ká, tó òó sɛ̀nɛ e kília ɓo là-zɔ̃̀ɔ̃̀ wà wéé dɔɔ̀ káa káa.

⁹ Ḿm̀ nàà zeĩ́ kɛ loà ó o mɛ́ yèlè e yiè ká, kɛɛ o mɛ́-yèlè-kɔ̀ e kília è kɛ gíkã́ zɛ̀, kɛ ó o mɛ́ sí o mɛ́-sí-zì píé. Yékɛ̀ ó o wĩĩ́-wũ̀ mɛ́ sí é diá zí wáá kɛɛ̀áa là. Ɛ́ɛ̃́ yékɛ̀ ó o mɛ́ sí góò, e bɛ̀i gɛ̀lɛ̀ sɔ̃̀ɔ̃́ gbùò zɛ̀, ɛ̃́ɛ̃́ sɔ sɔ̃̀ɔ̃́ gbùò zɛ̀ ká.

¹⁰ Kɛɛ ò o mɛ́ sí wɔ̃́ kɛ-zì yiè ká. Wɔ̃́ e kéa lɛ́ lɛ kpeĩ loà lɛ́ ò gèe óò gbìnì Wálà lɛ̀ɛ o mɔ́ɔ̀ wɔ̃̀ mɔ̀ɔ.

¹¹ Loà ò pɛ dã́ dìè-sì-péĩ́ ká, yékɛ̀ ó wéé.

¹² M̀ḿ wéé à mɔ̀ kɛɛ loà ó pɛ zɔ̃̀ɔ̃̀ gɔ̃ã̀ lɛ̀ɛ, ɛ̃́ɛ̃́ zeĩ́ kɛɛ yíkɛ̀ gáàa é kɛ o kɛ̀lɛ̀ gɔ̃ã̀ là. Lɛ o mɔ̀ ó o lɛ̀à ga.

¹³ Ƃii Wálà e Ádã̀ kɛ bèĩzɛ̀ kɛ é tĩã́ Íì kɛɛ̀.

¹⁴ Ɛ́ɛ̃́ mi lɛ́ o à bèkɛ̀ ɓoa, lɛ̀ɛ́ gbaa kɛ Ádã̀ ká. Kɛɛ lee lɛ́ wa bèkɛ̀ ɓo, lɛ́ e Wálà là lɔ́ɔ̀ɔ sìèa.

¹⁵ Kɛɛ lee lɛ́ɛ̀ lo la-ɓo sɔ̀lɔ̀ ɓoò à zì nɛ́ yeè kolo là, yé aà ló líé zò-dɔ̀à-mɔ̀, wà lɔ̀-kɛ̀à-mɔ̀, wà kɛ̀-púlú-kɔ̀, é dàá e dìè kũ̀ tã́ã̀ bàa ká.