1 Zɔ̃̀ɔ̃́ 3 - Wè-dɔ-wè Dɛɛ

Wálà là nɔ́ɔ̀

¹ Zi sùu kpɛɛ̀ lɛ́ ko lɔ̀ kpɔ́ɔ̀ lɛ à ká ko Dàa mɔ̀ ké. Ko zì lɔ̀ lɛ́ à kpɔ́ɔ̀ lɛ à mɔ̀ɔ lɛ dóo kpànazɛ̀, tó áà kɛ̀ wáà ko sì Wálà là nɔ́ɔ̀. Ɛ́ɛ̃́ ko mɔṹ à ká. Pɛ́ à kɛ̀ lɛ́ kpóṹ là lɛ̀ɛ́ ko dɔɔ, gɛ̃̀ e ké. Lɛ̀ɛ́ gbaa Wálà dɔɔ lɛ́ à kɛ̀ɛ.

² M̀ lɔ̀-kɛ̀á-mìà, ko Wálà là nɔ́ɔ̀ ká dɛɛ káa mɔ̀. Kɛɛ pɛ́ kò lo kɛɛ̀ à káa wɔ̃̀ wá nɛ́ e yí púlú zɛ̀ ká. Kɛɛ kóò à yí dɔ kélɛ̀ yé Kɛ́lɛ̀ì aà ɓíé mia làa, kóò lo kɛɛ̀ lɛ̀ à ye lɛ́ ɓe. Ƃii kóò lo à gɛ̃̀ɛ̃̀ lɛ̀ zí lɛ à ká lɛ́ ɓe.

³ Mia séĩ́ lɛ́ o zò lɛ Kɛ́lɛ̀ì mɔ̀ zi sùu e kéa káa, lɛ́ɛ̀ e dìè kɛ̀ púlú lɛ̀ zí Kɛ́lɛ̀ì lɛ à ká púlúa lɛ́ ɓe.

⁴ Mi nɔ́ɔ fé lɛ́ è kɛ-wɔ̃̀ yɔɔ kɛ̀ɛ, Wálà là lɔ́ɔ̀ɔ sìeè mɔ́ɔ̀ mɛ̀ĩ́-sà káà lɛ à wĩĩ́. Ƃii kɛ-wɔ̃̀ yɔɔ kɛɛ̀ lɛ́ nɔ́ e lɔ́ɔ̀ɔ sìeè káa.

⁵ Káà yí dɔ kélɛ̀ Kɛ́lɛ̀ì e ɓíé mia là, kɛɛ é mia ɓéèe zì kɛ-wɔ̃̀ yɔɔ ɓo o mɔ̀. Ɛ́ɛ̃́ káà yí dɔ kélɛ̀ kɛ-wɔ̃̀ yɔɔ gbɛɛ wá à mɔ̀.

⁶ À mɔ́ɔ̀ wɔ̃̀ mɔ̀ɔ, mi nɔ́ɔ fé lɛ́ à yàlà kṹũ̀ lɛ Kɛ́lɛ̀ì yía, lɛ̀ɛ́ ló líé kɛ-wɔ̃̀ yɔɔ kɛɛ̀ ká. Kɛɛ mi lɛ́ è lo líé kɛ-wɔ̃̀ yɔɔ kɛɛ̀ káa, kɛɛ lɛ̀ɛ́ à gɛ̃̀ do, ɛ̃́ɛ̃́ lɛ̀ɛ́ à dɔ.

⁷ Nɔ́ɔ̀ɓé, yékɛ̀ ká tó mi nɔ́ɔ fé é ka bèkɛ̀ ɓo. Mi nɔ́ɔ fé lɛ́ è wɔ̃́ lɛ kpeĩa kɛ̀ɛ lɛ kpeĩ, lɛ̀ zí Kɛ́lɛ̀ì lɛ à ká kpeĩa lɛ́ ɓe.

⁸ Mi nɔ́ɔ fé lɛ́ è lo líé kɛ-wɔ̃̀ yɔɔ kɛɛ̀ káa, kɛɛ lɛ Dɛ́ɓò là mi ká. Ƃii Dɛ́ɓò aà gbɛ̃̀ kɛ-wɔ̃̀ yɔɔ kɛɛ̀ ká wɔ̃́ gã̀-gbɛ̃̀pìàa mɔ́ɔ̀ wɔ̃̀ mɔ̀. Wálà Gbe e ɓíé mia là wɔ̃́ kpó-kpó e kéa mɔ́ɔ̀ wɔ̃̀ mɔ̀. Ye lɛ́ e kélɛ̀, kɛ é Dɛ́ɓò zì kɛ-yɛ̀ɓo yí sìè.

⁹ Mi nɔ́ɔ fé lɛ́ lɛ Wálà dìè ye-nɛ̀ káa, lɛ̀ɛ́ ló e líé kɛ-wɔ̃̀ yɔɔ kɛɛ̀ ká. Ƃii Wálà zì wɔ̃́ kɛ-kɔ̀ tóò lɛ à kɔ̀ mɔ̀ɔ mɔ́ɔ̀ wɔ̃̀ mɔ̀. Ɛ́ɛ̃́ lɛ̀ɛ́ bɛ̀i lóò e líé kɛ-wɔ̃̀ yɔɔ kɛɛ̀ ká, ɓii Wálà e à yea mɔ́ɔ̀ wɔ̃̀ mɔ̀.

¹⁰ Pɛ́ à zɔ̃̀ɔ̃̀ kélɛ̀ mi i Wálà là nɛ́ ká, ɛ̃́ɛ̃́ i Dɛ́ɓò là nɛ́ káa, gɛ̃̀ e ké. Mi nɔ́ɔ fé lɛ́ lɛ̀ɛ́ wɔ̃́ lɛ́ lɛ kpeĩa kɛɛ, ye wá Wálà là nɛ́ ká. Ɛ́ɛ̃́ là nɛ́ wá zeĩ́ mi lɛ́ à lèe-gé lɔ̀ kpɔ́ɔ̀ wá à mɔ̀ɔ ká bɛ̃̀ɛ̃.

Ka kíe nì lɔ̀ è kpɔ́ ka mɔ̀

¹¹ Wɔ̃́ làṹ lɛ́ kaà ma wɔ̃́ gã̀-gbɛ̃̀pìàa gɛ̃̀ e ké. Lɛ ko mɔ̀ lɔ̀-kɛ̀à-mɔ̀ é kɛ ko yí ko kíe nì wɛ̃́ĩ̀.

¹² Yékɛ̀ kɔ́á kɛ lɛ̀ Kéĩ̀ lɛ́ ɓe. E kɛ Kɛ-pɛ̀ Yɔɔ Kɛ-mìa là mi ká. E e dìè-tĩ́ lèe-gé zɛ. Mɛ́ e kɛ lɛ́ Kéĩ̀ e à zɛ? Ƃii pɛ́ e à kɛɛ lɛ yɔɔ, ɛ̃́ɛ̃́ à yé à lèe-gé a kɛɛ lɛ kpeĩa, lɛ́ a mɔ́ɔ̀ à zɛ ɓoa.

¹³ M lèe-gé vɔ̀, yékɛ̀ ka lé é pa yé ka lɔ̀ aà nyɛ kpóṹ-là-mìà mɔ̀ɔ ká.

¹⁴ Kóò à yí dɔ kélɛ̀ kɔaà gó ga kɛ̀lɛ̀, kɔaà nu gbaa kɛ̀ɓe yí. Kóò à yí dɔ, ɓii ko lèe-gé vɔ̀ lɔ̀ kpɔ́ɔ̀ lɛ ko mɔ̀ɔ mɔ́ɔ̀ wɔ̃̀ mɔ̀. Mi lɛ́ mi-lɔ̀ kpɔ́ɔ̀ wá à mɔ̀ɔ, lɛ tĩã́ ga kɛ̀lɛ̀.

¹⁵ Mi nɔ́ɔ fé lɛ́ à lèe-gé lɔ̀ nyɛɛ̀ lɛ à mɔ̀ɔ, kɛɛ mi zɛ-mì lɛ. Ɛ́ɛ̃́ káà yí dɔ kélɛ̀ kɛ̀ɓe wɔ́lɔ́-wɔ́lɔ́ wá mi zɛ-mì là pɛ ká.

¹⁶ Zi lɛ́ kò lɔ̀-kɛ̀à-mɔ̀ dɔáa gɛ̃̀ e ké. Kɛ́lɛ̀ì e e zì kɛ̀ɓe nɔ ko wɛ̃́ĩ̀. À mɔ́ɔ̀ wɔ̃̀ mɔ̀ɔ, lɛ ko bɛ̃̀ɛ̃ ko mɔ̀ kɛ kó ko zì kɛ̀ɓe nɔ ko lèe-gé vɔ̀ wɛ̃́ĩ̀.

¹⁷ Yé kpóṹ là zèe pɔ̀ɔ̀ aà kɛ mi dò kɛ̀lɛ̀, tó áà e lèe-gé lɛ́ pɛ wá à kɛ̀lɛ̀ɛ gɛ̃̀, tó áà e ko gbɛ̃̀ e lèe-gé yéĩ̀zɛ̀ e kília mɔ̀ɔ, zi sùu kpɛɛ̀ lɛ́ è bɛ̀i à mɔ̀ é à gèe kélɛ̀ Wálà zì lɔ̀-kɛ̀à-mɔ̀ yàlà kṹũ̀ lɛ à yí?

¹⁸ M̀ nɔ́ɔ̀ɓé, yékɛ̀ kɔa zì mi-lɔ̀ kpɔ̀ kɔa mɔ̀ɔ é kɛ nɔ́ ɓɔ̀ɔ wéé fèle kɔ̀à ɓoa ká. Kɛɛ lɛ à mɔ̀ é kɛ wánà zɛ̀, ɛ̃́ɛ̃́ é kɛ pɛ́ kò kɛ̀ ko kɔ̀ káa ká.

Kɔa zò lɛ́ɛ̀ yà kɔa gé Wálà wɛlɛ mɔ̀

¹⁹ Wɔ̃́ e kília lɛ́ɛ̀ lo à zɔ̃̀ɔ̃̀ ko lɛ̀ɛ kélɛ̀ ko wánà-wɔ̃̀ là mia nì káa. Ɛ́ɛ̃́ lɛ́ɛ̀ lo à kɛɛ̀ kɛ kó kɛ zò-yà-gé zɛ̀ Wálà wɛlɛ mɔ̀ɔ.

²⁰ Yé ko zò aà mɛ̀ĩ́-sà káá ko wĩĩ́a, kóò à yí dɔ kélɛ̀ Wálà lɛ kpànazɛ̀, é diá ko zò là, ɛ̃́ɛ̃́ lɛ́ɛ̀ wɔ̃́ séĩ́ yí dɔ.

²¹ M̀ lɔ̀-kɛ̀á-mìà, yé ko zò lɛ̀ɛ́ mɛ́ĩ́ káá ko wĩĩ́a, ko gé lɛ geleĩ Wálà wɛlɛ mɔ̀.

²² Kóò pɛ séĩ́ lɛ́ kò pɛ̃ à mɔ̀ɔ sɔ̀lɔ̀ ɓo, ɓii kóò à wéè kɛ̀, tó kɔ́áà wɔ̃́ lɛ́ à zò dàa kɛ̀ɛ mɔ́ɔ̀ wɔ̃̀ mɔ̀.

²³ Wɔ̃́ à gèe kó kɛɛ, gɛ̃̀ e ké. Láà gèe kó à Gbe Zízɛ̀ Kɛ́lɛ̀ì tɔ́ wɔ̃̀ gɛ̃̀ wánà ká, ɛ̃́ɛ̃́ kó à lɔ̀ kɛ ko kíe nì ká, lɛ̀ zí Kɛ́lɛ̀ì a gèe kó kɛáa lɛ́ ɓe.

²⁴ Mi nɔ́ɔ fé lɛ́ è Wálà wéè kɛ̀ɛ, kɛɛ aà e yàlà kṹ Wálà yí, ɛ̃́ɛ̃́ Wálà bɛ̃̀ɛ̃ yàlà kṹũ̀ lɛ à yí nɔ́ kíli. Zi lɛ́ kò Wálà kɛ̀ ko yí míní si à káa, gɛ̃̀ e ké. Kóò à míní si Gɛ̀ɛ̀ lɛ́ aà nɔ ko lɛ̀ɛ kolo là.