1 Kɔ̀léĩ́tĩ̀ã̀ 9 - Wè-dɔ-wè Dɛɛ

Yíkɛ̀ gáàa wà wɔ̃́ lɛ́ lɛ àpɔ́sɔ̀lɔ̀ vɔ̀ mɔ̀ ó kɛɛ

¹ Ḿ gɔ̃̀, yíkɛ̀ gáàa wá m kɛ̀lɛ̀? Ma wá àpɔ́sɔ̀lɔ̀ ká? Ḿ gɔ̃̀, maà Zízɛ̀ lɛ́ e kɔa Dàa-mì káa gɛ̃̀? Yɛɓo lɛ́ m̀ kɛ̀ ko Dàa-mì lɛ̀ɛ, ḿ gɔ̃̀, ka lɛ́ m ka gɛ̃̀ yɛɓo e kília kɛɛ̀ kolo làa?

² Yé ma wá àpɔ́sɔ̀lɔ̀ ká mia gbɛɛ nyìɛ làa, m à ká ka yee ka nyìɛ là wánà kpó-kpó ká. Ka kɛ̀ ko Dàa-mì yí zàáa, ka lɛ́ ka m̀ àpɔ́sɔ̀lɔ̀-yɛ̀ɓo lɛ́ m̀ kɛ̀ɛ dɔ̀á káa.

³ Yé mia waà tàà kɛ m mɔ̀ɔ, zí m̀ yí ɓo à káa gɛ̃̀ e ké.

⁴ Ḿ gɔ̃̀, yíkɛ̀ gáàa lɛ m kɛ̀lɛ̀ kɛ ḿ léɓèlè wà mi-pɛ̀ sɔ̀lɔ̀ ɓo mia kɛ̀lɛ̀?

⁵ Ḿ gɔ̃̀, yíkɛ̀ gáàa lɛ m kɛ̀lɛ̀ kɛ ḿ Wálà lee sí m na ká, kò ye kɔ́áà lò táá mɔ̀ píé lɛ̀ zí àpɔ́sɔ̀lɔ̀ vɔ̀ yé o tóa, ɛ̃́ɛ̃́ ko Dàa-mì lèe-gé vɔ̀, ɛ̃́ɛ̃́ Pílɛ̀ nì ò à kɛ̀áa lɛ́ ɓe?

⁶ Ɛ́ɛ̃́ kò Bánábà lɛ́ nɔ́ ko ɓɔ kɛɛ kó yɛɓo kɛ, kɛ kó dɔá ko dìè làa?

⁷ Sóyà kpɛɛ̀ lɛ́ aà e dìè là pɔɔ̀ ɛ̃́ɛ̃́ léɓèlè lɔ́ do e dìè lɛ̀ɛ sóyà-yɛ̀ɓo kɛɛ̀ yí? Deĩ̀ lɛ́ aà ɓɛ̀lɛ̀-wɛ́lɛ́ lɛ́ ò à ɓɛɛ yíí mia nyɛ́nɛ̀ĩ̀ kpɔ́ do, tó làá dò ɓèlè? Dé è e nyìɛ kɛ̀ là ɓáá mɔ̀, tó lɛ̀ɛ́ o nyɔ́-yíí ɓo e dìè lɛ̀ɛ?

⁸ Káà yí dɔ wɔ̃́ m̀ gèe kéa ḿm̀ gèe mia ɓéèe zì gíkã́ ká? Ḿ gɔ̃̀, Lɔ́ɔ̀ɔ lɛ́ɛ̀ wɔ̃́ nɔ́ doóa gèe?

⁹ Ƃii à bɛ̃̀ɛ̃ɛ̃̀ lɛ Móózè là Lɔ́ɔ̀ɔ yí weeá kélɛ̀, “Yé ɓaà dìì kɛ áà ɓà ɓu zììa, yékɛ̀ í kálá dà à lé.” Káà yí dɔ Wálà yɛ́lɛ́ lɛ dìì kpó-kpó píé?

¹⁰ Ḿ gɔ̃̀, aà gèea kɛɛ ko kpó-kpó kò wɔ̃́ lɛ́ a gèea? À bɛ̃̀ɛ̃ɛ̃̀ e kɛá ko mɔ́ɔ̀ wɔ̃̀ mɔ̀. Mi lɛ́ è ɓúa tààa, ɛ̃́ɛ̃́ à yé lɛ́ è à zìia, lɛ o mɔ̀ ó wà yɛɓoa kɛ o zò áà kɛ̀ à mɔ̀ kélɛ̀ óò lo o zì gɛ̃̀ɛ̃̀.

¹¹ Kɔaà pɛ lɛ́ è lo gbũũ̀ ka gɛ̀ɛ̀ mɔ̀ɔ taa ka bà. Pɛ lɛ́ kɔa taa ka bà kília, yé à ɓɛɛ aà kɛ ka zì kpóṹ là pɔ̀ɔ̀ dò káa, kɛɛ lɛ wɔ̃́ gbùò ká?

¹² Yé yíkɛ̀ gáàa aà kɛ mia gbɛɛ yee kɛ̀lɛ̀, tó o yɛ́lɛ́ áà kɛ̀ ka mɔ̀ ká pɛ nì sùua nɔ o lɛ̀ɛ, kɛɛ yíkɛ̀ gáàa wá ko yee ko kɛ̀lɛ̀ é diá vɔ̀ o là? Kɛɛ yíkɛ̀ gáàa e ko kɛ̀lɛ̀ɛ, kòó à kɛ nɛ́ pɛ-kɛ̀á-pɛ̀ ká. Kɛɛ kɔaà wɔ̃́ séĩ́ kṹ ko zò ká, kɛɛ yékɛ̀ kó gɛ̀lɛ̀ gbɛ̃̀ wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ ma-zì mɔ̀.

¹³ Kàá yí dɔ kélɛ̀ míá ò yɛɓo kɛ̀ sálà-ɓò-Wálà-lɛ̀ɛ-kà wìa, óò wà léɓèlè sɔ̀lɔ̀ ɓo Wálà-kà e kília wì? Ɛ́ɛ̃́ mia lɛ́ ò sálà ɓo sálà-ɓòà-là-pɛ̀ɛ làa, pɛ́ ò sálà ɓo à káa, o zì lɛ à mɔ̀?

¹⁴ Zi nɔ́ doóa káa, ko Dàa-mì aà gèe mia lɛ́ ò wɔ̃́ làṹ yièa gèe lòũ̀ káa, lɛ o mɔ̀ ó pɛ lɛ́ è lo dɔɔ̀ o làa, sɔ̀lɔ̀ ɓo wɔ̃́ làṹ yièa gèeè yí.

¹⁵ Kɛɛ yíkɛ̀ gáàa nì lɛ́ e ko kɛ̀lɛ̀ kília, m̀ḿ o dò kɛ nɛ́ pɛ-kɛ̀á-pɛ̀ ká. Ɛ́ɛ̃́ ma wá wɔ̃́ e kéa bɛ̃̀ɛ̃pìà kɛ é à kɛ kɛɛ ḿ pɛ sɔ̀lɔ̀ ɓo yíkɛ̀ gáàa nì e kília kolo là zàá. Yé maà ga yee ɓoa, lɛ sɛ̀ é diá mi dò à m zì lé-gbùò-là kɛɛ̀ síì, áà kɛ̀ wɔ̃́ dà tã́ã̀ zɛ̀ ká là.

¹⁶ Ƃii yé maà wɔ̃́ làṹ yièa gèea, lɛ̀ɛ́ pɛ gbɛɛ nɔ m lɛ̀ɛ, kɛɛ ḿ lé-gbùò-là kɛ à là. Ƃii à gèe-wɔ̃̀ lɛ m wĩĩ́. Ɛ́ɛ̃́ yé m̀ḿ wɔ̃́ làṹ yièa gèea, áá kɛɛ̀ dóo m mɔ̀ yɔɔ.

¹⁷ Yé maà wɔ̃́ e kília sí m dìè yí ḿ à kɛɛ, m yɛ́lɛ́ lɛ́ɛ̀ lo kɛɛ̀ yi kɛ ḿ m fɔ́nɔ́ gɛ̃̀. Kɛɛ yé wɔ̃́ e kília kɛ-wɔ̃̀ lɛ m wĩĩ́a, kɛɛ Wálà lɛ́ aà wɔ̃́ kpɔ́ m kɔ̀ là ɓɛ.

¹⁸ Yé aà kɛ kília, m fɔ́nɔ́ lɛ́ mɔṹ m̀ à gɛ̃̀ɛ, lɛ́ mɛɛ ká? Ye lɛ́ e kélɛ̀ ḿ wɔ̃́ làṹ yièa gèe mia lɛ̀ɛ, ḿ à kɛ̀á kília yékɛ̀ mi dò fé é pɛ nɔ à wɛ̃́ĩ̀. Kɛɛ yíkɛ̀ gáàa nì lɛ́ e m kɛ̀lɛ̀ wɔ̃́ làṹ yièa gèeè yía, yékɛ̀ ḿ à kɛ pɛ-kɛ̀á-pɛ̀ ká.

¹⁹ Yé bɛ̃̀ɛ̃ ma wá mi nɔ́ɔ fé dò là lùò káa, maà m dìè kɛ lùò ká mia séĩ́ lɛ̀ɛ, kɛɛ ḿ zi kɛ ɓe kɛɛ mia búnùzɛ̀ ó nu Kɛ́lɛ̀ì píé.

²⁰ Yé maà kɛ Zúù-mìà bàa, ḿm̀ kɛ̀ Zúù-mì ká kɛɛ ḿ nu Zúù-mìà ká Kɛ́lɛ̀ì píé. Mia lɛ́ o Móózè là Lɔ́ɔ̀ɔ wìa, yé bɛ̃̀ɛ̃ ma wá Lɔ́ɔ̀ e kília wìa, ḿm̀ m dìè kɛ̀ à wì kɛɛ ḿ nu mia lɛ́ o Lɔ́ɔ̀ e kília wìa ká Kɛ́lɛ̀ì píé.

²¹ Yé maà kɛ mia lɛ́ Lɔ́ɔ̀ e kília wá o kɛ̀lɛ̀ɛ bàa, ḿm̀ m dìè kɛ̀ lɛ̀ mi lɛ́ Lɔ́ɔ̀ wáá kɛ̀lɛ̀ɛ lɛ́ ɓe, kɛɛ ḿ nu mia lɛ́ Lɔ́ɔ̀ɔ wá o kɛ̀lɛ̀ɛ ká Kɛ́lɛ̀ì píé. Ye wá kélɛ̀ m̀ḿ Wálà là Lɔ́ɔ̀ɔ kɛò. M Kɛ́lɛ̀ì zì lɔ́ɔ̀ɔ wì.

²² Yé maà kɛ mia lɛ́ o yí wá gágàa bàa, ḿm̀ m dìè kɛ̀ lɛ̀ zí o à káa lɛ́ ɓe, kɛɛ ḿ Kɛ́lɛ̀ì píé-zì ɓo o ká. Ḿm̀ m dìè kɛ̀ pɛ séĩ́ ká mia séĩ́ lɛ̀ɛ, kɛɛ ḿ o dò la zi nɔ́ɔ fé lɛ́ m̀ bɛ̀i à mɔ̀ ḿ kɛáa ká.

²³ Ḿm̀ wɔ̃́ e kéa séĩ́ kɛ̀ wɔ̃́ làṹ yièa mɔ́ɔ̀ wɔ̃̀ mɔ̀, kɛɛ ḿ lúà lɛ́ è lo à kpɔ́ɔ̀ mia mɔ̀ɔ, kɛ ḿ m zì sɔ̀lɔ̀ ɓo.

²⁴ Kàá yí dɔ kélɛ̀ yé mia waà pɛ yà wáà bàlà sì à wɛ̃́ĩ̀a, o séĩ́-séĩ́ óò bàlà si pɛ doó wɛ̃́ĩ̀, kɛɛ mi doó lɛ́ nɔ́ è pɛ́ e kília sɔ̀lɔ̀ ɓoa? Lɛ̀ lɛ kília, kà bàlà sí gágà kɛɛ ká pɛ́ e kília sɔ̀lɔ̀ ɓo.

²⁵ Bàlà sí-mìà séĩ́ óò o dìè kũ tã́ã̀ wɔ̃́ séĩ́ kɛɛ̀ yí. Míá o kília óò wɔ̃́ e kília kɛ̀ kíli kɛɛ ó zòlò yé à kɛɛ̀ lɛ lɛ́ɛ́ ká, lɛ́ è bɛ̀i à mɔ̀ é sìèa sɔ̀lɔ̀ ɓo. Kɛɛ ko yee kóò kɛ̀ à yé lɛ́ lɛ̀ɛ́ ló sìè tòá kíli káa wɛ̃́ĩ̀.

²⁶ Pɛ́ è kɛ̀ lɛ́ m̀ mɔ́ɔ̀ bàlà si kpeĩ-kpeĩa, lɛ́ ɓɛ. Ɛ́ɛ̃́ pɛ́ à kɛ̀ lɛ́ m kélɛ̀ gèlè-gɔ̃-mì lɛ́ à kɔ̀-kpo lɛ̀ɛ́ die mi là fèlea lɛ́ ɓea lɛ.

²⁷ Ḿm̀ m gbĩ-kpàla mɛ̀ kɛɛ ḿ à kɛ é kɛ m wì kpã-kpã le, yékɛ̀ ḿ nyɛ̀á mia súo kɛɛ̀ mɔ̀ bàlà e kília sí wɛ̃́ĩ̀a, ó gèe m lɛ̀ɛ m kɔ̃́ɔ̃̀ lɛ bàlà e kília síì mɔ̀.