Biblia Todo Logo
Bìoball air-loidhne

- Sanasan -

1 Kɔ̀léĩ́tĩ̀ã̀ 6 - Wè-dɔ-wè Dɛɛ


Lèe-gé vɔ̀ wà kii-tii-kã̀ o kíe mɔ̀

1 Yé wéé aà kɛ ka doó-mì wà e lèe-gé o fĩ̀ã̀a, lɛ̀ɛ́ túó lò e ɓɛ́ɛ ye-mì e kília ká dɔ-mì lɛ́ ye wá Wálà mi káa píé pìà? Ḿ gɔ̃̀, lɛ à mɔ̀ é ló à ká Wálà-mìà píé?

2 Kàá yí dɔ kélɛ̀ Wálà là mia nì lɛ́ ò lo mɛ̀ĩ́-sà dɔɔ̀ kpóṹ là zèe mìà mɔ̀ɔ? Yé kà lo mɛ̀ĩ́-sà dɔɔ̀ kpóṹ là zèe mìà mɔ̀ɔ, káà yí dɔ bɛ̀i wá ka mɔ̀ kɛ ká mɛ́ĩ́ nyɔ̀nɔ́ sùua ɓo?

3 Kàá yí dɔ kélɛ̀ lɛ ko mɔ̀ kó mɛ̀ĩ́-sà dɔ Wálà là vɔ-mìà mɔ̀? Yé lɛ kília, gbá wá e yɛ́ mɛ̀ĩ́-sà yé à gbɛ̃̀ɛ̃̀ lɛ kɛ̀ɓe lɛ́ ko yàáa mɔ̀ɔ làa?

4 Yé lɛ kília, yé wɔ̃́ sùua aà kɛɛ, káà lo à síì ká ló à ká mi lɛ́ à dɔ̀lɔ̀ gbɛɛ wá ɓe Wálà là yɛɓo mɔ̀ɔ píé, kɛ á ɓo?

5 Wɔ̃́ e kéa, ma gèe kíli kɛɛ é yɛ́lɛ̀ kpɔ́ ka là. Lɛ wánà ká kélɛ̀ mi gí kã́ã̀a zɛ̀ gbɛɛ wá ka bà kɛɛ é kɛ mɛ́ĩ́ ɓo-mì ká lèe-gé vɔ̀ fĩ̀ã̀?

6 Kɛɛ mi lɛ́ɛ̀ lo áà kii-tii kã̀ e lèe-gé mɔ̀, tó áà kɛ̀ mia lɛ́ o zò dɔɔ̀ wá Wálà mɔ̀ɔ, wáà mɛ̀ĩ́-sà e kília ɓò.

7 Kii-tii-kã̀ ka kíe nì mɔ̀ lɛ́ e ka kɔ̀ mɔ̀ɔ, lɛ́ɛ̀ à zɔ̃̀ɔ̃̀ kélɛ̀ wɔ̃́ dò kɛɛ̀ lɛ ka ká. Yé mi dò aà naa é wɔ̃́ yɔɔ kɛ ka káa, lɛ̀ɛ́ gɔ̃̀ kɛɛ̀ dóo sɛ̀ yé kaà tó aà kɛɛ ká? Lɛ̀ɛ́ gɔ̃̀ kɛɛ̀ dóo sɛ̀ yé kaà tó aà ka fùlua ká?

8 Kɛɛ ka dìè-tĩ́ káà wɔ̃́ yɔɔ kɛ̀ ka kíe nì ká, ɛ̃́ɛ̃́ káà ka kíe nì fùlu. Ɛ́ɛ̃́ é kɛ bɛ̃̀ɛ̃ ka lèe-gé vɔ̀ nì káa, káà o fùlu.

9 Kàá yí dɔ kélɛ̀ mia lɛ́ o wá kpeĩa dɔ̀lɔ̀ lɛ̀ɛ́ ló kɛɛ̀ mia lɛ́ Wálà tóò lɛ o làa fĩ̀ã̀. Yékɛ̀ ká ka dìè bèkɛ̀ ɓo. Mia lɛ́ ò sɔ̃̀ɔ̃ yɔɔ kɛ̀, ɛ̃́ɛ̃́ o yé ò gbìnì kɛ̀ɛ̀-wɛ́lɛ́ lɛ̀ɛ, ɛ̃́ɛ̃́ o yé ò wàà o ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì, e bɛ̀i, gɔ̃ã̀ lɛ́ o o ɓɛ́ɛ gɔ̃̀ã̀ píé lɛ̀ lee wà e dɛ̃ lɛ́ ɓea,

10 ɛ̃́ɛ̃́ mia yé ò pɛ ɓo mia kɛ̀lɛ̀, ɛ̃́ɛ̃́ mia lɛ́ pɛ séĩ́ zì lɔ̀-kɛ̀à-mɔ̀ lɛ o yía, ɛ̃́ɛ̃́ o yé yɔ-mi-wɔ̃̀ diè lɛ o zò ká, ɛ̃́ɛ̃́ o yé ò lé-kã́ kɛ̀ mia mɔ̀, e bɛ̀i mia yé ò kã̀ã ɓoa, o dò nɔ́ɔ fé dɔ̀lɔ̀ lɛ̀ɛ́ ló kɛɛ̀ mia lɛ́ Wálà tóò lɛ o làa fĩ̀ã̀.

11 Ka dò ka kɛ nɔ́ kíli. Kɛɛ waà ka zì kɛ-wɔ̃̀ yɔɔ pɛ́lɛ́ gbaa ka mɔ̀. Kaà kɛ gbaa à doó kɔ̀á ká. Ka kɛɛ̀ lɛ kpeĩ gbaa Wálà lɛ̀ɛ ko Dàa-mì Zízɛ̀ Kɛ́lɛ̀ì tɔ́ yí, ɛ̃́ɛ̃́ Wálà lɛ́ e kò Wálà káa zì Gɛ̀ɛ̀ kolo là zàá.


Ka gbĩ-kpàla kɛ-wɔ̃̀ è nu tɔ́-ɓɔ ká Wálà gbĩ mɔ̀

12 Yíkɛ̀ gáàa lɛ m kɛ̀lɛ̀ kɛ ḿ wɔ̃́ nɔ́ɔ fé kɛ. Lɛ kíli, kɛɛ pɛ séĩ́ lɛ̀ɛ́ gbũ mia mɔ̀. Yíkɛ̀ gáàa lɛ m kɛ̀lɛ̀ kɛ ḿ wɔ̃́ nɔ́ɔ fé kɛ wánà ká. Kɛɛ pɛ nɔ́ɔ fé lɛ̀ɛ́ ló m lùò là kɛ̀ ɓoò.

13 Léɓèlè lɛ ɓe mia gé mɔ́ɔ̀ wɔ̃̀ mɔ̀, ɛ̃́ɛ̃́ mia gé bɛ̃̀ɛ̃ lɛ ɓe léɓèlè mɔ́ɔ̀ wɔ̃̀ mɔ̀. Lɛ kíli, kɛɛ Wálà lɛ́ɛ̀ lo o séĩ́ o líé nyɛɛ̀. Mia gbĩ-kpàla wá sɔ̃̀ɔ̃ yɔɔ kɛɛ̀ mɔ́ɔ̀ wɔ̃̀ mɔ̀. Kɛɛ lɛ ɓe ko Dàa-mì mɔ́ɔ̀ wɔ̃̀ mɔ̀. Ɛ́ɛ̃́ ko Dàa-mì bɛ̃̀ɛ̃ lɛ ɓe mia gbĩ-kpàla mɔ́ɔ̀ wɔ̃̀ mɔ̀.

14 Wálà e ko Dàa-mì wɛ̀lɛ̀ ga kɛ̀lɛ̀. Ɛ́ɛ̃́ lɛ́ɛ̀ lo ko bɛ̃̀ɛ̃ ko wɛ̀lɛ̀ lɛ̀í à zì yíkɛ̀ gáàa ká nɔ́ kíli.

15 Kàá yí dɔ kélɛ̀ ka gbĩ-kpàla lɛ Kɛ́lɛ̀ì gbĩ-kpàla lɛ̀ dò ká? Lɛ́ɛ̀ lo kɛɛ̀ sɛ̀ mɔṹ kɛ ḿ Kɛ́lɛ̀ì gbĩ-kpàla lɛ̀ dò sí, kɛ ḿ kɛ loà lɛ́ ò o dìè lɔ̀ɔ̀ dɔɔ gbĩ-kpàla lɛ̀ dò ká? Gbàaò. Lɛ̀ɛ́ bɛ̀i kɛɛ̀ gbɛɛ ɓo kíli.

16 Kàá yí dɔ kélɛ̀ mi lɛ́ è e dìè dà loà sùu o kília bàa, kɛ wà ye nì o gbĩ-kpàla aà kɛ gbaa doó? À bɛ̃̀ɛ̃ɛ̃̀ lɛ Wálà là kíía yí kélɛ̀, “Mia pèèlɛ óò lo kɛɛ̀ doó.”

17 Kɛɛ mi lɛ́ è e dìè dà ko Dàa-mì bàa, kɛɛ wà ye o gɛ̀ɛ̀ aà kɛ doó.

18 Kà ka mɛ́ tɛ̃́ sɔ̃̀ɔ̃ yɔɔ kɛɛ̀ mɔ̀. Kɛ-wɔ̃̀ yɔɔ séĩ́ lɛ́ mi à kɛ̀ɛ, à tíé lɛ̀ɛ́ à dìè kṹ. Kɛɛ mi yé è sɔ̃̀ɔ̃ yɔɔ kɛ̀ɛ, lɛ́ɛ̀ wɔ̃́ yɔɔ kɛ̀ e dìè gbĩ-kpàla mɔ̀.

19 Kàá yí dɔ kélɛ̀ ka gbĩ-kpàla lɛ Gɛ̀ɛ̀ Púlú lɛ́ Wálà a nɔ ka lɛ̀ɛ, lɛ́ à yàlà kṹũ̀ lɛ ka yía, là ká ká? Ka wá ka dìè kà pɛ ká.

20 Wálà aà ka lɔ́. Ka sɔ̃̀ɔ̃́ nɔɔ̀ lɛ à ká gbaa. À mɔ́ɔ̀ wɔ̃̀ mɔ̀ɔ, ka gbĩ-kpàla kɛ-wɔ̃̀ è kɛ wɔ̃́ lɛ́ è nu tɔ́-ɓɔ ká Wálà gbĩ mɔ̀ɔ ká.

Mann New Testament © Bible Society in Liberia, 1978.

Bible Society in Liberia
Lean sinn:



Sanasan