1 Kɔ̀léĩ́tĩ̀ã̀ 4 - Wè-dɔ-wè Dɛɛ

Kɛ́lɛ̀ì là àpɔ́sɔ̀lɔ̀ vɔ̀

¹ Lɛ sɛ̀ ká ko gɛ̃̀ Kɛ́lɛ̀ì là yɛɓo-kɛ-mìà, lɛ́ Wálà là pɛ lɛ́ à bĩ̀ĩĩ̀ e kɛ à káa, lɛ́ à kpɔ́ɔ̀ lɛ o kɔ̀ là gbaa ká.

² Wɔ̃́ doó lɛ́ lɛ à mɔ̀ɔ, gɛ̃̀ e ké. Mi lɛ́ ì wɔ̃́ kpɔ à kɔ̀ làa, è kɛ mi lɛ́ ò bɛ̀i à mɔ̀ ó o zò dɔ à mɔ̀ɔ ká.

³ É kɛ bɛ̃̀ɛ̃ m dìè m káa, yé kaà mɛ̀ĩ́-sà dɔ m mɔ̀, ɛ̃́ɛ̃́ yé bɛ̃̀ɛ̃ mɛ̀ĩ́-sà ɓo-mìà waà mɛ̀ĩ́-sà dɔ m mɔ̀ɔ, à kpàà wá m mɔ̀. M̀ḿ mɛ̀ĩ́-sà dɔ bɛ̃̀ɛ̃ m dìè mɔ̀.

⁴ M̀ḿ wɔ̃́ yɔɔ gbɛɛ kɛ nɛ́ kɛ ḿ yí dɔ. Kɛɛ wɔ̃́ e kília lɛ̀ɛ́ à zɔ̃̀ɔ̃̀ kélɛ̀ wɔ̃́ liì lɛ m mɔ̀. Ko Dàa-mì lɛ́ è mɛ̀ĩ́-sà dɔ m mɔ̀ɔ.

⁵ À mɔ́ɔ̀ wɔ̃̀ mɔ̀ɔ, yékɛ̀ ká mɛ̀ĩ́-sà dɔ mi nɔ́ɔ fé mɔ̀ yé lúóa kpó-kpó lɛ̀ɛ́ ɓɔ nɛ́ɛ ká. Lɛ à mɔ̀ mɛ̀ĩ́-sà dɔ̀-mia-mɔ̀ é tèá kíli ko Dàa-mì é nu nɛ́. À ye lɛ́ è lo pɛ lɛ́ à bĩ̀ĩĩ̀ lɛ bĩ́ bàa ɓɔɔ̀ lɛ̀ púlú mɔ̀ɔ. Ɛ́ɛ̃́ lɛ́ɛ̀ lo wɔ̃́ lɛ́ mia ò yà o gé ó kɛɛ dàà wáà-là. Yé aà kɛ kília, mia séĩ́ óò lo tɔ́-ɓɔ lɛ́ wáá à sɔ̀lɔ̀ ɓoò, lɛ́ è go Wálà píéa sɔ̀lɔ̀ ɓoò.

⁶ M lèe-gé vɔ̀, wɔ̃́ séĩ́ lɛ́ maà gèe e kéa, ma gbɛ̃̀ ma Pɔ́ɔ̀ ɛ̃́ɛ̃́ Àpɔ́lɔ̀ ko mɔ̀ ka zì wɛ̃́ĩ̀. Maà ko kɛ wɔ̃́ gɔ̃̀á ká, kɛɛ ká pɛ dã́ wɔ̃́ gèe-wè e kéa mɔ̀. Ye lɛ́ e kélɛ̀, kà ka yɛ́lɛ́ kɛ wɔ̃́ kɛ-kɔ̀ lɛ́ à bɛ̃̀ɛ̃ɛ̃̀ lɛɛ píé. Yékɛ̀ ka dò é mi dò sí gbùò, tó à nyìɛ áà fɔ̃̀ mi yé e tóa yí.

⁷ Dé e i kɛ gbɛɛ mia yé o tóa píé? Mɛ́ e i kɛ̀lɛ̀ lɛ́ Wálà lɛ̀ɛ́ gbaa nɔ i lɛ̀ɛ? Yé lɛ kília, mɛ́ e kɛ lɛ́ ì lé-gbùò-là kɛ̀ lɛ̀ pɛ lɛ́ nɔ̀-lɛ̀ɛ-pɛ̀ wá à ká i lɛ̀ɛ?

⁸ Pɛ séĩ́ lɛ́ kà nàà à káa, kaà à gɛ̃̀ gbaa. Ɛ́ɛ̃́ ka kɛɛ̀ lɛ gbaa kpànazɛ̀. Ka kɛɛ̀ lɛ mia wũ-là-mìà ká, yé bɛ̃̀ɛ̃ ko kɛɛ̀ wá à káa ká. É! Mɛ́ e kɛ lɛ́ ka wá mia wũ-là-mìà kpó-kpó ká ɓe? Kɔ̀à ɓi nì kɔ́áá kɛɛ̀ mia wũ-là-mìà ká nɔ́ doó.

⁹ Ƃii lɛ́ɛ̀ kɛ̀ lɛ̀ pɛ lɛ́ Wálà aà mia lɛ́ ko àpɔ́sɔ̀lɔ̀ vɔ̀ káa ko nɔ lɛ̀ fĩ́ĩ́-nyɛ zɛ̀ mɔ̀. Ko kélɛ̀ mia lɛ́ waà o kɔ̀ ɓo o wì ó o zɛ mia nyìɛ mɔ̀ɔ lɛ́ ɓe. Kɔaà kɛ gɛ̃̀-mìà ká kpóṹ là lɛ́ e Wálà là vɔ-mìà wà mia ɓɔ̀ɔ o káa lɛ̀ɛ.

¹⁰ Ko kɛɛ̀ lɛ bè-mìà ká Kɛ́lɛ̀ì mɔ́ɔ̀ wɔ̃̀ mɔ̀, kɛɛ ka gí kã́ã̀ lɛ Kɛ́lɛ̀ì yí zàá. Ko yí lɛ́ɛ̀ ga, kɛɛ ka yí lɛ gágà. Óò ɓɛ̀lɛyà nɔ ka lɛ̀ɛ, kɛɛ mia nyìɛ fɔ̃́ɔ̃̀ lɛ ko yí.

¹¹ Zi lɛ́ wɔ̃́ e kɛ à ká, ɛ̃́ɛ̃́ lɛ́ lɛ tĩã́ káa, gɛ̃̀ e ké. Lɔ̀ɔ lɛ́ɛ̀ ko kɛ̀, tó yíí-mi-lɔ̀ áà ko kɛ̀. Sɔ kã́ã̀ lɛ ko mɔ̀. Óò ko mɛ̀. Ko pà kpó-kpó wá ɓe.

¹² Kóò yɛɓo kɛ̀ gágà kɛɛ kó dɔá ko dìè là. Yé waà lé-kã́ kɛ ko mɔ̀ɔ, kóò lúà kpɔ o mɔ̀. Yé waà ko sã̀ dɔɔ, kóò ko kɔ̀ yà à wì.

¹³ Yé waà wéé gana zɛ̀ gèe ko lɛ̀ɛ, kóò à yí zũ wéé yiè gèeè ká. Ko kɛ gbaa lɛ̀ kpóṹ là zèe gbòo lɛ́ ɓe. Ko kélɛ̀ pɛ lɛ́ ò dùò dúnàa lɛ́ ɓe, é tóá kíli é ɓɔá pɛ́nɛɛ mɔ̀.

¹⁴ Wɔ̃́ e kéa m̀ḿ bɛ̃̀ɛ̃ kɛɛ é yɛ́lɛ̀ kpɔ́ ka là. Ḿm̀ à kɛ̀ kɛɛ é wɔ̃́ kɛ-zì zɔ̃̀ɔ̃̀ ka lɛ̀ɛ. Ƃii ka m̀ nɔ́ɔ̀ lɛ́ o lɔ̀ kpɔ́ɔ̀ lɛ m mɔ̀ɔ ká.

¹⁵ Míá ò o nyìɛ kɛ̀ ka mɔ̀ɔ, ó kɛ bɛ̃̀ɛ̃ wáá vũ̀ doó Kɛ́lɛ̀ì yí zàáa, ka dàa lɛ nɔ́ doó. Ƃii m ka ye Kɛ́lɛ̀ì Zízɛ̀ yí zàá wɔ̃́ làṹ yiè lɛ́ ma gèe ka lɛ̀ɛ wɛ̃́ĩ̀.

¹⁶ À mɔ́ɔ̀ wɔ̃̀ mɔ̀ɔ, kà kpé lɛ sɛ̀, kà kɛ m píé-gɔ̃́-mìà ká.

¹⁷ Wɔ̃́ e kéa mɔ́ɔ̀ wɔ̃̀ mɔ̀ɔ, m à mɔ́ɔ̀ Témɔ́tè vɔpìà ka píé. Lɛ m gbe lɛ́ m̀ lɔ̀ kɛ̀á, ɛ̃́ɛ̃́ lɛ́ lɛ zò-dɔ̀à-mɔ̀ zɛ̀ɛ ká ko Dàa-mì tɔ́ yí zàá. Lɛ́ɛ̀ lo ka zò vùò m zì kɛ-kɔ̀ ká Kɛ́lɛ̀ì tɔ́ yí zàá. M zì kɛ-kɔ̀ e kília, ye lɛ́ e kélɛ̀ pɛ lɛ́ m̀ zɔ̃̀ɔ̃̀ Wálà-mìà séĩ́ lɛ̀ɛ lɛ̀ séĩ́ mɔ̀ɔ káa.

¹⁸ Mia gbṹũ̀ káà ka dìè si gbùò, ɓii káà gɛ̃̀ kélɛ̀ m̀ḿ lo kɛɛ̀ nupìà ka píé.

¹⁹ Kɛɛ é kɛ̀á lɛ ko Dàa-mì wèèà-mɔ̀-wɔ̃̀ káa, ḿm̀ lo kɛɛ̀ nupìà ka píé yi dɛɛ. Yé aà kɛ kília, ḿm̀ lo mia lɛ́ ò o dìè si gbùò kília, o zì yíkɛ̀ gágà kɔ̀ gɛ̃̀ɛ̃̀, kɛɛ ye wá wɔ̃́ nɔ́ ò gèea ká.

²⁰ Ƃii Wálà tò-mia-là wa wéé ò ɓoa mɔ̀, kɛɛ lɛ yíkɛ̀ gáàa mɔ̀.

²¹ À ye kpɛɛ̀ lɛ́ kà nàà à ká? Káà nàà ḿ nu ka píé gbàtò ká, ɛ̃́ɛ̃́ káà nàà lɔ̀-kpɔ̀à-mɔ̀ é kɛ m kɔ̀ píé, máà nùá ka píé kpóló-kpɔ̀-mɔ̀ zɛ̀?