Biblia Todo Logo
Bìoball air-loidhne

- Sanasan -

1 Kɔ̀léĩ́tĩ̀ã̀ 3 - Wè-dɔ-wè Dɛɛ


Wálà zì yɛɓo-kɛ-mìà

1 Kɛɛ m lèe-gé vɔ̀, zi lɛ́ m̀ mɛ́ĩ́ ɓoá mia lɛ́ Gɛ̀ɛ̀ Púlúa lɛ o píéa lɛ̀ɛ, bɛ̀i lɛ̀ɛ́ gbaa kɛ m mɔ̀ kɛ ḿ mɛ́ĩ́ ɓoá ka lɛ̀ɛ kíli. E kɛ m mɔ̀ ḿ mɛ́ĩ́ ɓo ka lɛ̀ɛ lɛ̀ zí mia ò mɛ́ĩ́ ɓoá mia fèle, ɛ̃́ɛ̃́ mia lɛ́ o tĩã́ nɛ́fú dɛɛ ká Kɛ́lɛ̀ì mɔ́ɔ̀ wɔ̃̀ yía, lɛ̀ɛ lɛ́ ɓe.

2 E kɛ m mɔ̀ ḿ dìì-nyɔ́-yíí nɔ ka lɛ̀ɛ ka zì ɓèlè-pɛ̀ ká. Lɛ̀ɛ́ gbaa kɛ m mɔ̀ ḿ léɓèlè mɛ́ gágà zɛ̀ nɔ ka lɛ̀ɛ, ɓii bɛ̀i lɛ̀ɛ́ gbaa kɛ ka mɔ̀ nɛ́ kɛ ká ɓèlè. É kɛ bɛ̃̀ɛ̃ dɛɛ ká káa, bɛ̀i wá nɛ́ ka mɔ̀ à wɛ̃́ĩ̀.

3 Ƃii ka tĩã́ yììpìà lɛ̀ mia fèle lɛ́ ɓe. Lɛ̀ dàa-gbe-là kɛɛ̀ lɛ tĩã́ ka yí, ɛ̃́ɛ̃́ káà wéé dɔ̀ ka kíe nì píéa, làá zɔ̃̀ɔ̃̀ kélɛ̀ ka mia fèle ká, ɛ̃́ɛ̃́ ka tópìà kpóṹ là zèe mìà kɛ-kɔ̀ kpáá yí?

4 Yé ka doó-mì aà gèe, “M Pɔ́ɔ̀ là mi ká,” lɛ́ ka dò aà gèe, “M Àpɔ́lɔ̀ là mi káa,” kɛ ka kɛ-kɔ̀ lɛ̀ɛ́ kɛ nɛ́ lɛ̀ kpóṹ là zèe mìà kɛ-kɔ̀ lɛ́ ɓe?

5 Yé mɔṹ aà kɛ kília, dé e Àpɔ́lɔ̀ ká? Ɛ́ɛ̃́ zeĩ́, dé e Pɔ́ɔ̀ ká? Ko nɔ́ Wálà là yɛɓo-kɛ-mìà ká, ɛ̃́ɛ̃́ kɔ́áà kɛ̀ tó káà ka zò dɔ̀ Wálà mɔ̀. Kóò yɛɓo lɛ́ ko Dàa-mì a nɔ ko lɛ̀ɛ kɛ̀ ko tɔ̀ là doò do.

6 Ma lɛ́ m pɛ-wɛ́lɛ́ taa. Àpɔ́lɔ̀ lɛ́ e yíí kpɔ́ pɛ́ e kília làa. Kɛɛ Wálà lɛ́ à kɛ̀ lɛ́ è fàaa.

7 Mi lɛ́ è pɛ tààa, wà à yé è yíí kpɔ à làa, o wá mia kpànazɛ̀ ká. Wálà lɛ́ lɛ mi kpànazɛ̀ káa. Ƃii à ye lɛ́ à kɛ̀ lɛ́ taa-pɛ̀ è fàaa.

8 Mi lɛ́ e pɛ taa-mì káa, wà mí yé è yíí kpɔ à làa, o nɔ́ doó. Wálà lɛ́ɛ̀ lo o fɔ́nɔ́ nɔɔ̀ yɛɓo lɛ́ waà kɛɛ kolo là zàáa.

9 Àpɔ́lɔ̀ lɛ m ɓɛ́ɛ ká, kò ye nì kóò yɛɓo kɛ̀ e kíe bà Wálà lɛ̀ɛ. Ka lɛ́ ka kélɛ̀ Wálà zì nyɛ́nɛ̀ĩ̀ lɛ́ lɛ à kpɔ́pìàa. Ɛ́ɛ̃́ ka lɛ́ ka tɔ́ Wálà zì dɔ-pɛ̀ lɛ́ lɛ à dɔpìàa ká zeĩ́a.

10 M kélɛ̀ mi lɛ́ è ká-dɔ-yɛ̀ɓo dɔ kpó-kpó ɓoa lɛ́ ɓe. M ká gã̀ gbɛ̃̀ nɔ̀-lɛ̀ɛ-pɛ̀ lɛ́ Wálà a nɔ m lɛ̀ɛ kolo là zàá, ɛ̃́ɛ̃́ mi gbɛɛ lɛ gbaa ká dɔpìà ká gã̀ e kília là. Kɛɛ lɛ sɛ̀ mia séĩ́ ó o yɛ́lɛ́ kɛ o zì ká-dɔ-kɔ̀ píé.

11 Ká gã̀a gbɛ̃̀ɛ̃̀ lɛ à ká gbaa. Mi gbɛɛ lɛ̀ɛ́ bɛ̀i gbaa ká gã̀ gbɛɛ dɔɔ̀. Ká gã̀ e kília lɛ́ e Zízɛ̀ Kɛ́lɛ̀ì káa.

12 Mia gbṹũ̀ óò lo góò wà sévà, e bɛ̀i gɛ̀lɛ̀ sɔ̃̀ɔ̃́ gbùò zɛ̀ nì síì, wáà ká dɔ̀á píé ká gã̀ e kília là. Mia gbṹũ̀ óò lo yílí, ɛ̃́ɛ̃́ sùu, e bɛ̀i ɓu zìiìa zɛ̀ tòlò síì, wáà ká dɔ̀ à ká.

13 Zi lɛ́ mia kɛ-yɛ̀ɓo lɛ à ká doò doa, à zɔ̃̀ɔ̃̀ lɛ́ɛ̀ lo kɛɛ̀ à ká yé Lúó lɛ́ lɛ nupìàa aà kɛ waà dà wáà-làa ká. Tíé lɛ́ è lo kɛɛ̀ ɓe Lúó e kília káa, lɛ́ɛ̀ lo lɛ́ɛ́ ɓoò mia séĩ́ kɛ-yɛ̀ɓo là. Tíé e kília lɛ́ɛ̀ lo à yí dã́ã̀, áà zi lɛ́ o à káa zɔ̃̀ɔ̃̀.

14 Yé dɔ-pɛ̀ lɛ́ mi à dɔ ká gã̀ e kília làa, aà tó tíé yí lɛ́ lɛ̀ɛ́ géléa, lɛ́ɛ̀ lo e fɔ́nɔ́ síì yɛɓo a kɛɛ mɔ́ɔ̀ wɔ̃̀ mɔ̀.

15 Kɛɛ yé mi dò zì yɛɓo a kɛɛ, aà gélé tíé yía, kɛɛ à fɔ́nɔ́ wɔ̃̀ lɛ́ɛ̀ lo tóò à yí. À dìè-tĩ́ laà lɛ́ɛ̀ lo kɛɛ̀ à ká. Kɛɛ lá a ɓo kília, lɛ́ɛ̀ lo kɛɛ̀ lɛ̀ mi lɛ́ e ɓɔ tíé kṹũ̀a yí.

16 Kàá yí dɔ kélɛ̀ ka Wálà zì ká ká, ɛ̃́ɛ̃́ kélɛ̀ Wálà zì Gɛ̀ɛ̀ yàlà kṹũ̀ lɛ ka yí?

17 Yé mi dò aà Wálà zì káa sìèa, Wálà lɛ́ɛ̀ lo à bɛ̃̀ɛ̃ à sìè nɔ́ kíli. Ƃii Wálà-kà wì wɔ̃̀ lɛ wɔ̃́ púlú ká. Ɛ́ɛ̃́ ka lɛ́ nɔ́ ka ká e kília káa.

18 Yékɛ̀ mi nɔ́ɔ fé é e dìè bèkɛ̀ ɓo. É kɛ̀á mi dò lɛ ka bà, áà e dìè sì mi gí kã́ã̀a zɛ̀ kpóṹ là zèe zì gíkã́ kolo làa, è kɛ mi yí gíniìa zɛ̀ ká kɛ à gí é kã́.

19 Ƃii kpóṹ là zèe gíkã́ lɛ wɔ̃́ yí gíniìa zɛ̀ ká Wálà lɛ̀ɛ. Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Wálà lɛ́ɛ̀ mia gí kã́ã̀a zɛ̀ kũ o zì mɛ́ kɛ̀ kpálàa kɔ̀ bà.”

20 À bɛ̃̀ɛ̃ɛ̃̀ lɛ zeĩ́ kélɛ̀, “Ko Dàa-mì lɛ́ɛ̀ à yí dɔ kélɛ̀ mia gí kã́ã̀a zɛ̀ zì yɛ́lɛ́-tàà-yí-wɔ̃̀ɔ lɛ wɔ̃́ fèle fèle ká.”

21 À mɔ́ɔ̀ wɔ̃̀ mɔ̀ɔ, yékɛ̀ mi gbɛɛ é lé-gbùò-là kɛ mia zì kɛ-wɔ̃̀ là. Ƃii pɛ séĩ́ lɛ kà pɛ ká.

22 Ma Pɔ́ɔ̀, e bɛ̀i Àpɔ́lɔ̀, ɛ̃́ɛ̃́ Pílɛ̀, ɛ̃́ɛ̃́ zeĩ́ kpóṹ là zèe, ɛ̃́ɛ̃́ kɛ̀ɓe wà ga, dɛɛ ká wà líé zàá, pɔɔ̀ nì o kília o séĩ́ o kà pɛ ká.

23 Ka Kɛ́lɛ̀ì là mia nì ká. Ɛ́ɛ̃́ Kɛ́lɛ̀ì bɛ̃̀ɛ̃ lɛ Wálà là pɛ ká.

Mann New Testament © Bible Society in Liberia, 1978.

Bible Society in Liberia
Lean sinn:



Sanasan