1 Kɔ̀léĩ́tĩ̀ã̀ 13 - Wè-dɔ-wè Dɛɛ

Lɔ̀-kɛ̀à-mɔ̀

¹ Yé bɛ̀i aà kɛ m mɔ̀ kɛɛ ḿ wè gbɛɛ̀ gbɛɛ lɛ́ mia ò gèe, ɛ̃́ɛ̃́ à yé lɛ́ Wálà là vɔ-mìà ò gèea gèe, kɛɛ yé mi lɔ̀ kpɔ́ɔ̀ wá m mɔ̀ɔ, kɛɛ m lé-wè lɛ nɔ́ kélɛ̀ gbãũ-gbãũ mɛ̀-vĩ̀, ɛ̃́ɛ̃́ kɛɛ lɛ zeĩ́ kélɛ̀ pɛ lékèlè pèèlɛ mɛ̀ e kíe mɔ̀ vĩ̀ lɛ́ ɓe.

² Wálà é wɔ̃́ káá bɛ̃̀ɛ̃ m lé máà gèè, ɛ̃́ɛ̃́ ḿ wɔ̃́ yí-dɔ-kɔ̀ séĩ́, ɛ̃́ɛ̃́ wɔ̃́ séĩ́ lɛ́ lɛ́ɛ́ ɓoò lɛ̀ɛ́ gbaa kɛá làa yí dɔ bɛ̃̀ɛ̃, ɛ̃́ɛ̃́ zeĩ́ zò-dɔ̀à-mɔ̀ séĩ́ lɛ́ è bɛ̀i à mɔ̀ kɛɛ é tɔ̃̀ũ̀ wɛ̀lɛ̀ e dɔ̀lɔ̀ mɔ̀ɔ, é kɛ bɛ̃̀ɛ̃ m yía, yé mi lɔ̀ kpɔ́ɔ̀ wá m mɔ̀ɔ, ma wá pɛ-kɛ̀á-pɛ̀ dò fé ká.

³ Ḿ pɛ séĩ́ lɛ́ lɛ m kɛ̀lɛ̀ɛ nɔ bɛ̃̀ɛ̃ mia lɛ̀ɛ, ɛ̃́ɛ̃́ ḿ m gbĩ-kpàla nɔ bɛ̃̀ɛ̃ mia lɛ̀ɛ ó à géléa, kɛɛ yé mi lɔ̀ kpɔ́ɔ̀ wá m mɔ̀ɔ, m̀ḿ ló wɔ̃́ yiè gbɛɛ gɛ̃̀ɛ̃̀ wɔ̃́ nì e kéa kɛɛ̀ yí zàá.

⁴ Mi lɛ́ mia lɔ̀ kpɔ́ɔ̀ lɛ à mɔ̀ɔ, lɛ́ɛ̀ e zò kũ tã́ã̀, ɛ̃́ɛ̃́ à zò lɛ sɛ̀ mia ká. Ye wá dàa-gbe-là kɛ-mì ká, ɛ̃́ɛ̃́ ye wá mí è lé-gbùò-là kɛ̀ɛ ká. Ɛ́ɛ̃́ dìè-sì-gbùò wá à là.

⁵ E bɛ̀i, ye wá mi yáláṹ-gbá zɛ̀ ká. Ɛ́ɛ̃́ zeĩ́, ye wá mí è e yɛ́lɛ́ tàà e dìè-tĩ́ mɔ́ɔ̀ wɔ̃̀ káa ká. Mi lɛ́ mia lɔ̀ kpɔ́ɔ̀ lɛ à mɔ̀ɔ, ye wá mí wɔ̃́ lɛ̀ɛ́ túó à wàapìàa ká. Ɛ́ɛ̃́ lɛ mi lɛ́ lɛ̀ɛ́ wɔ̃́ kpɔ́ e gé mia gbĩ mɔ̀ɔ ká.

⁶ Ɛ́ɛ̃́ lɛ mi lɛ́ wɔ̃́ yɔɔ kɛɛ̀ lɛ̀ɛ́ à gé lia ká. Kɛɛ à gé lɛ́ɛ̀ li wɔ̃́ kpeĩ ká.

⁷ Ye wá kɔ̃̀-wɔ̃́-mɔ̀ mì ká. Ɛ́ɛ̃́ lɛ mi lɛ́ à zì zò-dɔ̀à-mɔ̀ líé-nyɛ-pìà wá ɓea ká. À zò lɛ pɛ séĩ́ mɔ̀. À fã̀ã́-wàà lɛ wɔ̃́ séĩ́ kɛɛ̀ yí.

⁸ Lɔ̀-kɛ̀à-mɔ̀ lɛ tòá-kíli pɛ̀ ká. Wálà lɛ́ɛ̀ wɔ̃́ kàà mia lé kɛ ó gèe, kɛɛ wɔ̃́ nì o kília o die-pɛ̀ ká. Wè gbɛɛ̀ gbɛɛ gèeè lɛ́ɛ̀ lo tèáà. Wɔ̃́ yí-dɔ-kɔ̀ lɛ die-pɛ̀ ká.

⁹ Ƃii wɔ̃́ lɛ́ kò à yí dɔɔ, ɛ̃́ɛ̃́ à yé lɛ́ Wálà à kàà ko lé kó gèea, lɛ wɔ̃́ lɛ̀ dò ɓɔ̀ɔ ká.

¹⁰ Kɛɛ yé pɛ́ e kília dìè-tĩ́ aà nua, kɛɛ pɛ yé lɛ nɔ́ ɓɔ̀ɔ à lɛ̀ dò káa, óò lo kɔ̃́ɔ̃̀ à ká.

¹¹ Lɛ̀ m kɛ nɛ́fú káa, m mɛ́ĩ́ ɓo lɛ̀ nɛ́fú lɛ́ ɓe. Ɛ́ɛ̃́ m zì wɔ̃́ yí-dɔ-kɔ̀ e kɛ lɛ̀ nɛ́fú là wɔ̃́ yí-dɔ-kɔ̀ lɛ́ ɓe. Ɛ́ɛ̃́ m yɛ́lɛ́-táá-zì e kɛ lɛ̀ nɛ́fú yɛ́lɛ́-táá-zì lɛ́ ɓe. Lɛ̀ maà kɛ gbaa gɔ̃ káa, maà kã́ gbaa nɔ́ɔ̀ɓé là wɔ̃̀ kɛɛ̀ mɔ̀.

¹² Pɛ́ kò gɛ̃̀ dɛɛ káa, lɛ kélɛ̀ pɛ bĩ́ lɛ́ mia ò gɛ̃̀ sɛ́ɓɛ̀ yí, lɛ́ e e ɓɛ́í-ɓɛ̀ì káa lɛ́ ɓe. Kɛɛ líé zàáa, kóò lo ko nyìɛ yàà ko kíe nì mɔ̀. Wɔ̃́ lɛ́ m̀ à yí dɔ dɛɛ káa, lɛ nɔ́ ɓɔ̀ɔ à lɛ̀ dò ká. Kɛɛ líé zàáa, wɔ̃́ lɛ́ m̀ à yí dɔɔ, à lé paà lɛ́ɛ̀ lo kɛɛ̀ à ká, lɛ̀ zí wɔ̃́ lɛ́ Wálà à yí dɔá m mɔ̀ɔ lé paà lɛ à káa lɛ́ ɓe.

¹³ Kɛɛ lúó é tĩã́ ɓɔɔ̀ɔ, pɛ yààka e kéa lɛ́ɛ̀ lo kɛɛ̀ ɓe teele. O lɛ́ o kélɛ̀, zò-dɔ̀à-mɔ̀, wà zò-kɛ̀-pɛ-mɔ̀, e bɛ̀i lɔ̀-kɛ̀à-mɔ̀. Kɛɛ pɔɔ̀ yààka o kéa, o wũ lɛ́ e lɔ̀-kɛ̀à-mɔ̀ káa.