1 Kɔ̀léĩ́tĩ̀ã̀ 12 - Wè-dɔ-wè Dɛɛ

Nɔ̀-lɛ̀ɛ-pɛ̀ lɛ́ Gɛ̀ɛ̀ Púlú à nɔ mia lɛ̀ɛ

¹ Wɔ̃́ lɛ́ à gbɛ̃̀ɛ̃̀ lɛ nɔ̀-lɛ̀ɛ-pɛ̀ lɛ́ Gɛ̀ɛ̀ Púlú à nɔ mia lɛ̀ɛ mɔ̀ɔ, gɛ̃̀ e ké. M lèe-gé vɔ̀, ḿm̀ nàà ḿ wɔ̃́ lɛ́ à gbɛ̃̀ɛ̃̀ lɛ à mɔ̀ɔ, à kɛ ká yí ma e yiè ká.

² Káà yí dɔ kélɛ̀ lɛ̀ kàá gbaa kɛ Wálà dɔpìàa, kɛ̀ɛ̀-wɛ́lɛ́ lɛ́ à lé lɛ̀ɛ́ wééa e kɛ ka zì kɛ̀ɓe là, ɛ̃́ɛ̃́ o kɛ ka lé tópìà luú.

³ À mɔ́ɔ̀ wɔ̃̀ mɔ̀ɔ, ḿm̀ nàà ká à yí ma kélɛ̀ Wálà zì Gɛ̀ɛ̀ Púlú làá kɛ kɛɛ mi á gèe kélɛ̀, “Ò Zízɛ̀ náá kpɔ́.” Ɛ́ɛ̃́ Gɛ̀ɛ̀ Púlú lɛ́ nɔ́ à kɛ̀ lɛ́ mi à gèe kélɛ̀, “Zízɛ̀ lɛ mia mì-Dàa-mì káa.”

⁴ Nɔ̀-lɛ̀ɛ-pɛ̀ɛ lɛ doò do. Kɛɛ Gɛ̀ɛ̀ Púlú doó lɛ́ nɔ́ è o nɔɔ.

⁵ Yɛɓoa lɛ doò do. Kɛɛ lɛ nɔ́ ko Dàa-mì doóa wɛ̃́ĩ̀.

⁶ Yɛɓo lɛ́ Wálà zì yíkɛ̀ gáàa è à kɛ̀ɛ, lɛ gbɛɛ̀ gbɛɛ. Kɛɛ Wálà nɔ́ doóa lɛ́ è yɛɓo doò do e kília kɛ̀ mia séĩ́ yía.

⁷ Gɛ̀ɛ̀ Púlú zɔ̃̀ɔ̃̀ lɛ mia yí o tɔ̀ là doò do mia séĩ́ zì wɔ̃́ yiè wɛ̃́ĩ̀.

⁸ Gɛ̀ɛ̀ Púlú láà kɛ̀ tó mi áà mɛ́ĩ́ ɓò gíkã́ ká. Tó Gɛ̀ɛ̀ Púlú nɔ́ doóa, áà kɛ̀ tó mi áà wɔ̃́ lɛ́ ɓà dɔɔ gèè.

⁹ Gɛ̀ɛ̀ Púlú nɔ́ doóa, lɛ́ɛ̀ zò-dɔ̀à-mɔ̀ nɔ mi dò lɛ̀ɛ. Tó e yíkɛ̀ gáàa lɛ́ ò mia la à ká yáá bàa, nɔ mi dò bɛ̃̀ɛ̃ lɛ̀ɛ.

¹⁰ Gɛ̀ɛ̀ Púlú lɛ́ɛ̀ nɔ̀-lɛ̀ɛ-pɛ̀ lɛ́ e wɔ̃́ kpàlézɛ̀ kɛɛ̀ káa, nɔ mi dò lɛ̀ɛ. Ɛ́ɛ̃́ lɛ́ɛ̀ nɔ̀-lɛ̀ɛ-pɛ̀ lɛ́ e wɔ̃́ lɛ́ Wálà à kàà mi léa gèeè káa, nɔ mi dò bɛ̃̀ɛ̃ lɛ̀ɛ. Tó Gɛ̀ɛ̀ Púlúa áà mi dò kɛ̀, tó mí e kília áà Gɛ̀ɛ̀ Púlú zì kɛ-wɔ̃̀ ɛ̃́ɛ̃́ pɛ yɔɔ zì kɛ-wɔ̃̀ dɔ̀. Gɛ̀ɛ̀ Púlú lɛ́ɛ̀ yíkɛ̀ gáàa nɔ mi dò lɛ̀ɛ, áà wè gbɛɛ̀ gbɛɛ gèè, tó áà yíkɛ̀ gáàa nɔ̀ mi gbɛɛ bɛ̃̀ɛ̃ lɛ̀ɛ kɛ é wéé e kília yí ɓo.

¹¹ Kɛɛ Gɛ̀ɛ̀ Púlú nɔ́ doóa lɛ́ è wɔ̃́ nì e kéa séĩ́ kɛ̀ɛ. Lɛ́ɛ̀ nɔ̀-lɛ̀ɛ-pɛ̀ gbɛɛ̀ gbɛɛ nɔ mia lɛ̀ɛ o tɔ̀ là doò do, lɛ̀ zí nɔ́ è à nàà á nɔáa lɛ́ ɓe.

Gbĩ-kpàla doó lɛ́ à gbɛ̃ĩ̀-pɛ lɛ à mɔ̀ búnùzɛ̀ɛ

¹² Kɛ́lɛ̀ì lɛ kélɛ̀ gbĩ-kpàla doó lɛ́ à gbɛ̃ĩ̀-pɛ lɛ à mɔ̀ gbùòa lɛ́ ɓe. À gbɛ̃ĩ̀-pɛ é kɛ bɛ̃̀ɛ̃ à mɔ̀ gbùò kília, o séĩ́ lɛ́ nɔ́ o gbĩ-kpàla doóa káa.

¹³ Ƃii Gɛ̀ɛ̀ Púlú nɔ́ doóa aà Zúù-mìà ɛ̃́ɛ̃́ sɛ́lɛ́ gbɛɛ yí-mìà, ɛ̃́ɛ̃́ lùò, e bɛ̀i mia lɛ́ o wá lùò káa, Gɛ̀ɛ̀ Púlúa aà ko séĩ́-séĩ́ ko kɛ gbĩ-kpàla doó ká ko bàtáì kɛɛ̀ kolo là zàá. Ɛ́ɛ̃́ Gɛ̀ɛ̀ Púlú nɔ́ doóa nɔɔ̀ lɛ ko lɛ̀ɛ kɛ kó à mi lɛ̀ zí ò yíí miáa lɛ́ ɓe.

¹⁴ Ƃii gbĩ-kpàlaa gbɛ̃ĩ̀-pɛ wá à mɔ̀ doó. Kɛɛ lɛ à mɔ̀ búnùzɛ̀.

¹⁵ Ƃii è kɛ̀á mi gã̀ láà gèe kélɛ̀, “Ma wá kɔ̀ ká. À mɔ́ɔ̀ wɔ̃̀ mɔ̀ɔ, ma wá gbĩ-kpàla lɛ̀ dò káa,” lɛ̀ɛ́ ló gã̀ tèáà kɛ̀ gbĩ-kpàla lɛ̀ dò ká mɔ̀.

¹⁶ Ɛ́ɛ̃́ è kɛ̀á tóó láà gèe kélɛ̀, “Ma wá nyìɛ ká. À mɔ́ɔ̀ wɔ̃̀ mɔ̀ɔ, ma wá gbĩ-kpàla lɛ̀ dò káa,” lɛ̀ɛ́ ló tóó tèáà kɛ̀ gbĩ-kpàla lɛ̀ dò ká mɔ̀.

¹⁷ È kɛ̀á mi nyìɛ doó lɛ́ nɔ́ e mi gbĩ-kpàla gbɛ̃ĩ̀-pɛ káa, zi sùu kpɛɛ̀ lɛ́ áá wɔ̃́ maà à ká? Ɛ́ɛ̃́ è kɛ̀á mi tóó doó lɛ́ nɔ́ e mi gbĩ-kpàla gbɛ̃ĩ̀-pɛ káa, zi sùu kpɛɛ̀ lɛ́ áá pɛ gĩĩ maà à ká?

¹⁸ Kɛɛ lɛ̀ zí lɛ à káa, Wálà e mia gbĩ-kpàla gbɛ̃ĩ̀-pɛ yà o tɔ̀ là doò do gbĩ-kpàla mɔ̀ lɛ̀ zí nɔ́ e à naa à káa ká.

¹⁹ Mi gbĩ-kpàla lɛ̀ɛ́ gɔ̃̀ kɛɛ̀ ɓe, è kɛ̀á mi gbɛ̃ĩ̀-pɛ lɛ nɔ́ à mɔ̀ doóa ká.

²⁰ Lɛ̀ zí lɛ à káa, mi gbĩ-kpàla lɛ nɔ́ doó, kɛɛ à gbɛ̃ĩ̀-pɛ lɛ à mɔ̀ búnùzɛ̀.

²¹ Mi nyìɛ lɛ̀ɛ́ bɛ̀i à mɔ̀ á gèe mi kɔ̀ lɛ̀ɛ, “M̀ḿ naa i ká,” kɛ bɛ̃̀ɛ̃ mi wũ-kèlè á gèe mi gã̀ lɛ̀ɛ, “M̀ḿ naa ka ká.”

²² Kɛɛ lɛ wánà kpó-kpó ká kélɛ̀ mi gbĩ-kpàla lɛ̀ dò lɛ́ è kɛ̀ lɛ̀ pɛ lɛ́ yíkɛ̀ gáàa wá à kɛ̀lɛ̀ɛ, ìí bɛ̀i kɛɛ̀ ɓe yé ye wá i mɔ̀ɔ ká.

²³ Ɛ́ɛ̃́ zeĩ́, ko gbĩ-kpàla lɛ̀ dò lɛ́ kò gɛ̃̀ kélɛ̀ à kɛ-wɔ̃̀ wá à mɔ̀ɔ, kóò ko yɛ́lɛ́ kɛ̀ à píé ɓɛ̀lɛ̀ɛ zɛ̀. Ɛ́ɛ̃́ ko gbĩ-kpàla lɛ̀ dò lɛ́ ye wá ko lɛ̀ɛ sɛ̀ɛ, kóò ko yɛ́lɛ́ yiè kɛ̀ à mɔ̀.

²⁴ Kɛɛ ko lɛ̀ lɛ́ lɛ sɛ̀ dóo gɛ̃̀ wɛ̃́ĩ̀a, ye wá ko mɔ̀ kɛ kó ko yɛ́lɛ́ kɛ bɛ̃̀ɛ̃ à píé. Wálà dìè-tĩ́ aà gbĩ-kpàla yà e kíe mɔ̀ zi sùu dò ká, kɛɛ mia gbĩ-kpàla lɛ̀ lɛ́ ɓɛ̀lɛyà wá o mɔ̀ɔ, kɛ é ɓɛ̀lɛyà kpànazɛ̀ nɔ o lɛ̀ɛ.

²⁵ A kɛ kíli kɛɛ yékɛ̀ o fĩ̀ã̀ ɓoò é kɛ à ká. Kɛɛ gbĩ-kpàla lɛ̀ doò doa ó o yɛ́lɛ́ kɛ o kíe nì mɔ̀.

²⁶ Yé gbĩ-kpàla lɛ̀ dò aà kɛ wàa ɓèlèpìàa, à lɛ̀ yé o tóa séĩ́ óò wàa e kília ɓèlè nɔ́ kíli. Ɛ́ɛ̃́ yé waà gbĩ-kpàla lɛ̀ dò tɛ̀nɛɛ, à lɛ̀ yé e tóa séĩ́ wà ye nì o gé lɛ́ɛ̀ li nɔ́ kíli.

²⁷ Ka Kɛ́lɛ̀ì gbĩ-kpàla ká. Ɛ́ɛ̃́ ka séĩ́ ka gbĩ-kpàla e kília lɛ̀ dò ká ka tɔ̀ là doò do.

²⁸ Wálà aà mia gbɛ̃̀ o kɛ-yɛ̀ɓo lé doò do o ɓɛ́ĩ̀ Wálà-mìà bà. À bèĩzɛ̀ lɛ́ e kélɛ̀ àpɔ́sɔ̀lɔ̀ vɔ̀. À tò-ko-mɔ̀ lɛ́ e dɔ̀-Wálà-lé-là-mìà káa. À tò-ko-mɔ̀ zɛ̀ lɛ́ zeĩ́ kélɛ̀ pɛ-zɔ̃̀ɔ̃̀-mìà. E bɛ̀i zeĩ́, mia lɛ́ o wɔ̃́ kpàlézɛ̀ kɛ-mìà káa. Ɛ́ɛ̃́ zeĩ́ mia lɛ́ ò yíkɛ̀ gáàa nɔ o lɛ̀ɛ, wáà mia là yáá bà, ɛ̃́ɛ̃́ zeĩ́ o dò wáà gbũ̀ mia mɔ̀ɔ. Ɛ́ɛ̃́ o yé ò líé si mia ká, ɛ̃́ɛ̃́ o dò yé ò wè gbɛɛ̀ gbɛɛ gèea.

²⁹ Káà yí dɔ mia séĩ́ o àpɔ́sɔ̀lɔ̀ ká? Ɛ́ɛ̃́ o séĩ́ o dɔ̀-Wálà-lé-là-mìà ká? O séĩ́ o pɛ-zɔ̃̀ɔ̃̀-mìà ká? O séĩ́ o wɔ̃́ kpàlézɛ̀ kɛ-mìà ká?

³⁰ Ɛ́ɛ̃́ yíkɛ̀ gáàa nɔɔ̀ lɛ mia séĩ́ lɛ̀ɛ, kɛɛ ó mia la yáá bà? Ɛ́ɛ̃́ o séĩ́ óò wè gbɛɛ̀ gbɛɛ gèe? Mia séĩ́ óò bɛ̀i wéé e kília yí ɓoò?

³¹ À mɔ́ɔ̀ wɔ̃̀ mɔ̀ɔ, pɛ lɛ́ ka zò è lo kɛɛ̀ à mɔ̀ kpó-kpó ɓoa, è kɛ nɔ̀-lɛ̀ɛ-pɛ̀ yé lɛ dóo nɔ̀-lɛ̀ɛ-pɛ̀ kpànazɛ̀ káa ká. Kɛɛ ḿm̀ lo zi lɛ́ lɛ kpànazɛ̀ é diá zi séĩ́ làa zɔ̃̀ɔ̃̀ ka lɛ̀ɛ.