1 Kɔ̀léĩ́tĩ̀ã̀ 11 - Wè-dɔ-wè Dɛɛ

¹ Kà m píé gɔ̃́, lɛ̀ zí nɔ́ m̀ Kɛ́lɛ̀ì píé gɔ̃ à káa lɛ́ ɓe.

Wɔ̃́ lɛ́ à gbɛ̃̀ɛ̃̀ lɛ sɔ kàà mia wũ là wɔ̃̀ mɔ̀ɔ

² Ḿm̀ ka tɛ̀nɛ, ɓii ka zò lɛ́ɛ̀ vùò m mɔ́ɔ̀ wɔ̃̀ ká teele. Ɛ́ɛ̃́ wɔ̃́ kɛ-kɔ̀ nì lɛ́ ma zɔ̃̀ɔ̃̀ ka lɛ̀ɛ, káà to o píé.

³ Kɛɛ ḿm̀ nàà ká yí dɔ kélɛ̀ Kɛ́lɛ̀ì lɛ gɔ̃ nɔ́ɔ fé là, ɛ̃́ɛ̃́ lee-sí-gɔ̃̀ lɛ e na là, ɛ̃́ɛ̃́ Wálà bɛ̃̀ɛ̃ lɛ Kɛ́lɛ̀ì là.

⁴ À mɔ́ɔ̀ wɔ̃̀ mɔ̀ɔ, gɔ̃ lɛ́ è sɔ kàà e wũ là áà sɛ̀nɛ ɓò, ɛ̃́ɛ̃́ áà wɔ̃́ lɛ́ Wálà a káá à lé á gèea gèè mia nyìɛ mɔ̀ɔ, lɛ yɛ́lɛ̀ kpɔ́pìà Kɛ́lɛ̀ì là.

⁵ Ɛ́ɛ̃́ lee lɛ́ pɛ gbɛɛ wá à wũ là áà sɛ̀nɛ ɓò, ɛ̃́ɛ̃́ áà wɔ̃́ lɛ́ Wálà a káá à lé á gèea gèè mia nyìɛ mɔ̀ɔ, lɛ yɛ́lɛ̀ kpɔ́pìà e dɛ̃ là. Wà lee lɛ́ à wũ káà lɛɛ, o nɔ́ à yí doó.

⁶ Kɛɛ yé lee lɛ̀ɛ́ sɔ káá e wũ làa, lɛ à mɔ̀ mɔṹ ó là wũ ɓo. Kɛɛ yé lɛ wɔ̃́ yɛ́lɛ̀ zɛ̀ ká kɛɛ ó lee là wũ ɓo, ɛ̃́ɛ̃́ ó là wũ kááa, lɛ mɔṹ sɛ̀ kɛ é sɔ káá e wũ là.

⁷ Ye wá gɔ̃ mɔ̀ kɛɛ é sɔ káá e wũ là, ɓii à ye lɛ́ e Wálà bĩ́ wà à zì tɔ́-ɓɔ káa. Kɛɛ lee lɛ́ e gɔ̃ zì tɔ́-ɓɔ káa.

⁸ Ƃii Wálà lɛ̀ɛ́ gbaa gɔ̃ kɛ lee lɛ̀ dò fé ká. Kɛɛ Wálà e lee kɛ gɔ̃ lɛ̀ dò ká.

⁹ Ɛ́ɛ̃́ zeĩ́, Wálà lɛ̀ɛ́ gbaa gɔ̃ kɛ lee mɔ́ɔ̀ wɔ̃̀ mɔ̀. Kɛɛ e lee kɛ gɔ̃ mɔ́ɔ̀ wɔ̃̀ mɔ̀.

¹⁰ À mɔ́ɔ̀ wɔ̃̀ mɔ̀ɔ, lɛ lee mɔ̀ kɛ é sɔ káá e wũ là kɛ á zɔ̃̀ɔ̃̀ kélɛ̀ à dɛ̃ zì yíkɛ̀ gáàa lɛ à là, Wálà zì vɔ-mìàa wɛ̃́ĩ̀.

¹¹ É kɛ bɛ̃̀ɛ̃ kília, lee lɛ̀ɛ́ e zò dɔ e dìè mɔ̀ yé gɔ̃ lɛ ɓea ká, ɛ̃́ɛ̃́ gɔ̃ lɛ̀ɛ́ e zò dɔ e dìè mɔ̀ yé lee lɛ ɓea ká tò ko Dàa-mì píé yí zàá.

¹² Ƃii zi nɔ́ o lee kɛá gɔ̃ lɛ̀ dò káa, zi nɔ́ doóa lɛ́ nɔ́ lee è gɔ̃ yeáa. Ɛ́ɛ̃́ pɛ séĩ́ lɛ́ɛ̀ go Wálà kɛ̀lɛ̀.

¹³ Kà à yí gɛ̃̀ ka dìè lɛ̀ɛ. Káà yí dɔ lɛ wɔ̃́ kpeĩ ká kɛɛ lee é sɛ̀nɛ ɓo Wálà lɛ̀ɛ mia nyìɛ mɔ̀ yé sɔ káà wá à wũ làa ká?

¹⁴ Ḿ gɔ̃̀, à dàà lɛ mia ɓéèe zì yɛ́lɛ́-táá yí kélɛ̀ yé gɔ̃ wĩĩ́-wũ̀ aà kɛ gbèkènia, lɛ wɔ̃́ yɛ́lɛ̀ zɛ̀ ká à mɔ̀?

¹⁵ Kɛɛ yé lee wĩĩ́-wũ̀ aà kɛ gbèĩa, ḿ gɔ̃̀ lɛ tɔ́-ɓɔ ká à lɛ̀ɛ? Ƃii wũà kɛ̀ìa nɔɔ̀ lɛ à lɛ̀ɛ kàà-à-wũ-là pɛ̀ ká.

¹⁶ Kɛɛ yé mi dò aà naa é tèé dàa, è à yí dɔ kélɛ̀ é kɛ bɛ̃̀ɛ̃ ko ká, ɛ̃́ɛ̃́ Wálà-mìà lɛ́ o lɛ̀ séĩ́ mɔ̀ɔ, ko zì wɔ̃́ kɛ-kɔ̀ gbɛɛ wá ɓe.

Ko Dàa-mì zì léɓèlè

¹⁷ Kɛɛ wɔ̃́ lɛ́ m nupìà à gèeè ka lɛ̀ɛ, m̀ḿ ka tɛ̀nɛ à gèeè yí. Ƃii ka zì pà-kíe-mɔ̀ɔ wɔ̃́ yɔɔ lɛ́ e kɛ à kɛpìàa, diè lɛ à yiè là.

¹⁸ Wɔ̃́ bèĩzɛ̀ m̀ lo à gèeèa gɛ̃̀ e ké. Ḿm̀ à ma kélɛ̀ yé mia lɛ́ ka Wálà-mìà káa, kaà pá ka kíe mɔ̀ɔ, ka yí gìniì lɛ. Ɛ́ɛ̃́ ḿm̀ à lɛ̀ dò gɛ̃̀ wánà ká.

¹⁹ Lɛ à mɔ̀ kɛ ka yɛ́lɛ́-táá-kɔ̀ é kɛ gbɛɛ̀ gbɛɛ kɛ́ kà ɓo ka kíe bàa ká, kɛɛ mia yé o zì lɛ kpeĩ ka bàa, kɛ ó o gɛ̃̀.

²⁰ Yé kaà pá ka kíe mɔ̀ɔ, ka lóò wá yi kɛɛ ká ko Dàa-mì zì léɓèlèa ɓèlè.

²¹ Ƃii yé kaà kɛ pɛ ɓèlèpìàa, mia séĩ́ óò o yɛ́lɛ́ kɛ̀ o líé, wáà o zì léɓèlè lɛ́ ò ɓèlèa ɓèlè o tɔ̀ là doò do. Tó áà kɛ̀ mia gbṹũ̀ wáà tò lɔ̀ɔ ká, yé mia dò bɛ̃̀ɛ̃ nyìɛ là lɛ nìɛ̀pìàa ká.

²² Yée. Ka píé kɛ́ì wá ɓe kɛɛ ká ka lé ɓèlè ɛ̃́ɛ̃́ káà mi-pɛ̀ mì yi? Ɛ́ɛ̃́ káà nàà ka nyìɛ é fɔ̃́ Wálà-mìà yí, tó káà yɛ́lɛ̀ kpɔ̀ mia lɛ́ pɛ wá o kɛ̀lɛ̀ɛ là? Mɛ́ m̀ bɛ̀i à mɔ̀ ḿ gèe ka lɛ̀ɛ wɔ̃́ sùua wɛ̃́ĩ̀? Lɛ m mɔ̀ ḿ ka tɛ̀nɛ? Gbàaò. M̀ḿ ló à kɛɛ̀ kíli.

²³ Ƃii wɔ̃́ kɛ-kɔ̀ lɛ́ maà à zɔ̃̀ɔ̃̀ ka lɛ̀ɛ, ye lɛ́ e tɔ́ wɔ̃́ lɛ́ ma sɔ̀lɔ̀ ɓo ko Dàa-mì kɛ̀lɛ̀ɛ. Lɛ́ e kélɛ̀, ko Dàa-mì Zízɛ̀, bĩ́míà lɛ́ o à lé gó à káa, e belè sí,

²⁴ e Wálà zúo ɓo, a kpuú yɛ́ kélé kélé, áà gèè weeá kélɛ̀, “M gbĩ-kpàla lɛ́ e ka mɔ́ɔ̀ wɔ̃̀ mɔ̀ɔ, gɛ̃̀ e ké. Kà wɔ̃́ e kéa kɛ, kɛɛ ka zò é vùò m mɔ́ɔ̀ wɔ̃̀ ká.”

²⁵ Zi nɔ́ doóa káa, lɛ̀ o nyɛ pɛ ɓèlè mɔ̀ɔ, e kɔ́pòa sí, áà gèè weeá kélɛ̀, “Kɔ́pò e kéa lɛ́ e Wálà zì wè-dɔ-wè dɛɛ lɛ́ m léà lɛ à wɛ́lɛ́ káa káa. Lúó séĩ́ lɛ́ kà lo à miì à káa, kà kɛ kɛɛ ka zò é vùò m mɔ́ɔ̀ wɔ̃̀ ká.”

²⁶ Kɛɛ ko Dàa-mì é tĩã́ nuùa, káà à ga-wɔ̃̀ gèe lòũ̀ ká lúó nɔ́ɔ fé lɛ́ kà belè e kéa ɓèlè, ɛ̃́ɛ̃́ lɛ́ kà pɛ mi kɔ́pò e kéa yía káa ká.

²⁷ Lɛ̀ lɛ kília, yé mi nɔ́ɔ fé aà ko Dàa-mì là belèa ɓèlè, ɛ̃́ɛ̃́ aà pɛ mi là kɔ́pòa yí zi lɛ́ ye wá à ɓɛ̀lɛyà zì píéa káa, kɛɛ mɛ̀ĩ́-sà aà káá à wĩĩ́. Ƃii aà wɔ̃́ yɔɔ kɛ ko Dàa-mì gbĩ-kpàla wà à zì léà gbĩ mɔ̀.

²⁸ Kɛɛ lɛ sɛ̀ mia séĩ́ ó lɛ̀ gɛ̃̀ o dìè là, wáà belè e kília ɓèlè, ɛ̃́ɛ̃́ wáà pɛ mì kɔ́pò e kília yí.

²⁹ Ƃii yé mi nɔ́ɔ fé lɛ̀ɛ́ ko Dàa-mì gbĩ-kpàlaa mɔ́ɔ̀ wɔ̃̀ yí ma yé aà belèa ɓèlè, ɛ̃́ɛ̃́ lɛ́ aà pɛ mi kɔ́pòa yía, lɛ́ɛ̀ nu mɛ̀ĩ́-sà dɔ̀ e dìè mɔ̀ ká, yé aà belèa ɓèlè ɛ̃́ɛ̃́ lɛ́ aà pɛ́ɛ mia ká.

³⁰ Pɛ́ è kɛ̀ lɛ́ ka búnùzɛ̀ ka kɔ̃́ṹ-kɔ̃̀ũ̀, ɛ̃́ɛ̃́ ka dò yí áà gà, ɛ̃́ɛ̃́ ka dò bɛ̃̀ɛ̃ káà gàa lɛ́ ɓɛ.

³¹ Kɛɛ è kɛ̀á kóò ko dìè mɛ́ nyɛ bèĩzɛ̀ɛ, Wálà lɛ̀ɛ́ gɔ̃̀ mɛ̀ĩ́-sà dɔɔ̀ ko mɔ̀.

³² Kɛɛ ko Dàa-mì lɛ́ɛ̀ mɛ̀ĩ́-sà dɔ ko mɔ̀, ɛ̃́ɛ̃́ áà ko kũ̀ gágà, kɛɛ mɛ̀ĩ́-sà lɛ́ è lo káà kpóṹ là zèe mìà wĩĩ́a, yékɛ̀ é káá ko bɛ̃̀ɛ̃ ko wĩĩ́.

³³ M lèe-gé vɔ̀, à mɔ́ɔ̀ wɔ̃̀ mɔ̀ɔ, yé kaà pá ka kíe mɔ̀ ká ko Dàa-mì zì léɓèlèa ɓèlèa, kà dɔ ka kíe nì gɛ̀nɛ̀.

³⁴ Lɔ̀ɔ é kɛ̀á mi dò kɛpìàa, è pɛ ɓèlè e píé kɛ́ì, kɛɛ ka zì pà-ka-kíe mɔ̀ɔ, yékɛ̀ é nu mɛ̀ĩ́-sà dɔ̀ ka mɔ̀ ká tã́ã̀. Wɔ̃́ yé e tóa, ḿ nùáa, ḿm̀ lo à yí bɛ̀iì.