1 Kɔ̀léĩ́tĩ̀ã̀ 10 - Wè-dɔ-wè Dɛɛ

Lìè-wè lɛ́ à gbɛ̃̀ɛ̃̀ lɛ kɛ̀ɛ̀-wɛ́lɛ́ mɔ̀ɔ

¹ M lèe-gé vɔ̀, ḿm̀ nàà ka zò é vùò wɔ̃́ lɛ́ e kɛ ko dàa ye dàà nì lɛ́ o tó Móózè píéa, mɔ́ɔ̀ wɔ̃̀ ká. O séĩ́ o kɛ lúé-lúé wì, ɛ̃́ɛ̃́ o séĩ́ o Mɛ̀ĩ́ Zóló kã́ nyìɛ́-sɛ́lɛ́ là ɓɔ̀ɔ mɔ̀.

² O kɛ lɛ̀ pɛ lɛ́ o séĩ́-séĩ́ bàtáì kɛɛ̀ e kɛá lúé-lúéa yí, ɛ̃́ɛ̃́ mɛ̀ĩ́a bà, ɛ̃́ɛ̃́ o kɛ̀ Móózè là mia nì káa, lé e pa gbaa.

³ O séĩ́ o Wálà kɛ belè nɔ́ doóa ɓèlè.

⁴ Ɛ́ɛ̃́ o séĩ́ o Wálà kɛ yíí nɔ́ doóa mi. Yíí lɛ́ wa mia, e gó Wálà kɛ gɛ̀lɛ̀ lɛ́ wà ye nì o kɛ lópìà, ɛ̃́ɛ̃́ lɛ́ e kélɛ̀ Kɛ́lɛ̀ìa yí.

⁵ É kɛ bɛ̃̀ɛ̃ kília, Wálà zò lɛ̀ɛ́ gbaa kɛ e dàaà ká o búnùzɛ̀ o píé. À mɔ́ɔ̀ wɔ̃̀ mɔ̀ɔ, o bílí wɛ̃̀ĩĩ̀ e kɛ à ká yɛ̀í là píé.

⁶ Wɔ̃́ nì lɛ́ e kéa lɛ wɔ̃́ gɔ̃̀á ká ko lɛ̀ɛ, kɛ é lìè-wè dɔ ko lɛ̀ɛ, yékɛ̀ wɔ̃́ yɔɔ lɔ̀ é kɛ ko mɔ̀ lɛ̀ zí e kɛ à ká o mɔ̀ɔ lɛ́ ɓe.

⁷ Yékɛ̀ ká gbini kɛ̀ɛ̀-wɛ́lɛ́ lɛ̀ɛ, lɛ̀ zí o dò o kɛ à kɛpìà káa lɛ́ ɓe. Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Míáa o yà tã́ã̀ ó pɛ ɓèlè, ɛ̃́ɛ̃́ ó mi-pɛ̀ mi, ɛ̃́ɛ̃́ o wɛ̀lɛ̀ ó dɔ ó tã́ kɛ.”

⁸ Yékɛ̀ kó sɔ̃̀ɔ̃ yɔɔ lɛ́ à gbɛ̃̀ɛ̃̀ lɛ kɛ̀-lee-píé-wɔ̃̀ mɔ̀ɔ kɛ, lɛ̀ zí o dò o kɛ à kɛpìà káa lɛ́ ɓe. Ɛ́ɛ̃́ o wáá vũ̀ pèèlɛ wɛ́lɛ́ yààka o káá tã́ã̀ o bílí ká lúó doó ká.

⁹ Yékɛ̀ kó ko Dàa-mì yí dã́, lɛ̀ zí o dò o kɛ à kɛpìà káa lɛ́ ɓe. Mɛ̀nɛ e o zɛ.

¹⁰ Yékɛ̀ ká ka wè kpɔ́ lɛ̀ zí o dò o kɛ à kɛpìà káa lɛ́ ɓe. Pɛ-yí-sìè-mì lɛ́ e o yí sìèa.

¹¹ Wɔ̃́ nì lɛ́ è kɛ̀ o ká kília, e kɛ o ká kɛ é kɛ wɔ̃́ gɔ̃̀á ká mia lɛ̀ɛ ɛ̃́ɛ̃́ zeĩ́, à bɛ̃̀ɛ̃ɛ̃̀ e kɛ lìè-wè ká ko lɛ̀ɛ. Ƃii ko ɓe yé lúó líé-nyɛ-mɔ̀ lɛ kɛpìà é nua ká.

¹² Mi lɛ́ à gɛ̃̀ kélɛ̀ lɛ dɔ̀á e gã̀ mɔ̀ɔ, è e yɛ́lɛ́ kɛ e dìè píé, yékɛ̀ é pèlè.

¹³ Yí-dã́-wɔ̃̀ nɔ́ɔ fé lɛ́ aà ɓɔ ka mɔ̀ɔ, lɛ́ nɔ́ è ɓɔ kpá mia séĩ́ làa. Kɛɛ Wálà lɛ zò-dɔ̀à-mɔ̀ zɛ̀. Ɛ́ɛ̃́ lɛ̀ɛ́ ló à tóò kɛɛ yí-dã́-wɔ̃̀ lɛ́ à diè lɛ ka zì yíkɛ̀ gáàa làa, kɛ é ɓɔ ka là. Lúó lɛ́ yí-dã́-wɔ̃̀ è nuá ka píéa, Wálà lɛ́ɛ̀ lo zi kɛɛ̀ ka lɛ̀ɛ ɓe kɛɛ ká gó à gɛ̀nɛ̀, kɛɛ bɛ̀i é kɛ ka mɔ̀ yékɛ̀ ká gó ka dɔ̀lɔ̀ mɔ̀.

¹⁴ M̀ lɔ̀-kɛ̀á-mìà, à mɔ́ɔ̀ wɔ̃̀ mɔ̀ɔ, kà ka yí ɓo gbìnì kɛ̀ɛ̀-wɛ́lɛ́ lɛ̀ɛ wɔ̃̀ mɔ̀.

¹⁵ Ḿm̀ mɛ́ĩ́ ɓo ka lɛ̀ɛ ka kɛ̀ mia gí kã́ã̀a zɛ̀ káa wɛ̃́ĩ̀. Kà wɔ̃́ lɛ́ m̀ gèea yí gɛ̃̀ ka dìè lɛ̀ɛ.

¹⁶ Kɔ́pò lɛ́ lúà kpɔ́ɔ̀ lɛ à mɔ̀, lɛ́ kò mɔ́ɔ̀ Wálà zúo ɓoa, ḿ gɔ̃̀, kɛɛ kò Kɛ́lɛ̀ì nì ko dɔpìà à zì léàa yí, yé kɔaà pɛ mi kɔ́pò e kília yía ká? Ɛ́ɛ̃́ belè lɛ́ kò à yɛɛ, ḿ gɔ̃̀, kɛɛ kò Kɛ́lɛ̀ì nì ko dɔpìà à zì gbĩ-kpàlaa yí yé kɔaà ɓèlèa ká?

¹⁷ Ƃii belèa zì kɛ̀ pɛ doó káa, à mɔ́ɔ̀ ko séĩ́-séĩ́ ko gbĩ-kpàla doó ká, yé bɛ̃̀ɛ̃ ko kù lɛ gbùòa ká. Ƃii ko séĩ́-séĩ́ ko belè-kpo doóa yí gìnì ko kíe nì mɔ̀.

¹⁸ Kà ka yɛ́lɛ́ táá Éézɛ̀lɛ̀-mìà mɔ́ɔ̀ wɔ̃̀ yí. Mia lɛ́ ò pɛ lɛ́ ò sálà ɓo à káa ɓèlèa, wà sálà-ɓòà-là-pɛ̀ɛ zì yɛɓo lɛ́ à kɛ̀ Wálà lɛ̀ɛ, wà ye nì óò dɔ à yí.

¹⁹ Wɔ̃́ m̀ gèea yí lɛ́ mɛɛá? À yí lɛ́ e kélɛ̀ kɛ̀ɛ̀-wɛ́lɛ́, ɛ̃́ɛ̃́ léɓèlè lɛ́ ò à kóná ɓo kɛ̀ɛ̀-wɛ́lɛ́ mɔ̀ɔ, o pɛ-kɛ̀á-pɛ̀ ká?

²⁰ Gbàaò. Wɔ̃́ m̀ gèea ye lɛ́ e kélɛ̀, pɛ lɛ́ mia lɛ́ òó Wálà dɔɔ ò sálà ɓo à káa, òó sálà ɓo à ká Wálà mɔ̀. Kɛɛ pɛ yɔɔ lɛ́ ò sálà e kília ɓo à mɔ̀ɔ. M̀ḿ naa kɛ kà pɛ yɔɔ vɔ̀ ká kɛ à yí doó.

²¹ Kàá bɛ̀i à mɔ̀ kɛɛ ká kɛ pɛ mipìà ko Dàa-mì là kɔ́pòa yí, kɛɛ káà pɛ mì zeĩ́ pɛ yɔɔ zì kɔ́pò yí. Kàá bɛ̀i à mɔ̀ ká kɛ pɛ ɓèlèpìà ko Dàa-mì là téɓò mɔ̀, tó káà pɛ ɓèlè zeĩ́ pɛ yɔɔ zì téɓò mɔ̀ nɔ́ kíli.

²² Lɛ ko mɔ̀ kɛɛ kó à kɛ ko Dàa-mì é dàa-gbe-là kɛ ko ká? Kɔ́áà yí dɔ kélɛ̀ kɔa yí lɛ gágà é diá à là?

²³ Yíkɛ̀ gáàa lɛ mia kɛ̀lɛ̀ kɛɛ ó wɔ̃́ nɔ́ɔ fé kɛ. Lɛ kíli, kɛɛ pɛ séĩ́ lɛ̀ɛ́ gbũ mia mɔ̀. Yíkɛ̀ gáàa lɛ mia kɛ̀lɛ̀ kɛɛ ó wɔ̃́ nɔ́ɔ fé kɛ wánà ká, kɛɛ pɛ séĩ́ lɛ̀ɛ́ mia mɛ́ kɛ gágà.

²⁴ Yékɛ̀ mi nɔ́ɔ fé é e yɛ́lɛ́ kɛ e dìè mɔ́ɔ̀ wɔ̃̀ yí, kɛɛ à yɛ́lɛ́ è kɛ e ɓɛ́ĩ̀ gbɛɛ mɔ́ɔ̀ wɔ̃̀ yí.

²⁵ Wìì nɔ́ ò à lɔ̀ɔ̀ dɔ wìì-lɔ̀ɔ̀-dɔpìàa, kà à ɓèlè, yékɛ̀ ká wɛ̃́ĩ́-lɔ̀ɔ gbɛɛ kɛ à mɔ̀ ka zì zò gíkã́ zò-dà-wɔ̃̀ kɛɛ̀ mɔ́ɔ̀ wɔ̃̀ mɔ̀.

²⁶ Ƃii kpóṹ là zèe wà pɔɔ̀ séĩ́ lɛ́ e kpóṹ là zèea, lɛ ko Dàa-mì là pɛ ká.

²⁷ Yé mi lɛ́ ye wá Wálà mi káa aà ka súo kɛ léɓèlè mɔ̀, lɛ́ lò-yi-lɔ̀ lɛ ka mɔ̀ɔ ká lòá yia, pɛ nɔ́ ò lo à yàà ka líéa kà ɓèlè, yékɛ̀ ká wɛ̃́ĩ́-lɔ̀ɔ gbɛɛ kɛ à mɔ̀ ka zì zò gíkã́ zò-dà-wɔ̃̀ kɛɛ̀ mɔ́ɔ̀ wɔ̃̀ mɔ̀.

²⁸ Kɛɛ yé mi dò aà gèe ka lɛ̀ɛ kélɛ̀, “Léɓèlèa wa kóná ɓo kɛ̀ɛ̀-wɛ́lɛ́ mɔ̀ɔ,” yékɛ̀ ká léɓèlè e kília ɓèlè, mi lɛ́ e à gèe ka lɛ̀ɛ, ɛ̃́ɛ̃́ zò gíkã́ mɔ́ɔ̀ wɔ̃̀ mɔ̀.

²⁹ Kɛɛ ye wá ka zì zò gíkã́ ká, kɛɛ mí e kília lɛ́ à zì zò gíkã́ lɛɛ. Mɛ́ e kɛ lɛ́ m zì yíkɛ̀ gáàa lɛ́ lɛ m kɛ̀lɛ̀ ḿ pɛ ɓèlè à káa, mi gbɛɛ bɛ̃̀ɛ̃ zì zò gíkã́ è bɛ̀i à mɔ̀ é à tèá?

³⁰ Yé maà Wálà zúo ɓo m̀ léɓèlè wɛ̃́ĩ̀a, mɛ́ e kɛ lɛ́ mi dò è m tɔ́ yɔɔ gèe pɛ lɛ́ m zúo ɓo kɛ à wɛ̃́ĩ̀a mɔ́ɔ̀ wɔ̃̀ mɔ̀?

³¹ À mɔ́ɔ̀ wɔ̃̀ mɔ̀ɔ, ká pɛ ɓèlè ɛ̃́ɛ̃́ ká pɛ mìá bɛ̃̀ɛ̃, ɛ̃́ɛ̃́ ká wɔ̃́ nɔ́ɔ fé kɛ bɛ̃̀ɛ̃, kà à kɛ kɛɛ Wálà tɔ́ é ɓɔ.

³² Yékɛ̀ ká wɔ̃́ lɛ́ è lo Zúù-mìà, ɛ̃́ɛ̃́ sɛ́lɛ́ gbɛɛ yí-mìà, e bɛ̀i Wálà-mìà kɛɛ̀ ó pèlèa, yékɛ̀ ká kɛ à kɛ-mìà ká.

³³ M dìè m zìa, ḿm̀ à kɛ-zì nàà kɛ ḿ mia séĩ́ zò-dà-wɔ̃̀ kɛ m zì wɔ̃́ kɛɛ̀ séĩ́ yí. Ma wá wɔ̃́ kɛpìà m dìè-tĩ́ m̀ wɔ̃́ yiè gɛ̃̀ɛ̃ɛ̃̀ wɛ̃́ĩ̀. Kɛɛ ḿm̀ kɛ̀ mia búnùzɛ̀ zì wɔ̃́ yiè gɛ̃̀ɛ̃ɛ̃̀ wɛ̃́ĩ̀, kɛɛ ó la-ɓo sɔ̀lɔ̀ ɓo.