1 Kɔ̀léĩ́tĩ̀ã̀ 1 - Wè-dɔ-wè Dɛɛ

¹ Óò m si Pɔ́ɔ̀. M Kɛ́lɛ̀ì Zízɛ̀ là àpɔ́sɔ̀lɔ̀ ká, ɓii Wálà a naa ḿ kɛáa mɔ́ɔ̀ wɔ̃̀ mɔ̀. Ɛ́ɛ̃́ aà m súo kɛ, kɛ ḿ kɛ à ká. Kò m ɓɛ́ɛ ye-mì lɛ́ ò si Sɔ́sénìa,

² kóò wèè Wálà-mìà lɛ́ ka Kɔ́lèĩ̀a bà. Ka Wálà là pɛ ká kà Kɛ́lɛ̀ì Zízɛ̀ nì ka kɛ̀ doó yí zàá. Wálà aà ka súo kɛ ká kɛ là mia nì ká. Mia séĩ́ lɛ́ o lɛ̀ séĩ́ mɔ̀, lɛ́ ò ko Dàa-mì Zízɛ̀ Kɛ́lɛ̀ì tɔ́ súo kɛ̀ɛ, aà kà ye nì ka súo kɛ e kíe là. Kɛ́lɛ̀ì lɛ o Dàa-mì ká, lɛ̀ zí lɛ à ká ko Dàa-mì káa, lɛ́ ɓe.

³ Kɔa Dàa Wálà wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

Wálà zì nɔ̀-mia-lɛ̀ɛ-pɛ̀ lɛ́ à kpɔ́ɔ̀ lɛ Kɛ́lɛ̀ì kɔ̀ yí zàáa

⁴ Ḿm̀ m̀ Wálà zúo gèe teele ka mɔ́ɔ̀ wɔ̃̀ mɔ̀. À zì zò-kɛ̀-sɛ̀ lɛ́ lɛ à ká ka píé Kɛ́lɛ̀ì Zízɛ̀ kɔ̀ yí zàáa, lɛ́ m̀ mɔ́ɔ̀ à zúo ɓoa.

⁵ Kà Kɛ́lɛ̀ì nì ka kɛ̀ doó yía, kaà kɛ gbaa kpànazɛ̀ zi nɔ́ɔ fé ká, é ló é gbɛ̃̀á ka zì mɛ́ĩ́-ɓo-kɔ̀ séĩ́, ɛ̃́ɛ̃́ ka zì wɔ̃́ yí-dɔ-kɔ̀ séĩ́ mɔ̀.

⁶ Kélá-wè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, à yàlà kṹũ̀ lɛ dóo ka yí kpó-kpó ɓo.

⁷ Ɛ́ɛ̃́ láà kɛ̀ lɛ̀ lɛ́ ka tĩã́ yàá lúó lɛ́ ko Dàa-mì Zízɛ̀ Kɛ́lɛ̀ì è lo e dìè zɔ̃̀ɔ̃̀áa gɛ̀nɛ̀ɛ, kàá kɔ̃́ do Wálà là nɔ̀-lɛ̀ɛ-pɛ̀ nɔ́ɔ fé yí ká.

⁸ Ɛ́ɛ̃́ zeĩ́a, Kɛ́lɛ̀ì lɛ́ɛ̀ lo ka mɛ́ kɛɛ̀ gágà é tóá kíli é ɓɔá lúó léĩ́-tó-lùò mɔ̀, kɛɛ yékɛ̀ wɔ̃́ gbɛɛ é kɛ ka mɔ̀ ko Dàa-mì Zízɛ̀ Kɛ́lɛ̀ì zì Lúó ká.

⁹ Wálà lɛ zò-dɔ̀à-mɔ̀ mì ká. À ye lɛ́ e i súo kɛ, kɛ kà à Gbe Zízɛ̀ Kɛ́lɛ̀ì lɛ́ e ko Dàa-mì káa, kà ye nì ká tàà-kíe-píé kɛɛ.

Mia fĩ̀ã̀-ɓo-wɔ̃̀ lɛ́ e Wálà-mìà fĩ̀ã̀a

¹⁰ M lèe-gé vɔ̀, kà kpé lɛ sɛ̀, ko Dàa-mì Zízɛ̀ Kɛ́lɛ̀ì tɔ́ yí. Ka séĩ́ ka wúú è tó doó wɔ̃́ lɛ́ kà gèea yí, yékɛ̀ mia fĩ̀ã̀ ɓoò é dà ka fĩ̀ã̀. Kà kɛ dóo kpó-kpó ɓo mia doó ká, kɛɛ ka zì yɛ́lɛ́-táá wà ka zì yɛ́lɛ́-tàà-yí-wɔ̃̀ é kɛ doó.

¹¹ M lèe-gé vɔ̀, Kólóè là mia dò waà wɔ̃́ gã̀ dɔ m lɛ̀ɛ zèe kélɛ̀ mia dò o o kíe kṹpìà ka bà.

¹² Wɔ̃́ lɛ́ m̀ gèea gɛ̃̀ e ké. Míá ka kéa, ka lé-wè lɛ doò do nɔ́ séĩ́ le. Mi dò láà gèe, “M Pɔ́ɔ̀ là mi ká.” Mi dò bɛ̃̀ɛ̃ áà gèè, “M Àpɔ́lɔ̀ là mi ká.” Mi dò bɛ̃̀ɛ̃ áà gèè zeĩ́, “Ma yee m Pílɛ̀ là mi ká.” Ɛ́ɛ̃́ mi dò bɛ̃̀ɛ̃ áà gèè, “M Kɛ́lɛ̀ì là mi ká.”

¹³ Kéa, Kɛ́lɛ̀ì fĩ̀ã̀ ɓoò lɛ kàáà? Kéa, ma Pɔ́ɔ̀ lɛ́ o m pá nélè ká kɔ́lɔ́sì mɔ̀ ka mɔ́ɔ̀ wɔ̃̀ mɔ̀ɔ? Ɛ́ɛ̃́ o ka bàtáì kɛ ma Pɔ́ɔ̀ m tɔ́ yí?

¹⁴ M̀ḿ gbaa míá ka kéa ka dò nɔ́ɔ fé bàtáì kɛ, é kã́ Kílísípà wà Géyà o mɔ̀ɔ ká. Ḿm̀ Wálà zúo ɓo à mɔ́ɔ̀ wɔ̃̀ mɔ̀.

¹⁵ Lɛ̀ lɛ kília, mi gbɛɛ lɛ̀ɛ́ bɛ̀i à gèeè kélɛ̀ ka bàtáì kɛɛ̀ lɛ m tɔ́ yí.

¹⁶ (Ɛ́ɛ̃́ zeĩ́a, m Sɛ́fínà wà e kɛ̀ì-mìà bàtáì kɛ. M̀ḿ à yí dɔ kélɛ̀ m mi gbɛɛ bàtáì kɛ é kã́ o mɔ̀ɔ ká.)

¹⁷ Kɛ́lɛ̀ì lɛ̀ɛ́ gbaa m vɔ kɛ ḿ mia bàtáì kɛ. Kɛɛ e m vɔ kɛ ḿ wɔ̃́ làṹ yièa gèe. Ye wá kélɛ̀ ḿ à gèe mia ɓéèe zì wéé gí kã́ã̀a zɛ̀ ká, yékɛ̀ Kɛ́lɛ̀ì zì gá a ɓo kɔ́lɔ́sì mɔ̀ɔ é kɛ wɔ̃́ dà tã́ã̀ zɛ̀ ká.

Kɛ́lɛ̀ì lɛ ko lɛ̀ɛ Wálà zì yíkɛ̀ gáàa wà à zì gíkã́ ká

¹⁸ Ƃii wɔ̃́ lɛ́ ò gèe lɛ́ à gbɛ̃̀ɛ̃̀ lɛ Kɛ́lɛ̀ì zì gá a ɓo kɔ́lɔ́sì mɔ̀ɔ mɔ̀ɔ, lɛ wɔ̃́ yí gíniìa zɛ̀ ká mia lɛ́ o gínipìàa lɛ̀ɛ. Kɛɛ mia lɛ́ ko lapìàa, wɔ̃́ e kília lɛ Wálà zì yíkɛ̀ gáàa lɛ̀ ká ko lɛ̀ɛ.

¹⁹ À bɛ̃̀ɛ̃ɛ̃̀ lɛ Wálà là kíía yí kélɛ̀, “Ḿm̀ lo mia lɛ́ o gí kã́ã̀ lɛɛ o zì gíkã́ e kília yí sìè. Ɛ́ɛ̃́ ḿm̀ lo mia lɛ́ o wũ-kèlè yí lɛ sɛ̀ɛ o zì wɔ̃́ yí-ma-kɔ̀ wɔ̃̀ dàà m kɔ̀ mɛ̀ĩ́.”

²⁰ Mɛ́ɛ̀ zàá kpó-kpó lɛ́ mia gí kã́ã̀ zɛ̀ɛ o yí? Wálà kii-dɔ-mìàa o mɛ́ɛ̀ zàá? Ɛ́ɛ̃́ mia lɛ́ o tèé-dà-mìà ká kpóṹ e kéa làa, o dóo mɛ́? Wálà aà kpóṹ là zèe gíkã́ kɛ wɔ̃́ yí gíniìa zɛ̀ ká.

²¹ Ƃii Wálà zì gíkã́ a kɛ, bɛ̀i wá kpóṹ là zèe mìà mɔ̀ ó à dɔ o zì gíkã́ kolo là zàá. Kɛɛ Wálà yee gé lɛ́ɛ̀ li é mia lɛ́ zò-dɔ̀à-mɔ̀ lɛ o yía la, wɔ̃́ yí gíniìa zɛ̀ lɛ́ kò gèe o lɛ̀ɛ lòũ̀ káa kolo là.

²² Zúù-mìà óò nàà lé-pa-wɔ̃̀ gɛ̃̀ɛ̃ɛ̃̀ ká, tó Gílíì-mìà wáà nàà wɔ̃́ gí kã́ã̀a zɛ̀ ká.

²³ Kɛɛ ko bɛ̃̀ɛ̃ kóò Kɛ́lɛ̀ì wà ga lɛ́ a ɓo kɔ́lɔ́sì mɔ̀ɔ wɔ̃̀ gèe lòũ̀ ká. Wɔ̃́ e kéa lɛ Zúù-mìà zì sã́-gɛ̀lɛ̀-kpùlù ká. Ɛ́ɛ̃́ lɛ wɔ̃́ yí gíniìa zɛ̀ ká sɛ́lɛ́ gbɛɛ yí-mìà lɛ̀ɛ.

²⁴ Kɛɛ mia lɛ́ Wálà aà o súo kɛɛ, ó kɛ bɛ̃̀ɛ̃ Zúù-mìà ɛ̃́ɛ̃́ sɛ́lɛ́ gbɛɛ yí-mìà káa, Kɛ́lɛ̀ì lɛ o lɛ̀ɛ Wálà là yíkɛ̀ gáàa wà là gíkã́ ká.

²⁵ Ƃii Wálà zì yí-gíni-kɔ̀ɔ lɛ gí kã́ã̀a zɛ̀, é diá mia ɓéèe zì gíkã́ là. Ɛ́ɛ̃́ Wálà zì yí-ga-kɔ̀ɔ lɛ gágà, é diá mia ɓéèe zì yíkɛ̀-gágà-kɔ̀ là.

²⁶ M lèe-gé vɔ̀, kà ka yɛ́lɛ́ táá zi lɛ́ ka kɛá lɛ́ Wálà e ka súo kɛɛ yí. Ka gí kã́ã̀a zɛ̀ lɛ̀ɛ́ gbaa kɛ búnù kpóṹ là mìà zì yɛ́lɛ́-táá yí zàá. Ɛ́ɛ̃́ ka búnùzɛ̀ kàá gbaa kɛ mia tɔ́ zɛ̀ ká. E bɛ̀i, ka búnùzɛ̀ kàá gbaa kɛ mia kpànazɛ̀ sùu ká.

²⁷ Kɛɛ Wálà e wɔ̃́ lɛ́ kpóṹ là mìà ò si wɔ̃́ yí gíniìa zɛ̀ɛ sí, kɛ é yɛ́lɛ̀ kpɔ́ à ká mia gí kã́ã̀a zɛ̀ là. Ɛ́ɛ̃́ e pɛ lɛ́ kpóṹ là mìà ò à si pɛ yí gaàa zɛ̀ɛ sí, kɛ é yɛ́lɛ̀ kpɔ́ à ká à yé lɛ́ à yí lɛ gáàa là.

²⁸ Ɛ́ɛ̃́ Wálà e pɛ lɛ́ kpóṹ là mìà ò si pɛ yéĩ̀zɛ̀, ɛ̃́ɛ̃́ pɛ lɛ́ o nyìɛ fɔ̃́ɔ̃̀ lɛ à yí, e bɛ̀i à ye lɛ́ òó à sí pɛɛ sí, é pɛ lɛ́ lɛ ɓea wɔ̃̀ kɛá fĩ́ĩ́-nyɛ zɛ̀.

²⁹ Wálà e wɔ̃́ e kéa kɛ kíli yékɛ̀ mi nɔ́ɔ fé é lé-gbùò-là kɛ à wɛlɛ mɔ̀.

³⁰ Kɛɛ Wálà aà kà Kɛ́lɛ̀ì Zízɛ̀ nì ka kɛ doó. Ɛ́ɛ̃́ Wálà aà Kɛ́lɛ̀ì kɛ ko zì gíkã́ ká. À ye lɛ́ a kɛ lɛ́ ko kɛ kpeĩ Wálà lɛ̀ɛ. Ɛ́ɛ̃́ zeĩ́a, e ko kɛ mia púlú ká Wálà lɛ̀ɛ. E bɛ̀i ko wũ mɛ́ ɓoò lɛ à kolo là zàá.

³¹ À mɔ́ɔ̀ wɔ̃̀ mɔ̀ɔ, “Mi lɛ́ è lé-gbùò-là kɛ̀ɛ, è à kɛ wɔ̃́ lɛ́ ko Dàa-mì aà kɛɛ là.” Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, ye lɛ́ ɓɛ.