Yuuba 9 - Mandinka Bible

Yuuba la Bilidadi jaaboo

¹ Bituŋ Yuuba naata jaabiroo ke ko:

² Tooñaa-tooñaa, ŋa a loŋ ne ko, ñiŋ kumoo mu tooñaa le ti. Bari hadamadiŋo si boloo noo Alla ma ñaadii le?

³ Moo niŋ a si ñoo saba noo ñaadii le? A si ñininkaari wuli kiliŋo ñininkaa noo, moo te hani kiliŋ ne jaabi noo la a ye.

⁴ Alla le mu sembetiyo ti, aniŋ ñaameŋo. Jumaa le nene ka balaŋ a ma, a ye a maarii wati?

⁵ Ate le si a noo, a ye konkoolu ñorindi, a maŋ sara dii. Aduŋ niŋ a kamfaata, a si a noo, a ye ì katiŋ-katiŋ ñoo kono.

⁶ Ate le si a noo, a ye bankoo jarajarandi. Samasiŋolu mennu ye a muta, bee ye jiijaa.

⁷ Ate le si a noo, a ye yaamaroo dii tiloo la, a kana finti, a ye looloolu bali, ì kana mala.

⁸ A doroŋ ne ye saŋo wanka duniyaa kunto, aduŋ ate le si baa baliŋolu semboo mara noo.

⁹ Ate le ye Siisee Dimbaa Looloo daa, Mfaalii Looloo, Sanjaani Benteŋo aniŋ looloolu mennu ka finti bulubaa kara maafaŋo la.

¹⁰ A la kuu baalu, a ka mennu ke, buka tara ǹ ye londaa to, aduŋ a la kaawakuwolu te yaatee noo la.

¹¹ Alla ka tambi n daala le, bari n te a je noo la. A ka tambi n na le, m maŋ a kalamuta.

¹² Jumaa le si Alla bali noo feŋo taa la, a lafita ka meŋ taa? Jumaa le si haañi ka a ñininkaa a la?

¹³ Alla buka sabari a la kamfaa kaŋ. Daafeŋ Rahabu maakoyilaalu, wolu faŋo ka mosimosi ate le koto.

¹⁴ Saayiŋ nte si Alla jaabi noo ñaadii le? M be kumakaŋolu bo la mintoo le, n niŋ a be ñoo saba la mennu la?

¹⁵ M be tooñaa kaŋ ñaa-wo-ñaa, n te m faŋ kanandi noo la. Nte si meŋ ke noo, wo le mu, ŋa balafaa ñini a bulu, ate meŋ mu kiitiikuntulaa ti.

¹⁶ Niŋ ŋa a samane, a ye n danku, n te laa la ñiŋ na ko, a be i lamoyi la m fokumoo la le.

¹⁷ A si n kasaara niŋ foño baa la, a ye n na dimoo lafaa, a te ke la daliila kaŋ ti.

¹⁸ N te n niijii noo la a bulu, a si naa n na baluwo bee kuniyandi m bulu.

¹⁹ Niŋ ŋa semboo tiliŋ a la, ate le semboo warata n ti. Niŋ n taata kiitiyo la karoo la, jumaa le be ate samane noo la?

²⁰ Hani niŋ a ye a tara m be tooñaa le kaŋ, m fokumoo le be m boyindi la. Hani niŋ m maŋ sootaari soto, ate le be n na boyoo yitandi la.

²¹ Sootaari te n na kuwo to ñaa-wo-ñaa, bari m maŋ ñaŋ noo m faŋ to. M pasita le ka tara baluwo to.

²² A bee mu kiliŋo le ti, wo le ye a tinna ñiŋ kumakaŋo bota n daa ko, “Alla ka moo tilindiŋolu niŋ moo kuruŋolu bee le kasaara.”

²³ Niŋ mantooroo boyita moo tilindiŋo kaŋ, kataba kiliŋ a faata, Alla ka a maarii ñaawali a la wo mantoora kuwo kaŋ ne.

²⁴ Alla ye duniyaa duŋ moo kuruŋolu le bulu. A ye kiitiikuntulaalu bee ñaalu finkindi. Niŋ Alla maŋ a ke, jumaa le ye a ke?

²⁵ M baluu tiloolu tambiñaa le tariyaata borilaa ti. Ì ka tambi le, m maŋ hani niidiyaa kuu kiliŋ soto ì kono.

²⁶ Ì ka tambi le ko kuluŋ tariŋo. Ì la hawusaroo* be tariyaariŋ ne komeŋ, niŋ seeliŋo be jii kaŋ a la deema suboo nooma.

²⁷ Tumoo doo n ka a kata le ka ñina n na bataa kuwolu la, ka n na niikuyaa faliŋ seewoo ti,

²⁸ bari n na bataa kuwo ka naa n silandi le, kaatu ŋa a je le ko, Alla ye m muta le komeŋ hani saayiŋ m maŋ tiliŋ.

²⁹ Baawo a ye nte muta le komeŋ m maŋ tiliŋ, wo to, nte ka m faŋ batandi muŋ ne la kotenke?

³⁰ Hani niŋ ŋa m baloo joosi saafunoo le la, ŋa m buloo kuu sooda la,

³¹ a si n ñori noo kono, hani n na duŋ feŋolu faŋo si ñewuŋ n na.

³² Alla maŋ ke hadamadiŋo ti, komeŋ nte be ñaameŋ teŋ. Nte te loo noo la m faŋ ye, n niŋ a ye taa kiitiyo la.

³³ Aduŋ teemafolaa te tara noo la ǹ teema, meŋ si kaŋo dii ka ǹ teemoo fo,

³⁴ fo meŋ si a tinna, a si i foño n jaraboo la, a kana n silandi kotenke.

³⁵ Wo to le n si diyaamu noo, n te sila la, bari kuwolu be m fee teŋ ñaameŋ, n te diyaamu noo la.