Yuuba 6 - Mandinka Bible

Yuuba la Elifasi jaaboo

¹ Bituŋ Yuuba ye jaabiroo ke ko:

² Ŋa a jiki, n na kamfaadaa ñanta peesa la le, ka a niŋ n na bataa kuwo bee laa peesarilaŋo kaŋ.

³ A be koyiriŋ ne ko, ate le be kuliyaa la bankumunkoo ti. Wo le ye a tinna n daakumoolu maŋ diyaa.

⁴ Alla Tallaa ye m buŋ a la kalabeñoolu le la. Ì kunoo dunta n jaatoo kono. Alla ye silaŋ kuwolu le randi n kamma.

⁵ Fo fali dalibaloo ka kuma le baŋ, niŋ a ye ñaamoo soto a ñaama, waraŋ fo ninsi senelaa ka kuma le baŋ, niŋ a ye domoroo soto a ñaama?

⁶ Jumaa le si domori koontaŋo domo noo, diyaa te meŋ bala? Muŋ diyaa le be siiseekili daajiyo bala?

⁷ M maŋ lafi ka a maa. Ñiŋ domori siifaa ka nte jusoo le maa.

⁸ M be ñaaniriŋ, ŋa Alla daani meŋ na, a ye a ke n ye, ŋa meŋ jiki, a ye a dii n na.

⁹ Muŋ ne ye a tinna Alla maŋ n teyiŋ-teyiŋ, a ye m bula, ŋa faa?

¹⁰ Wo le be ke la nte la dahaa ti. N si podiŋ-podiŋ seewoo kamma la, m be dimi jawoo kono ñaa-wo-ñaa, kaatu m maŋ Mansa Senuŋo la yaamaroolu soosoo.

¹¹ Nte ŋa muŋ sembe le soto ka tara baluwo to? Muŋ ne ye a tinna m be tara la baluuriŋ, jiki te n na kuwo to?

¹² Fo nte semboo be le ko beroo la kuliyaa be ñaameŋ baŋ? Fo nte balajaatoo dadaata niŋ jaawaloo le la baŋ?

¹³ Tooñaa-tooñaa, nte te m faŋ maakoyi noo la, aduŋ deemaaroo semboo, wo bee bota m bulu le.

¹⁴ Moo meŋ be niitooroo kono ka suula a teerimaalu la ŋaniya kendoolu le la. Niŋ wo nte, Alla Tallaa silaŋñaa semboo bee si baŋ a bala.

¹⁵ Bari alitolu, mennu mu n kafuñoolu ti, ali maŋ ke jiki moo ti. Ali la kuwo ye m moonee le komeŋ jiiboroo, jaa naata, a bee suusuuta.

¹⁶ Waati sotota, a be faariŋ niŋ jiyo la.

¹⁷ Jaa waatoo kono, a bee naata suusuu. Niŋ kandoo waatoo naata, a bee ka yeemaŋ ne ka bo a taradulaalu to.

¹⁸ Juloolu mennu ka sele ñonkomoolu kaŋ, ka fili a maafaŋolu to la le. Ì ye muruŋ-muruŋ keñewuloo* kono, fo mindoo ye ì faa.

¹⁹ Tema juloolu ye jii sotodulaalu ñini, Seba taamalaalu ye jiki.

²⁰ Ì niŋ jiki baa le ka a waliŋ, bari niŋ ì futata jee, ì si jaakali, ì ye jikilateyi.

²¹ Alitolu keta nte ye le komeŋ wo jii sotodulaalu be ñaameŋ. Ali ye n na bataadaa je, ali pisaalita.

²² Fo n nene ka a fo ali ye le baŋ, ali ye n so feŋ na, waraŋ ka n duku feŋ na, ka bo ali la fankoolu to,

²³ waraŋ ka m bondi n jawoo bulu, waraŋ ka n kumakaa fitinamoo bulu?

²⁴ Saayiŋ ali n karandi, m be n deyi la le. Ali ye m fahaamundi, m boyita ñaameŋ.

²⁵ Tooñaa kumoo ka dimi le, bari alitolu la kumakaŋolu ye muŋ ne yitandi?

²⁶ Alitolu ye a miira, ali si nte tilindi noo niŋ ali neŋolu la baŋ? Ali ye nte, moo bataariŋo, la kumoo ke ko foño kenseŋo.

²⁷ Alitolu be alikuuroo* le faŋo ke la aliyatiimoolu la. Ali ye ñoo fuufuu ali teeriñolu la.

²⁸ Saayiŋ, ali ke moo kendoo ti baŋ, ali ye n juubee naŋ. Nte te faniyaa fo la ali ñaatiliŋo la.

²⁹ Ali a daŋ wo la, ali kana kasoo fo. Ali i miira, nte be tooñaa le kaŋ hani saayiŋ.

³⁰ Fo n neŋo ka kuma jenkeriŋ ne fo baŋ? Fo nte te tooñaa niŋ faniyaa bo noo la ñoo to baŋ?