Yuuba 35 - Mandinka Bible

Elihu la diyaamu sabanjaŋo

¹ Elihu tententa diyaamoo la, a ko Yuuba ye ko:

² Fo ite ye ñiŋ miira tiliŋo le ti baŋ, ka a fo ko, ite tilinta Alla ñaa koto le?

³ I ye naa Alla ñininkaa ka a fo a ye ko, junube kebaliyaa, wo ye muŋ nafaa le soto?

⁴ Nte be i jaabi la, aniŋ i teeroolu mennu be i fee.

⁵ Saŋo santo juubee, i ye jeroo ke, minaayoolu juubee mennu be i kunto.

⁶ Niŋ i ye junube kuwo ke, wo be Alla toora la muŋ ne la? Niŋ i la junuboo siyaata, wo be muŋ ne ke la a la?

⁷ Niŋ i mu moo tilindiŋo ti, fo i ye feŋ ne dii Alla la baŋ? A ka muŋ feŋ ne soto i bulu?

⁸ I la kuruŋyaa kuwo ye i ñoŋolu doroŋ ne toora. I ye kuu kendoo meŋ ke, wo ye hadamadiŋolu doroŋ ne maakoyi.

⁹ Niŋ hadamadiŋo dunta mantooroo kono, a ka woosii le. A ka woosii maakoyiroo le la, sembetiyolu ye bataa kuwo meŋ laa a kaŋ.

¹⁰ Bari a hakiloo buka muru Alla kaŋ, ka a fo ko, “N Daamansoo lee, meŋ ka jikoo dii bataa waatoo kono,

¹¹ meŋ ye ntolu so londoo la ka tambi wulakono daafeŋolu la, meŋ ye ñaameŋo dii ǹ na ka tambi kunoolu la?”

¹² Bituŋ a si naa maakoyiri ñini Alla bulu, bari Alla te a danku la, kaatu faŋ wara moo le mu, aniŋ kuruŋo.

¹³ Tooñaa-tooñaa, Alla Tallaa te i danku la a la woosii kuma kenseŋo la, a te i lamoyi la a la.

¹⁴ Yuuba, i ko, i ñaa te Alla je noo la, bari sabari doroŋ, i ye i lamoyi, i la kuwo be laariŋ a ñaatiliŋo la le.

¹⁵ Kaatu Alla la kamfaa maŋ jii i kaŋ ka i jarabi, aduŋ a maŋ tara looriŋ i la kuruŋyaa kuu nooma,

¹⁶ ite ka naa i daa yele ka kuma kenseŋolu fo, i maŋ londi soto mennu to.