Yuuba 34 - Mandinka Bible

Elihu la diyaamu fulanjaŋo

¹ Bituŋ Elihu tententa diyaamoo la, a ko:

² Baawo alitolu le mu moo ñaamendiŋolu ti, ali n na kumakaŋolu moyi, alitolu mennu ye kuwolu loŋ, ali ali tuloo loo.

³ Tuloo ka kumoo moyi le, ko neŋo ka domoroo nene ñaameŋ.

⁴ Ali ŋà tooñaa juubee, ali ŋà a karaŋ m̀ faŋ fee meŋ beteyaata.

⁵ Yuuba ye ñiŋ ne yitandi ko, ate maŋ sootaari soto, Alla le balanta ka a la kuwo tooñaayandi.

⁶ A ko, Alla ye ate muta faniyaa folaa le ti, a be tooñaa kaŋ ñaa-wo-ñaa. Barama jaarabaloo keta a bala, a maŋ feŋ ke ñaa-wo-ñaa.

⁷ Fo Yuuba ñoŋ ne be keriŋ baŋ, moo meŋ ka ñaawaliroo ke ko niŋ a be jiyo miŋ na?

⁸ A niŋ moo kuruŋolu le ka taa, a ka maa le ko moo jawoo.

⁹ A ko a faŋ ma ko, a maŋ nafaa soto hadamadiŋo ye, ka diyaa ñini a niŋ Alla teema.

¹⁰ Wo to, alitolu hakilimaalu, ali i lamoyi m ma. Alla Tallaa nene te kuu jawoo ke la, ka kuu ke meŋ maŋ ke tiliŋo kono.

¹¹ Hanii, a ka hadamadiŋo joo a la baaroo le la, a ka ì joo niŋ ì faŋolu la maañaa le la.

¹² Tooñaa-tooñaa, Alla Tallaa buka tilimbaliyaa kuu ke, aduŋ a buka tooñaa nakari.

¹³ Jumaa le ye a marandi duniyaa la, aniŋ jumaa le ye duniyaa muumewo bee duŋ a bulu?

¹⁴ Niŋ Alla lafita, a si a la niyo taa,

¹⁵ moo bee ye kasaara ñoo la, aduŋ ì si naa seyi ka ke bankumunkoo ti.

¹⁶ Yuuba, niŋ i mu hakilimaa ti, i lamoyi ñiŋ na, i tuloo loo m be meŋ fo la.

¹⁷ Meŋ maŋ lafi tiliŋo la, wo si maraloo ke noo baŋ? Fo i lafita Alla le tuumi la baŋ, Mansoo meŋ be warariŋ, a tilinta?

¹⁸ Fo ate le buka a yitandi mansoolu la ko, ì maŋ ke feŋ ti, a ye maralilaalu la kuruŋyaa yitandi ì la?

¹⁹ A buka maralilaa faasaa, aduŋ a buka fankamaa la kuu selendi fuwaare kaŋ, kaatu ate le ye ì bee daa.

²⁰ Ì si faa noo le kataba kiliŋ. Suutoo teema, maasiiboo si boyi noo moolu kaŋ ne, ì ye kasaara. Alla si sembetiyolu yeemandi noo le, hadamadiŋ bulu maŋ maabee jee.

²¹ Alla ka hadamadiŋo la taaraŋ siloolu koroosi le, a ye simfaa-wo-simfaa taa, Alla ñaa ka tara a la le.

²² Wo dibi te keriŋ, meŋ si junubelaa maabo noo Alla ma.

²³ A maŋ jari Alla ye ka waati londi ka hadamadiŋo kiitindi.

²⁴ Ate le ka sembetii baalu la semboo janjaŋ, a maŋ hani ì la kuwo kisikisi. A ye naa doolu seyindi ì noolu to.

²⁵ A be londiŋ ì la baaroolu la le, a ye ì la kuwo jindi suuto kiliŋ, ì kasaarata.

²⁶ A ye ì jarabi ì la kuu jawu baaroolu le kaŋ moolu bee ñaa la.

²⁷ Kaatu ì muritita Alla ma le, ì maŋ a la siloolu muta feŋ ti.

²⁸ Ì ye fuwaaroolu kumbondi a ñaatiliŋo la, fo a ye moo toorariŋolu woosii kaŋo moyi.

²⁹ Niŋ Alla maŋ kuu ke a noo to, jumaa le be a tuumi noo la a la? Niŋ a ye a faŋ maabo, jumaa le be a je noo la, fo moo kuŋ kiliŋ, waraŋ fo jamaa?

³⁰ Bari hani wo bee, a buka moo kuruŋo bula a ye tenteŋ maraloo la, waraŋ ka feere kuruŋo siti moolu kamma.

³¹ Moo si a fo noo Alla ye le ko, “Ŋa n na jaraboo dunoo taa le, n te kuu jawoo ke la kotenke.

³² N karandi kuu la, m maŋ meŋ je noo, niŋ ŋa kuu kuruŋo le ke, wo to n te a ke la kotenke.”

³³ Bayiri ite Yuuba maŋ soŋ Alla la keroo la, i ye a miira, Alla be a ke la wo moo la le baŋ, ko ite lafita a la ñaameŋ? Ite le ñanta kuwo juubee la i faŋ fee, nte te. I ye meŋ loŋ, wo fo.

³⁴ Moo ñaamendiŋolu be soŋ na m ma le, hakilimaa-wo-hakilimaa niŋ a ye i lamoyi n na, a be a fo la le ko,

³⁵ “Yuuba ye diyaamoo meŋ fo, a maŋ londi soto a to. A fokumoolu maŋ kese.”

³⁶ M be lafi la, Yuuba la kuwo ye kisikisi kendeke, a ye jaabiriñaa meŋ ke ko moo kuruŋo.

³⁷ A ye badaloo le lafaa a la junube kuwo kaŋ. A loota kenebaa to m̀ bee ñaa la le, ka kuma jawoo fo laalaa Alla ma.