Yuuba 31 - Mandinka Bible

¹ Ŋa ñiŋ laahidoo taa n ñaa la karoo la le ko, n te sunkutu juubee la ka hame a la.

² Wo to muŋ ne be ke la nte niyo ti Alla Tallaa bulu, aniŋ n na keetaafeŋo?

³ Fo kasaara kuwo buka laa moo jawoo le kaŋ baŋ, maasiiba kuwo ye laa moo kaŋ meŋ ka kuu kuruŋo ke?

⁴ Fo Alla maŋ tara n taaraŋ siloolu je kaŋ baŋ, n na simfaa-wo-simfaa, a be londiŋ a bee ma le?

⁵ Fo n nene ka taama niŋ sila jenkeriŋo le la baŋ? Fo n siŋo nene ka neeneeri sila le taa baŋ?

⁶ Wo to Alla ye n na kuwo peesa tiliŋo peesarilaŋo kaŋ, a be a loŋ na le ko, n tilinta le.

⁷ Niŋ a ye a tara n jenketa le ka bo sila tilindiŋo kaŋ, n ñaa la jeroo ye n sondomoo filindi, waraŋ m buloolu le maŋ seneyaa,

⁸ wo to Allamaa moo koteŋ ye n na fiifeŋolu domo, m faŋo ye mennu fii, n na fiifeŋolu ye kasaara.

⁹ Niŋ a ye a tara n nene ka hame n siiñoo la musoo la, ka a batu, ka dende a ye a la bundaa kooma,

¹⁰ wo to Allamaa n na musoo ye tabiroo ke kee koteŋ ye, a niŋ kewolu ye kafu laaraŋo la.

¹¹ Niŋ a ye a tara ŋa ñiŋ ne ke, wo le ñanta ke la malu kuu jawoo ti, meŋ jarita ka samba luwaa ñaatiliŋo la.

¹² A si ke n ye komeŋ dimbaa, a ye n domo fo ŋa kasaara, a ye n na siimaŋ feŋolu bee jani fo ì ye baŋ fereŋ.

¹³ Niŋ m balanta ka tooñaa londi n niŋ n na jommusoolu waraŋ jonkewolu teema, niŋ ì ye tooñaa yitandi n na,

¹⁴ wo to nte be muŋ ne ke la, niŋ Alla ye n kiitindi? Niŋ a ye a kuwo kisikisi, m be muŋ ne fo la?

¹⁵ Fo ate Alla meŋ ye n daa m baamaa wuluuñaŋo kono, ate le maŋ itolu fanaa daa baŋ? Fo ate le maŋ m̀ bee daa daariñaa kiliŋo la m̀ baamaañolu kono?

¹⁶ N nene maŋ fuwaaroolu bali feŋ na, ì suulata meŋ na m bulu. N nene maŋ furuyaamusoolu jikilateyindi.

¹⁷ N dammaa nene maŋ n na domoroo domo, n niŋ aliyatiimoolu le ka a talaa.

¹⁸ Kabiriŋ n na fondinkeeyaa waatoo la, n keta aliyatiimoolu ye le komeŋ diŋo niŋ a faa, aduŋ n ka tara n hakilituriŋ furuyaamusoolu la kuwo to le.

¹⁹ Niŋ ŋa fuwaaroo je, feetoofata te meŋ bala, aduŋ a maŋ muurilaŋ soto,

²⁰ n ka n na daarifaanoo le dii a la, meŋ dadaata m fansuŋ saajiyolu tiyo la, aduŋ a ka duwaa n ye niŋ a ŋaniyoo bee le la.

²¹ Niŋ n nene ka aliyatiimoo toorandi, kaatu ŋa a loŋ ko boloo be dii la nte le la,

²² wo to m buloo ye kati n nonkonkuŋo to, n daboo ye farasi n dabakunkuŋo bala.

²³ Bari n nene maŋ ñiŋ kuu siifaalu doodoo ke, kaatu n silata Alla la jarabiroo le la, aduŋ m maŋ haañi a la sembe waroo la.

²⁴ N nene maŋ sani ke m faŋ ye tankaraŋ ti, waraŋ ka saniforoo ke jikiraŋ ti.

²⁵ N na fankoo nene maŋ n duŋ kufaŋ kuu kono, waraŋ ka kufaŋ n na dookuwo la ñaatotaa la.

²⁶ Niŋ ŋa tiloo je mala kaŋ, aniŋ ŋa karoo je diyaariŋ tal,

²⁷ fulaŋ kafuyaa kuu nene maŋ duŋ n sondomoo kono ka ì batu, waraŋ ka sujudi ì ye.

²⁸ Niŋ ŋa ñiŋ junube kuu siifaa ke, wo fanaa jarita le ka samba luwaa ñaatiliŋo la, kaatu m fisiriwalleeyaata Alla ma le.

²⁹ N nene maŋ seewoo n jawoo la kooroo kuwo la, n nene maŋ kontaani, niŋ ŋa maasiiba kuwo je laariŋ a kaŋ.

³⁰ Ŋa n neŋo mara le fo n kana junube kuwo ke, ka n jawoo danka saayaa la.

³¹ N na moolu si a seedeyaa noo le ko, moo maŋ soto ì kono, meŋ buka nte la domoroo domo a faŋo sawoo la.

³² Luntaŋ nene maŋ suutoo laa banta, n ka daa yele taamalaalu ye le.

³³ M maŋ n na junube kuu maabo, ko hadamadiŋolu dalita a la ñaameŋ, sako n si n na boyoo maabo kulloo kono.

³⁴ N nene maŋ sila hadamadiŋo fokumoo la, sako a la jutoo n na, ka tara bitiriŋ buŋo kono ka tu deyiriŋ.

³⁵ Jumaa le be ke la n lamoyilaa ti? N na siiñaroo fele! M batu, Alla Tallaa ye n jaabi. M be lafi la ñiŋ ne la, n tuumilaa ye n na sootaaroolu yitandi n na, ì safeeriŋo.

³⁶ N si ì laa n sañoo kaŋ n taamaayaariŋo, ŋa ì duŋ ko mansanaafoo.

³⁷ M mansamaa si Alla waliŋ noo le, ŋa n kekuwolu bee seyinkaŋ a ye.

³⁸ Hani n na senekunkoo nene maŋ kumboo n too jawu ma, sako a baliŋolu si woosii.

³⁹ M buka a munafaŋo domo, fo niŋ ŋa a la kuwo topatoo foloo, aduŋ n nene maŋ jikilateyi kuu ke a dookuulaalu la.

⁴⁰ Niŋ a ye a tara n ka ñiŋ ne ke, wo to ŋaniŋolu ye faliŋ a kono, wiiti* siimaŋ kana faliŋ jee, aniŋ ñaama kenseŋo doroŋ ye faliŋ jee, baali* siimaŋ kana faliŋ a kono. Yuuba la kumakaŋo danta jaŋ ne.