Yuuba 20 - Mandinka Bible

Sofari la diyaamu fulanjaŋo

¹ Bituŋ Sofari Naamankoo ye jaabiroo ke ko:

² Miiroolu mennu be n kono, wo le ye m forisee ka jaabiroo ke waati kiliŋ, kaatu n niyo toorata baake le.

³ Ŋa nendiri kumakaŋo moyi le, meŋ ye horomoo bondi n kaŋ, bari n na fahaamuroo keñaa, wo le ye a tinna ŋa jaabiroo ke.

⁴ Fo i maŋ ñiŋ loŋ baŋ kabiriŋ folooto, kabiriŋ hadamadiŋolu naa waatoo ñiŋ duniyaa kono jaŋ ko,

⁵ moo kuruŋolu la kontaanoo loo buka jamfa, aniŋ Alla sookilaalu la seewoo ka ke waati kuntundiŋ doroŋ ne ti?

⁶ Hani niŋ ì la kuwo seleta le fo saŋ fatoolu to, ì kuŋo ye minaayoo soo,

⁷ ì si halaki fo fawu ko ì faŋolu la kenetotaa, meŋ nene ka ì je nuŋ, si ñininkaaroo ke, ì be daameŋ.

⁸ Ì si yeemaŋ ko siiboo, aduŋ ì te je la, ì ye ì bayi ko suuto finifinoo.

⁹ Ñaa meŋ nene ka ì je, wo te ì je la kotenke, sako ì si tara sabatiriŋ ì taradulaalu to kotenke.

¹⁰ Ì faŋo buloo le be ì la fankoo seyindi la, aduŋ ì diŋolu si sadaa daani fuwaaroolu nooma.

¹¹ Ì balajaatoolu mennu tarata kereyaariŋ, bee labaŋo be naa ke la bankoo le ti.

¹² Kuruŋyaa ka tara diyaariŋ ì ye le, komeŋ niŋ diimaa le be ì daa kono, ì ka a maabo ì neŋolu koto duuma.

¹³ Ì si a maabo jee fo waati jaŋ, ì te a fintindi la, ka a diyaa mendi ì faŋ fee.

¹⁴ Bari niŋ ñiŋ domori diimaa futata ì konoo kono, a si yelema feŋ kuniyaariŋo ti, a ye ke ì kono ko saa kunoo.

¹⁵ Ì ye suuñaari feŋolu mennu domo, ì si ì bee foonoo naŋ kotenke. Alla faŋo le ka ñiŋ feŋolu bondi ì kono.

¹⁶ Ì ye meŋ domo, a ka ke ì ye kunoo le ti, a ka ì faa le komeŋ saa kuna jawutoo la kindiroo.

¹⁷ Ì te baluu la ka Alla la neemoo diyaa loŋ, liyo niŋ keekewo dalamaa, meŋ ka bori ko baajiyo.

¹⁸ Ì ye taroo bondi meŋ kunna, ì te a domo noo la. Ì te ì la safaaroo munafaŋo diyaa loŋ noo la,

¹⁹ kaatu itolu tarata fuwaaroolu le batandi kaŋ, aniŋ ka ì ñaa kaasi ì la. Ì ye buŋolu taa moolu bulu, ì maŋ mennu loo.

²⁰ Ì nene te wasa la muk, ì te ì la lafinna feŋ maabo noo la.

²¹ Ì la domotaa koolaa feŋ buka tu ì bulu, wo ye a saabu, ì la firiŋo te labaŋ noo la.

²² Hani niŋ ì ye feŋo bee le soto, ì niyo si tara kuyaariŋ. Niitooroo doroŋ ne be naa la ì kaŋ.

²³ Ka ì konoolu fandi noo a daŋo ma, Alla be a la kamfaa baa le jindi la naŋ ì kaŋ, a ye a sanji kesemaa jindi naŋ ì kaŋ, ka ke ì la domoroo ti.

²⁴ Ì ko, ì be bori la nee jooraŋo ma, jaawali kalabeñe daa melundiŋo taata ì soo.

²⁵ A dunta ì kono, a fintita niŋ ì kooma la, a kesoo ye ì kunaŋ-kunaŋ bootoolu teyi, kijafara baa naata ì kaŋ.

²⁶ Kasaaroo le be laariŋ ñaato ì la fankoolu kamma. Dimbaa meŋ moo buka a mala, wo le be itolu faŋolu domo la, aniŋ feŋ-wo-feŋ tuta ì yaa.

²⁷ Saŋ fatoolu si ì la kuruŋyaa waañaari, bankoo ye ì la kuwo tooñaa yitandi.

²⁸ Ì la bunkono feŋolu bee si kasaara, ka ì wafu naŋ Alla la kamfaa luŋo la.

²⁹ Alla ka moo kuruŋolu la joo ke ñiŋ ne ti, Alla ka ñiŋ ne laa ì kaŋ.