Yunusa 2 - Mandinka Bible

Yunusa la duwaa

¹ Kabiriŋ Yunusa be ñewo kono, a ye Yaawe* daani, a la Alla.

² A ko: “N na bataa kaŋ ŋa ite Yaawe kumandi le, aduŋ i ye n danku le. Ka bo kaburu dinkoolu to, ŋa i la maakoyiroo daani, aduŋ i ye n kalamuta le.

³ I ye m fayi diinoŋo le to, ka taa fo baa duumoo to, daameŋ jiyo be m baloo karoo bee la, aduŋ i la baa baliŋo semboo bee ka naa n kaŋ ne.

⁴ Ŋa a miira le nuŋ ko, n yeemanta i la karoo la le. Bari hani wo, m be i la buŋ senuŋo je la le kotenke.

⁵ Jiyo naata n kaŋ, aduŋ a maranta, diinoŋo ye m muru karoo bee la. Baato ñaamoo ye n kuŋo bee muura.

⁶ N taata fo baa duumoo to, n dunta banku le to, meŋ bundaalu ka tu sorondiŋ fo abadaa. Bari ite, hee Yaawe m Maariyo i ye m bondi naŋ ñiŋ diinoŋo to le, m baluuta.

⁷ Kabiriŋ ŋa a loŋ ko, n na duniyaa ka naa baŋ ne, n hakiloo bulata i la ŋa i daani, aduŋ n na duwaa futata i ma le, i la buŋ senuŋo kono.

⁸ Moolu mennu ka jalaŋ nafantaŋolu batu, wolu ye ì koo dii hiinoo la le, meŋ ñanta ke la ì taa ti.

⁹ Bari m be sadaa* bo la i ye le, ŋa i jayiraŋ suukuwo laa, aduŋ ŋa n kali meŋ na, m be wo ke la le. Kiisoo bota naŋ Yaawe le yaa.”

¹⁰ Bituŋ Yaawe ye ñewo yaamari, aduŋ a ye Yunusa foonoo naŋ banku jaaroo kaŋ.